ඌට පුදුම සෙල්ෆි උණක් තියෙන්නෙ
සංගීත්... ඔයාට මහේන්ද්‍රව මුණගැහුණු මුල්ම දවස මතකද..?
මට මහේන්ද්‍ර අයියව මුලින්ම මුණගැහුණේ හිරු නාලිකාවේ විකාශනය වුණු සඳසාවි ටෙලිනාට්‍යයෙන්. ඒක තමයි මගේ මුල්ම නාට්‍ය වුණේ. ඒ නාට්‍යයේ හැටියට මම යාළුවෙන්න ට්‍රයි කරන ගැහැනු ළමයාගේ අක්කගේ සැමියා විදිහට තමයි මහේන්ද්‍ර අයියා රඟපෑවෙ. හැබැයි ඒ නාට්‍යයේදී එකම කොටසක්වත් මහේන්ද්‍ර අයියයි මමයි එකට රඟපෑවෙ නැහැ. එක දවසක් රූපගත කිරීම් කරන තැනකදී අපි දෙන්නා එකට මුණගැහුණා.
ඊට පසුව එයාව මුණගැහුණේ කවදද..?
සඳසාවි ටෙලිනාට්‍යයෙන් පස්සෙ අපේ ඉස්කෝලෙ තිබුණු වැඩසටහනක් ගැන කතා කරන්න කලාකරුවන් කිහිප දෙනෙක් දෙරණ වැඩසටහනකට සහභාගි වුණා. මහේන්ද්‍ර අයියා වගේම මමත් ඉගෙන ගත්තෙ තර්ස්ටන් විද්‍යාලයෙ. ඉතින්... මටත් ඒ වැඩසටහනට සහභාගි වෙන්න අවස්ථාව ලැබුණා. එතනදී ආයෙමත් මහේන්ද්‍ර අයියව මට සෙට් වුණා. මහේන්ද්‍ර අයියයි මමයි බොහෝ දේවල් කතා කළා. මම හිතන්නෙ මහේන්ද්‍ර අයියයි මමයි ගොඩක් හිතවත් වුණේ ඒ දෙරණ වැඩසටහනින් තමයි.
ඊට පස්සෙ ද දෙන්නට එකතුවෙලා සුද්ධ කරන්න අවස්ථාව ලැබුණෙ..?
ඔව්නෙ.. ඒ ටිකිරි රත්නායකගේ කුසුමාසන දේවි නාට්‍යයෙනුයි. ඒකෙ මමයි ප්‍රධාන චරිතය රඟපෑවෙ. මහේන්ද්‍ර අයියත් ප්‍රධාන චරිතයක් රඟපෑවා. ඒකත් විකාශය වුණේ දෙරණ නාලිකාවෙ. ඉතින් ඒ නාට්‍යයෙන් අර හිතවත්කම තවත් වැඩි වුණා.
කොළඹ ඉඳන් නුවර ගියෙත් වැඩිපුර දෙන්නා එකට කියලයි ආරංචිය..?
ඔව්.. ඔව්.. ඒ නාට්‍යයේ වැඩිපුරම රූපගත කිරීම් තිබුණේ නුවරයි මාතලෙයි. ඉතින් නුවර ලොජ්වෙලා තමයි අපි වැඩිපුරම රූපගත කිරීම් කළේ. කොළඹ ඉඳන් නුවරට ගියෙත් අපි දෙන්නා වැඩිපුරම එකම වාහනයේ. සමහර දවස්වලට එකදිගට දවස් දහයක් විතර ෂූටින් තියෙනවා. ඉතින් අපි යන්නෙ එකට. ඉන්නෙ එකට. එහෙම ගියාම එක කාමරයක දෙන්නෙකුට විතර ඉන්න ඉඩ ලැබෙනවා. ඉතින් එක ලොජ් එකෙයි අපි ඉන්නෙ.
මහේන්ද්‍ර කියන්නෙ මොනවගේ චරිතයක්ද..?
මහේන්ද්‍ර අයියා කියන්නෙ මට වඩා වැඩිමහල් සහෝදරයෙක්. මම ලොකු අයියේ කියලා තමයි මහේන්ද්‍ර අයියට කතා කරන්නෙ. මහේන්ද්‍ර අයියා කියන්නෙ මම දැකපු ඉතාම දක්ෂ නළුවෙක්. වේදිකාව වගේම ටෙලිනාට්‍යවලත් ඕනෑම විදිහකට සෙල්ලම් දාන්න පුළුවන් නළුවෙක්. විශේෂයෙන් මහේන්ද්‍ර අයියා කියන්නෙ ඉතා දක්ෂ වේදිකා නළුවෙක්. එයා හැමදේම ගැන අවබෝධයෙන්, හරිම පරීක්ෂාවෙන් ජීවත්වෙන කෙනෙක්. ඕන කෙනෙක් එක්ක මහේන්ද්‍ර අයියා ඉන්න දන්නවා.
