රඟ මඬලේ මගෙ හීනය සැබෑ වුණා
තිළිණ.. අපිට ඔයාගේ විස්තර ටිකක් කියමුද..?
මගේ නම තිළිණ ද සිල්වා. මම ඉගෙන ගත්තෙ ගල්කිස්ස විද්‍යා විද්‍යාලයෙන්. මගේ පවුලේ ඉන්නෙ මමයි තාත්තයි අම්මයි අයියයි. අපි පදිංචිවෙලා ඉන්නෙ රත්මලානෙ. මම පාසල් යන කාලෙදී උඩරට නර්තන ශිල්පියෙක්. වෙස් නැට්ටුවෙක්. ක්‍රිශාන්ති සොයිසා ගුරුතුමිය යටතේ තමයි මම උඩරට නර්තනය හැදෑරුවෙ.
වෙස් නැට්ටුවෙක් හඬ කැවීම් ශිල්පියෙක් වුණේ කොහොමද..?
මම උසස්පෙළ පන්තිවල ඉගෙන ගන්න කාලෙදී නිපුන අමල්ප්‍රිය කියන අපේ පාසලේ ආදි ශිෂ්‍යයෙක් මාව නිවේදනය පැත්තට යොමු කෙරෙව්වා. නිපුන අයියා මාව නිවේදකයෙක් විදිහට පුරුදු පුහුණු කළා. ඊට පස්සෙ මම පාසල් මාධ්‍ය කවයේ සභාපති වුණා. ප්‍රධාන ශිෂ්‍ය නායකයා වුණා. ඒ හරහා මම ඒ පැත්තට යොමු වුණා. මාව මාධ්‍ය ක්ෂේත්‍රයට යොමු කරන්නෙ පාසල් උසස්පෙළ පන්තිවල ඉගෙන ගනිද්දී. මම උසස්පෙළට වාණිජ අංශයෙන් තමයි පෙනී හිටියෙ.
පාසල් අධ්‍යාපනයෙන් පසුව තිළිණ හඬකැවීම් ශිල්පියෙක් වුණේ කොහොමද..?
පාසල් අධ්‍යාපනයෙන් පසුව මට අතුල ජයසිංහ ගුරුතුමා මුණගැහුණා. ඔහු තමයි මාව හඬකැවීම් ශිල්පියෙක් විදිහට පුහුණු කළේ. ඊට පස්සෙ මම හඬකැවීම් නාට්‍යවල සුළු චරිත කිහිපයකට හඬ මුසු කළා. පස්සෙ මම පෞද්ගලික නාලිකාවක නිවේදකයෙක් විදිහට ටික කාලයක් වැඩ කරලා ඒකෙන් පූර්ණකාලීනව ඉවත්වෙලා අද වෙනකොට නිදහස් නිවේදකයෙක් විදිහට සේවය කරනවා.
මේ දවස්වල ඔබ නිර්මාණ කිහිපයකටම දායක වෙනවා නේද.. ඒ චරිත මොනවාද..?
ඔව්... මේ දවස්වල හිරු නාලිකාවේ සිහිනයක සේයා නාට්‍යයේ ඩොක්ටර් කුනාල්ගේ චරිතයත්, බාහුබලී කාටුන් එකේ බලාල් දෙවිගේ චරිතයත්, රාමා සීතා රාවණා නාට්‍යයේ ශිව දෙවිඳුන්ගේ චරිතයටත් හඬකැවීම් කරනවා. ඒ වගේම සිරස නාලිකාවේ විකාශය වෙන ප්‍රවීණා නාට්‍යයේ අනුරාධ බාසුගේ චරිතයත්, දෙරණ නාලිකාවේ මුතු අහුර නාට්‍යයේ සර්කත්ගේ චරිතයත්, හමුවෙමු ආයේ සංසාරේහි ෂෝන්ගේ චරිතයටත් හඬ මුසු කරනවා.
හඬකැවීම් ශිල්පියෙක් වන තිළිණ නොබෝ කලකින්ම රංගන ශිල්පියෙක් විදිහට දැකබලා ගන්නටත් පුළුවන් වේවි..?
ඔව්.. රංගන ශිල්පියෙක් වීම මගේ එක හීනයක්. ඇත්තටම මම රංගන ශිල්පියෙක් වෙන්න ලොකු කැමැත්තකින් හිටියෙ. ඒ අවස්ථාව මට උදා වුණා. ඒ සුරංග ලක්මාල් සෙනෙවිරත්නගේ කකුළුවෝ සහ මකුළුවෝ කියන ටෙලිනාට්‍යයෙන්. ඒකෙ මම ප්‍රධාන චරිතයක් රඟපෑවා. ඒ නාට්‍යයෙදී මාත් එක්ක ඉසුරු ලොකුහෙට්ටිආරච්චි, වොල්ගා කල්පනී, මේධා ජයරත්න, නයෝමි තක්ෂිලා රඟපෑවා. ඒ අයගෙන් මට ලොකු සහයෝගයක් ලැබුණා. මම තරැණසේවා සභාවේ නාට්‍ය ඩිප්ලෝමාව හැදෑරැවා. රංගනය පිළිබඳව මට තව බොහෝ දේවල් ඉගෙන ගන්න තියෙනවා.
තිළිණ වැඩිපුරම කැමති හඬකැවීම් ශිල්පියෙක් වෙන්නද.. රංගන ශිල්පියෙක් වෙන්නද..?
මම රංගන ශිල්පියෙක් වෙන්න තමයි වැඩිපුරම කැමති. හැබැයි රංගනය ගැන මම තව බොහෝ දේවල් ඉගෙන ගන්න තියෙනවා. අත්දැකීම් ඔස්සේ තමයි ඒ හැකියාවන් තව තවත් වැඩිදියුණු කරගන්න පුළුවන් වෙන්නෙ. මේ දවස්වල මම හඬකවන නාට්‍ය කිහිපයක්ම හරිම ජනප්‍රියයි. චරිතයකට හඬ කවද්දී මට වඩා ප්‍රවීණ, අත්දැකීම් වැඩි හඬකැවීම් ශිල්පීන් ශිල්පිනියන්ගෙන් ලොකු සහයෝගයක් ලැබෙනවා.
ඔබට හිතෙන විදිහට ඔබ හඬකවන චරිතවලින් මිනිසුන් අතරට ගිය, ලොකු ප්‍රතිචාරයක් ලැබුණු චරිත තියෙනවද..?
ඒ හැම චරිතයකම හඬවල් එකිනෙකට ටිකක් වෙනස් විදිහටනෙ යන්නෙ. ඒ නිසා ඒ හැම චරිතයකටම පෞද්ගලිකව මම කැමතියි. ඔය අතරින් මුලින්ම පටන් ගත්තෙ මුතු අහුර නාට්‍යයේ සර්කත්ගේ චරිතයයි. ඒ නිසා ඒකට මුලින්ම ප්‍රතිචාර එන්න පටන් ගත්තා. ඒ වගේම හීනයක්ද මේ නාට්‍යයේ රාජ්වීර්ගේ චරිතයට හොඳ ප්‍රතිචාර ලැබුණා. කොහොමත් හැම චරිතයකටම හොඳ ප්‍රතිචාර ලැබෙනවා. ඒ හැම චරිතයකටම මම කැමතියි.
ඊළඟට තියෙන බලාපොරොත්තු මොනවාද..?
මගේ ලොකුම බලාපොරොත්තුව නළුවෙක් වීමම තමයි.
► Text - Dishani / Pic - Internet