කුලේ මල මඟුලක් ඕයි!

අස්වැන්න නෙලා ගන්න ඔන්න මෙන්න තියෙන කෙත්වතු යායක් මැද්දෙන් පටු තාර දැමූ මාර්ගයක් පේනතෙක් මානයක් යනකම් තියෙන්නේ. මේ මාර්ගයේ ඉඳහිට වාහන යනවනම් පේන්නවත් නැහැ. මේ ප‍්‍රදේශයේ මිනිස්සු ජීවත් වුණත් ඔවුන්ගේ නිවාසනම් පිහිටලා තියෙන්නේ එකකට එකක් බොහෝ දුරකින්. මේ මාර්ගය දිගේ පොලිස් ජීප් රථයක් වේගයෙන් ධාවනය වෙනවා. ඒකේ ඉදිරි අසුනේ ඉන්නේ අද අපේ කතාවේ නායකයා. ඔහුගේ නම අයාන්. ඔහුට තමන්ගේ ප්‍රේමවන්තිය වන අදිතිව මේ පාරේ යද්දී මතක් වෙනවා. ඒත් ඒ මතකයට බාධා කරන්නේ ඔහුට විස්තර කියන නිලධාරියා.

පොලිස් නිලධාරියා - එ ගෑනු ළමයි දෙන්නා නිවුන්නු. දෙන්නම මරලා ගමේ කෙළවරේ ගහක එල්ලලා. දෙන්නගෙම සම්බන්ධයක් අහුවෙලා එයාලගේ තාත්තා දෙන්නම එල්ලලා මරලා.

අයාන් - තුන්වෙනි කෙල්ල කෝ?
පොලිස් නිලධාරියා - එයා ගැන කිසිම ආරංචියක් නැහැ සර්. 

අයාන් තමයි කුලයෙන් අඩු කියා සැලකෙන යුවතියන් දෙදෙනෙක් එල්ලා මරා දමා තියෙන එක හොයන්නේ. ඔහු මේ වෙලාවේ ඉන්නේ ඔහුගේ කාර්යාල කාමරයේ තියෙන ඔහුගේ මේසය අසල පුටුවේ වාඩිවෙලා ඔහුගේ හිසට ඉහළින් බිත්තියේ සවි කරලා තියෙන මහත්මා ගාන්ධිගේ ඡායාරූපය දිහා බලාගෙනයි. ඔහු අදිතිත් එක්ක දුරකථනයෙන් කතා කරමින් ඉන්නේ.
ආදිති - ඒගොල්ලෝ අඩු කුලේ කට්ටියද?

අයාන් - මටයි ඔයාලටයි එයාලව පේන්නේ නෑ. අපි වෙලාවකට එයාලට කුලහීනයෝ කියනවා. එහෙමත් නැත්නම් ගෝත්‍රිකයෝ කියලා කියනවා. ඒත් ඒගොල්ලන්ට කවදාවත් සමාන්‍ය ජනතාව වෙන්න ලැබෙන්නේ නැහැ. ඒත් ජනයාගේ ප‍්‍රමාණය කවදාවත් සාමාන්‍ය ජනතාව විදියට එයාලව ගණනය කරන්නේ නැහැ. යුක්තිය හිඟාකන්න අවශ්‍ය දෙයක් නොවුණත් ඒගොල්ලෝ ගොඩාක් එහෙම කරලා තියෙනවා. ඒත් වැඩක් වෙලා නැහැ. ඔයාට ඕන හීරෝ කෙනෙක්නේ අදිති..
අදිති - මට හීරෝ කෙනෙක් වැඩක් නෑ අයාන්. ඒත් ඒ මිනිස්සු හීරෝ කෙනෙක් එනකම් බලාගෙන ඉන්න අසරණ මිනිස්සු.

මේ කෙත්වතුවලින් වටවෙලා තියෙන ඒ ගම්මානයේ සිදුවීමක්. මෙතන යුරෝපීය ඇඳුමින් සැරසුණු උඩු රැවුල වැවූ අයාන් හිටගෙන ඉන්නවා. ඔහු අසල නිල ඇඳුමින් සැරසුණු පොලිස් නිලධාරීන් කිහිපදෙනෙක් හිටගෙන ඉන්නවා.
අයාන් - රිපෝර්ට් එකේ මොනවද ලියලා තියෙන්නේ?
පොලිස් නිලධාරියා - සර් ඒ කේස් එක සීරියස් නෑ වගේ පේන්නේ.

