පාර වැරදුණාද සහෝ...

ප‍ටු අදහස් නම් පවුරින් ලෝකය කැබලිවලට නොබෙදී ඥානය නිවහල් වී බියෙන් තොරව හිස කෙළින් තබාගෙන හිඳිනට හැකි කොහිදෝ... Y Trend වලින් අපි ගොඩක් හොඳ නරක දේවල් කතා කරලා තියෙනවා. ඒ හැම  එකක්ම අද තාරුණ්‍යයේ ප්‍රවණතා. මගේ යාළුවන්ට මතක ඇතිනේ ඒ දේවල්. ඉතින් යාළු.. අද ටිකක් වැදගත්, ඒ වගේම කාලීන Trend එකක් අපි තෝරාගත්තා. මේක බොහොම භයානකයි. මේ රට තුළ තියෙන තත්ත්වයට අදාළයි. ඒ  නිසා සංවරවෙලා අහගෙන ඉන්න ඕන හොඳේ.. කාට හරි රිදුණොත් සමාවෙන්න. අන්තවාදය ඒක තමයි මාතෘකාව.

අන්තවාදය ඉතාම අවාසනාවන්ත විදිහට ලෝකයේ තරුණ ප්‍රජාව තුළ පැතිරෙන Trend එකක්. මේක එක ආගමකට විතරක් අයිති එකක් නෙවෙයි. පොදුවේ ලෝකයේ තියෙන ගොඩක් ආගම්, ජනවර්ග, දේශපාලන මතවාද මගින් අන්තවාදය බිහිවෙලා තියෙනවා. අවාසනාව තමයි හැම අන්තවාදී මතවාදයක්ම සීඝ්‍රයෙන් පැතිර ගියේ තාරැණ්‍ය අතර. අපි මුලින්ම ඒකට හේතුව බලමුකෝ...

මිනිසුන්ගේ ශරීර ඒ ඒ අවදිවලදී වෙනස් වෙනවා වගේ තමයි යාළුවනේ මනසත්. ළමා කාලයේ දී එක විදිහක්, තාරුණ්‍යයේ දී තවත් විදිහක්, මැදි වයසෙදී වෙනම විදිහක්, වයසට  ගියාම අමුතුම විදිහක්. තාරුණ්‍යයේ දී මනසේ හැසිරීම උද්වේගකාරීයි. ඒ නිසා තමයි YouTube Trend කියලා වෙනම දෙයක් ලෝකේ තියෙන්නේ. මගේ Broලාට පැහැදිලියිනේ.. මේ උද්වේගය, ශක්තිය, ආවේගය හේතුවෙන් තාරුණ්‍ය  ඕනෑම පැත්තකට යොමුවෙන්න පුළුවන්. ක්‍රීඩාව, කලාව  ඒකට හොඳ පැත්තෙන් තියෙන උදාහරණ. නරක උදාහරණය තමයි මත්ද්‍රව්‍ය, ප්‍රචණ්ඩත්වය, අන්තවාදය වගේ දේවල්. ඔන්න අන්තවාදයට ඔච්චරම තාරුණ්‍ය ආකර්ෂණය වෙන්න හේතුව තේරුම් ගන්න පුළුවන් නේද යාළු... 

ලෝකයේ අන්තවාදයට තරුණයන් වේගයෙන්  ආකර්ෂණය වෙනවා. මොකද, හැම අන්තවාදී මතයකම අමුතු ගතියක් තියෙනවා. මොකද ඒක සාමාන්‍ය ලෝක සම්මතයට වඩා වෙනස්. තාරුණ්‍ය ඒ දේවල්වලට ආසයි. ඕනෑම අන්තවාදී කණ්ඩායමක් උත්සාහ කරන්නේ තරුණ කොටස් ආකර්ෂණය කරගන්න. අද ලෝකේ තියෙන ප්‍රබලම ඉස්ලාමීය අන්තවාදී ත්‍රස්ත සංවිධාන සියල්ල තරුණ කොටස් ඉලක්ක කරගෙන වැඩ කරනවා. ඒ නිසාම එම සංවිධානවල බහුතර තරුණ අය.. උදාහරණයක් විදිහට සිරියාවේ ISIS සංවිධානය පෝෂණය වන්නේ තරුණයන් හා නව යොවුන් පාසල් සිසුන් වටා කියලා තියෙන මාධ්‍ය වාර්තා අපිට ගන්න පුළුවන්.

නමුත් මේ සියලු අන්තවාදී සංවිධාන උපක්‍රමිකව මෙහෙයවන්නේ වයසින් මුහුකුරා ගිය පිරිස්. ඒ නිසා තාරුණ්‍ය විසින් අන්තවාදය බිහිකරනවා කියන එකට වඩා තාරුණ්‍ය අන්තවාදයට නතුවෙනවා, ගොදුරැ කර ගන්නවා කියන එක සාධාරණයි නේද යාළු... හැබැයි ඉතින් තාරුණ්‍ය අන්තවාදයට ගොදුරු කර ගන්නේ ආගමික අන්තවාදීන් විතරක් නෙවෙයි, දේශපාලකයනුත් ඒ අතර ඉන්නවා විශාල වශයෙන්. උදාහරණයක් විදිහට ඉන්දියාවේ සහ අප්‍රිකානු මහද්වීපයේ කුළු ගැටුම් සහ ගෝත්‍රික ගැටුම් පෙන්වන්න පුළුවන්. ඒවා සිද්ධවෙන්නේ දේශපාලන අවශ්‍යතා මත වන නමුත් මෙම ගැටුම්වලදී ප්‍රචණ්ඩත්වය පතුරුවා හරින්නේ තරුණ කොටස්. 

