දෙවරක් කැඳවූ ජනපතිගේ රැස්වීම
ආණ්ඩුවේ අභ්‍යන්තර අවුල් තැවුල් ප්‍රසිද්ධියේ කතාබහට ලක්වුණු සතියක් ගෙවී ගියේය. ඉඩම් කඩම් නිසා ලොකු ලොකු තැන්වල පවා නොහොද නෝක්කාඩු ඇතිවිය. ඡන්ද කතාද නැවත දේශපාලන කරළියේ කන් කොන්වල මාතෘකා වී තිබුණි. සැබැවින්ම ගෙවී ගියේ වේදිකා ගතවීමට නියමිත දේශපාලන නාටකයක, පිටපත් ලියැවුණු සතියකි.
පසුගිය සතියේ සඳුදා ජනාධිපති රනිල් වික්‍රමසිංහ මහතා ආණ්ඩු පක්ෂ ප්‍රධානීන් සහ පොහොට්ටුවේ දිස්ත්‍රික් නායකයන් කැඳවීය. මෙම රැස්වීම් දේශපාලන ආන්දෝලනයක් ඇති කිරීමට සමත් වුණි. ආරංචි මාර්ග සඳහන් කළ පරිදි ජනාධිපති ලේකම් කාර්යාලයේ සංවිධානය වූ මෙම රැස්වීමේ අරමුණ වූයේ, ආණ්ඩුවේ ක්‍රියාකාරීත්වය සම්බන්ධව මෙහෙයුම් කමිටුවක් නිර්මාණය කිරීමය.
දේශපාලන ආරංචි මාර්ග තවදුරටත් සඳහන් කළේ මෙම සාකච්ඡාව සඳහා 47 දෙනෙක් වෙත ජනපති පාර්ශ්වයෙන් ඇරයුම් ලැබී තිබුණු බවකි. පොහොට්ටුවේ දිස්ත්‍රික් නායකයන්ට මෙන්ම අමාත්‍ය මණ්ඩලයටද මීට ඇරයුම් ලැබී තිබුණි. කෙසේ වෙතත් පෙර මෙවන් මෙහෙයුම් කමිටුවක් නිර්මාණය කර ගැනීමට සිදුකළ පළමු සාකච්ඡාවේදී පොහොට්ටුව පවසා තිබුණේ පළමුව පක්ෂ සමඟ සාකච්ඡා කිරීම සුදුසු බවකි.
ඒ අනුව දෙවැනි වරටද පක්ෂය සමඟ සාකච්ඡා නොකොට පක්ෂ නායකයන් කැඳවීම පොහොට්ටුවට ඉවසුම් නොදුන්නේය. අවසානයේ පොහොට්ටුවේ ජෙස්ෂ්ඨයන් තීරණය කළේ මෙම වර්ජනය කිරීමටය.
''දිස්ත්‍රික් නායකයෝ යන්න ඕන නෑ. ජනාධිපතිතුමා කැඳවල තියෙන නිසා කැබිනට් අමාත්‍යවරුන්ට රාජ්‍ය අමාත්‍යවරුන්ට යන්න වෙයි. ඒ නිසා ඒ අය යන්න. අනෙක් අය යන්න වුවමනා නෑ.'' අවසානයේ පොහොට්ටුවේ ප්‍රධන ලේකම්වරයා ඇතුළු ජෙස්ෂ්ඨයන් පැමිණ තිබුණේ මෙවන් එකඟතාවයකටය.
පොහොට්ටුවෙන්ම බලයට පැමිණ ජනපතිට සමීපව කටයුතු කරන අමාත්‍යවරයකු විසින් මෙම රැස්වීම සංවිධානය කිරීමෙහිලා පුරෝගාමි කාර්යභාරය සිදුකර ඇති බව ගත හැකි විය. මෙම රැස්වීම සඳහා ආරාධනා කළ ආකාරයද ගැටලු සහගත වූ බව ඇතැම් මාධ්‍ය වාර්තා කර තිබුණි.
අවසානයේ සඳුදා රැස්වීම සඳහා ජනාධිපති ලේකම් කාර්යාලයට පැමිණ සිටියේ කැබිනට් අමාත්‍යවරු රාජ්‍ය අමාත්‍යවරු ඇතුළු 26 දෙනකු පමණි. පොහොට්ටුවේ එකඟතාවයට අනුව දිස්ත්‍රික් නායකයන් ඇතුළු 21ක් දෙනෙක් රැස්වීමට නොපැමිණිහ. රාජ්‍ය අමාත්‍යවරුන් වන ශෂීන්ද්‍ර රාජපක්ෂ සහ සනත් නිශාන්ත යන දෙදෙනාද මෙහි නොපැමිණීම කැපී පෙනුණි.