අයාන් - කවද්ද සීරියස් වෙන්නේ?
පොලිස් නිලධාරියා - ඒගොල්ලන්ගේ සිද්ධිනම් නිතරම වෙනවනේ සර්.
අයාන් ගාවට ඒ පොලිස් ස්ථානයේම ඉන්න මහත පොලිස් නිලධාරියෙන් එනවා. 

මහත පොලිස් නිලධාරියා – an honor killing සර්
ගමේ මිනිස්සු කට්ටියක් ඇවිත් අයාන්ව හමුවෙලා ඔහුට වැඳගෙන ඔවුන්ට සිද්ධවෙලා තියෙන අසාධාරණය ගැන කියනවා.
ගමේ මිනිස්සු - අපේ දුවලව මරලා දාලා උන් අපිටම වරද පටෝනවා.
කාන්තාවක් - අංශු නහාරියා පූජාගේ කම්මුලට ගැහුවා.
ඒගොල්ලන් රුපියල් තුනක් වැඩියෙන් ඕන කිව්වා.
අයාන් - කීයක්ද කිව්වේ?
කාන්තාව -රුපියල් තුනක්.
අයාන් ඇයගෙන් ප‍්‍රශ්න කරලා අංශු නහාරියාව හොයාගෙන යවනවා. ඔහුව අත්අඩංගුවට අරගෙන අයාන් ඔහුගෙන් ප‍්‍රශ්න කරනවා. 
නහාරියා - ඒගොල්ලෝ ඒගොල්ලන්ගේ තැන තියන්න ඕන සර්.
වැඩ නවත්තන්න බැහැ.
අයාන් - මොකක්ද තැන?
නහාරියා - ඒගොලන්ගේ තැන අපි මතක් කරලා දෙනවා සර්.
ඊට ටික දවසකට පස්සේ ඒ ගම්මනයේ බොහෝ තැන් ගිනිබත් කරලා. අයාන් පොලිස් නිලධාරියෙක් එක්ක ඒ ගිනි අරගෙන අළු බවට පත්වුණු ගොඩනැගිල්ලක් ගාව කතාබහ කරමින් ඉන්නවා.

අයාන් - කවුද මේක කළේ?
පොලිස් නිලධාරියා - මහන්තිජීගේ කොල්ලො කරලා තියෙන්නේ සර්.
අයාන් - මහන්තිජී කියන්නේ කවුද?
පොලිස් නිලධාරියා - මහන්තිජී.. මහන්තීජී කියන්නේ...
අයාන් - එයා  ඉහළ කුලේක කෙනෙක්ද?
තරුණයෙක් - එයා බ‍්‍රාහ්මණ කුලේ කෙනෙක් සර්.
අයාන් - ජාතව ඔයා අඩුකුලේ කෙනෙක් නේද?
පොලිස් නිලධාරියා - ඔව් සර්.

අයාන් - එහෙනම් ඒ කොල්ලෝ ගැන ඔයා දන්නවා ඇතිනේ.
පොලිස් නිලධාරියා - නෑ සර් මම චමාර් කුලේ. ඒගොල්ලෝ පස්සි කුලේ.

අයාන් - ඔය කොයි කුලේද?
තරුණයා - මම කයස්ත් කුලේ සර්. 
අයාන් - මගෙ කුලේ මොකක්ද?
තරුණයා - ඔයා බ‍්‍රාහ්මණ කුලේ සර්.

අයාන් - ඒ කියන්නේ මමයි ඒ මහන්තිජීයි එකම කුලේ නිසා මමත් එයා වගේ.
තරුණයා - නෑ නෑ සර්.. එයා කන්‍යකුබ්ජ් බ්‍රාහ්මන කුලේ සර්. ඔයා ඊටත් ඉහළ කුලේ. සර්යුපරින් බ‍්‍රාහ්මණ කුලේ.

අයාන් - මොන මඟුලක්ද මෙතන වෙන්නේ?
ඔහුට කුලමල ගැන අහලා ගොඩාක් කේන්ති යනවා. ඔහු අසභ්‍ය වචනත් කියනව. ඒ යුවතියන් කණ්ඩායමක් විසින් සමූහ දූෂණයට ලක් කරලා මරා දමලා තියෙන්නේ කියලා ඔහු පරීක්ෂණවලින් හොයා ගන්නවා. අයාන් පොලිස් නිලධාරීන් සමඟ එල්ලා මරා දැමූ යුවතියන්ගේ සිරුරු හොයන්න උත්සාහ කරනවා. ඔහු තමන්ගේ ඉහළ නිලධාරීන් එක්කත් නිර්භීතව සටන් වදිනවා.