තව පැත්තකින් ලෝකයේ ගොඩනැගෙන දක්ෂිණාංශික අන්තවාදය ගැන කතා කරන්න ඕන. ඒකට ගොදුරැවෙලා ඉන්නෙත් තරුණයෝ. අමෙරිකාව යුරෝපය ඇතුළු රටවල තමයි මේ අන්තවාදය ක්‍රියාත්මක... තාරුණ්‍යයට බලපාන විරුකියාව ඇතුළු සමාජ ගැටලු හේතු කරගෙන ආසියාතික අප්‍රිකානු සංක්‍රමණිකයන්ට එරෙහිව ස්වදේශික පිරිස් මේ අන්තවාදය පතුරුවා හරිනවා. උදාහරණයක් විදිහට නවසීලන්ත ප්‍රහාරය පෙන්වන්න පුළුවන්. ක්‍රමයෙන් තාරුණ්‍ය අතර මේ අන්තවාදය ව්‍යාප්ත වෙනවා. ඒ නිසා හෙට අනිද්දාට ලෝකයේ ලොකු ප්‍රශ්නයක් වෙන්න පුළුවන්.

අපේ රට පැත්තට හැරෙමුකෝ.. අද අපි අන්තවාදයේ ගොදුරක් වෙලා. පසුගිය දවස්වල සිද්ධවුණු දේවල් ඇතුළේ අන්තවාදීන් විදිහට අපි දැක්ක බහුතරය තරැණයෝ. සමහරු ඉහළ අධ්‍යාපනයක් ලබපු තරුණයෝ. ඔවුන් එතැනට යොමුවෙන්න හේතු ගණනාවක් තියෙනවා. තාරුණ්‍ය ඒකට එක හේතුවක්. අන්තවාදයේ ගොදුරක් වුණාම ඕනෑම කෙනෙක්ගෙ මනස අඳුරු වෙනවා. විවෘත නෑ. තරුණයෙක් එහෙම වුණාම ඔහුගේ ජවය, ශක්තිය, සාරය අන්තවාදීන්ට සූරාගන්න පුළුවන්. ඒකයි මේ වෙමින් තියෙන්නේ.

අද ලංකාවේ Social Media කියන්නේ Extremism Youth Trend එක හොඳටම පෙනෙන තැනක්. වෛරී ප්‍රකාශ ඕනෑ තරම් මේවායේ දකින්න පුළුවන්. ඒක මහා භයානක තත්ත්වයක්. ලංකාවේ අපිට පෙනෙන විදිහට අන්තවාදී මතවාද වර්ධනය වෙනවා. යම් තැනකදී මේක පුපුරා යන්න පුළුවන්. ඒක විශාල ජාතිවාදී ගැටුමක් නිර්මාණය කරන්න හේතු වේවි. එහෙම වුණොත් විශාල තරුණ ජීවිත සංඛ්‍යාවක් නියත වශයෙන්ම විනාශ වෙනවා. අපි දන්නවා බෙදුම්වාදී එල්.ටී.ටී.ඊ. සංවිධානය වටා විශාල වශයෙන් එකතු වුණේ තරුණයෝ.  ඉතින් අපිට ඕනෑ තරම් උදාහරණ තියෙනවා.

අන්තවාදයට ගොදුරු වුණාම ඒක මනසට වැළඳුණු පිළිකාවක් වගේ. සුව කරන්න තියෙන අවකාශය ඉතා අඩුයි. මනුෂ්‍යත්වය සහමුලින්ම විනාශ වෙනවා. අම්මා තාත්තා දරැවෝ වැඩක් නැතිව යනවා. ඒක මහා භයානක තත්ත්වයක් යාළු... මේ හරහා සමස්ත සමාජ පද්ධතියටම බලපෑම් ඇතිවෙනවා. අනික යම් තරුණ කණ්ඩායමක් අතර එක් අයෙක් අන්තවාදයට ගොදුරු වුණොත් සීඝ්‍ර වශයෙන් පැතිර යන්න පුළුවන්.

මගේ ආදරණීය පැංචෝ පැංචියෝ ඔන්න අද කතාව අපි ඉවර කරන්නයි යන්නේ. ජාතික ව්‍යසනයක් අර්බුදයක් වෙලාවෙදී Y Trend අපේ යුතුකම ඉටු කරන්න තමා මේ සටහන අපි ලිව්වේ. අපේ තාරුණ්‍යයට මනුෂ්‍යත්වය පිළිබඳ නිසි අවබෝධය ලබාදීමේ වැඩසටහන් ක්‍රියාත්මක වෙන්න ඕන. මැදිහත්ව හිතන්න හුරු කරන්න ඕන. වගකිවයුත්තෝ ඒවා කරයි ද කියලානම් අපි දන්නේ නෑ. ඔයාලා  වගකීමෙන් වැඩ කරන්න. තරුණ ජීවිත අන්තවාදයට බිලි දෙන්න එපා. ලෝක ස්වභාවයි ජීවිතයයි අවබෝධ කර ගන්න  එක තමයි වැදගත්ම දේ.

► Text - Nisal   /   Pic – Internet