2019 මැයි 04 වන සෙනසුරාදා

දෙන්න දෙපැත්තේ කෑවලු සැපසේ....

 2019 මැයි 04 වන සෙනසුරාදා, ප.ව. 12:30 129

අද කියන්න හදන කතාව සිද්ධ වෙන්නේ ඉන්දියාවේ උසස් අධ්‍යාපනය ලබා දෙන පාසැලක් තුළ. මෙන්න මේ පාසැලේ ශිෂ්‍යත්වයක් ලබා දෙන්න වාර්ෂිකව කුසලානයක් වෙනුවෙන් පැවැත්වෙන තරගයකින් තමයි මේ කියන්න හදන කතාව ආරම්භ වෙන්නේ. අද අපේ කතාවේ නායකයා කඩවසම් තරුණයෙක්. ඔහුගේ නම රෝහන්.

රෝහන් - තමන්ගේ අරමුණට, සිහිනවලට ළඟාවෙන්නේ දෛවයට වඩා තමන්ගේ අරමුණ නැත්නම් සිහින ඉටු කරගන්න මහන්සි වෙන කෙනයි. 
රෝහන් සෑම ක‍්‍රීඩාවකටම දක්ෂයෙක් කිව්වොත් ඔබ පිළිගන්නවද? පිළිගන්නේ නැති වුණත් ඒක තමයි ඇත්ත. අනිත් එක තමයි කෝලේජ් එකේ කෙල්ලෝ හැමෝගෙම සිහින කුමාරයා කවුද කියලා ඇහුවොතින් ඒ රෝහන්. රෝහන් ශිෂ්‍යත්වය ලබා ගන්න තරග කරද්දී ඔහුගේ හිත ගත්ත සුන්දර කෙල්ලගේ සිහිනය වෙන්නේ තව එකක්. තව දෙයක් කියන්න ඕන. මේ කෙල්ල තමන්ගේ ප්‍රේමවන්තිය කරගන්න කොලේජ් එකේ කොල්ලෝ බොහෝ දෙනෙක් සිහින දකිනවා. 
මියා - මං ඩාන්සින්ග් කම්පෙටිශන් එක දින්නොතින් මගේ හැම සිහිනයක්ම ඉෂ්ඨ කරගන්නවා. 

ඒ අතරේ රෝහන්ට ආදරය කරන ධනවත් කෙල්ලෙක් ඔහු පසුපස එනවා විතරක් නෙවෙයි ඇය ඔහුට එක එක විදියේ කැත වැඩ කරනවා ඔහු දිනා ගන්න. දවසක් සෙන් ඇන්තනීස් කොලේජ් එකේ විදුහල්පතිවරයා රෝහන්ව තමන්ගේ කාර්යාලයට කැඳවනවා.

විදුහල්පති - තමුන්ව සෙන් ඇන්තනීස් එකෙන් අස් කරනවා.
රෝහන් කල්පනා කරමින් විදුහල්පතිගේ කාර්යාල කාමරයෙන් එළියට බහිනවා. 
රෝහන් - එක අතක ගර්ල්ෆ්‍රෙන්ඩ් හිටියා. අනිත් අතේ කුසලානය.

රෝහන්ගේ එදිරිවාදියා රෝහන්ට හොඳටම පහර දෙනවා. ඔහුට පහර දීලා පහර දීලා කොලේජ් එකේ ගේට්ටුවෙන් එළියට ඇදලා දානවා. හොඳටම ගුටි කාලා ඉන්න රෝහන් බිම ඇද වැටෙනවා. ඒත් ඔහු තරගය අතහරින්නේ නැහැ. සුන්දර යුවතියන් දෙදෙනකුගේ ආදරයටත් තමන් වගේම කඩවසම් ශක්තිවන්ත එදිරිවාදියෙක්ටත් මැදිවන රෝහන්ගේ කතාව නරඹන්න ඔබට වැඩි කාලයක් බලාගෙන ඉන්න වෙන්නේ නැහැ. 2019 මැයි 10 වැනිදා තමයි ඒ දවස. වරුන් ධාවන්, සිද්ධාර්ත් මල්හෝත‍්‍රා සහ ආලියා භාත් රංගනයෙන් දායක වූ ස්ටුඩන්ට් ඔෆ් ද ඉයර් සිනමාපටය මතකයිනේ. අන්න ඒ සිනමාපටයේ දෙවැනි එක කියලයි මේ සිනමා පටය හඳුන්වන්න වෙන්නේ.

