බලු ලා‍ෙක්කන්ගේ පට්ට වැඩ
මේ දවස්වල සිද්ධ වෙන ආරක්ෂක වැටලීම් එක්ක පොලිස් සුනඛයෝ ගැනත් ලොකු කතාබහක් ඇතිවෙලා තියෙනවා. පොලිස් නිලධාරීන් එක්ක ලහි ලහියේ අපරාධ වෙච්ච තැන්වලට ගිහින් ඉව අල්ලමින් අපරාධකාරයෝ වගේම අපරාධවලට පාවිච්චි කරපු බඩු භාණ්ඩ හොයාගන්නත් මෙයාලා උදව් වෙනවා. ඉතින් හැමෝම පොලිස් සුනඛයෝ ගැන උනන්දු වෙන කාලෙක, පොලිස් සුනඛයන් විදිහට තෝරගන්න ජනප්‍රියම සුනඛ වර්ග මොනවද කියලා පොඩ්ඩක් හොයලා බලන්න කියලා අපි හිතුවා.
ජර්මන් ෂෙපර්ඩ්
ජර්මන් ෂෙපර්ඩ් කිව්වම නොදන්න කෙනෙක් නැති තරම්. ඒ වගේම ජර්මන් ෂෙපර්ඩ් කියන්නේ අපිට නිතරම දකින්න ලැබෙන පොලිස් සුනඛ වර්ගයක්. ජර්මන් ෂෙපර්ඩ් කියන්නේ හොඳින් පුරුදු පුහුණු කරන්න පුළුවන් සුනඛයින් විශේෂයක් කියලත් බොහොම ප්‍රසිද්ධයි.
අපේ ගෙවල්වල ඉන්න ජර්මන් ෂෙපර්ඩ්ලා නම් බොහොම කම්මැළිකමින් ඉන්න පිරිසක් වුණාට හරියට පුරුදු කරපු ජර්මන් ෂෙපර්ඩ් කෙනෙක්ට ගොඩක් දේවල් කරන්න පුළුවන්. ඒ වගේම මෙයාලා තමන්ගේ ස්වාමියාට හරිම කීකරැ සහ පක්ෂපාතී පිරිසක් කියලත් හැඳින්වෙනවා. ඒ වගේම අනික් අයගේ විශේෂයෙන්ම තමන්ගේ ස්වාමියාගේ ආරක්ෂාව වෙනුවෙන් අවදානම් ගෙන ක්‍රියා කිරීමේ හැකියාවත් මෙයාලට තියෙනවා.
සාමාන්‍යෙයන් අවුරුදු 7ක් 10ක් ජීවත් වෙන ජර්මන් ෂෙපර්ඩ්ලා තමයි සුනඛයන් අතරින් ගොඩක් වැඩවලට පුරුදු පුහුණු කරවිය හැකි සුනඛයා විදිහට ප්‍රසිද්ධියට පත්වෙලා ඉන්නෙ.
බ්ලඩ්හවුන්ඩ්
බ්ලඩ්හවුන්ඩ්ලගේ පෙනුම ටිකක් විශේෂයි. එල්ලා වැටෙන හම, දිගට පහතට කඩාහැලුණු කන් පෙති වගේ පෙනුම නිසා මෙයාලට ටිකක් මහලු පෙනුමක් තමයි තියෙන්නේ. ඒ වගේම හරිම මිත්‍රශීලී සුනඛයින් වර්ගයක් ලෙසත් ඔවුන්ව හැඳින්වෙනවා. කොහොම වුණත් පොලිසියේ රාජකාරියට උදව් වෙන්නේ මෙයාලගේ නාසයයි. හරිම තියුණු නාසයක් බ්ලඩ්හවුන්ඩ්ලට ඇති බව කියවෙනවා.
ඩච්ෂෙපර්ඩ්
මෙයාලා හරිම ක්‍රියාශීලී, දුවල පැනලා ඉන්න සුනඛයන් වර්ගයක්. අතීතයේ ඉඳන්ම බැටළු පට්ටි බලාගැනීමේ රාජකාරියේ යෙදුණු ඩච්ෂෙපර්ඩ්ලා දවස පුරාම දුව පනිමින් ඉන්න කැමැති පිරිසක් බවත් ප්‍රසිද්ධයි. කොහොම වුණත් මෙයාලා ටිකක් තමන්ගේ ස්වාධීනත්වයට කැමැති පිරිසක්. ඒ නිසාම පුරුදු කරද්දි ලොකු සැලකිල්ලක් අවධානයක් දෙන්න සිද්ධ වෙන බවත් කියවෙනවා.
බීගල්
පුංචි හුරතල් බලුපැටියෙක් වෙච්චි බීගල්ලා පොලිස් රාජකාරියේ යෙදෙනවා කියලා ඇහෙද්දිත් පුදුමයි තමා. හැබැයි ඒක ඇත්ත. මතුපිටට පේන්නෙ එයාලගේ පුංචි හුරතල්කම විතරක් වුණාට සුනඛ විශේෂ අතුරින් හොඳම නාසයක් තියෙන කෙනෙක් විදිහට බීගල් හඳුන්වන්න පුළුවන්. විශේෂයෙන්ම මත්ද්‍රව්‍ය පරීක්ෂා කිරීම්වලට ගොඩක් ලොකු සහායක් දෙන සුනඛයෙක් විදිහටත් බීගල්ලා හැඳින්වෙනවා.
බෙල්ජියන් මැලිනොයිස්
මෙයාලාව ජර්මන් ෂෙපර්ඩ්ලාගේම සහෝදරයෙක් විදිහට හඳුන්වනවා. ජර්මන් ෂෙපර්ඩ්ලා වගේම මෙයාලත් එඬේර යුගයේ ඉඳන්ම මිනිස්සු එක්ක එකට හිටපු වර්ගයක්. ඒ වගේම හරි හතරැස් පෙනුමක් තියෙන හුරුබුහුටි සුනඛ විශේෂයක්. මොවුන් අමෙරිකානු සීල් නාවුක භටයන් එක්කත් හරි හරියට වැඩකරන සුනඛ වර්ගයක් විදිහට ප්‍රකටයි.
► Text - Suranga