කෙනෙකුට දුකක් කරදරයක් ඇතිවුණාම ඒක බයිට් එකට ගන්න එක හොඳ නැති වුණත් මේක කියන්න වෙන්නෙ මේ සිද්ධියට සම්බන්ධවෙලා ඉන්න අපේ ජනප්‍රිය විකට නළුවෙක් නිසයි.

මෑතකදී ඔහුගෙ පියා නැති වුණා. දේහය තැන්පත් කරලා තිබුණෙ මල්ශාලාවක. කොළඹින් බැහැර නිසා බොහෝ අය ඒ තැන හොයාගත්තෙ අමාරුවෙන්. 

ගොඩාක් අය මේ නළුවට කෝල් කර කර තමයි තැන හොයාගෙන ආවෙ.
ඒ අතරෙ තවත් නිළියක් මෙයාට කෝල් කරගෙන පාර ඇහුවත්, පාර කිහිප සැරයක්ම වරද්දගෙන. කෝල් සීයක් විතර අර නළුවට දෙනවලු.

බැරිම තැන අර නළුවා ඒ නිළියට මෙහෙම කිව්වලු.
ඔයා ඉන්න තැන හරියට කියන්න. මේ වැඩේ හරියන්නෙ නැහැ. මම මිනිය ඔයා ඉන්න තැනට ගේන්නම්.

ශත 87කට ලියූ ඓතිහාසික ගිවිසුම

අපි බොහෝවිට කතා කරන මාතෘකාවක්නෙ කලා ලෝකයෙ ප්‍රවීණයො නව පරපුරේ අය විසින් ගරු කිරීමකට ලක් නොවෙන එක.
කලා ලොවේ නව පරපුරේ ඇතැම් ශිල්පීන් අපේ සමහර ප්‍රවීණයො හඳුනන්නෙවත් නැහැ, කියලයි සමහරු කියන්නෙ.

වසර ගණනාවකට පෙර අපේ එක්තරා ජනප්‍රිය නළුවෙක්ව ඔහු ප්‍රිය කරන, ඔහු ගරු කරන ප්‍රවීණ සිනමාවේදියෙක් අධ්‍යක්ෂණය කරන චිත්‍රපටයකට තෝරාගෙන තිබුණා. එවැනි ප්‍රවීණයෙකුගෙ චිත්‍රපටයකට රඟපාන්න ලැබීම මොන තරම් භාග්‍යයක්ද කියලා ඔහුට හිතුණා.

ඒ ප්‍රවීණයාට ඔහු විසින් කළ හැකි උපරිමය ලෙස ඔහු එම චිත්‍රපටයේ නොමිලේ රඟපාන්නට කැමති වුණා. ඒත් නිෂ්පාදක කණ්ඩායමේ ඇතැම් ප්‍රතිපත්තීන් නිසා ඔහුට ඒක කරන්න බැරි වුණා. අනිවාර්යයෙන් යම්කිසි මුදලකට ගිවිසුමක් අත්සන් කරන්නට ඔහුට සිදු වුණා.

ඔහු ගිවිසුමක් අත්සන් කළා, ශත 87කට. වසර ගණනාවක් ගතවී ඇතත් එම ඓතිහාසික ගිවිසුම තාමත් ජාතික චිත්‍රපට සංස්ථාව සතුව තිබෙන බවයි ආරංචිය.

මට නළුවො මරන්න බැහැ

අද රටේ හැම ක්ෂේත්‍රයකටම දේශපාලනය කොහෙන් හරි ගෑවිලි තියෙනවා. වර්තමානයේ සිදුවන දේවල් එක්ක බැලුවත් ඕකෙ ලොකු වෙනසක් නැති බව පේනවා. අපි බලන රාමුවට පිටින් ඕනෑම සිද්ධියකට අදාළව විශාල ප්‍රමාණයේ රාමුව බැලුවොත් ඔය පාට පාට සම්බන්ධකම් හොඳටම පෙනේවි.

අපේ රටේ කලාව ගැන කියන්න තියෙන්නෙත් ඒ ටිකමයි.
අර ආණ්ඩුව බලයෙ ඉන්නකොට ඒ අයට විරුද්ධව හඬ නඟන නළු නිළියො රඟපාන ටෙලිනාට්‍ය රජයේ නාලිකාවෙ පෙන්නන එක තහනම් කළා. මේ ආණ්ඩුව ඇවිල්ලත් ඒකෙ කියන්න තරම් ලොකු වෙනසක් වුණේ නැති බව පේනවා.
ඔන්න ඔය වගේ බලේ ඉන්න පාලකයො ප්‍රිය නොකරන චරිතයක් එක්තරා ටෙලිනාට්‍යයක ඉන්නවලු. නාට්‍යයත් හොඳයි, අධ්‍යක්ෂකත් හොඳයි. ඒත් අර නළුවා නිසා රජයේ නාලිකාවක් ඒක විකාශය කරන්න අදිමදි කරනවා.
ඒ නිර්මාණයේ අධ්‍යක්ෂකවරයා දවසක් සුපර් මාකට් එකක භාණ්ඩ මිලදී ගන්නවා. වටේටම බඩු ආපු කට්ටිය. මෙයාගෙ ෆෝන් එක නාද වෙනවා. අර කියන නාලිකාවෙ ඉහළ නිලධාරියෙක්, ඔයාගෙ නාට්‍ය ගන්න අපි තීරණය කළා. හැබැයි ඔයා එක වැඩක් කරන්න ඕනෙ. කතාවෙ 10 වැනි කොටසට කලින් අර නළුවාව රට යවන්න ඕනෙ. නැත්තම් මරන්න ඕනෙ. 

පිස්සු කතා කරනවද? ඔය මහත්මයා හිතුවද මම පාතාලෙ කියලා. මට නළුවො මරන්න බැහැ. ඕගොල්ලො මගේ නාට්‍ය ගත්තත් එකයි නැතත් එකයි.., අධ්‍යක්ෂකවරයා ආවේගශීලීව කළ කතාව සුපර් මාකට් එකට ඇවිත් හිටිය මිනිස්සු ගොඩාක් කටවල් ඇරගෙන අහගෙන හිටියලු.

► Text - Mithra