එයාට කේන්ති යනවද..?
ඕනෑම මනුස්සයෙක්ට කේන්ති යනවනෙ. හැබැයි මහේන්ද්‍ර අයියා එහෙම කේන්තිකාරයෙක් නෙමෙයි. සමහර අවස්ථාවලදී මහේන්ද්‍ර අයියට කේන්ති යනවා. හැබැයි ඒ කේන්තිය හැමෝටම පෙන්නන්නෙ නැහැ. සමහර වෙලාවට කේන්ති යනවා බං මුන් කරන වැඩවලට කියලා මාත් එක්ක කියපු වෙලාවලුත් තියෙනවා.
රූපගත කිරීම් කරද්දී මහේන්ද්‍රගෙන් ලැබුණු සහයෝගය කොහොමද..?
ඒකනම් මාරයි. ප්‍රවීණ කලාකරුවෙක් විදිහට අපි වගේ අලුත් අයට ලබාදුන්න සහයෝගය ගැන කියන්න වචන නැහැ. එයා තරම් මට අත්දැකීම් නැහැ. වයස වගේම අත්දැකීම් අතිනුත් මම මහේන්ද්‍ර අයියට වඩා ගොඩක් බාලයි. මට ප්‍රධාන චරිතයක් රඟපෑවට ලොකු අත්දැකීම් තිබුණෙ නැහැ. ඒ අතින් එයා මට මාරම සපෝට් එකක් දුන්නෙ. ගොඩක් වෙලාවට මම ළඟට ගිහින් මහේන්ද්‍ර අයියේ.. මම මේක කළා හරිද? කියලා අහනවා. සමහර වෙලාවට මහේන්ද්‍ර අයියා ඒ අඩුපාඩු හදනවා. ඇත්තටම මහේන්ද්‍ර අයියා මට හොඳ සහෝදරයෙක්.
ෂූටින් නැති වෙලාවට දෙන්නා මොනවගේ දේවල් ද කළේ..?
මෙහෙමනෙ.. මහේන්ද්‍ර අයියත් මත්පැන් ගන්නෙ නැති කෙනෙක්. මමත් එහෙමයි. ඉතින් ෂූටින් නැති වෙලාවට එහෙම සෙට් වෙනවට වඩා අපි දෙන්නා සෙට්වෙලා නුවර ටවුමේ ඇවිදින්න යනවා. අපි දළදා මාලිගාවට යනවා. එහෙම නැත්නම් කන්න කොහේ හරි නුවර රෙස්ටුරන්ට් එකකට යනවා. ෂූටින් නැති වෙලාවට අපි දෙන්නා වැඩිපුරම නුවර ටවුමේ ඇවිදින එක තමයි කරන්නෙ.
මහේන්ද්‍රට ව්‍යායාම් කරන්න පුරුදු කළේ ඇයි..?
ඔව්නෙ.. ඒක තමයි අමතකම වෙන්නෙ නැති සිද්ධිය. මම තමයි කුසුමාසන දේවි නාට්‍ය පටන් ගනිද්දී ඩම්බල් දෙකත් අරගෙන ෂූටින් ආපු එකම එකා. මහේන්ද්‍ර අයියා මගේ කාමරයට සෙට් වෙනකොට මම මහේන්ද්‍ර අයියට එක්සයිස් කරන්න හුරු කළා. මහේන්ද්‍ර අයියගේ ඇඟපත නිසා මහේන්ද්‍ර අයියා.. අපි සෙල්ලම් කරමු කියලා මහේන්ද්‍ර අයියට මාත් එක්ක එක්සයිස් කරන්න පුරුදු කළා.
ඒ නිසාද මහේන්ද්‍රට කෑම පාලනය කරන්න හුරු කළේ..?
ඔව් ඔව්.. මහේන්ද්‍ර අයියා රෑට බත් කන්න හරි ආසයි. හැබැයි එයාට රෑට බත් කෑම තහනම්. මම ඒකට නීති දාලයි තිබ්බෙ. බත් ඉස්සරහ මාව දකිද්දී මහේන්ද්‍ර අයියා දුවනවා. සමහර දවස්වලට ළඟට ඇවිත් මල්ලි බත් කටක් කන්නද? කියලා අහද්දී නෑ නෑ.. කඩල ටිකක් කන්න කියලා මම කිවුවාම මල්ලි.. කඩල ටිකක් එක්ක බත් කටක් කන්නද? කියලා අහනවා. මහේන්ද්‍ර අයියා මට මාර ආදරෙයි. මම කියන දේ අහනවා. එක්සයිස් කරද්දී අයියා... අපි හොඳට ඇඟ හදාගමු කියලා මම කිවුවාම ඔව්.. ඔව්.. අපි හොඳ තර්ස්ටන් කොල්ලෝ කියලා ඔන්න එක්සයිස් කරනවා. මම කියලා දෙන විදිහට මහේන්ද්‍ර අයියත් ඔන්න එක්සයිස් කරනවා.