ස්ටුඩන්ට් ඔෆ් ද ඉයර් 02 කියන නමින් හින්දී සිනමාවට එකතුවෙන මේ නවතම හින්දි සිනමාපටය අධ්‍යක්ෂණය කරලා තියෙන්නේ පුනිත් මල්හෝත‍්‍රා. මේ සිනමාපටය හදන්න කලින් සිනමාපටයට වගේම සල්ලි වියදම් කරලා තියෙන්නේ ඒ කිව්වේ නිෂ්පාදනය කරලා තියෙන්නේ කරන් ජොහාර්, හිරූ යාශ් ජොහාර් සහ අපූර්වා මෙහ්තා. ඒ වගේම ස්ටුඩන්ට් ඔෆ් ද ඉයර් 02 සිනමාපටයේ කතාව ලියා තියෙන්නේ අර්ශාද් සයේද් විසින් වන අතර සප්ත ස්වරයෙන් මේ සිනමාපටය හැඩ කරලා තියෙන්නේ සලීම් - සුලෙයිමාන්. දැන් ඔබට කියන්න හදන්නේ රෝහන්ගේ චරිතය හැඩ කරන ඔහු ගැනයි. ඔහු ගැන කියන්න කලින් මෙන්න මේ සිනමාප කිහිපය ගැන සඳහන් කරන්නේ ඔබට ඔහුව මතක් වෙනවද කියලා බලන්නයි.
Heropanti 2012, Baaghi (2016), A Flying Jatt

1990 මාර්තු 02 වැනිදා ඉපදිලා තියෙන ඔහු 2014 වසරේ පටන් හින්දී සිනමාවට එකතු වෙනවා. ඔහු ෆිල්ම් ෆෙයාර් සම්මාන පවා තමන්ගේ නමට වෙන් කරගන්න සමත් වුණු කෙනෙක්. නමින් ජායි ඒ හේමන්ත් කිව්වට ඔබට මතක නැති වුණාට ඔහු ජනප‍්‍රිය හින්දී සිනමාවේ නළුවෙක් වෙන ජැකී ශ්රොෆ්ගේ සහ හින්දී සිනමාපට නිෂ්පාදිකාවක් වන අයේශා දත්ගේ පුතා ටයිගර් ශ්රොෆ් කිව්වම නම් ඔබට කඩවසම් හාදයා අමතක වෙන්න විදිහක් නැහැ. ටයිගර් ශ්රොෆ් රෝහන්ගේ චරිතයට පණ පොවද්දී මියාගේ චරිතයට පණ පොවන්නේ 1995 නොවැම්බර් 19 වැනිදා ඉපැදිලා තියෙන 2010 වසරේ පටන් නිළියක් වගේම ගායිකාවක් විදිහට ඔබ දන්න කෙනෙක්. ඇය සිනමා නිළියක් විදියට කලඑළි බහින්නේ නම් මේ ස්ටුඩන්ට් ඔෆ් ද ඉයර් 2 සිනමාපටයෙන්. ඇය නිළියක් වෙන්නේ 2010 දී වීඩියෝවල ඉඳලයි. ඇය ඩිස්නි චැනල් ඉන්ඩියා එකෙත් වැඩ කරලා තියෙනවා. විවිධ නර්ථනයන් හදාරා තියෙන ඇය යුරෝපයෙනුත් නර්ථනය හදාරා තියෙනවා. ඇය නමින් තාරා සුටාරියා. ඇය මියාගේ චරිතය හැඩ කරද්දී ශ‍්‍රියාගේ චරිතය හැඩ කරන්න මේ සිනමාපටයට එකතුවෙලා ඉන්නේ ඔබ අපි දන්න කෙනෙක්ගේ දියණියක්. 1998 ඔක්තෝම්බර් 30 වැනිදා ඉපදිලා තියෙන මේ සුන්දර කෙල්ල අඩි 5යි අගල් 7උස වන අතර බරනම් කිලෝ ග‍්‍රෑම් 50ක් කියනවා. කළු පැහැති කොණ්ඩයකට සහ ලා දුඹුරු ඇස් දෙකකට හිමිකම් කියන මේ සුන්දර තරුණියගේ ප්‍රේමවන්තයා කරන් ජයිසින්ග් කියලා කොල්ලෙක් කියල තමයි දැන්ගන්න ලැබෙන්නේ. මුම්බායිවල ධිරුභායී අම්බානී ඉන්ටර්නැශන්ල් ස්කූල් එකෙන් ඉගෙන ගෙන තියෙන ඇය උපාධිය ලබා ගන්නේ ලොස් ඇන්ජලීස්වල යුනිවර්සිටි ඔෆ් සදර්න් කැලිෆෝනියා කියන විශ්ව විද්‍යාලයෙනුයි. චොක්ලට් සහ පීසා කන්න කැමත්තක් දක්වන ඇය කැමතිම නළුවන් වෙන්නේ වරුන් ධාවන්, රන්වීර් සිං සහ ලියනාඩෝ ඩී කැප‍්‍රියෝ කියලා කියන අතර ඇය කැමතිම නිළියන් වෙන්නේ කාජල්, දීපිකා පඩුකෝන්, ජෙනිෆර් ලෝරන්ස් සහ එමා වොට්සන් කියලයි කියන්නේ. කුච් කුච් හෝතා හේ, 02 ස්ටේටස්, ස්ටුඩන්ට් ඔෆ් ද ඉයර්, කුන්ග් ෆු පැන්ඩා, හැරී පොටර්, ද නෝට් බුක්, ටයිටැනික් වගේ සිනමාපටවලට කැමතියි කියන ඇය ඉන්දියානු ක‍්‍රිකට් ක්‍රීඩක විරාත් කෝලිගේ රසිකාවියක් කියලත් ඇයම කියනවා. ලන්ඩන්, නිව් යෝර්ක් සහ ලාස් වේගාස්වල ඇවිදින්න වැඩි කැමැත්තක් දක්වන ඇය ඉන්දියාවේ ජනප‍්‍රිය විකට චරිත නිරූපණය කරන්නෙක් වන චුන්කී පාන්ඩේගේ සහ භාවනා පාන්ඩේගේ වැඩිමහල් දියණිය අනන්‍යා පාන්ඩේ වන අතර ඇයට රියිසා පාන්ඩේ නමින් නැගණියක් ද ඉන්නවා.

