නළු දොස්තරට හෝ ගගා හචිං යනවලු
පහුගිය දවස්වල රට තුළ ඇතිවුණු ඇතැම් සිද්ධි හේතුවෙන් මේ පරණ කතාව අලුතින් මතකයට ආවා.
මේක සිද්ධවෙලා දැන් මාස දෙක තුනක් වෙනවා. කුරුණෑගල දිස්ත්‍රික්කයේ එක්තරා ගමක රෝහලක දර්ශන කීපයකුත් රූපගත කෙරුණා.
කොළඹින් ගිය කණ්ඩායමට දොස්තර පාවිච්චි කරන MASK (මුහුණු ආවරණය) ගෙනියන්න අමතක වෙලා. එනිසා නිෂ්පාදන කණ්ඩායමේ වෑන් එකට කිව්වලු ටවුමෙ ෆාමසියෙන් මුහුණු ආවරණ පහක් විතර ගේන්න.
ඔන්න ඕක දාගත්තු වෙලේ ඉඳලා අර දොස්තරට රඟපාන නළුවා නන්-ස්ටොප් කිවිසුම් අරිනවලු. දෙබසක්වත් කියාගන්න බැරි සයිස් එකට අවුල්ලු.
පස්සෙ හොයලා බැලින්නම් මේකයි වෙලා තියෙන්නෙ. අර නිෂ්පාදන කණ්ඩායමේ මල්ලි ලොජ් එකට මිරිස් කුඩු ගේන බෑග් එකේමලු මේ මුහුණු ආවරණ ටික ගෙනල්ලා තියෙන්නෙ.
ගොන් ආතල් නොමිලේ සාලයටම
පසුගිය සති දෙක තුනක කාලයක මේ රටේ මිනිස්සුන්ට පුදුමාකාර ආතල් එකක් කවුරුත් නොහිතපු විදිහටම ලැබුණා.
කාගෙ කාගෙත් මාතෘකාව වුණේ ඒ දේශපාලනික වශයෙන් ඇතිවුණු අර්බුද හරහා ඇතිවූ හාස්‍යජනක මෙන්ම බිහිසුණු සිදුවීම්ය.
ඒ කාලය තුළ මේ රටේ සංගීත ප්‍රසංග, වේදිකා නාට්‍ය හා චිත්‍රපට සඳහා ප්‍රේක්ෂක සහභාගීත්වය සැලකිය යුතු ප්‍රමාණයකින් අඩුවෙලා. ප්‍රවේශ පත් අලෙවිය අඩු නිසා ඒවා අලෙවි කිරීම සඳහා විවිධ උපක්‍රම භාවිත කෙරුණා.
ඒ ගැන අදහස් දක්වමින් එක් ප්‍රසංග සංවිධායකවරයෙක් කියා සිටියේ, රටේ උත්තරීතර තැන්වල පසුගිය දවස්වල සිදුවූ නොයෙක් රසවින්දනාත්මක සිදුවීම් නිසා, ඒවා ගෙදර රූපවාහිනී යන්ත්‍රවලින් නරඹන්න බොහෝ අය ඇබ්බැහිවෙලා හිටියා. එළියට ඇවිත් මුදල් ගෙවා විනෝද වෙනවට වඩා නොමිලේ ගෙදරට ගේන ආතල් එකට ඒ අය හුරු වුණා.
සිංහල වචන නැද්ද හලෝ
අපේ රටට නිල වශයෙන් ටෙස්ට් වරම් ලැබිලා තවම දශක පහක්වත් ගෙවිලා නැහැ.
ඒත් ක්‍රිකට්වලට ආවේණික වූ වචන බොහොමයකට සිංහල වචන අද වනවිට හැදී තිබෙනවා. තණ නිල්ලේ සිට දඟර පන්දුව, මදවේග පන්දුව වගේම පෙර පාදයේ, පසු පාදයේ ක්‍රීඩා කරන ඉරියව් පිළිබඳ අපි බොහෝ දුරට දැනුම්වත් වී සිටිනවා.
ඒත් අපේ ප්‍රවීණ රංගන ශිල්පියෙක් මෑතකදී අපූරු දෙයක් මතක් කර දුන්නා.
අපේ දේශීය සිනමාවට දැන් අවුරුදු 71ක් පිරී තිබුණත් අපේ චිත්‍රපට තාමත් හැදෙන්නෙ ඉංග්‍රීසියෙන්.
සයිලන්ස්, කැමරා රෙඩී, රෝලිං, ඇක්ෂන්, කට්, පැක්-අප්, මේ සේරම තාම සිද්ධ වෙන්නෙ ඉංග්‍රීසියෙන්.
මේ ගැන සිනමාවට සම්බන්ධ කාගෙත් අවධානය යොමුවේවිද?
► Text - Mithra
