Mirai සරසන අපේ පාලම

උඩරට දුම්රිය මාර්ගයේ කොටසක් ඉන්දීය සිනමා පටයක රූගත කිරීම වෙනුවෙන් වසා දැමුණු පුවත අප කාගේත් අවධානය දිනා ගත්තා. ඒත් ඇත්තටම මේ සිදුවෙන්නේ මොකක්ද කියන කාරණාව බහුතරයක් දෙනාට පැහැදිලි වුණේ නෑ. එනිසාම මේ සිනමා පටය සහ සිදුවෙමින් පවතින දේ පිළිබඳව පුංචි අදහසක් ඔබට ලබා දෙන්න අපි තීරණය කළා.

මෙය නිර්මාණය වෙන්නේ ඉන්දීය තෙළිඟු‍ චිත්‍රපටයක් විදිහට. මේ චිත්‍රපටය නම් කරලා තියෙන්නේ “Mirai” කියලා. දැනට තිබෙන තොරතුරු වාර්තා අනුව 2025 දී තිරගත වීමට නියමිත මෙම චිත්‍රපටය ක්‍රියාදාම සහ ත්‍රාස්‍ය පිරුණු විද්‍යා ප්‍රබන්ධ ගණයට අයිති වන නිර්මාණයක්.

අධ්‍යක්ෂවරයා ලෙස කටයුතු කරන්නේ කාර්තික් ගැට්ටම්නේනින්. ඔහු ජනප්‍රිය ඉන්දියානු තරුණ චිත්‍රපට අධ්‍යක්ෂවරයෙක්. 2013 ඉඳලා සිනමා කර්මාන්තයත් එක්ක වැඩ කරන ඔහුට ජනප්‍රිය නිර්මාණ කිහිපයක්ම දැනටමත් බිහි කරන්න අවස්ථාව සැලසිලා හමාරයි.

“Mirai” තරමක් විශේෂිත සිනමා පටයක් වෙයි කියලා දැනටමත් කතාබහක් නිර්මාණය වෙලා තියෙනවා. මේ නිර්මාණය සඳහා Teja Sajja, Manoj Kumar Manchu, Ritika Nayak, Koushik Mahata වගේ නළු නිළියන් පිරිසක් දායකත්වය සැපයීම ඒකට එක හේතුවක්. ලොව පුරා රටවල් ගණනාවකම මෙම නිර්මාණයට අදාළ පටිගත කිරීම් සිදු වෙනවා. ශ්‍රී ලංකාව මේ සඳහා තෝරා ගැනීම සම්බන්ධයෙන් තියෙන්නෙත් බොහොම අපූරු කතාවක්.

මේ තෝරා ගැනීමට ප්‍රධානතම හේතුව තමා ඇල්ල සහ දෙමෝදර අතර පිහිටි ආරුක්කු නවයේ පාලම (Nine Arch Bridge). මෙම තෙළිඟු‍ චිත්‍රපටයේ සටන් ජවනිකා සහ ගීත ඇතුළත් දර්ශන කිහිපයක් රූගත කරන්න තෝරාගෙන තිබුණේ තුර්කියේ ආරුක්කු පාලමක්. කොහොම වුණත් වාර්තා වෙන පරිදි පසුව, ඊට වඩා ලංකාවෙ ආරුක්කු නවයේ පාලමේ ඇති සුන්දරත්වය වගේම පිරිවැය අඩුවෙන් මෙම කටයුතු සිදු කිරීමට හැකියාව මත නිෂ්පාදකයන් ලංකාව තෝරාගෙන තියෙනවා.

ඉතින් මේ වෙනකොට ඉන්දු ලංකා ඒකාබද්ධ චිත්‍රපටයක් ලෙස මෙම නිර්මාණය පිළිබඳ බොහෝ දෙනෙක් කතා කරන්න පටන් අරගෙන. ඒත් ඉන්දු ලංකා ඒකාබද්ධ චිත්‍රපටයක් ලෙස හැඳින්වුවත්, ආරුක්කු නවයේ පාලමේ දර්ශන හැරුණුකොට ඔවුන් ලංකාවේ වෙනත් දර්ශන රූගත කරන බවක් තවමත් වාර්තා වෙන්නේ නැහැ. කොහොම නමුත් මෙය රාජ්‍ය තාන්ත්‍රික මට්ටමෙන් අවසර ලබාගෙන සිදුකෙරෙන ව්‍යාපෘතියක්. මෙම දර්ශන තල සඳහා සැලකිය යුතු විදේශ විනිමයක් ශ්‍රී ලංකාවට ලැබෙනවා.
මේ රූගත කිරීම් නිසා උඩරට දුම්රිය ධාවනය, ඔක්තෝබර් 09 - 15 දිනවලදී, උදෑසන 7.30 සිට සවස 5.30 අතරතුර කාලයේදී, කොළඹ කොටුව සිට ඇල්ල දුම්රිය ස්ථානය දක්වා පමණක් සීමා කිරීමට කටයුතු යොදලා තිබුණා.