අනන්‍යාට අමතරව මේ සිනමාපටයේ විවිධ චරිත හැඩ කරන්න ඒවාට පණ පොවන්න සමීර් සෝනී, අභිෂේක් බජාජ්, ආදිත්‍ය සීල්, මනෝජ් පහ්වා සහ ෆරීදා ජලාල් එකමුතු වෙලා තියෙද්දී විශේෂ ආරාධිත රංගනයක ආලියා භාත් ද නිරත වෙනවා. 2018 අප්‍රේල් 09 වැනිදා දෙහරාන්වලින් රූගත කිරීම් ආරම්භ කරලා තියෙන මේ සිනමාපටයේ තියෙන මන බඳින ගීතයන්හි ගේය පද රචනා කරලා තියෙන්නේ අන්විතා දත් ගුප්තාන් සහ උමාර් වන අතර ඒ ගේය පද සප්ත ස්වරයෙන් හැඩ කරලා තියෙන්නේ විශාල් සහ ශේඛර්. 1972 දී ජවානී දීවානී සිනමාපටයේ යෙහ් ජවානී හේ දීවානී කියන කිශෝර් කුමාර් ගැයූ ආර් ඩී බර්මන් සංගීතවත් කළ ගීතය මේ සිනමාපටය සඳහා නව නිර්මාණය විදියට සිද්ධ වෙනවා. ඒ නව නිර්මාණය සඳහා සංගීතවත් කරලා තියෙන්නේ විශාල් සහ ශේඛර් වන අතර ඒ ගීතයට තමන්ගේ හඬ මුසු කර තියෙන්නේ විශාල් දඩ්ලානි සහ පායල් දේව්.

 

► Translation — Chandana Waravitage

 

 2025 මාර්තු 22 වන සෙනසුරාදා, ප.ව. 02:00
 2025 මාර්තු 08 වන සෙනසුරාදා, ප.ව. 02:00
 2025 මාර්තු 08 වන සෙනසුරාදා, ප.ව. 02:00