හිටුකියලා නැට්ටට නගින ටිප් සුවිච්

YouTube Hit වලින් අද කතා කරන්නේ ලකයි සිකයිගේ වීඩියෝවක් ගැන. ලකයි සිකයි  YouTube Channel එක මෑත කාලීනව ඉහළ ජනප්‍රියත්වයක් ලබාගෙන තියෙන Channel එකයි. දැනට දෙලක්ෂ දහතුන් දහසක් විතර subscribe තියෙනවා. සාමාන්‍යයෙන් සතියකට එක වීඩියෝවක් තමා එළියට එන්නේ. ලක්ෂ දෙකකට වැඩි views සාමාන්‍යයක් ඔවුන් පවත්වාගෙන යනවා. 

පසුගිය සතියේ ඔවුන් කරපු වීඩියෝව තමා ටිප් සුවිච් එක. වීඩියෝ එකේ ධාවන කාලය තත්ත්පර 51ක්. වීඩියෝකරණයේ දී කැමරා කෝණ කොපියි පාවිච්චි වෙන්නේ. නමුත් ඉතා පැහැදිලිව වෘත්තීයමය විදිහට වැඩේ වෙනවා. සාමාන්‍යයෙන් YouTube නිර්මා‍ණයකරණයේදී මේ වගේ ප්‍රමිතියක් දකින්න ලැබෙන්නේ හරිම අඩුවෙන්. සංස්කරණයත් ඒ වගේමයි. කෙටි වීඩියෝවක් ඇතුලේ මතුකරන අදහස තීව්‍ර කරන්න පරිස්සමින් කරලා තියෙනවා. ලකයි සිකයිගේ වීඩියෝ බහුතරයක මේ ගුණාත්මක තාක්ෂණික ලක්ෂණ පිහිටලා තියෙනවා කිව්වොත් හරියට හරි. 

තිර පිටපත ගැන කතා කරනවානම් එතැන දී අත්‍යවශ්‍ය කරුණු මතුවෙන විදිහට දෙබස් භාවිත කරලා තියෙනවා අරපරිස්සමට, ගුණාත්මකව. ටිප් සුවිච් එක පිළිබඳව තියෙන සරල සමාජ ආකල්ප තමයි මෙතැන දී තියුණු විදිහට උත්ප්‍රාසයට ලක් කරන්නේ. ඒක ඉතා සියුම්, ඒ වගේම ප්‍රබලයි. හිනාව වගේම හිතන්න දෙයක් අන්තර්ගතයි. ඉස්සෙල්ලා කිව්වා වගේ මේ කාරණාවත් ලකයි සිකයිගේ වැඩවල දිගින් දිගටම පෙනුණු දෙයක්. 

ඊළඟට මේ දෙන්නාගේ රඟපෑම ගැන යමක් කියන්න ඕන. ලකයි සිකයි කියන්නේ මගේ මතය අනුව මෝඩ ජෝක් කරන විහිළුකාරයෝ දෙන්නෙක් නෙවෙයි. උදාහරණයක් විදිහට අපි කතා කරන වීඩියෝ ඇතුළේ ඔවුන් තුළින් ප්‍රහසනය තුඩුදෙන රඟපෑමක් මතුවෙන්නේ නෑ. නමුත් අවසානයේ දී සිනහවක් අපේ මුහුණේ ඇදෙනවා. තාත්වික රංග කෞෂල්‍යයක් මේ දෙදෙනා සතුයි. අභිනයන්ගේ භාවිතය අපූරුයි. අවශ්‍ය තැනදී සූක්ෂම විදිහට මතුවෙන සමාජ ප්‍රහසනය සජීවී කරන්නේ ඔවුන් දෙදෙනා. YouTube මාධ්‍යයෙන් එහාට ගිය නළුකමක් ලකයි සිකයි සතුයි කියලා කිව්වොත් සාධාරණයි.

අපි නිමිත්ත කරගත්ත වීඩියෝවට Views දෙලක්ෂ තිස්හය දහසක් තිබුණා අපි නරඹන මොහොත වෙනකොට. මේක පොදුවේ බැලුවාම ලකයි සිකයිගේ වැඩවල Super Hit එකක් කියලා අපිට කියන්න බෑ. ඊට වඩා ඒවා ඔවුන් කලින් කරලා තියෙනවා. මේ නිර්මාණය අද කතාබහට තෝරාගත්තේ ආසන්නතම නිර්මාණයක් වුණු නිසා. අවසාන වශයෙන් කියන්න තියෙන්නේ අවුරුදු දෙකක් ඇතුළත ලොකු ගමනක්  ආපු ලකයි සිකයි සෙට් එක සුපිරි වැඩ්ඩෝ කියලා. ඔන්න අද අපි අඩුපාඩුනම් කිව්වේ නෑ. මොකද, කියන්න තරම් අඩුවක් නෑ. 

► Text - Nisal   /   Pic – Internet