මාස ගණනාවක සිට පැවති සාකච්ඡාවල ප්‍රතිඵලයක් අනුව මේ සඳහා අදාළ නිෂ්පාදන කණ්ඩායමට අවසර ලබාදීමට ශ්‍රී ලංකා රජය කටයුතු කරලා. දුම්රිය දෙපාර්තමේන්තුව නම් සඳහන් කළේ මෙම සිනමා පටය සංචාරක ආකර්ෂණය ලැබීමට ද හේතුවක් වෙන්න පුළුවන් කියලා. එහි යම් සත්‍යතාවයක් තිබුණත් ඇතැමුන් වාර්තා කර තිබූ පරිදි එය Singham Again චිත්‍රපටයේ රූගත කිරීමක් නොවේ. එම නිසාම සමස්තයක් විදිහට විශාල සංචාරක ආකර්ෂණයක් මෙම නිර්මාණයෙන් පමණක් ලැබේවි කියනඑක සම්පූර්ණයෙන් පිළිගන්න අපිට අපහසුයි.

කොහොම නමුත් ශ්‍රී ලංකාවට ලැබෙන මූල්‍ය වාසිය සහ ඉන්දීය සිනමා කර්මාන්තය ගැන අවධානය මෙහිදී වැදගත් කොට සලකන්න පුළුවන්. මේ වන විටත් ආරුක්කු නවයේ පාලම සහ මෙම දුම්රිය ගමන ලොව පුරා සංචාරකයන් අතර ඉහළ ආකර්ෂණයක් සහිත ගමනක්. මෙම දුම්රිය මාර්ගයේ ඡායාරූප ගැනීම ලෝ වටා සැරිසරන සංචාරකයන් අතර සිහිනයක්ව තිබෙනවා. ඒ නිසාම එය අගය කළ යුතු නමුත්, වඩාත් සාධනීය පැහැදිලි කිරීම් සහිතව මෙවන් කාර්යයන් වෙත එළඹීමේ වැදගත්කම

අප බලධාරීන්ට සිහිපත් කරන්න ඕනෑ.
කොහොම නමුත් පොදුවේ මෙම ව්‍යාපෘතිය සම්බන්ධව ඇතැමුන් සිදු කරන විවේචන ද පදනමක් සහිත ඒවා නොවෙයි. ඕනෑම චිත්‍රපටයක් සැබෑ දර්ශන තලවල රූගත කිරීමේදී මහජනතාවට යම් අපහසුතා සිදුවන එක නතර කරන්න බැහැ. නමුත් එය සිනමාවේ අවශ්‍යතාවයක් නම්, ඒ ඔස්සේ සැලකිය යුතු පරිමාවක විශාල හානියක් සිදු නොවන්නේ නම්, ඉතාම හොඳ මූල්‍ය ගනුදෙනුවක් හරහා මෙවැන්නකට ඉඩ දීමේ වරදක් නැහැ. කොහොම නමුත් සියල්ල විනිවිදභාවයෙන් සිදුවීමේ අවශ්‍යතාවය නම් අවධාරණය කළ යුතුමයි.

කොහොම නමුත් මෙම සිනමා අත්දැකීම ශ්‍රී ලාංකිකයන් විදිහට අපිට නැවුම් දෙයක්. ලොව කොහේ හෝ තැනක අපේ සලකුණක් දක්නට ලැබීම අවංකවම අපිට සතුටක් බව අමුතුවෙන් සඳහන් කළ යුතු නැහැ. එනිසාම අපි හැමදෙනාම මේ අලු‍ත් සිනමා නිර්මාණය තිරගත වනතුරු බලාගෙන ඉන්නවා.

• චමිඳු නිසල