පාස්කුවේ සංවේගය
ගිය ඉරිදා ලංකාවේ තැන් කිහිපයකම ඇති වෙච්ච පිපිරීම් සම ඒවායෙන් මරණයට පත්වුණු ජනතාව ගැනත් තුවාල ලබපු ජනතාව ගැනත් ලංකාව විතරක් නෙමේ මුළු ලෝකෙම දැඩි කණස්සල්ලට පත්වුණා කිව්වොත් වැරදි නැහැ. වෙන කවරදාටත් වඩා ලෝකේ හැම කෙනෙක්ගෙම ඇස් මේ පුංචි දූපත දිහාවට එල්ල වුණේ පාස්කු දිනය සමරමින් හිටි අහිංසකයින් ඉලක්ක කරගෙන මේ ම්ලේච්ඡ වැඩේ කරලා තිබුණු හින්දයි.
මේ පිපිරුම් මාලාවත් එක්ක ලෝකෙ පුරා ඉන්න විවිධ ජනප්‍රිය පුද්ගලයෝ ලංකාවේ ජනතාව වෙනුවෙන් තමන්ගේ කනගාටුව ප්‍රකාශ කරන්න තරම් සංවේදී වුණා. ඒ අතර හොලිවුඩ් බොලිවුඩ් තරු ලෝක දේශපාලන නායකයන් වගේම ක්‍රිකට් ලෝකේ තරු බොහෝමයකුත් ඉන්නවා.
කොළඹ ඇතිවුණු සිද්ධි ගැන දැනගත්තම මට ඇතිවුණේ ලොකු කම්පනයක්. ලංකාවේ මිනිස්සු වෙනුවෙන් මම දෙවියන්ට යාඥා කරනවා. ශ්‍රී ලංකාවට ශක්තිමත්ව එකමුතුව නැඟීසිටින්නට හැකිවේවා කියලා ටෙස්ට් ක්‍රිකට් ලෝකයේ දැවැන්තයෙකු වන බටහිර ඉන්දීය කොදෙව් හිටපු ක්‍රිකට් ක්‍රීඩක බ්‍රයන් ලාරා ට්විටර් පණිවුඩයකින් ප්‍රකාශ කරලා තිබුණා.
මේ අතර බ්‍රිතාන්‍යයේ විලියම් කුමරු සහ කේට් කුමරියත් විශේෂ නිවේදනයක් යොමුකරමින් ශ්‍රී ලාංකිකයන්ට තමන්ගේ සංවේගය පළ කරලා තිබුණා. පාස්කු ඉරිදා දිනයේදී ශ්‍රී ලංකාවේ ඇතිවුණු බිහිසුණු ප්‍රහාර පිළිබඳ අපි අතිශය කනගාටුවට පත්වෙනවා. තමන් ආරක්ෂිත යැයි ජනතාව බලාපොරොත්තු වන මෙවැනි ස්ථානවල සිදුකෙරණු නොමිනිස් ක්‍රියාවන් සැබවින්ම භයංකරයි. මේ මොහොතේ ජීවිත අහිමිවූවන්ගේ පවුල්වල සාමාජිකයන්ට, මිතුරන්ට, ලාංකික කිතුණුවන්ට සහ සමස්ත ශ්‍රී ලාංකිකයන්ට අපගේ හෘදයාංගම සංවේගය පළකර සිටිනවා යනුවෙන් එම නිවේදනයේ සඳහන්ව තිබුණා.
මේ අතර බොලිවුඩ් තරු රැසක්මත් තමන්ගේ අසල්වැසි රටේ සිද්ධ වෙච්ච ඛේදවාචකය ගැන ශෝකය පළකරලා ට්විටර් පණිවුඩ නිකුත් කරලා තිබුණා.
ශ්‍රී ලංකාවේ බෝම්බ පිපිරීම් ගැන ඇසීමෙන් මම මහත් දුකට පත්වුණා. හිංසාව දම්වැලක පුරුක් වගේ එකට ඇදී යන දෙයක්. එය නැවැත්විය යුතුයි යනුවෙන් ජැක්ලීන් ෆර්ඩිනැන්ඩස් කියා තිබුණා. ජීවිතක්ෂයට පත්වුණු අයගේ පවුල්වල ඥාතීන්ට ශෝකය පළකරන අතරේම තුවාල ලැබූ අයට ඉක්මන් සුවය ප්‍රාර්ථනා කරනවා. මේ ප්‍රහාර සිදුකර අය තුළ කිසිදු මිනිසත්කමක් නොතිබීම හිත තදින්ම පාරවන කාරණයක්
- තමන්නා භාතියා
මේ අවාසනාවන්ත ඉරණමට ගොදුරු වුණු සෑම ශ්‍රී ලාංකිකයෙක් වෙනුවෙන්ම අපේ හෘදයාංගම කණගාටුව පළකරනවා. මේ දුක්බර සහ කම්පිත මොහොතේ අපිද ඔබ හා එක්ව යාඥා කරනවා.
- අනුෂ්කා ෂර්මා
ශ්‍රී ලාංකිකයනි ශක්තිමත්ව නැඟීසිටින්න. අපේ ආදරය සහ යාඥාව ඔබ සමඟයි.
