ග්‍රහ යුද්ධවලින් රට අවුලට!
2018 දෙසැම්බර් මස 7 වැනි කිවි දින බිහිසුණු සිදුවීම් ඇති කරමින් අඟහරු ග්‍රහයාත් නැප්චූන් ග්‍රහයාත් යුධ සංග්‍රාමයක නිරත වනු ඇත. අඟහරු හා නැප්චූන් ග්‍රහයන් සෙනසුරුට අයත් කුම්භ රාශියෙහි ගමන් කරමින් සිටියදී එකම අංශකයක ග්‍රහයන් දෙදෙනාම එකිනෙකා අභිබවා යාමට උත්සාහ දරයි. මෙහිදී ග්‍රහයන් දෙදෙනාගේම අයහපත් වූ ග්‍රහ කිරණ පෘථිවිය කරා එල්ල වේ. මේ පිහිටීම නිසා ඉදිරි වකවානුව අප රටට මෙන්ම ලෝකයේ විවිධ රටවල්වලට ඉතා අයහපත් වූ සිදුවීම් ඇති කරන කාලයක් වනු ඇත.
අප රටෙහි අවධානය යොමු කිරීමේදී රට තුළ අපරාධ ක්‍රියාවල වර්ධනයක් ද රහසිගත කුමන්ත්‍රණ ක්‍රියාවන් ද මහජනයා රැස්වන ස්ථාන සේවා ස්ථාන ආශ්‍රිතව හදිසි විපත් ද ඇතිවනු ඇත. වැඩ වර්ජන ද වැඩි වේ. භූමියේ සෙලවීමක් හෝ හදිසි නාය යෑමක් ද වාර්තා වනු ඇත. පවුල් ආරවුල් මත සිදුවන ඝාතන ක්‍රියා ද වැඩිවන අතර බලාපොරොත්තු නොවූ ආකාරයේ භයානක විපත් ද පහරදීම් ඝාතනය කිරීම් ද සිදුවනු ඇත. වෛද්‍ය වෘත්තියට සම්බන්ධ ප්‍රධානියකුට මෙන්ම ව්‍යාපාරික ක්ෂේත්‍රයේ කීර්තිමත් පුද්ගලයකුගේ අභාවයක් වාර්තා වෙයි. රිය අනතුරුවල ඉහළ යාමක් සිදුවන අතර වෙනදාට වඩා හදිසි අනතුරැ වර්ධනය වේ. ජලය ආශ්‍රිතව සිදුවන අනතුරුවල වැඩිවීමක් ද පෙන්නුම් කෙරේ. ආගමික ගැටුම් සහගත තත්ත්වයක් ද හටගනී.
විදේශීය වශයෙන් රාජ්‍ය නායකයකුගේ අභාවයක් සිදුවන අතර සමාජශාලා නාට්‍ය ශාලා විනෝද ස්ථාන හා පාසල් ආශ්‍රිතව අයහපත් සිදුවීම් ඇතිවේ. පහරදීම් ඝාතනය කිරීම් ගිනි ගැනීම් ද වාර්තා වනු ඇත. රිට්ට මාපාංක 7ක භූ චලනයක් නිසා දේපල ජීවිත හානි වනු ඇත.
මීළඟට ඔබට...
මේෂ - සිත් අමනාපකම්
දේශපාලනයේ සහ සමාජ සේවා කටයුතුවල නිරත වී සිටින අයට අයහපත් ඵල අත්වනු ඇත. ලැබීම් මාර්ගවලට ද බාධා ගෙන දෙන අතර හිතමිතුරන් තමා සමඟ සිත් අමනාපකම් ඇති කරගනු ඇත.
වෘෂභ - රථවාහන අනතුරු
සේවා ස්ථානයන්හිදී අනෙකුත් සේවකයන්ගෙන් තමාට යම් පීඩාවක් ඇතිකරනු ඇත. රථවාහන ආශ්‍රිත හදිසි අනතුරැ ඇතිවිය හැකි බැවින් රිය ධාවනය කිරීමේදී පරිස්සම් වන්න. සිතේ ප්‍රශ්න වැඩි වන සිත් පීඩාවන් ඇතිවන වකවානුවකි.
මිථුන - සහෝදර මතබේද
ඔබට එතරම් අයහපත් නොවූවද තමා ගැන වැඩිපුර සිතා කටයුතු කිරීමට යාම නිසා හිතවතුන් තමා සමඟ සිත් අමනාපකම් ඇති කරගනු ඇත. සහෝදරයන් සමඟ මතභේද ඇතිවන බැවින් ඉවසීමෙන් කල්පනාවෙන් කටයුතු කරන්න.
