ළඟදී කොළඹ අවට ෂූටින් කරන ස්ථානයක් අසල මහා පොසොන් බත් දන්සලක් සංවිධානය කරලා තිබුණා.
මේ ටෙලිනාට්‍යයේ වැඩ කරන එක්තරා නළුවෙක් දහවල් ආහාරයට ලැබුණු විවේක කාලයේදී ගෙදරට කෝල් එකක් දීලා කතා කර කර ඉන්න ගමන් එයාගෙ නෝනට කිව්වලු බත් දන්සලේ විස්තරේ.

ඔන්න පැයකට පස්සෙ නෝනගෙන් මෙයාට කෝල් එකක් ආවලු.
අද කීයටද ඔයාගෙ වැඩ ඉවර වෙන්නෙ?

මට තව සීන් දෙකයි තියෙන්නෙ. ඊට පස්සෙ මගෙ වැඩ ටික ඉවරයි...
අයියෝ ඔයාගෙ වැඩ ඉවර වුණාට කමක් නෑ... ටිකක් හවස් වෙනකම් ඉඳලා දන්සල ඕපන් කළාට පස්සෙ ඒගොල්ලො එක්ක කතා කරලා මටත් පාර්සලයක් අරන් එන්නකො. මම දුන්තෙල් බත්වලට මාර ආසයි...

නින්ද ගිහින් ආච්චිට බයවෙලා

සමහර අය දවස පුරාම මහන්සිවෙලා වැඩ කළාම තෙහෙට්ටුවට හිටගෙන නින්ද යනවා.
පහුගිය දවසක රූපගත කිරීමක් අතරතුර තරුණ ශිල්පියෙකු එවැනි ඇබැද්දියකට මුහුණ දුන්නා. 

ඔහු උදේ පාන්දර ඉඳලා ෂූටින්. දවල් කෑමට ලැබුණු පුංචි විවේකය විතරයි. රූ නවය විතර වෙද්දී මෙයාට පුටුවක් උඩ හොඳටම නින්ද ගිහින්. එකපාරටම කොල්ලා නැඟිටලා වටපිට බල බලා අනේ එපා ආච්චි... එපා ආච්චි කියාගෙන යටිගිරියෙන් කෑගැහුවලු.

කට්ටියම බයවෙලා, කවුරුහරි මෙයාගෙ ඇඟට වැහිලද කියලා. 
බැලින්නම් මෙයා ඉන්නෙ ආච්චිලාගෙ ගෙදර. ආච්චිට පණ බයයිලු. හීනෙන් ආච්චිව දැකලා බයවෙලා තියෙන්නෙ.
ඔයා ආච්චිට බයවුණා වගේ නෙවෙයි, මෙහෙ ඉන්න අය ඔයාගෙ මූණ දැකලා බයවෙච්ච තරම. තව පොඩ්ඩෙන් නූල් බඳින්න වෙයි,අධ්‍යක්ෂවරයා කිව්වලු.
කොල්ලගෙ මූණ පුංචි වුණාලු.

කොහොමද මිස්ටර් කේප්පෙ?

අපේ රංගන ශිල්පීන් කිහිප දෙනෙක් ඉන්නවා, ඒගොල්ලන්ව ගොඩාක් වෙලාවට රසිකයො හඳුනන්නෙ සමහර චරිතත් එක්ක.

දැන් කෝපි කඩේ හාමිනේ, කුරුං ගුරුං, දයාවතී වගේ චරිත ඒවාට හොඳම උදාහරණ. ඒ වගේම අපේ ප්‍රවීණ නළුවෙක් ඉන්නවා එයාගේ නම කියපු ගමන් කට්ටියට එක පාරටම මතකෙට නාවත් ඉතින් පුදුම වෙන්න දේකුත් නැහැ, මොකද මෙයාව හැමෝම හඳුනන්නෙ කේප්ප සුමනෙ කියලා.

මෙයාගෙ දරුවො ඉගෙන ගන්න ඉස්කෝලෙ ටීචර්ලාත් මෙයාට කතා කරන්නෙ මිස්ටර් කේප්ප කියලලු.