තත්ත්වය එසේ වුවද ඇමැතිකම නොලද නමුත්, පොහොට්ටුවේ මහනුවර දිස්ත්‍රික් නායක මහින්දානන්ද අලුත්ගමගේ, පොහොට්ටුවේ තිරිකුණාමලය දිස්ත්‍රික් නායක කපිල අතුකෝරළ යන මන්ත්‍රීවරු පැමිණ සිටියහ. කෙසේ නමුත් පසුව කපිල අතුකෝරළ මන්ත්‍රීවරයා පවසා තිබුණේ වර්ජනය සම්බන්ධ පණිවිඩය තමාට හරිහැටි නොලැබීම හේතුවෙන්, අදාළ රැස්වීමට සහභාගි වූ බවකි.
මහින්ද රාජපක්ෂ, චමල් රාජපක්ෂ, බැසිල් රාජපක්ෂ නාමල් රාජපක්ෂ යන රාජපක්ෂවරුද පොහොට්ටුවේ ප්‍රධාන ලේකම් සාගර කාරියවසම්ද ජනපතිගේ රැස්වීමට නොපැමිණිහ. ඒ අනුව ජනපතිට සිය අපේක්ෂාවන් මුදුන් පමුණුවා ගත නොහැකි විය. රැස්වීම බොහෝ දුරදිග නොඇදුණි.
''පක්ෂ නායකත්වය දිස්ත්‍රික් නායකත්වය දරන කවුරුත් නෑ. මෙහෙම හරියන්නේ නෑ. එහෙනම් අගමැතිතුමා මැදිහත් වෙලා ලබන බදාදාට ආණ්ඩු පක්ෂ නායකයෝ ටික කැඳවන්න. ඒගොල්ලෝ කියනවා නම් පක්ෂ නායකයන්ට මුලින් කතාකරන්න කියලා. අපි එහෙම කතා කරමු.''
දේශපාලන ආරංචි මාර්ග අනුව ජනපති පවසා තිබුණේ මෙවැන්නකි. මේ අනුව බදාදා දිනය සතියේ තීරණාත්මක දිනයක් බවට පත්වන බව දැනගත හැකි විය.
මේ අතර පසුගිය සතියේ දැනගැනීමට ලැබුණේ මැතිවරණ ඉල්ලා කෙරෙන සටන පිළිබඳ විපක්ෂ අභ්‍යන්තරයේ සාකච්ඡා ක්‍රියාත්මක වී ඇති බවකි. වහාම පළාත් පාලන මැතිවරණය පවත්වන ලෙස බලකරමින් ඉදිරියේදී විපක්ෂය නියෝජනය කරන සියලු පක්ෂ තෝරාගත් එක් දිනයක පෙළපාළියකින් පැමිණ කොළඹ නගරයට ඇතුළු වී ආණ්ඩුවට බල කිරීමට සූදනම් වන බව දේශපාලන ආරංචි මාර්ග සඳහන් කළේය. එම ආරංචිය අනුව දැනගැනීමට ලැබෙන්නේ දැනටමත් පවත්වා ඇති සාකච්ඡාවලදී කොළඹට ජනතාව රුගෙන එන්නේ කෙසේද, රැලි පවත්වන්නේ කොතැනද, ආදිය පිළිබඳවද ඇතැම් විපක්ෂ ක්‍රියාකරීන් සාකච්ඡා කර ඇති බවකි.
මේ අතර මෙම කතාව යම් පමණකට සනාථ කරමින් ගෙවීගිය සතියේ සමගි ජනබලවේගය, ජාතික ජනබලවේගය පක්ෂ ඇතුළු විපක්ෂයේ ලොකු කුඩා සියලු දේශපාලන පක්ෂ සමඟ සාකච්ඡා කරන බව නිදහස් ජනතා සභාවේ නායක පාර්ලිමේන්තු මන්ත්‍රී ඩලස් අලහප්පෙරුමද ප්‍රසිද්ධියේ කීය.
''මේ අසංවේදී අත්තනෝමතික වික්‍රමසිංහ ජනාධිපතිවරයාගේ ආණ්ඩුව පරාජය කිරීමට නම් විපක්ෂයේ පළල්ම දේශපාලන පෙරමුණ හෝ සන්ධානය ගොඩනැගිය යුතුයි. එහි ආරම්භයක් විදියට අප නිදහස ජනතා සභාව විපක්ෂයේ ප්‍රධාන ධාරාවන් වන සමගි ජනබලවේගය සහ ජාතික ජනබලවේගය මෙන්ම අනෙකුත් සියලුම ලොකු කුඩා විපක්ෂ බලවේග සියලුදෙනා එක්ක කතා කරන්න සූදානම්.''
