මල බද්ධයට හොඳ පොහොර
එදා කොළඹින් බැහැර නගරයක ෂූටින් කලින්ම ඉවර වෙලා. ප්‍රධාන නළු නිළි කට්ටිය පළවැනි වෑන් එකෙන්ම කොළඹ ආවා.
ඒ එන ගමන් කෙනෙකුට එක්තරා ටවුමක තිබුණ කෘෂිකර්ම දෙපාර්තමේන්තුවේ අලෙවිසලකට යන්න වුවමනා වුණා. කොහොම හරි වෑන් එකේ හිටිය කට්ටියම එතනින් බැහැල විකුණන්න තියෙන මල්, පළතුරු, එළවළු පැළ අතපත ගාන්න පටන් ගත්තලු වෙන පැත්තක තිබුණු බද්ධ කළ පළතුරු ගස්, ඒ ඒ පැළවලට අදාළ පොහොර වර්ග සහ නොයෙකුත් දේවල්.
වෑන් එකේ ආපු එක්තරා ශිල්පිනියක් එකපාරටම එහි සේවක මහතෙකුගෙන් ඇහුවලු මල බද්ධයට හොඳ පොහොර නැද්ද? කියලා.
කට්ටිය උඩ බිම බැලුවලු, හිනාව නවත්තගන්න බැරුව.
ඇයි මම වැරදි වචනයක් කිව්වද? මට නුවරඑළිය පැත්තෙන් ලැබුණා ලස්සන බද්ධ කරපු රෝස මල් පැළයක්. ඒ පැළේට හොඳ පොහොර නැද්ද කියලයි මම ඇහුවෙ.
වෛද්‍ය උපදෙස් පිළිපදින අපූරුව
පහුගිය දවසක අපේ ජනප්‍රිය කලා ශිල්පිනියකට වෛරස් උණක් හැදිලා. ඒ මදිවට කැස්සයි හෙම්බිරිස්සාවකුත් හැදිලා.
ඕක වැඩිවෙන්න කලින් මෙයා ගියාලු දොස්තර කෙනෙකුගෙන් බෙහෙත් ගන්න.
මේක දවස් හතර පහකින් අඩු වේවි, ඒත් පරෙස්සම් වෙන්න වෙයි. ඇල්වතුරනම් අල්ලන්නම එපා, වෛද්‍යවරයා උපදෙස් දුන්නලු.
ගෙදර ආපු ගමන් දැක්කලු හෝදන්න තියෙන රෙදි ගොඩගැහිලා.
ඇල්වතුර අල්ලන්නෙ නැතුව ඉන්න කිව්වට අපේ ගෙදර හැම වැඩක්ම උණුවතුරෙන් කරන්නෙ කොහොමද? මම රෙදි ටික සේරම හේදුවා... ඇය ඇගේ සැමියා හවස ගෙදර ආපු ගමන් කිව්වලු.
දොස්තර ඇල්වතුර අල්ලන්න එපා කියන්නෙ හේතුවක් ඇතුවනෙ. ඔයා ඉතින් පණ්ඩිත වැඩමනෙ කරන්නෙ.. මහත්තයා කිව්වලු.
අනේ ඕක ඔච්චර ගණන් ගන්න එපා. මම ඇල්වතුරෙන් රෙදි හේදුවට, ඊට පස්සෙ අව්වෙ හිටගෙන හිටියා විනාඩි 15ක් විතර. ඒකෙන් බැලන්ස් වුණා.
ජංගම දුරකතනය සහ ජෝ මහත්තයා
අද චිත්‍රපට හෝ ටෙලිනාට්‍ය රූපගත කෙරෙන දර්ශන තලවල ලොකුම හෙනහුරා තමයි ජංගම දුරකතනය. අධ්‍යක්ෂකවරු කොච්චර කිව්වත් අද බොහොමයක් නළු නිළියන්ට ජංගම දුරකතනය දර්ශන තලයේ දී පවා නැතිවම බැරි අංගයක් වෙලා. ඒත් මුහුරත් උත්සවයේදීම මේ ගැන අවවාද කරන අධ්‍යක්ෂකවරු කිහිප දෙනෙක් අපට ඉන්නවා.
මීට කාලෙකට උඩදීම ඔහු ජංගම දුරකතන දර්ශන තලයේ දී භාවිත කිරීම ගැන දැඩි ලෙස විවේචනය කළා.
දවසක් අපේ ප්‍රවීණ රංගන ශිල්පී ජෝ අබේවික්‍රම මහතාත් සහභාගි වුණු ටෙලිනාට්‍ය මුහුරත් උත්සවයකදී ඔහු මේ ගැන එළිපිටම විරුද්ධත්වය පළ කළා.
උත්සවය අවසානයේ දී පැවති පුංචි තේ පැන් සංග්‍රහයක් අතරතුරදී අධ්‍යක්ෂකවරයා ළඟට කිට්ටුවෙලා ජෝ මහත්තයා අර ජංගම දුරකතන කතාව ටිකක් සැර වැඩියි කියලා කිව්වලු.
ජෝ මහත්තයා ඉතින් ජංගම දුරකතනයක් පාවිච්චි කරන්නෙ නැහැනෙ. මම කිව්වෙ ෂූටින් වෙලාවෙවත් ජංගම දුරකතනය ළං නොකර ඉන්න බැරි කෙනෙක් ඉන්නවනම් දැන්මම මේ වැඩෙන් අයින් වෙන්න කියලනෙ..
පහුවදා ජෝ මහත්තයා දැන්නුවලු ඒ වැඩෙන් අයින් වෙනවා කියලා.
► Text - Mithra
