වීරවිල කුරුලු රජදහනේ සුපිරි කූඩාරම් ලොජ් එක

අලින්ගේ වාසභූමියක් ලෙස මෑතකදී ප්‍රකාශයට පත්වුණු වීරවිල කියන්නේ දකුණු ලකේ ගොඩක් සංචාරක ස්ථානවලින් මැදි වුණු ප්‍රදේශයක්. වීරවිල ලොකු සංචාරක ආකර්ෂණයක් තියෙන තැනක් නොවුණත් වීරවිල ජලාශයත් ඒ ආශ්‍රිතව ජීවත් වන විවිධ කුරුලු වර්ගත් නිසා ඒ අවට ප්‍රදේශය සංචාරකයන්ට කදිම වටපිටාවක් නිර්මාණය වෙලා තිබෙනවා. 

කොහොම නමුත් හම්බන්තොට සංචාරක කර්මාන්තයේ දියුණුවත් සමඟ වීරවිලටත් සංචාරකයන්ගේ අවධානය යොමුවෙලා. ඉතින් වීරවිල වැව් ඉස්මත්තේ දර්ශනීය භූමි භාගයක පිහිටා ඇති ‘Flame back Eco Lodge’ හෝටලයත් වීරවිලට සංචාරකයන් කැඳවාගැනීමට ලොකු දායකත්වයක් සපයන තැනක්. 

පහුගිය මාර්තු මාසයේදී විවෘත කෙරුණු මේ සුඛෝපභෝගී එකෝ ලොජ් එක සම්ප්‍රදායික සංචාරක සේවාවනුත් ශ්‍රී ලාංකික ආගන්තු සත්කාරයේ උණුසුමත් හොඳින් ලබාගත හැකි හෝටලයක් කිව්වොත් නිවැරදියි. මෙය ඇත්තෙන්ම කූඩාරම් සංකල්පය සුඛෝපභෝගීත්වයක් එක්ක මුසු කරලා අලුත්ම සේවාවක්, සත්කාරයක් පිරිනමන තැනක්. 
Flame backs හෙවත් golden backs යනුවෙන් හඳුන්වන්නේ විශාල ප්‍රමාණයේ කොට්ටෝරැවන් විශේෂයකුයි. එම පක්ෂීන් මෙම ප්‍රදේශයේ බහුලව දකින්න ලැබෙන නිසා තමයි හෝටලයට ඒ නම යොදාගෙන තියෙන්නෙ. කොහොමටත් වීරවිල වැව අවට පක්ෂීන් දහස් ගාණක් ලැගුම් අරගෙන ඉන්න නිසා ‘Flame back Eco Lodge’ කියන්නේ කුරුලු පාරාදීසයක්. 

හෝටලය සතුව ස්ථීර කූඩාරම් නිවාස හතක් තිබෙනවා. ඉන් හයක් ඩිලක්ස් පන්නයේ කාමර වෙද්දී අනෙක සුඛෝපභෝගී හනිමූන් ස්යූට් එකක්. ළඟදීම පවුලේ කාමර ලෙස පිළිගැන්වෙන විශාල ප්‍රමාණයේ කූඩාරම් නිවාස දෙකකුත් මෙතැනට එක්වන්න නියමිතයි. ඩිලක්ස් කාමරයක් දෙදෙනකු වෙනුවෙන් පිළියෙල කර තිබෙනවා. ඒවායේ කින්ග් සයිස් නිදන ඇඳක්, අංග සම්පූර්ණ නාන කාමරයක් වගේ උසස් මට්ටමේ පහසුකම් පවතිනවා. ඇත්තටම‍ තරු පහේ සුඛෝපභෝගීත්වය වැව් ඉස්මත්තකට ගෙනා හා සමාන අත්දැකීමක් බව නිසැකයි.

මේ කූඩාරම් නිවාස තනා තිබෙන්නේ දකුණු අප්‍රිකාවේ සිට ගෙන්වූ විශේෂ කැන්වසයකින්. ලොව පුරා හොඳ මට්ටමේ සෆාරි කූඩාරම් භූමි බොහෝමයකට යොදාගන්නේ මෙවැනි උසස් මට්ටමේ කැන්වස්. 

මේ සෑම කූඩාරම් නිවසකටම සුන්දර දර්ශනය තලයක් හිමිවෙනවා. ඒ නිසාම ස්වභාවධර්මයට විවර වුණු සොඳුරු විරාමයක් ලබන්න මෙතැන හොඳින් ගැලපෙනවා. මෙතැන පවතින තවත් සුන්දර අත්දැකීමක් තමයි වීරවිල වැව දිහාවට මුහුණලා ඉදිකර තිබෙන infinity පිහිනුම් තටාකය.

ආහාර පාන පිළියෙල කරන්නේ අවට ජනතාවගෙන් සපයා ගන්නා කාබනික එළවළු පළතුරු යොදාගනිමිනුයි. වැව දෙසට හැරුණු ප්‍රධාන අවන්හලේ 30 දෙනකුට අසුන් ගත හැකියි. එතැනදී ගමේ ආරේ කෑම බීම වගේම විදෙස් ආහාර රටාවල කෑම බීමත් රසවිඳිය හැකියි. විශේෂයෙන්ම ඉහළ සෞඛ්‍යාරක්ෂිත ක්‍රමවේද අනුගමනය කරමින් වවන ලද එළවළු, පලතුරු සහ ධාන්‍ය වර්ග මෙතැනදී නොම්මර එකේ තේරීමක් බවත් කිවයුතුමයි. ඊට අමතරව ‘Cook your Catch’ from the lake, farmer’s Lunch, Chena Lunch, Making Curd, Rod Fishing, Pottery sessions, Cooking demos and Palmyra Weaving වගේ ආහාර හා බැඳුණු විශේෂ අත්දැකීම් රැසකුත් මෙතැනදී ලබන්න පුළුවන්.  

♦ සනත් වීරසූරිය
   සේයාරූ - ශාන් බන්දු වීරසිංහ