හිටු බැටේ කාලකන්නි ජාතකේ

ශ්‍රී කාලකණ්නි ජාතකය FTT වැඩක්. කාලෙකින් දැකපු අමුතු වැඩක් කිව්වොත් හරි.  රටේ පසුගිය දවස්වල ඇතිවුණු තත්ත්වය පාදක කරගෙන තමයි මේ නිර්මාණය කරලා තියෙන්නේ. සම්පූර්ණ විරිඳුවක් තමයි යන්නේ Graphic වලින් හදපු තොරණක් එක්ක. 

මේ වීඩියෝ එක බලද්දී තොරණක් ළඟදී දැනෙන සැබෑ හැඟීම දැනෙනවා. ඉබේම මතුවෙනවා. YouTube බලන අපි දන්න දෙයක් තමා යම් දේශපාලන මතවාදයක් FTT නිරෑපණය කරන බව. පසුගිය කාලේ පුරා ඔවුන් කරපු නිර්මාණවලින් ඒක අපට අවබෝධ වුණා කිව්වොත් හරි. මේ වීඩියෝවත් එහෙමයි. කොහොමත් අපි YouTube Hit වලට මේක තෝරාගත්තේ මෙහි ඇති නිර්මාණාත්මකභාවය නිසාම විතරයි.

තාක්ෂණික පැත්ත ගැන බැලුවොත් Editing, Graphic උපරිමයෙන් ඔවුන් උපයෝගී කරගෙන තියෙනවා. ඒ වගේම විරිඳුවක රැව මේ Graphic තොරණට ගෙන ඒම අපූරු දෙයක්. ඒ වගේම ආධාර බාස්කට් එක නිර්මාණය අමුතුම වැඩක්. ඒ වගේම තොරණේ ආලෝක ධාරා ගමන් කරවීමත් අපූරැයි. හැබැයි පසුගිය කාලේ Digital තොරණ් අපි දැක්කා සමාජ මාධ්‍යවල web වල. ඒවායෙත් මේ විදුලි ආලෝක ධාරා නිරූපණය සිදුවෙලා තිබුණා. එහෙත් විරිඳු Graphic Mix කරලා මෙතරම් දුරකට සාර්ථකව තොරණක් සජීවීකරණය කරන්න පෙර කිසිවෙකුට හැකිවෙලා නෑ කියලා අපිට කියන්න පුළුවන්. 

මෙතන දී FTT ලා දේශපාලනඥයන්ගේ නම් ගම් රූප භාවිත කරනවා උපහාසය මතුවෙන්න. ඒ වගේ ඍජු වාග් ප්‍රහාර ඔවුන් එල්ල කරනවා. ටිකක් සැරට රිදෙන වචන කියනවා. මෙතනදී නම් යම් ගැටලුවක් මතුවෙනවා. ඍජුව එවන් භාවිතයක් නොකළානම් මෙහි නිර්මාණාත්මක අගය වැඩිවෙනවා. ඒ වගේම ඇතැමෙකුට මෙය අපහාසයක් විදිහටත් අර්ථකථනය කරගන්න පුළුවන්. කොහොම වුණත් මෙය පෙර අප නොදැකපු වෙනස්ම දෙයක්.

අපි මේ වීඩියෝව නරඹන කොට පැය 14ක් ඇතුළත Views තිස් දහසක් ලැබිලා තිබුණා. Like 3.4kක් වගේම unlike 48කුත් තිබුණා. FTT කියන්නේ Subscribe 69k තියෙන YouTube Channel එකක්. ඒ නිසා මේ වීඩියෝව වේගයෙන් ප්‍රසිද්ධ වෙයි කියලා අපිට කියන්න පුළුවන්. කොහොම වුණත් මේ වීඩියෝ නිසා FTT අර්බුදයකට මැදි නොවේවා කියලා අපි ප්‍රාර්ථනා කරනවා.

YouTube එකේ අපි දැක්ක දෙයක් තමයි මෑතකාලීනව සිදුවෙච්ච සිදුවීම් YouTubers ලා තමන්ගේ නිර්මාණය වෙනුවෙන් භාවිත කළේ අඩුවෙන්. එහෙම බැලුවාම මිනිසුන් 22ක් විශාල නිර්මාණයක් කරමින් FTT කලඑළි බැසීම හෙට අනිද්දාට තවත් නිර්මාණයක් එළියට එයි කියන්න හොඳ උදාහරණයක්.

► Text - Nisal   /   Pic – Internet