Art එකේ කැරට්ටුව..

- හඬ: දර්ශන් ධර්මරාජ්

අයුබෝවන්...
මේ දවස්වල කරන වැඩකටයුතු ගැන දර්ශන්ගෙන් දැනගෙන අපි අපේ වැඩේට බහිමු.. 

බෙනට් රත්නායකගේ අලුත් ෆිල්ම් එකේ  වැඩ පටන් ගන්න තියෙනවා හෙට අනිද්දට.. කලින් මම කරපු වැඩ කිහිපයක්ම රිලීස් වෙන්න තියෙනවා.. තව මම බාරගත් වැඩ කිහිපයක්ම තියෙනවා... ඕවා තමයි  ඉතින්.. 
දර්ශන් එයාගේ වැඩ ගැන කිව්වනේ දැන් අපි වැඩේට පටන්ගමු නේද? දර්ශන් එක පයින්....
මම මෙහෙම අහන්නම් එහෙනම්.. 

දර්ශන් ධර්මරාජ්ගේ ජීවිතයට සමීප වුණු, පේනවාට වඩා වැඩි දෙයක් හිතට කාවද්දපු,  සරලවම කිව්වොත් හිතට දැනුණු නිර්මාණයක් ගැන පොඩ්ඩක් කතාකරමුද..?  ඒක ගීතයක් වෙන්නත් බෑ. ඔබ සම්බන්ධ නිර්මාණයක් නම් කොහොමත් බෑ....  හරි නේද?
මෙහෙමයි එක නිර්මාණයක් තෝරගන්න එක ටිකක් අමාරු වැඩක්... මොකද මම ආසකරන මට දැනිච්ච නිර්මාණ කිහිපයක්ම තියෙනවා... චිත්‍රපට, කවි, නවකතාව, ටෙලිනාට්‍ය කියන විෂයන් ගත්තොත් මම අද කතා කරන්න හිතුවේ ටෙලිනාට්‍ය විෂය ගැන... ටෙලිනාට්‍ය විෂය ගත්තාමත් මම අසම කරන ටෙලි ගොන්නක්ම තියෙනවා.. තමිල්නාඩු ගැමි සාහිත්‍ය ඇසුරු කරගෙන නිර්මාණය වුණු මල්ගුඩි දවසැක් නාට්‍යයටත් මගේ විශේෂ කැමැත්තක් තිබුණත් අද මම කතා කරන්න හිතුවේ.. ඔෂීන් කියන ජපන් ටෙලිනාට්‍ය ගැන..  

දර්ශන්ට මෙච්චරම ඔෂීන්ව දැනෙන්න විශේෂ හේතුවත් තියෙන්න ඇති නේද?
සුගාකෝ හෂීඩා තමයි ඔෂීන් කියන චරිතය සහ මේ කතාව රචනා කළේ... 1984 තමයි ඔෂීන් මුලින්ම ජපානයේ පෙන්නලා තියෙන්නෙ... එවකට ජපානයේ තිබුණු දේශපාලනික, ආර්ථික, සමාජීය වටපිටාවට මුහුණ දෙන ධෛර්යසම්පන්න කාන්තාවකගේ භූමිකාව තමයි ඔෂීන් කියන්නෙ... ඇත්තටම මට ඔෂීන්ව දැනෙන්න ප්‍රධාන හේතුව වුණේ ඇගේ තිබුණු ධෛර්යවන්ත භාවය සහ ආත්ම ශක්තිය .. ඇත්තටම හරිම ආදර්ශමත් කතාවත් තමයි ඔෂීන් කියන්නේ... ජීවිතයට එන හැම බාධාවක් දරාගෙන ඒවා මැඬගෙන ජීවිතේ ජයගන්න විදිය තමයි මේ කතාවෙන් කියවෙන්නේ... අතිශය සියුම් මානව හැඟීම් සහ සංකීර්ණ ප්‍රශ්න එකිනෙක ගැටෙනකොට මනුස්සකම් දෝලනය වන විදිය මේ නාට්‍ය පුරාවට අපිට විශේෂ විදියකට දකින්න පුළුවන්... ඔෂීන් නාට්‍යයට රංගනයෙන් දායක වන නළුනිළියන්ගේ දක්ෂතාවත් මේ නිර්මාණ ප්‍රේක්ෂකයාගේ හදවතට දැනෙන්න බලපෑවා කියලා මම විශ්වාස කරනවා. අපි පුංචි කාලේ ආසාවෙන් බලමු කතාවලින් එකක් තමයි ඔෂීන් කියන්නෙ... මොන වැඩේ තිබුණත් ඔෂීන් යන වෙලාවට... අපි ටීවී එක ළඟට ඇවිත් ඉඳගන්නවා.. අපේ ගෙවල් තිබුණේ ආත්තම්මාගේ මහ ගේ කිට්ටුව නිසා ඉඳලා හිටලා මොනව හරි හේතුවක් මත ඔෂීන් බලන්න බැරි වුණොත් මම ඒ කතාව අහගන්නෙ අත්තම්මාගෙන්.. එයා හරි රහට ඒ කතා අපිට කියනවා...

