අවන්හ‍ලේ මනුස්සකම

කොහොම වුණත් අවන්හල ඇතුළේ ඉඩකඩ නොතිබුණු නිසා ඔවුන් දෙදෙනාට ආලින්දයේ තියෙන සෝෆාවක වාඩිවෙලා ඉන්න ලෙස පිළිගැනීමේ කවුන්ටරයේ හුන් සේවිකාව දැනුම් දුන්නා. ඔවුනුත් ඊට කීකරු වෙමින් සෝෆාවේ අසුන් ගත්තා. 
ටික වේලාවකින් තලතුනා මහත්මයෙක් අවන්හලට ඇතුළු වුණා. දෙන්නෙකුට කෑම ගන්න ආසන මට අවශ්‍යයි. ඔහු පිළිගැනීමේ කවුන්ටරයේ හුන් සේවිකාවට දැනුම් දුන්නා. සේවිකාව ඔහුවත් සෝෆාවේ වාඩි කෙරෙව්වේ ආසනයක් ලද සැණින් එසැණින් එය ලබාදෙන බව දන්වමිනුයි. 

මිනිත්තු කිහිපයක් ගතවුණා.  
“සර් ඔයාගේ මේසය ලෑස්තියි. එන්න මාත් එක්ක” අවන්හලේ සේවිකාව තලතුනා මහත්මයාව ඇතුළට කැඳවාගෙන යන්න උත්සාහ කළා. ඒත් තමන් වගේම ආසනයක් ලැබෙන තුරු බලාගෙන ඉන්න මුස්ලිම් ජෝඩුව දිහාවට ඔහුගේ අවධානය යොමුවුණා. 

“මෙයාලා මෙතැනට ආවේ මට කලින් මම හිතන්නෙ. ඉතින් මට කලින් එයාලට අවස්ථාවක් ලැබෙන්න ඕනෙ නේද?” ඔහු සේවිකාවගෙන් පෙරළා ප්‍රශ්න කළා. 

“අයියෝ නැහැ සර්. එහෙම කියන්න එපා. එයාලට අවන්හලේ පිටිපස්සේ කෙළවරෙන් ආසනයක් දෙන්න තමයි මම හිතාගෙන ඉන්නේ. එයාලව මැද්දේ මේසෙකට දැම්මොත් අනිත් මිනිස්සු කලබල වෙයි. දැන් නිව්ස්වල යන දේවල් පේනවනේ” සේවිකාව උත්තර දුන්නා. 

“ඔහේට පිස්සුද? මොනවද මේ කියවන විකාර?” මහත්මයා නැවත ප්‍රශ්න කළේ සේවිකාව දුන් උත්තරයට ගල්ගැහෙමින්. 
“මැඩම් අපි සෑහෙන වෙලාවක් තිස්සේ බලන් ඉන්නෙ. අපිට ආසනයක් දෙන්න බැරි මොකක් හරි හේතුවක් තියෙනවද?” මුස්ලිම් තරුණියත් අවන්හල් සේවිකාවගෙන් විමසුවා. 
“ඇයි ඔයාලට තේරැම් ගන්න බැරි. ඔයාලා ඇතුළට ගියොත් අනිත් අයට අපහසුවක් ඇතිවේවි. ඒකයි හේතුව” සේවිකාව උත්තර දුන්නා. 

“ඔයා හරිම පහත් විදිහටයි මේ අයට සලකන්නේ. මේ දෙන්නත් අපි වගේම මිනිස්සු. ඇයි එයාලට වෙනම විදිහකට සලකන්නේ. මම ආයිත් මේ අවන්හලට එන්නේ නෑ” තලතුනා මහත්තැන් කීවේ ස්ථීර හඬකින්. 
ටිකකින් තමයි මහත්තයා දැනගත්තේ මේක රියැලිටි වැඩසටහනක් කියලා. ඔවුන්ගේ සම්පූර්ණ සංවාදයම අසල තිබුණු කැමරා කිහිපයක වාර්තා වෙලා තිබුණා. දේශපාලකයින් මොන මොන අදහස් සමාජය තුළ වැපිරෙව්වත් සාමාන්‍ය මිනිස්සු එකිනෙකා දිහා දකින්නේ මොන ආකාරයටද කියන එක ලෝකයට පෙන්වන්න තමයි මේ රියැලිටි වැඩසටහන සංවිධානය කරලා තිබුණේ. ඒ මහත්මයාට අමතරව ඊට පස්සේ අවන්හලට ගොඩවුණු පුද්ගලයින් හැමදෙනෙක්ම වගේ මුස්ලිම් ජෝඩුව වෙනුවෙන් පෙනී හිටියා, කතාකළා. ඇඳුම, ආගම, ජාතිය වෙනුවට මනුස්සකම වෙනුවෙන් එයාලා පෙනී හිටියා.

- ‘What Would You Do’ YouTube චැනලය ඇසුරෙන්

► Text - Suranga   /   Pic -  Internet