කාලා කාලා අත්පුඩි ගහන ආච්චිලාගේ හෝටලේ

ගොඩක් දෙනෙක්ට තමන්ගේ මිත්තණිය ගැන තියෙන මතක අතරේ ඈ හදන රස ආහාර ගැන ලොකු මතකයක් තියෙනවා. ලංකාවේ අපිට නම් ආච්චි අම්මා හදන පොල් සම්බෝලේ, කොණ්ඩ කැවුම් ගැන දවස් ගාණක් වුණත් කතාකරන්න තරම් දේවල් තියෙනවා. හැබැයි ආච්චිලාගේ කෑමබීමවලට ආදරේ කරන්නේ අපේ රටේ උදවිය විතරන් නෙමෙයි. ලෝකෙ පුරාම ඉන්න මුණුපුරු මිණිපිරියෝ තමන්ගේ ආච්චි අම්මා හදන කෑම රසබලන්නේ දිව්‍ය භෝජන රසවිඳිනවා වගේ හැඟීමකිනුයි.

ඉතින් මෙන්න මේ අපූරු සංකල්පය උඩ නිර්මාණය කරලා තියෙන අවන්හලක් ගැනයි මේ කතාබහ. Enoteca Maria කියන මේ අවන්හල පිහිටලා තියෙන්නේ එක්සත් ජනපදයේ නිව් යෝර්ක් නුවරයි. 2016 අවුරුද්දේදදි ඉතාලි අවන්හලක් විදිහට පටන්ගත්තු මෙතැන අද වෙද්දි ලෝකෙ පුරාම ජනප්‍රිය වෙලා තියෙන්නේ ආච්චි අම්මාගේ අවන්හල (Grand Ma’s Kitchen) කියලයි. 

අවන්හලේ හිමිකරු වන ජෝසෙප් මුලින්ම හිතලා තියෙන්නේ මෙතැන ඉතාලි අවන්හලක් පටන්ගන්නයි. ඒත් තවත් සාමාන්‍ය ඉතාලි අවන්හලක් වෙනුවෙට ඉතාලියේ සාමාන්‍ය ගෙදරක හදන කෑම විදිහේ හැබෑ රසයෙන් යුත් කෑමබීම හදන්න ජෝසෙප්ට උවමනා වුණා. ඉතින් එයා කළේ ඉතාලියේ ඉන්න කෑම හදන්න කැමැති වයසක ආච්චිලා කිහිපදෙනෙකු අවන්හලට එකතු කරගත්ත එකයි. වැඩේ හිතුවටත් වඩා සාර්ථක වුණා. 

පළපුරුදු වෘත්තීය කෝකියෝ අතරේ මේ ආච්චි අම්මලාත් හරි හරියට වැඩ කරන්න ගත්තා. ව්‍යාපාරය ඔහොම සාර්ථකව ඉස්සරහට යද්දී ව්‍යාපාරයට තවත් අලුත් දේවල් එකතු කරන්න ජෝසප් කල්පනා කළා. ඉතින් එයා කළේ ඉතාලි කෑමවලට හිරවෙන්නෙ නැතුව ලෝක පුරා තියෙන වෙනත් කෑම සංස්කෘතීනුත් තමන්ගේ අවන්හලට එකතු කරගන්න එකයි. එතැනදීත් එයා විවිධ රටවල ඉන්න ආච්චි අම්මලා තමන්ගේ අවන්හලට ගෙන්වා ගත්තා. 
මේ වෙද්දි ආජන්ටිනාව, කසකස්තානය, ඇල්ජීරියාව, සිරියාව, ඩොමිනිකා, පෝලන්තය, ලයිබීරියාව, නයිජීරියාව, වෙනිසියුලාව, තුර්කිය, ප්‍රංශය සහ කොළොම්බියාව වගේ රටවල් රාශියකට අයත් ආච්චි අම්මලා මේ අවන්හලේ වැඩ කරනවා.  
මෙතැනට කොච්චර ඉල්ලුමක් තියෙනවාද කියනවා නම් එක්සත් ජනපදයේ විවිධ පැතිවල ඉඳන් වගේම පිටරට ඉඳන් සංචාරකයිනුත් මේ අවන්හලට පැමිණෙනවා. මේ ආච්චිලාට අමතරව එක සීයා කෙනෙකුත් මෙතැන සේවය කරනවා. ඔහුට තමයි සියලුම ආකාරයේ පැස්ටා වර්ග හැදීම භාරවෙලා තියෙන්නේ. 

අනිත් එක තමා මෙතැන ඒ ඒ දවස්වලට හැදෙන්නේ මොන මොන ආරේ කෑමවර්ගද කියලා අවන්හල කල් තියා අන්තර්ජාලෙට එකතු කරලා තියෙන නිසා, තමන්ට කැමැති පන්නයක ආහාර රසබලන්න මෙතැනට එන්න පුළුවන්. 
ඒ විදිහට මෙතැන ආහාර රස විඳින්න එන අය, හිතේ හැටියට කාලා බීලා සතුටුවෙලා අවන්හලෙන් පිටත්ව යන්නේ තමන් වෙනුවෙන් රසවත් කෑමවේලක් පිළියෙළ කරපු ආච්චිලා වෙනුවෙන් හිටගෙන අත්පොළොසන් දීලා ගෞරව කරමිනුයි. 

ද නිව්යෝර්ක් ටයිම්ස් ඇසුරෙන්

► Text - Suranga