වත්මන් පරපුර සහ පෙර පරපුර අතර තියෙන ලොකුම වෙනස තමයි මේ පරපුරේ බොහෝ අයට වැඩක් කරද්දී මහන්සි වෙන්න, කැපවෙන්න, ඉවසන්න පුරුද්දක් නැති එක. කලා ක්ෂේත්‍රයේ විතරක් නෙවෙයි මේ විෂබීජය සමාජයේ හැමතැනකටම පැතිරිලා ගිහින් තියෙන්නෙ. තාක්ෂණික අතින් අපි කොයිතරම් දියුණුවෙලා හිටියත්, ප්‍රායෝගික දැනුම හා සමාජ ආශ්‍රය නැතිකම තමයි බොහෝවිට මේ තත්ත්වයට ප්‍රධාන හේතුව වෙලා තියෙන්නෙ. 

අද මේ තීරුවේ අලුත් අය මුහුණදීපු යම් යම් අකරතැබ්බයන් ගැන තමයි අපි අවධානය යොමු කරන්නෙ.
ඔන්න පහුගිය දවසක රඟපාන්න පුදුම ආසාවකින් හිටිය කොල්ලෙකුට අවස්ථාවක් හම්බවුණාලු ටෙලිනාට්‍යයක පොඩි චරිතයක් රඟපාන්න.

ඒත් මළාට දෙබස් මතක හිටින්නෙ නැහැල්ලු මේ කොල්ලට. අධ්‍යක්ෂකට මළ පැනලා බණිනවලු කොල්ලට පලු යන්න. දර්ශන තලයෙන් කොල්ලව එලෙව්වෙ නැති ටික විතරලු. ඒත් කොල්ලට ගාණක්වත් නැහැලු.
අනේ සර් මට තව බණින්න. හොඳටම බණින්න සර්. බැණලා මාව හදන්න සර්. පින් සිද්ධවෙයි මාව බැණලා හරි හදන්න සර්, ඔහු පින්සෙණ්ඩු වුණාලු.

මෙගා කියන්නෙ බඩවැල් නාට්‍යටද?

මේකත් අලුතින් රඟපාන්න මෙගා ටෙලිනාට්‍යයකට සම්බන්ධ වුණු තරුණයෙක් ගැන කතාවක්. රඟපාන්න ඇවිත් තුන්වැනි දවසෙ තමයිලු මෙයා මේ නාට්‍යයේ නම දැනගෙන තියෙන්නෙ. 

කොල්ලා ඉක්මනින් වැඩේ අල්ලගත්තා, ඒත් ඉතින් ටියුබ්ලයිට්.ඔන්න සති දෙකක් විතර ගියාට පස්සෙ මේ කොල්ලා ඒකෙ රඟපාන ප්‍රවීණ නිළියකගෙන් ඇහුවලු එයා රඟපාන මේ මෙගා ටෙලිනාට්‍ය ඩේලි යන එකක්ද, සෙනසුරාදා/ ඉරිදා යන එකක්ද කියලා. ප්‍රවීණ නිළියත් මුලදී අන්දුන් කුන්දුන් වෙලා බලන් ඉඳලා පස්සෙ කිව්වලු ඔව් ඔව් බං මෙගා නාට්‍ය කියන්නෙ ඔය හැමදාම යන බඩවැල් නාට්‍ය තමයි, කියලා.

ඇඳලා දීපු පාරේ සර්...

එක්තරා අලුත් චිත්‍රපටයක නිෂ්පාදන අංශයට අලුත් ඩ්‍රයිවර් කෙනෙක් ආවලු. ගමේ කොල්ලෙක් නිසා කොළඹ පාරවල් ගැන ඒ හැටි දැනුමකුත් තිබුණෙ නැහැ. චිත්‍රපටයට සම්බන්ධ වැඩවලට වාහනෙන් එළියට ගියාම නිෂ්පාදන කළමනාකරු එයාට යන පාරවල්, හැරෙන හන්දි වගේ ඒවා පැහැදිලිව කොළයක ඇඳලා දෙනවලු. 

ඔන්න දවසක් ෂූටින් අතරතුර හදිසියේ බඩු වගයක් ගන්න මේ රියදුරා යැව්වලු වාහනේ. යන පාරවල් එහෙම ඇඳලා කඩේ නමත් ලියලා මෙයාව යවලා තියෙන්නෙ. කඩේ තියෙන්නෙ නුගේගොඩ කිට්ටුව. ෂූටින් කරන තැන ඉඳලා එතනට යන්න මිනිත්තු 5ක්වත් යන්නෙ නැහැලු. ඒත් මිනිත්තු 20කුත් ගිහින් මේ රියදුරාගෙන් කෝල් එකක්වත් නැති නිසා නිෂ්පාදක කළමනාකරු ඔහුට කෝල් එකක් ගත්තලු.
වැඩේ හරිද? දැන් එන ගමන්ද?

නෑ නෑ. තාම යන ගමන්. සර් ඇඳලා දීපු පාරවල් දිගේ තමයි යන්නෙ, රියදුරා කිව්වලු.
පිස්සු නටන්න එපා. ඔයා පාර වරද්දගෙන. දැන් කොයි හරියෙද ඉන්නෙ කියලා කියන්නකො. ඔය හරියෙ කඩේක පේන බෝඩ් එකක් කියවන්නකො ඉන්න තැන බලාගන්න.
සර් මෙතන තියෙනවා බෝඩ් එකක් ජංගම දුරකතන අලුත්වැඩියා කරනු ලැබේ කියලා.

► Text - Mithra