අපරාධකරුවෝ රැසක් කොටුවෙති!

ග්‍රහලොව රජු වන රවි තමාගේම රාශි භවන වූ සිංහ රාශියට 2018 අගෝස්තු මස 17 වැනි කිවි දින උදේ 6.50ට පිවිසෙන අතර කේතුට අයත් මා නැකතේ සහ කිවිට අයත් පුවපල් නැකතේ සම්පූර්ණයෙන්ද, තමාට අයත් උත්‍රපල් නැකතේ ප්‍රථම පාදයෙන්ද 2018 සැප්තැම්බර් 17 වැනි සඳු දින උදේ 6.47 දක්වාම ගමනේ යෙදෙනවා ඇත.

අප රට කෙරෙහි අවධානය යොමු කිරීමේදී කර්මාන්ත ව්‍යාපාර ක්ෂේත්‍රයේ දියුණුවක්ද කෘෂිකාර්මික කටයුතුවල සංවර්ධනයක්ද ඇතිවීම මෙන්ම නව යන්ත්‍ර සූත්‍ර විදේශීය රටවලින් ලබාගැනීමක්ද සිදුවන වකවානුවක් වේ. විදේශීය සම්බන්ධකම්ද දැඩිවන අතර යම් ප්‍රධානියකු විසින් ව්‍යාජ ලෙසින් සකස් කරන ලද ලිපි ලේඛන පිළිබඳ අනාවරණයක්ද සිදුවන්නාවූ වකවානුවකි. මෙරටින් වටිනා දේ විදේශීය රටකට රැගෙන යාමටද විදේශීය රටවලින් නීති විරෝධී දේ මෙරටට රැගෙන ඒමක්ද මේ කාලය තුළ වාර්තා වේ.

යම් යම් අපරාධ ක්‍රියාවල නිරත අපරාධකරුවන් නීතියේ රැහැනට හසුකරගත හැකිවීමෙන් ආරක්ෂක අංශ නිලධාරීන්ගේ වික්‍රමයන් පෙන්වන්නාවූත් කාලයකි.

විදේශීය වශයෙන් විමසා බැලීමේදී විනෝදාගාර, අධ්‍යාපනික ස්ථාන හා පාසල් ආශ්‍රිතව අශුභ සිදුවීම් ඇතිවන අතර ප්‍රසිද්ධ කලාකරුවකුට මාරකද උද්ගත වනු ඇත. පාර්ලිමේන්තුවකට හදිසි විපතක් හෝ ත්‍රස්ත ප්‍රහාරයක් ඇතිවීමක්ද සිදුවන්නාවූත් කාල වකවානුවක් ද වෙයි.

මීළඟට ඔබට

මේෂ - දේශපාලනයට හොඳයි

යම් යම් කටයුතුවල ප්‍රමාද ගතියක් ඇතිවන අතර දේශපාලනයේ නිරතවී සිටින අයට යහපත් ඵල අත්වනු ඇත. ඉතිරිකර ගැනීමට බාධා ඇතිවේ.

වෘෂභ - අලුතින් ඉඩමක්

භූමිය ආශ්‍රිතව තිබූ ප්‍රශ්න විසඳෙන අතර නව ඉඩමක් මිලදී ගැනීමටද යහපත් වන වකවානුවකි. රැකියාවක් බලාපොරොත්තුවෙන් සිටියේ නම් එම බලාපොරොත්තු ඉෂ්ඨ වනු ඇත.

මිථුන - ගමනට හොඳ නෑ

සිතේ සහනය අඩුවන අතර ලේඛන කටයුතුවල නිරත අයට ශුභ ඵල ද අත්වනු ඇත. යම් යම් වැඩවල ප්‍රමාද ගති ඇතිවන අතර ගමන්වලින් පීඩාවන්ද ගෙන දෙනු ඇත.

කටක - ශරීර පීඩා

තමාගේ උත්සාහයේ තරමට ලබාගත හැකි ඵලය අඩුවන්නාවූත් කාලයක් වන අතර ඉතිරිකර ගැනීමටද බාධා ඇතිවනු ඇත. ගමන්වලින්ද හදිසි ශරීර පීඩා ඇතිවනු ඇත.

සිංහ - කැපී පෙනේ

ඔබට යහපත් ඵල අත්වන අතර ඔබගේ කටයුතු සාර්ථක බවට පත්වේ. අන් අය අතර කැපීපෙනෙන තත්ත්වයට පත්වනු ඇත.

කන්‍යා - ආර්ථික ගැටලු

ඔබට එතරම් යහපත් නොවන අතර ඔබගේ කටයුතුවලට යම් යම් බාධා ඇතිවේ. ආර්ථික අපහසුතාද ඇතිවන අතර ගමන්වලින් හදිසි ශරීර පීඩාද ගෙන දෙනු ඇත.

තුලා - ධනය වර්ධනය වේ

දේශපාලන කටයුතුවල නිරත අයට ශුභ ඵල අත්වන අතර අන් අයගේ සහයෝගය ඔබට ලැබෙනු ඇත. දිනපතා තම ධනයද වර්ධනය වන්නාවූ වකවානුවක් වේ.

වෘශ්චික - රැකියා උසස්වීම්

ඔබට යහපත්ය. කටයුතු සාර්ථක වන අතර විශේෂයෙන් නව රැකියාවක් බලාපොරොත්තු වූයේ නම් එය ඉටුවේ. රැකියාවේ උසස්වීම්ද ලබාගත හැකි කාලයක් වේ.

ධනු - ලේඛනයට හොඳයි

ඔබගේ කටයුතුද සාර්ථක වන අතර ලේඛනයේ නිරත අයට ශුභ ඵල අත්වේ. දේශපාලන කටයුතුවල නිරත අයටද යහපත්ය.

මකර - විවිධ බාධා

ඔබට එතරම් යහපත් නොවනු ඇත. ඔබගේ කටයුතුවලට විවිධ බාධා ඇතිවන අතර ගමන්වලින්ද හදිසි ශරීර පීඩා ඇතිවනු ඇත.

කුම්භ - කැපී පෙනේ

ඔබගේ කටයුතු සාර්ථක වේ. අන් අය අතර කැපීපෙනෙන තත්ත්වයට පත්වනු ඇත. සිතේ සහනය අඩුවනු ඇත. අලුතින් යම්කිසි කාර්යයක් ආරම්භ කිරීමට ශුභ කාලයක් වේ.

මීන - තම කටයුතුවලට නරකයි

ඔබට යහපත් නොවන කාලයක් වේ. ගමන්වලින්ද හදිසි ශරීර පීඩා ඇතිවිය හැකි බැවින් ප්‍රවේසම් වන්න. තමන්ගේ කටයුතුවලට විවිධ බාධා ඇතිවන්නාවූ කාලයක් වේ.

ජ්‍යොතිෂ නන්දන
ප්‍රවීණ ජ්‍යොතිෂවේදි ජ්‍යොතිෂාචාර්ය
රේණුක වික්‍රමසිංහ
සුවණැන ජ්‍යොතිෂ පර්යේෂණායතනය
ඔලබොඩුව, ගෝනපල