එයා වගේ කෙනෙක් ජීවිතයට මුණගැහීම ගැන මොකද හිතෙන්නෙ..?
ඒ වගේ කෙනෙක් මුණගැහීම හැමෝටම ලැබෙන අවස්ථාවක් නෙවෙයි. හැම නාට්‍යයකම කලාකරුවන් මුණගැහෙන අවස්ථා තියෙනවා. අපි අහලා තියෙන විදිහට ඉස්සර නාට්‍යයකට ගියාම මාසයකට එක නාට්‍යයක් බාරගෙන හැමෝම ඒ මාසෙම එක තැනක ඉඳලා තමයි ආයෙ එන්නෙ. එතකොට ඒ අය අතරේ ලොකු බැඳීමක් ඇතිවෙනවා. අද කාලේ එහෙම වෙනවා හරි අඩුයි. ඒ වගේ වෙලාවක මහේන්ද්‍ර අයියා වගේ ප්‍රවීණයෙක් මුණගැහීම ලොකු භාග්‍යයක්. වාසනාවක්. එයා ඉතා දක්ෂ රංගන ශිල්පියෙක්. මහේන්ද්‍ර අයියා ඇස්වලින් රඟපාන්න හරි දක්ෂයි. මහේන්ද්‍ර අයියගේ රංගනය තුළින් මම ඉගෙන ගත්ත දේවල් බොහොමයි.
සංගීත් ඔන්න ඔහොම මහේන්ද්‍ර ගැන කියද්දී අපි මහේන්ද්‍රගෙනුත් සංගීත් ගැන අහන්න අමතක කළේ නැහැ. දැන් එහෙමනම් බලමුද මහේන්ද්‍ර සංගීත් ගැන මොනවද කිව්වෙ කියලා.
මහේන්ද්‍ර.. ඔයාට මතකද සංගීත්ව මුලින්ම මුණගැහුණු කාලය..?
ඔව්.. සංගීත් මට මුලින්ම මුණගැහුණෙ හිරු නාලිකාවෙ විකාශය වුණු සඳසාවි ටෙලිනාටයෙනුයි. ඒකෙදී දවස් දෙක තුනක්ම මට සංගීත් මල්ලිව මුණගැහුණා. අපි ඉතින් සාමාන්‍ය විදිහට කතා කළා. සංගීත් මල්ලිත් අපේ ඉස්කෝලෙ ඉගෙන ගත්ත මල්ලි කෙනෙක් කියලා මම දැනගත්තෙ දෙරණ නාලිකාවෙන් පවත්වපු එක්තරා වැඩසටහනකදී. ඒකට සහභාගි වුණේ තර්ස්ටන් විද්‍යාලයේ ඉගෙන ගත්ත ආදි ශිෂ්‍යයන්.
සංගීත් තර්ස්ටන් විද්‍යාලයෙ ඉගෙන ගත්ත කොල්ලෙක් කියලා දැනගත්තට පස්සෙ ඔයාට මොකද හිතුණෙ..?
ෆීල්ඩ් එකට ආවට පස්සෙ අපි ඉතින් හොයන්න ගන්නවනෙ. එකම ඉස්කෝලෙ වුණාම වැඩිපුරත් හිතනවා. විශේෂයෙන් මූගේ කල්ක්‍රියාව කොහොම කියලා හොයනවනෙ. ඇත්තටම සංගීත් කියන්නෙ එකම වයසට චරිත තුනක් ජීවිතය ඇතුළේ තියෙන කොල්ලෙක්. මූගේ ඇඟ ඇතුළේ දරුවෙකුත් ඉන්නවා. කෙළිලොල් තරැණයෙකුත් ඉන්නවා. ඒ වගේම ජීවිත අත්දැකීම් තියෙන මනුස්සයෙකුත් ඉන්නවා. ඉතින්.. සංගීත් එක්ක වැඩ කරගෙන යද්දී තේරුණු දෙයක් තමයි මිනිහා ඕනෑම තැනකට වතුර වගෙයි. ඕනෑම දේකට දාගන්න පුළුවන්. දස්කම් ගොඩක් තියෙනවා. වාදනය, ගායනය, නර්තනය, සටන් ක්‍රියාකාරකම්, සංගීත් ඒ හැමදෙයක්ම තියෙන දක්ෂ කොල්ලෙක්. ඇත්තටම ඒ වගේ තරුණයන් තමයි මේ කලා ක්ෂේත්‍රයට ඉස්සරහට අපිට ඕන වෙන්නෙ.
