දවස් දහයක් පිරිත් කියලයි කල එළි මංගල්ලෙ කළේ
සුමුදු... පසුගිය දිනෙක ඔබේ ශිෂ්‍ය පිරිසකගේ අංගම්පොර කලඑළි දැක්මක් සිදු වුණා..?
ඔව්.. අංගම්පොර සටන් කලාවේ ශිෂ්‍ය ශිෂ්‍යාවන් මූලික සටන් කලාව ඉගෙනගෙන එය බුදුන් සහ දෙවියන් ඉදිරියේ ඉදිරිපත් කිරීම තමයි කලඑළි මංගල්‍ය කියලා කියන්නෙ. බුදුන් වහන්සේ මූලිකත්වය ගෙන මහා රාවණා දෙවියන් ඇතුළු දේව සභාව ඉදිරියේ මේ සටන් කලාව පෙන්වනවා. මෙහිදී මහා රාවණා දෙවියන්ගේ සහ පුලස්ති ඍෂිවරයාගේ රූපය වඩම්මවා මහා රාවණ පරපුරට වන්දනා කිරීම සිදුකරනවා. මේ රූප ඉදිරියේ තමයි අපේ ආධුනික ශිල්පීන් ශිල්ප දක්වන්නෙ.
මේ කලඑළි මංගල්‍යයෙන් පසුවද ඔබේ ගෝලයන් සටන් කලාවට අවතීර්ණ වෙන්නෙ..?
ඔව්.. මේ සටන් කලාවට අපේ ගෝලයන් බඳවාගත් බව දැනුම් දෙන්නට අපි අපේ ආධුනික සටන් ශිල්පීන් ශිල්පිනියන්ගේ ගෙලට ස්වස්ථික ලාංඡනය පළඳවනවා. කලඑළි මංගල්‍යයේ ප්‍රධාන අරමුණ වෙන්නෙ එයයි. එහිදී මේ ආධුනිකයන් තමන් දන්නා සටන් හරඹයක් එදින දෙවියන් ඉදිරියේ පෙන්නුම් කරනවා.
පසුගියදා ඔබේ ආධුනික අංගම්පොර ශිල්පීන් ශිල්පිනියන් කී දෙනෙක් කලඑළි මංගල්‍යයට සහභාගි වුණාද..?
එදා ආධුනික අංගම්පොර ශිල්පීන් ශිල්පිනියන් එකසිය පනහක් විතර කලඑළි මංගල්‍යයට සහභාගි වුණා.
ඒ සඳහා දිනය වෙන්කර ගත්තෙ යම් නැකැතකට අනුවද..?
ඔව්.. මේ සඳහා අපි විශේෂ වූ අසුර නැකැතකට අනුව තමයි දිනය සහ වෙලාව යොදාගත්තෙ. අසුරයන්ගේ අසුර නැකැතයි ශිල්ප දක්වන්න වඩාත් සුදුසු වෙන්නෙ. වෙලාව බලද්දී ජ්‍යොතිෂ විද්‍යාව, යන්ත්‍ර මන්ත්‍ර කලාව සහ ආවේෂ කලාවට අදාළ සියලු දෙනාගෙන්ම මේ සඳහා සුදුසු වෙලාවක් ලබාගන්නවා. ඒ අනුව අපි මෙවර කලඑළි මංගල්‍ය පැවැත්වූයේ ජූනි මස නව වැනිදා උදෑසන සුබ නැකැතට අනුව නුවරදීයි. ස්වස්ථික යන්ත්‍රය ආධුනිකයාට පළඳවන්නට පෙර දින දහයක් ස්වාමීන් වහන්සේලා විසින් පිරිත් කියෙව්වා. එහෙම පිරිත් කියා එය පිරිත් වතුරෙන් සෝදා ආධුනිකයාගේ ගෙලෙහි පැළඳෙව්වා. දින ගණනාවක්ම ආධුනිකයා විසින් මස් මාළු පිළී නොකා මේ සඳහා පේවීම අනිවාර්යයෙන්ම සිදුකළ යුතු වෙනවා. බෝධීන් වහන්සේ ළඟ අපි මේ විශ්ව ශක්ති සටන් කලාව එදා පෙන්නුම් කළා.
මෙම ස්වස්ථිකයේ විශේෂත්වය පැහැදිලි කළොත්..?
පුරාණ හෙළ දිවයිනේ රාජ්‍ය ලාංඡනය ස්වස්ථිකයයි. මෙම ස්වස්ථිකය හා සම්බන්ධ වැදගත්ම කරුණ වන්නේ සියලුම බුදුවරුන්ගේ ශ්‍රී පාදයේ සටහන් වන මංගල සලකුණු අතරින් ස්වස්ථිකයට ප්‍රබල ස්ථානයක් හිමිවීමයි. විශ්වයේ යතුර ලෙසත් ස්වස්ථිකය හඳුන්වනවා. ඒ වගේම විශ්වයේ පොදු සලකුණ ලෙසත් මෙය හඳුන්වනවා. මේ ආකාරයේ තවත් බොහෝ හේතු නිසා අංගම්පොර සටන් කලාව යටතේ ස්වස්ථිකයට විශේෂ තැනක් ලැබෙනවා.
ගැහැනු දරුවන් පවා කලඑළි මංගල්‍ය දින අංගම්පොර සටන් කලාව පෙන්නුම් කළා. ගැහැනු දරුවන්ගේ කිල්ලට හසුවීම වැනි දේ මෙම සටන් කලාව පෙන්වීමේදී බලපාන්නෙ නැද්ද...?
නැහැ... අපි මේ අංගම්පොර සටන් කලාවේ මූලිකම තැන දෙන්නෙ පිරිතටයි. ඒ නිසා කවදාවත් පිරිත කිල්ලට අහුවෙන්නෙ නැහැ. පිරිත මේ හැමදේටම වඩා ප්‍රභලයි. පිරිතට වඩා ප්‍රබල දෙයක් මේ ලෝකෙ නැහැ. අපි පළඳවන ස්වස්ථික යන්ත්‍රය ඕනෑම මළගෙදරකට, ඕනෑම තැනකට ගෙනියන්න පුළුවන් යන්ත්‍රයක්. ඒක කිසිම කිල්ලකට අහුවෙන්නෙ නැහැ. අංගම්පොර සටන් කලාව පිරිමි දරුවකුට මෙන්ම ගැහැනු දරුවකුටත් හැදෑරිය හැකි ඉතා වටිනා සටන් කලාවක්. අංගම්පොර සටන් කලාවේ ඉතිහාසය ගැන පොත්පත්වල සඳහන් වෙන්නෙ මෙය වයස අවුරුදු අට සිට අසූව දක්වා කළ හැකි සටන් කලාවක් ලෙසයි. නමුත් අද දරුවන් වයස අවුරුදු හයේ සිටම මේ අංගම්පොර සටන් කලාවට සම්බන්ධ වෙනවා.
► Text - Dishani