සුන්දර කතාවක් නේද? ඒත් මේ මනරම් කතාවේ ඉතුරු හරිය දැනගන්නනම් ඔබට අනුභව් සිංහා අධ්‍යක්ෂණය කළ ඔහු විසින්ම සී ස්ටුඩියෝ වෙනුවෙන් නිෂ්පාදනය කළ 2019 ජුනි 28 වෙනිදා තිරගත වෙන ආර්ටිකල් 15 කියන හින්දි සිනමාපටය නරඹන්නම වෙනවා. ආර්ටිකල් 15 හින්දි සිනමාපටයේ කතාව ලියලා තියෙන්නේ ගෞරව් සෝලන්කී සහ අනුභව් සිංහා. සප්ත ස්වරයෙන් මේ සිනමාපටය හැඩ කරලා තියෙන්නේ අනුරාග් සයිකියා, ඩේවින් සහ ගින්ජර්. මේ සිනමාපටයේ පසුබිම සප්ත ස්වරයෙන් හැඩ කරලා තියෙන්නේ මන්ගේෂ් ධාක්ඩේ විසිනුයි. 2014 වසරේ බදාවුන් ගැන්සිය විසින් කරන ලද සමූහ ස්ත‍්‍රී දුෂණය සහ 2016 වසරේදී ඌනා ෆ්ලොගින් සිදුවීම අනුසාරයෙන් තමයි මේ සිනමාපටය නිෂ්පාදනය කරලා තියෙන්නේ. දැන් ඔබට කියන්න හදන්නේ මේ සිනමාපටය හැඩ කරන්න එහි චරිතයන්ට පණ දෙන කට්ටිය ගැනයි. මුලින්ම අයාන් ගැන කියලා ඉන්න ඕනනේ.

ආයුශ්මාන් ඛුරානා අයාන්ගේ චරිතයට පණ පොවද්දී ඔහුගේ ප්‍රේම්වන්තියගේ චරිතය වන අදිතිගේ චරිතයට පණ පොවන්නේ 1987 දෙසැම්බර් 22 වැනිදා ඉන්දියාවේ මහාරාෂ්ට‍්‍රා ප‍්‍රාන්තයේ මුම්බායි නගරයේ ඉපදුණු දැනට ඉන්දියාවේ කේරලා ප‍්‍රාන්තයේ කෝචිවල ජීවත්වෙන 2010 වසරේ පටන් නිළියක් වගේම නිරූපණ ශිල්පිනියක් විදිහට කටයුතු කරන හුරුබුහුටි එක වරක් දැක්කම ආපහු හැරිලා බලන්න තරම් රූප ශ්‍රීයක් තියෙන ඇයයි. නම කියන්න කලින් ඇය ගැන තව දෙයක් කියන්නම ඕන. ඒ තමයි ඇය වැඩිපුරම මලයාලම් සිනමාපටවලින් තමයි අපිට දැකගන්න පුළුවන්වෙලා තිබුණේ.

ඔය කිව්ව දෙන්නට අමතරව මේ සිනමාපටයේ සයානී ගුප්තා, කුමුදු මිශ‍්‍රා, මනෝජ් පහ්වා, නස්සාර්, අශීෂ් වර්මා, ප‍්‍රර්ථනා බෙහෙරේ, ශෂන්ක් ශෙන්දේ, ශුෂිල් පාන්ඩේ, අන්කූර් විකාල්, ශන්කර_ යාදව්, ශුබ‍්‍රජ්යෝතී භාරත්, රොන්ජීනි චක‍්‍රබෝර්තී, මොහම්මද් ශෙෂාන් අය්යුබ්, මීර් සර්වාර් සහ රාජීව් සිං කියන නළු නිළියන් චිත්‍රපටයට එකතුවෙලා තියෙනවා. මේ හින්දි සිනමාපටයේ තියෙන මන බඳින ගීතවල පද අමුණලා තියෙන්නේ ශකීල් ආස්මී, ස්ලෝව් චීටා, දී එම්.සී, කාම් භාරී සහ අපිට් ෆයර් කියන පුදගලයන් සහ කණ්ඩායම්.

► Translation — Chandana Waravitage