- අභිෂේක් භච්චන්
ශ්‍රී ලංකාව තුළ 200කට වැඩි පිරිසක් ඝාතනය කළ ත්‍රස්ත ප්‍රහාරය ගැන අසන්නට ලැබීම අතිශය සංවේගජනක මොහොතක්. මේ පාස්කු සැමරුම් අවස්ථාවේදී මාගේ ආදරය සහ සහයෝගය කිතුණු ජනතාව වෙනුවෙන් එක්කරනවා
- ඇමී ජැක්සන්
මේ අතර බොලිවුඩ් නිළි රවීනා තන්ඩන් ද බොහෝම සංවේදී ශෝක පණිවුඩයක් තමන්ගේ ට්විටර් ගිණුමේ තබා තිබුණා.
අවුරුදු ගණනාවක ලේ වැගිරීම් අරගලවලින් පසුව නැඟී එමින් තිබුණු රටකට සිදුවුණු මේ දේ ගැන ඉතාම කනගාටුයි. ශ්‍රී ලංකාව අපේ ප්‍රියතම නිවාඩු ගමනාන්තයයි. අපේ රටට ළඟම ගමනාන්තය වගේම ලංකාවේ මිනිස්සුන්ටත් අපි ආදරය කරනවා. අමානුෂික ප්‍රහාරය එහි කැළැල් ඉතිරිකර යාවි. ශ්‍රී ලංකාවට ඉක්මන් සුවය ලැබේවායි මම ප්‍රාර්ථනා කරනවා.
- රවීනා තන්ඩන්
ලෝකවාසියෙක් විදිහට ශ්‍රී ලංකාවේ ඇතිවෙච්ච අමානුෂික ප්‍රහාර ගැන මට හිතාගන්නවත් බැහැ. විපතට පත්වුණු ජනතාව වෙනුවෙන් මගේ හදවතත්, යාඥාවත් කැපකරනවා
- කරන් ජොහාර්
ශ්‍රී ලංකාවෙන් අහන්න ලැබෙන්නේ හදවත කම්පා කරවන පුවතක්. සතුටින් සමරන්න තිබුණු දවසක් දරුණු විනාශයක් බවට පත්වුණා. මේ බියකරු ප්‍රහාරවලින් විපතට පත්වූවන් වෙනුවෙන් මගේ හෘදයාංගම කනගාටුව පළකරනවා. මාගේ යාඥාව ඔබ සමඟයි.
- ප්‍රියංකා චොප්රා
ශ්‍රී ලංකාවෙන් ඇසෙන්නේ හදවත සසල කරවන ප්‍රවෘත්තියක්. මේ විදිහට අහිංසක ජනතාවට මියැදෙන්න සිද්ධ වෙන්නේ ඇයි? මේ තේරැමක් නැති ප්‍රහාරවල අරමුණ මොකක්ද? මේ ප්‍රහාර සඳහා යොදන වෑයම සාමය ගොඩනඟන්න යොමු කළා නම් ලෝකයේ බෙදීම් වෙනුවට එක්සත් බවක් ඇතිවේවි.
- ආලියා බාට්
ශ්‍රී ලංකාවේ ප්‍රදේශ කිහිපයක වාර්තා වුණු ත්‍රස්ත ප්‍රහාර ගැන ඇසීමෙන් මම කම්පාවට පත්වුණා. මේ ත්‍රස්ත ක්‍රියා මා තරයේ හෙළා දකිනවා. වෛරයට සහ හිංසාවට කිසිදිනෙක ආදරය, කරුණාව සහ දයාව අභිභවා යෑමට හැකිවන්නේ නැහැ.
- සචින් ටෙන්ඩුල්කාර්
ලංකාවෙන් ඇසෙන ප්‍රවෘත්ති නිසා මා අතිශය කම්පනයට පත්වුණා. මේ ව්‍යසනය නිසා විපතට පත්වුණු සියලුදෙනා වෙනුවෙන් මා යාඥා කරනවා.
- විරාට් කෝලි
ජනප්‍රිය අමෙරිකානු පොප් ගායිකාවක වන මාරියා කේරිත් ලංකාව ගැන තමන්ගේ ට්විටර් ගිණුමේ සඳහන් කරලා තිබුණා.
මගේ හදවත ශ්‍රී ලංකාව සමඟයි. මේ අවාසනාවන්ත ව්‍යවසනයට මුහුණ දුන් සියලුදෙනා වෙනුවෙන් මම යාඥාකරනවා. ශක්තිමත්ව රැඳීසිටින්නට හැකිවේවා!
- මාරියා කේරි
අපි මෙතැන සඳහන් කළේ මේ විදිහට ලාංකිකයන් වෙනුවෙන් ගලාගෙන ආපු ශෝක පණිඩුව රැසකින් කිහිපයක් පමණයි. ඊට අමතරව මධුරි ඩික්සිත්, අනූපම් කේර්, බෝමන් ඉරානි වැනි ජනප්‍රිය විශාල පිරිසක් පණිවුඩ නිකුත් කර තිබුණ.
මිලේච්ඡ්ත්වය හදවතින් ප්‍රතික්ෂේප කරමින් ඇස් අග ඉපදුණු හැම කඳුළකම හඬා වැටුණු හැම හදවතකම රිදුම් පිරිමදිමින් අන්තවාදි ත්‍රස්තවාදයට එරෙහිව ඔබ සමඟ අපත් ඉන්න බවයි ඔවුන් කියන්නේ. ඒ මනුෂ්‍යත්වයට අනේක වාරයක් ස්තූතියි!
ට්විටර් ඇසුරෙනි
► Text - Suranga / Pic - Internet