විශේෂයෙන් කියන්නම ඕනෙ කාරණාව තමයි මේ නාට්‍ය ජපානයේ නිර්මාණය වුණ එකක්නෙ... අපේ සංස්කෘතියට ඔවුන්ගේ සංස්කෘතිය සමාන නැති වුණත් අපිට ගොඩක් මේ නාට්‍යය දැනෙනවා... ඒකට විශේෂම හේතුව තමයි අපේ හඬකැවීම් ශිල්පීන්ගේ දක්ෂතාව. ටයිටස් තොටවත්ත මහත්තයා තමයි ශ්‍රි ලාංකික අපිට මේ නාට්‍ය සමීප කරන්නෙ.. මට මතක විදියට ඔෂීන් පුංචි කාලේ හඬ කවන්නේ පබෝදා..  ඔෂීන්ගේ තරැණ කාලේ හඬ කවන්නේ රසාදරී පීරිස්..

නිර්මාණයක් රසවිඳිද්දී ඒ නිර්මාණය ඇතුළේ ඉන්න චරිත අපේ කරගන්න අපි කැමතියි...  ඔබ ඔෂීන් ටෙලිනාට්‍යයේ කැමති චරිතය කවුද?
මට මේ ටෙලිනාට්‍යයේ හැම චරිතයක්ම වගේ විශේෂයි...  නිර්මාණවේදයේ තියෙන විශේෂත්වයත් ඒකම තමයි... ටෙලියේ ඉන්න ප්‍රධාන චරිත පමණක් නෙමේ සෙසු සුළු සුළු චරිත පවා හරිම විශේෂ විදියට ඔහු නාට්‍ය තුළ හසුරුවනවා... ඔෂීන් තමයි මේ නාට්‍යයේ ප්‍රධාන චරිතය. ඇයගේ චරිතයට තමයි මම වැඩිපුර ඇලුම් කරන්නෙ.. ඇයට රංගනයෙන් දායක වෙන්නෙ අයකෝ ක‍බොයාෂි.
මේ ටෙලිනාට්‍යයේ නළු නිළියන්ගේ රංගනය ගැනත් කියන්නම ඕන කාරණාව තමා... ඔවුන් සියල්ලන් තමන්ගේ චරිතවලට ඉතා හොඳ සාධාරණයක් ඉටුකරනවා... අපිට කොයි වෙලාවකවත් හිතෙන්නෙ නෑ මේ ශිල්පීන් රංගනයක් කරන බව... 

දර්ශන්ගේ සිත සංවේදී කරපු ඔෂීන් ටෙලිනාට්‍යයේ තැනක් දෙකක් මතක් කරමුද...
මට නම් ඔෂීන් නාට්‍යයේ සියලුම් තැන් ඉතා සංවේදීයි... ඔෂීන්ගේ පුංචි කාලේ ඉඳලා එයා වැඩිමහලු වෙන තෙක්ම... කෙටියෙන්ම කිව්වොත් ඔෂීන්ගේ මුළු ජීවිතය සංවේදී එකක් කිව්වොත්... මම වැරදි නෑ... 

දර්ශන්ගේ සැබෑ ජීවිතයේ මෙවැනි චරිත හමුවෙලා එහෙම නැද්ද?
ඔෂීන් වගේම චරිත නැතත්... ඔෂීන්ගේ සමහර ගුණාංග තිබෙන චරිත කිහිපයක්ම මට මගේ සාමාන්‍ය ජීවිතයේ හමුවෙලා තියෙනවා...  ඩ්‍රාමා නැති කාලෙට මම නිකන් ඔෂීන් වගේ තමයි... සෑහෙන මහන්සි වෙන්න වෙනවා..... දර්ශන් එහෙම කිව්වේ හඬ නගා හිනාවෙලා... 

මේ නාට්‍යය අවසාන කොටසෙදී ඔබට මොනවගේ හැඟීමක්ද හිතට ආවේ.. ?
මේ ජීවිතය කියන්නෙ හරිම වෙහෙසකර එකක්.. කියන එක තමයි මගේ ඔළුවට මුලින්ම ආවේ..  ඒ වෙහෙස මහමෙරක් සේ දරාගෙන ජීවිත දිනන්න පුළුවන් කියලා මට හිතුණා... මිනිහෙකුගේ ආත්ම ශක්තියට මොනතරම් බලයක් තියෙනවද.. මානව හැඟීමෙන් යුතුවත් ජීවිතය ගතකිරීමේ වැදගත්කම සියුම්ව අපේ හදවත්වලට මේ නිර්මාණය ඔස්සේ දුවනවා.

► Text - Danushka Wijesiri   /   Pic – Internet