කොටුවේ බස් නැවතුමෙත් මම නිදා ගත්තා
ඔබ කවුද?
මම ඉෂාන් ශානක. මම දැනට රංගන කටයුතුවල නිරතව සිටිනවා.
ඉෂාන් ඔබේ පවුලේ විස්තර ටිකක් කියමුද?
මගේ පවුලේ හතරදෙනෙක් ඉන්නවා. අම්මා, තාත්තා, මම, නංගි. අම්මා තාත්තා දෙන්නම බිස්නස් කරන්නේ. නංගි දැනට උසස්පෙළ හදාරනවා. මම පදිංචිව සිටින්නේ මාතර.
කොහොමද ඔබ රංගන ක්ෂේත්‍රයට පා තබන්නේ?
ඔව්. මුලින්ම මම අවුරුදු පහක් හයක් වගේ කාලයක් රංගනය ගැන හැදෑරුවා. ඒ වගේම ජපානයට ගිහිල්ලත් රංගනය ගැන හැදෑරුවා. ඊටපස්සේ 2019 වසරේ ලංකාවට ඇවිල්ලා සිරස වසන්ත කුමරා තරගයට ඉදිරිපත් වුණා. එම තරගයෙන් මම ප්‍රථම ස්ථානය ලබාගත්තා. ඉන්පසුව තමයි මට රඟපාන්න අවස්ථාවක් ලැබුණේ.
මේ වනවිට ඔබ රංගනයෙන් දායක වන නිර්මාණ මොනවද?
මම දැනට නීල පබළු කියන ටෙලි නාට්‍යයේ මනුල කියන චරිතයට පණ පොවනවා.
රංගන ක්ෂේත්‍රයට පැමිණෙන්න උදව් කරපු අයව මතක් කරමුද?
ප්‍රධාන වශයෙන් මට උදව් කළේ ඉන්දික අයියා. ඊට අමතරව මගේ අම්මයි තාත්තයි ගොඩක් උදව් කළා. මම ලංකාවෙන් පිට ඉන්න කාලෙත් එයාලා මට කිව්වේ ලංකාවට එන්න. ඇවිල්ලා රංගන කටයුතුවල නිරත වෙන්න කියලයි. ඒ වගේම ප්‍රසන්න අයියා තමා මාව ඉස්සෙල්ලම ස්ක්‍රීන් ටෙස්ට් එකකට යොමු කරලා නීල පබළු ටෙලි නාට්‍යයේ අවස්ථාවක් ලබා දුන්නේ. ඒ වගේම ලලිත් සර්, සඳුන් සර්වත් මතක් කරන්නම ඕනේ. මෙයාලගේ උදව්වෙන් තමා මට රංගනයට එන්න අවස්ථාවක් ලැබුණේ.
ඔබගේ පවුලේ අයගෙන් මුලදි කිසිම බාධාවක් ඇතිවුණේ නැද්ද රංගනයට එනවට?
2013 තමා මම රංගනයට එන්න උත්සාහ කළේ. ඒත් මට කිසිම අවස්ථාවක් ලැබුණේ නෑ. ඊටපස්සේ මම මගේම ට්‍රැක් එකක් කරලා ඒකට මියුසික් වීඩියෝ එකක් හදලා මමම ඒකෙ රඟපෑවා. ඒ කාලේ ඉගෙනීමේ කටයුතුවලට බාධා වන නිසා අම්මා, තාත්තා වැඩි කැමැත්තක් දැක්වුවේ නෑ. එයාලා කිව්වේ මේ කාලෙ ඉගෙනගන්න කියලා. හැබැයි මම ලංකාවෙන් ගියාට පස්සේ එයාලා කිව්වේ දැන් තමයි ඔයාගේ ගමන යන්න හරි කාලය කියලා. දැන් ලංකාවට ඇවිල්ලා රංගන කටයුතුවලට යොමුවෙන්න කියලා. අද වෙනකොටත් එයාලා මට කියන්නේ ඔයා රැකියාවක් කරන්න එපා. දිගටම මේ ක්ෂේත්‍රයේ රැඳිලා ඉන්න කියලයි.
ඔබ හිතන විදිහට මේ ක්ෂේත්‍රය මොන වගේද?
දැනට මම ලොකු ගමනක් ඇවිත් නැහැ. ඒත් මම අවුරුදු හයක් පුරාවට මේ ක්ෂේත්‍රයට එන්න උත්සාහ කරපු කාලය තුළ මට දැනුණේ මේ ක්ෂේත්‍රය ටිකක් අමාරුයි කියලා. රංගන හැකියාව පමණක් මදි. මම අවුරුදු හයක් කට්ට කෑවා. කාලයක් තිබුණා මම කොටුව බස් ස්ටෑන්ඩ් එකේ නිදාගෙන හිටපු. ඒ කියන්නේ රඟපාන්න අවස්ථාවක් ලැබිලා එය අවසන් වී ගෙදර යන්න බස් එකක් නැතිව උදේ හය වෙනකම් කොටුව බස් ස්ටෑන්ඩ් එකේ හිටපු කාලයක් තිබුණා. මේ ක්ෂේත්‍රයේ ඉදිරියට යන්න දක්ෂකම, කැපවීම වගේම කාගෙහරි උදව්වකුත් අවශ්‍යම වෙනවා. ඒත් නිරූපණ ක්ෂේත්‍රයට සම්බන්ධ හෝ අවුරුදු කුමරා වැනි තරගයකින් ජයග්‍රහනයක් ලැබුණොත් බොහෝ වෙලාවට අවස්ථාවක් ලැබෙනවා මේ ක්ෂේත්‍රයේ රැඳෙන්න.
ඔබ පෙම්වතෙක්ද?
වසර ගණනකට කලින් පෙම්වතෙක් වෙලා හිටියා. ඒ කෙනා රංගන ක්ෂේත්‍රයට එන්න මට ගොඩක් උදව් කළා. පසුව ඒ සම්බන්ධය නැති වුණා. දැන් මම තනි පුද්ගලයෙක්. ඒ කියන්නේ දැන් මම මගේ අම්මගේ තාත්තගේ ආදරය මත ජීවත් වන කෙනෙක්.
ඉෂාන්.. ඔබේ ජීවිතයේ අනාගත බලාපොරොත්තු මොනවද?
මේ ක්ෂේත්‍රයේ තිබෙන පුංචි පුංචි ගැටලු මඟහැරගෙන කවදාහරි ලංකාවේ චරිතාංග නළුවෙක් වෙන එක සහ සම්මානනීය නළුවෙක් වෙලා ගම්වල හැංගිලා ඉන්න අපි වගේ හැකියාවන් තියෙන අයව ඉස්සරහට ගෙන ඒම සහ මම මේ ක්ෂේත්‍රයෙන් ඉදිරියට යන්න තමා මගේ එකම බලාපොරොත්තුව.
► Text - Channa kassapa / Pic – Internet