කුසුමාසන දේවි ටෙලිනාට්‍යයෙදී සංගීත්ව ළඟින්ම ඇසුරු කරන්න ඔබට අවස්ථාව ලැබුණා. ඒ ගත කරපු කාලය කොහොමද..?
මූත් එක්ක එකම ලොජ් එකක හිටියොත් මට කන්න ලැබෙන්නෙ නැහැ. මූ මට කන්න දෙන්නෙ නැහැ. කෑම පාලනය කරන්න ඕනෙ. බත් ටිකක් වැඩිපුර කෑවොත් එදාට වලියක් තමයි. අයියේ.. ඇයි බන් කෑවෙ.. ඔහොම බෑ ඔහොම බෑ කියලා කෑගහනවා. හැබැයි ඒක මරු හැබැයි මොනවා කළත් හරියට පිටපත බලලා ඒ වැඩේට බැහැලා වැඩ කරනවා. තරුණ පරපුරේ ශිල්පීන් අතරින් ගොඩක් කැපවීමෙන්, හොයලා බලලා උනන්දුවෙලා වැඩ කරන තරුණයෙක් තමයි සංගීත් කියන්නෙ.
සංගීත් කාලයක් ඔබගේ ව්‍යායාම උපදේශක විදිහට කටයුතු කළා නේද..?
ඔව්නෙ.. මෙහෙමනෙ. ඌත් එක්ක ඉඳිද්දී ඒ හැම සෙල්ලමක්ම කළා. ඊට පස්සෙ වැඩත් එක්ක ඒ හැමදෙයක්ම නතර වුණා. හැබැයි ඉතින් දැන් දැක්කත් සංගීත් අයියේ.. අයියේ.. බඩ වැඩියි* කිය කියා කියනවා. හැබැයි මාත් පුළුවන් විදිහට දැන් ව්‍යායාම් කරනවා. ඒත්.. එකදිගට ව්‍යායාම් කරන්න වෙලාවක් නැහැ. හැබැයි සංගීත් එක්ක හිටියනම් ඒක හරියට කරන්න තිබුණා.
එයාගේ විලාසිතා ගැන මොකද හිතන්නෙ...?
ඌ වෙනමම මොඩ්ල් එකක්. ඌට සෙල්ෆි අමාරුවක් තමයි තියෙන්නෙ. ඌ එක එක විදිහට සෙල්ෆි ගන්නවා. සංගීත් මල්ලිගේ ඒ ස්ටයිල් එක ඌට ගැලපෙනවා. මිනිහා හොඳ ෆොටෝග්‍රැෆර් කෙනෙක්.
කුසුමාසන දේවි කරද්දී අමතක නොවන සිදුවීම් වෙලා නැද්ද..?
අම්මෝ.. තියෙනවා. එක පාරක් මූ අශ්වයා පිටින් වැටිලා මැරෙන්නත් ගියා. එක දවසක් සංගීත් මල්ලිට අශ්වයා පිටේ නැගලා යන්න දර්ශනයක් තිබුණා. සංගීත් අශ්වයා පිටට නැග්ගට පස්සෙ අධ්‍යක්ෂක මල්ලි හරි නේද..? කියලා ඇහුවා. සංගීත් &ඔව් හරි හරි.. අපි ගමු කියලා කිව්වා. එච්චරමයි. සංගීත්ව පිටේ තියාගෙන අශ්වයා මහ වේගයෙන් දිව්වා. ගස්වල වැදි වැදී සංගීත් යනවා. අපිට පුදුම බයක් දැනුණෙ. අශ්වයා එක තැනකදී වේගය අඩු කරද්දීම සංගීත් අශ්වයාගේ පිටින් පැන්නා. එහෙම පැන්නෙ නැත්නම් ඕකා මැරෙනවා.
සංගීත් වගේ සහෝදරයෙක් මේ ක්ෂේත්‍රයේ දී මුණගැහීම ගැන මොකද හිතෙන්නෙ..?
සංගීත් කියන්නෙ හරි උනන්දු කොල්ලෙක්. වැඩවලදී කම්මැලි නැහැ. ඕන දෙයක් සාකච්ඡා කරනවා. අඩුපාඩු හදාගන්නවා. ඇත්තටම ඒ වගේ මල්ලි කෙනෙක් මුණගැහීම ගැන ඇත්තටම සතුටුයි.
Text - Dishani / Pic - Sumudu & Internet