ඔන්න පහුගිය සිංහල හා දමිළ උත්සව කාලෙ නම් අපේ බොහෝ රූපවාහිනී නාලිකා එකපාරටම වෙනස් වෙලා අපව ගම්, වැව්, ඇළ, දොළ තියෙන තැන්වලට එක්ක ගිහින් පුදුම විදිහට අපේ දේවල්වලින් අපේ ඇස් කන් පිරෙව්වා.

දේශීයත්වයට හැමදාම ඒ වගේ මුල්තැන දෙනව නම් කොච්චර දෙයක්ද? ඔන්න ඔය අතරතුර හිතාගන්නට බැරි අරුම පුදුම දේවලුත් අපට සමහර චැනල්වලින් පෙන්නුවා.

එක්තරා ප්‍රවීණ කලා ශිල්පියෙක් සජීවී වැඩසටහනකට සහභාගි වෙලා ඉන්නවා එක්තරා පෞද්ගලික රූපවාහිනී නාලිකාවක. දැන්වීමක් යන අතරතුර ඊළඟ චැනල් එකට ගියාම ඒකෙත් ඉන්නවා මේ ප්‍රවීණ කලා ශිල්පියා. පුදුමෙ කියන්නෙ ඒකත් සජීවී වැඩසටහනක්.

ඕවත් වැඩද මල්ලි.... හොඳට ගෙවනව නම් එක්කෙනෙකුට පුළුවන් චැනල් දෙක තුනක වුණත් එකවර සජීවීව ඉන්න... එක්තරා ප්‍රවීණ කලා ශිල්පියෙක් කිව්වලු.

නිළියක් මිනී පෙට්ටිය කඩයි

මේ දිනවල අති සාර්ථකව තිරගත වන චිත්‍රපටයක් තමයි වැලි පවුරු මේ ආදර්ශමත් පවුලේ චිත්‍රපටයේ ජනප්‍රිය නළු නිළියන් රැසක් චරිත නිරූපණය කරනවා.
මේ නිර්මාණයේ බොහෝ කොටස් රූපගත කෙරුණෙ කොළඹින් බැහැර දර්ශන තලවලයි.

ඔන්න මෙහි එන එක දර්ශනයක අපේ සම්මානනීය රංගන ශිල්පිනී දිල්හානි ඒකනායක මියගිහින් මිනී පෙට්ටියක වැතිර සිටිනවා. පවුලේ අය මෙන්ම හිතවත් අය ඒ වටේ ඉඳන් විලාප දෙනවා. අපේ තවත් ජනප්‍රිය නිළියකුත් මේ අතර අඬනවා. මේ නිළිය එක පාරටම අඬ අඬා මිනී පෙට්ටියට හේත්තු වෙනවා. ඒත් එක්කම මිනී පෙට්ටිය තල්ලු වෙලා ගිහින් දිල්හානිත් එක්කම පෙරළෙනවා.

දිල්හානි හිනාවෙවී පෙට්ටියෙන් නැගිටිනවා. ඇයට කිසිම අනතුරක් සිදු වී නැහැ. ඒත් මිනී පෙට්ටිය නම් තැන් තැන්වලින් කැඩිලා.
මිනී පෙට්ටි කඩේ බාස් උන්නැහැ ඇවිත් පෙට්ටිය හදනකල් කට්ටිය ලන්ච් බ්‍රේක් එකට ගියාලු.

සීයා මැරුණෙ නැද්ද?

පහුගිය ඉරිදා සිදුවුණු අවාසනාවන්ත බෝම්බ පිපිරීම් ගැන හිතෙනකොට ඇතිවෙන්නෙ මහ දුකකට වඩා කලකිරීමක්.

ඒ කළු ඉරිදාව තරම් මේ රටේ මිනිසුන්ගෙ හිත් සසල කරපු වෙනත් දවසක් නැති තරම්. ඔන්න හරියට ඒ දවසෙ අපේ ප්‍රවීණ කලා ශිල්පියෙක් නුවර පැත්තෙ ෂූටිං ඉවරවෙලා ගෙදර එන ගමන්ලු හිටියෙ.
පිපිරීම් ගණන වැඩිවෙනවාත් එක්කම මේ ශිල්පියාගෙ ගෙදර උදවිය - නෝනා, ළමයි, මුණුබුරු මිණිබිරියන් හොඳටම බයවෙලා. ඒ අස්සෙ මෙයාගෙ ෆෝන් එකේ බැටරි බැහැලා ජංගම දුරකතනෙත් ඕෆ් වෙලා. ගෙදර කට්ටිය වටේටම කෝල් කර කර මෙයා ගැන හොයනවලු.

ඔන්න පැය 3කට විතර පස්සෙ ශිල්පියා ගෙදර ආවම කට්ටියටම මාර අස්වැසිල්ලක්ලු.
ඒත් එක්කම එයාගෙ චූටිම මිණිබිරී දුවගෙන ඇවිත් එයාගෙන් ඇහුවලු, සීයා මැරුණෙ නැද්ද? කියලා.

Text - Mithra