අපේ සමහර නිර්මාණකරුවො තමන්ගෙ වාහන පදවන්නෙ නැහැ. ඒ වැඩේට වෙනම රියැදුරෙක් තියාගෙන ඉන්නවා. මොකද නිර්මාණකරුවෙකුට ඔළුව නිදහසේ තියෙන්න ඕනෙලු.
ඒත් ඉතින් තමන්ට ගැලපෙන හරි රියැදුරෙක් හොයාගන්න එක ලේසි පහසු වැඩක් නෙවෙයි. 

අපේ එක්තරා නිර්මාණකරුවෙකුට ළඟදී රියැදුරෙක් හම්බවෙලා තියෙනවා. 
හැබැයි ඉතින් එයාගේ වැඩේම හෝන් ගහන එකමලු. සිග්නල් එකේ රතු එළියට නවත්තලා හිටියත් මෙයාගේ හෝන් ගැහිල්ල නතර වෙන්නෙ නෑ.
බැරිම තැන මේ නිර්මාණකරුවා රියැදුරාට කිව්වලු ඔය හෝන් ගහන පුරුද්ද වහාම නවත්තන්න කියලා. 
ඇයි සර් තෙල් පිච්චෙනවද?

තෙල් නෙවෙයි ඕයි මගේ ලේ පිච්චෙනවා.

මගේ නොම්බරේ මගේ ෆෝන් එකේ

ජංගම දුරකතනවල විවිධ අය දාන විවිධ සෙල්ලම් ගැන අප මීට කළිනුත් කතා කරලා තියෙනවනෙ.
ගීතා ස්ටෝර්ස්, රංජනී හාඩ්වෙයාර්, දමයන්ති ෆාමසි කියලා ෆෝන්වල නම් සේව් කරගෙන ඉන්න කට්ටිය අපි දන්නවා.

ඒ වගේම තමයි අද සමහර අයට ජංගම දුරකතන අංක දෙක තුනක් නිසා ඒ අයගේ මහත්තුරු ෆෝන්වල අදාළ නොම්බර සේව් කරගෙන තියෙන්නෙ. Wife 2, Wife new, Wife Latest කියලාලු. නෝනලත් ඒ වගේමයි Husband 2, Husband India, Husband Thmporary කියලලු save කරන්නෙ.

ඒ හැම දෙයක්ම මැද්දෙ අපේ පරණ ශිල්පියෙක් ඉන්නවා. එයාට එයාගේ නොම්බරේවත් දන්නේ නැහැ. කවුරු හරි නොම්බරේ ඇහුවොත් ෆෝන් එකේ My Number කියලා සේව් කරගෙන තියෙන නොම්බරේ බලාගෙන තමයි කියන්නේ. 

සර් මම හන්දියේ

එක්තරා ටෙලි නාට්‍යක සුළු චරිතයක් රඟපාන්න අලුත් ශිල්පියෙකු තෝරගත්තාලු.

එයාගේ ෂූටින් තියෙන දවසේ උදේ 8 වෙද්දී ලොකේෂන් එකට එන්න ඕනෙ කියලා අධ්‍යක්ෂ එයාට කීප වරක්ම මතක් කළාලු.
“කිරුළපන හන්දියට ඇවිත් මට කෝල් එකක් දෙන්න මම ඔයාව එක්කරගෙන එන්න බයික් එකක් එවන්නම්. අධ්‍යක්ෂකවරයා මේ තරුණයාට කිව්වාලු. 
ඔන්න දැන් ෂූටින් පටන්අරන් 9ත් වුණා. 10ත් වුණා මේ කොල්ලා තාම ආවෙ නැහැල්ලු. 

අධ්‍යක්ෂකට මළ පැන්නලු. කෝල් එකක් අරගෙන කතා කරලා තරැණයාට. “මොකද්ද අයියෙ උදේ 8ට එන්න කිව්වෙ. දැන් දහයත් පහුවෙලා. කොයි හරියෙද දැන් ඉන්නෙ කියනවා. අධ්‍යක්ෂ ඇහුවලු. 
“සර් මම හන්දියෙ ඉන්නෙ.

“හා ඔහොම ඉන්නවා මම බයික් එකක හාදයෙක් එවන්නම්..
“සර් හැබැයි මම තාම ඉන්නෙ අපේ ගෙවල් ගාව මීගමුව හන්දියේ.. 

► Text - Mithra