වයඹ මුහුදුකරේ හෝටල් රජා Anantaya Resort and Spa

බංගදෙණිය මෑතකාලීනව සංචාරක කර්මාන්තය තුළ ජනප්‍රියත්වයට පත්වුණු ප්‍රදේශයක්. ඊට හේතුව තමයි ලාෆ්ස් සමූහය විසින් මීට වසර හතරකට පෙර ඉදිකළ ‘Anantaya Resort and Spa’ හෝටලය.

තමන්ගේ සිව්වැනි සංවත්සරය සමරමින් හෝටලයට අලුතින් සුඛෝපභෝගී වෝටර් විලා හතරක් එකතු කිරීමටත් හෝටලය පියවර ගෙන තිබුණා. වර්තමානය වනවිට වයඹ දිග මුහුදු තීරයේ පිහිටා තිබෙන දැවැන්තම හෝටලය වන්නේත් මෙයයි. 

ඉන්දියන් සාගරය දෙසට මුහුණ ලා පිහිටා තිබෙන මේ දැකුම්කළු හෝටලයේ මුළු කාමර සංඛ්‍යාව 91ක්. ඒවා වෝටර් විලා, සුපීරියර් කාමර, ඩිලක්ස් කාමර, ප්‍රීමියම් කාමර සහ suites ආදි විවිධ වර්ගවලින් ඉදිරිපත් කෙරෙනවා. මේ සියලු කාමරවල පෞද්ගලික බැල්කනියක්, තේ සහ කෝපි සෑදීමේ පහසුකම්, කේබල් ටීවී, වායුසමන යන්ත්‍ර, නවීන පන්නයේ නාන කාමර ඇතුළු සෑම පහසුකමක්ම පවතිනවා.

මෙහි කාමර සැපයීමේ තිබෙන තවත් විශේෂත්වයක් තමයි එකට ඈඳා නිර්මාණය කරන ලද පවුලේ කාමර. ඒ වගේම සෑම කාමරයක්ම නිර්මාණය කර තිබෙන්නේ විශේෂ අවශ්‍යතා ඇති අයටත් කිසිදු අපහසුවකින් තොරව නිදහසේ කටයුතු කිරීමේ අවකාශය උදාකරමිනුයි. හෝටලය සතුව අලංකාර පිහිනුම් තටාක දෙකකුත් පවතිනවා. 

අනන්තය හෝටලයේ ආහාර අත්දැකීමත් ඉතාම සුවිශේෂීයි. මෙහි අවන්හල් හතරක්ම පවතිනවා. The Ocean ලෙස නම් කර තිබෙන ප්‍රධාන අවන්හලේදී සියලුම ප්‍රධාන ආහාරවේල් රස විඳින්න පුළුවන්. ඊට අමතරව River, Lounge Bar සහ Mangrove Beach Bar නමින් තවත් අවන්හල් තුනක් පවතිනවා. මේ නිසාම එකිනෙකට වෙනස් ආහාර රස බොහෝමයක් අනන්තයේදී අත්විඳින්න හැකිවෙනවා.

පාරිභෝගිකයන් කෙරෙහිම නැඹුරු වුණු හෝටලයේ සුහදශීලී පිළිවෙත හොඳින්ම දිස්වෙන අවස්ථාවක් විදිහට වයින් රස බැලීම හඳුන්වන්න පුළුවන්. එනම් තමාටම හෝටලයේ වයින් ගබඩාවට ගොස් කැමැති වයින් වර්ගයක් තෝරාගැනීමේ අවස්ථාව සංචාරකයන්ට හිමිවෙනවා. 

ආයතනික අවශ්‍යතාවයන් සැළකිල්ලට ගනිමින් 200 දෙනකුට අසුන් පැනවිය හැකි සම්මන්ත්‍රණ ශාලාවකුත් ඊට අමතරව 50ත් 100ත් අතර ප්‍රමාණයකට ගැලපෙන කුඩා සම්මන්ත්‍රණ ශාලාවකුත් හෝටලයේ අන්තර්ගත වෙනවා. ඒ වගේම ශාරීරික සහ මානසික සුවතාව වෙනුවෙන් සම්බාහන ප්‍රතිකාරත් මෙහි දකින්න පුළුවන්. 

අනන්තය රෙසෝට් හෝටලයේ සිට සංස්කෘතික ත්‍රිකෝණයට, ආනවිලුන්දාව කුරුළු අභය භූමියට වගේම විල්පත්තුව, කල්පිටිය, මුතුරාජවෙල, දැදුරු ඔය වැනි තැන් බොහෝමයකට පහසුවෙන් ළඟාවිය හැකියි. 

 සනත් වීරසූරිය