කටක - ලේ විෂවීම්
මිතුරන්ගෙන් ඔබට ප්‍රශ්න ඇතිවන වකවානුවක් වේ. දේශපාලනික කටයුතුවල නිරත වී සිටින අයට ද ශුභ ඵල අත් නොවනු ඇත. තම තැන්පත් ධනය වියදම් කිරීමට සිදුවන කාලයක් වේ. ලේ දෝෂ, ලේ විෂ වීම් ඇතිවනු ඇත.
සිංහ - උදර පීඩා
පවුල් දිවියේ සමගිය දෙදරා යාමට හැකි බැවින් ඉවසීමෙන් කටයුතු කරන්න. ව්‍යාපාරික කටයුතුවල නිරත වී සිටින අයට ද ලාභ අත් නොවනු ඇත. සේවා ස්ථානයේ ද ගැටලු ඇතිවන අතර උදරය සම්බන්ධ පීඩා මතු වේ.
කන්‍යා - බිය වැඩි වේ.
ඔබට එරෙහිව රහස් සතුරු බලවේග ක්‍රියාත්මක වනු ඇත. යම් යම් ආරංචිවලින් බියට පත් වන්නාවූත් කාලයක් වේ. හදිසි ශරීර පීඩා ඇතිවිය හැකි බැවින් ප්‍රවේසම් වන්න. ලේ විෂ වීමක් ද විය හැක.
තුලා - ආදරයට බාධා
ප්‍රේමවන්තයන්ගේ ආදර සම්බන්ධතාවලට බාධා ඇතිවනු ඇත. දේශපාලන කටයුතුවල නිරත වී සිටින අයට එතරම් යහපත් නොවේ. හදිසි කේන්ති ගති පාලනය කිරීම වැදගත් වනු ඇත. මුත්‍රා ආශ්‍රිත ආබාධයක් මතු වේ.
වෘෂ්චික - නිතර කේන්තිය
තමා පදිංචි ස්ථානය සම්බන්ධව යම් ප්‍රශ්න පැන නගිනු ඇත. පවුල් දිවියේ ද සමගියට බාධා එල්ල වේ. සිතේ සහනය අඩු වකවානුවක් වන අතර නිතර කේන්තියෙන් යුක්තව කටයුතු කරනු ඇත.
ධනු - සේවා ප්‍රශ්න
තම සහෝදරයන් සමඟ සිත් අමනාපකම් ඇති විය හැකි බැවින් කල්පනාකාරීව කටයුතු කරන්න. සන්නිවේදන කටයුතුවල නිරත වී සිටින අයට යහපත් ඵල අත් නොවනු ඇත. සේවා ස්ථානයේ ද ප්‍රශ්න ඇතිවේ.
මකර - රුධිර පීඩා
පවුල් දිවියේ සමගියට බාධා ඇතිවන අතර ආර්ථික ගැටලු ද ඉස්මතු වේ. හදිසි ශරීර පීඩා ඇතිවිය හැකි බැවින් පරිස්සම් වන්න. මිතුරන්ගෙන් ද ප්‍රශ්න මතුවනු ඇත. රැධිරය ආශ්‍රිත පීඩාවක් මතුවනු ඇත. තමන් කිරීමට යන කටයුතුවලට ද බාධා ඇතිවේ.
කුම්භ - ව්‍යාපාර කටයුතු
තමන්ගේ කටයුතුවලට විවිධ බාධා ඇතිවනු ඇත. ව්‍යාපාරික කටයුතුවල නිරත වී සිටින අයට ලාභ අත් නොවේ. තමන් පදිංචි ස්ථානය ආශ්‍රිතව ද ප්‍රශ්න මතු වනු ඇත. ළය ආශ්‍රිත පීඩාවක් ඇති වනු ඇත.
මීන - සතුරු බලවේග
ඔබට එරෙහි සතුරු බලවේග හිස ඔසවන වකවානුවකි. පවුල් දිවියේ සමගියට බාධා මතු වනු ඇත. සන්නිවේදන තාක්ෂණික කටයුතුවල නිරත වී සිටින අයට අයහපත් වේ. හදිසි ශරීර පීඩාවලින් පරිස්සම් වන්න.
ජ්‍යොතිෂ නන්දන
ප්‍රවීණ ජ්‍යොතිෂවේදි ජ්‍යොතිෂාචාර්ය
රේණුක වික්‍රමසිංහ
සුවණැන ජ්‍යොතිෂ පර්යේෂණායතනය
ඔලබොඩුව, ගෝනපල