කෙසේ වෙතත් ඩලස් පිල සෘජුව සමගි ජනබලවේගය සමග සන්ධානගත ගතවීමට සූදානමින් සිටින බවටද කතාවක් දේශපාලන කරළියේ පැතිර යන්නට විය. විපක්ෂයේ ආණ්ඩුව විරෝධී සංධානය පිළිබඳ සජබ පාර්ලිමේන්තු මන්ත්‍රී විපක්ෂයේ ප්‍රධාන සංවිධායක ලක්ෂ්මන් කිරිඇල්ල මහතාද ඉඟියක් ලබා දුන්නේය.
''ඔව් අපි හැම සඳුදාම පාර්ලිමේන්තුවේදී හම්බවෙනවා. සමහර අය ප්‍රසිද්ධියේ අපිත් එක්ක සාකච්ඡාවලට එනවා. තවත් අය අප්‍රසිද්ධියේ අපිත් එක්ක ගනුදෙනු කරමින් ඉන්නවා. සජිත් ප්‍රේමදාස මහත්මාගේ නායකත්වයෙන් පුළුල් දේශපාලන සංධානයක් හැදෙනවාට සැකයක් නෑ.''
කිරිඇල්ල මහතාගේ මෙම ප්‍රකාශයත් සමග ජාතික ජනබලවේගයත් මෙම සන්ධානයට එක්වේද යන පැනය නැගුණි.
''ඔව්, අපි කිසි කෙනෙක් එක්ක පෞද්ගලික අමනාපයක් නෑ. අපේ සන්ධානයට පොදු වැඩපිළිවෙළක් හදාගන්න ඕනෑ. ඒක තමා වැදගත්. පොදු වැඩපිළිවෙළකට එකඟ නම් ඒකටත් අපි සූදානම්.''
කෙසේවෙතත් ඇතැම් මාධ්‍ය වාර්තාවලට අනුව සමගි ජනබලවේගය, ජනතා විමුක්ති පෙරමුණ, උතුරු නැඟෙනහිර ද්‍රවිඩ පක්ෂ සහ වතුකරය නියෝජනය කරන සුළු පක්ෂ මෙන්ම ආණ්ඩුවෙන් ඉවත්ව විපක්ෂයේ අසුන්ගෙන සිටින ස්වාධීන කණ්ඩායම්ද මැතිවරණයක් ඉල්ලා සිදුකෙරෙන විරෝධතාව වෙනුවෙන් ඒකාබද්ධ වීමට සූදානම්ය. එහෙත් එවන් උත්සාහයකට ජාතික ජන බලවේගය ඇතුළු උතුරේ පක්ෂ සහාය නොලැබෙනු ඇතැයිද ඇතැම් ආරංචි මාර්ග සඳහන් කරයි.
පසුගිය සතියේ එක්සත් ජාතික පක්ෂයද සිය දේශපාලන ක්‍රියාකාරකම් පුළුල් කරමින්, එජාපයේ පැරණි බලකොටුවක් වන මැද කොළඹ ආසන බල මණ්ඩල රැස්වීම පවත්වනු ලැබීය. එක්සත් ජාතික පක්ෂයේ ඉදිරිපෙළ නායකයන් රුසක් මේ සඳහා එක්වූහ. සාගල රත්නායක, රුවන් විජෙවර්ධන, පාලිත රංගේ බණ්ඩාර, අකිල විරාජ් කාරියවසම් මෙහි පැමිණි සුවිශේෂී චරිත විය.
මෙහිදී සාගල රත්නායක මහතා රට ගොඩගැනීම සහ එක්සත් ජාතික පක්ෂය නැවත ගොඩගැනීම අතර ඇති සම්බන්ධය පිළිබඳ විශේෂ පැහැදිලි කිරීමක් මෙහිදී සිදු කළේය.
''රට රටවල් ගානේ යන්න හදන තරුණ දුවලා පුතාලා, මේ රට තුළ තියාගෙන ඔවුන්ට රුකියා අවස්ථා නැත්නම් ව්‍යාපාර අවස්ථා හදලා දීලා මේ රට තුළම ඔවුන්ගේ ජීවිතය බබලවන්න පුළුවන් අවස්ථාව සකස් කරන්න ඕනෑ. රනිල් වික්‍රමසිංහ මැතිතුමා අන්න ඒ රාමුව තමා දැන් සකස් කරගෙන යන්නෙ. සමහර අලුත් නීති ඕන වෙනවා, අපි වැඩ කරන විදිහේ වෙනසක් ඕන වෙනවා. ශක්තිමත් රාමුවක් ඕනේ වෙනවා මේ වැඩ කටයුතු කරන්න. ඔහු පටන් ගත්තෙ කොතනින්ද, නමුත් අද අපි ලොකු දීර්ඝ ගමනක් ඇවිල්ලා තියෙනවා. මේ ගමන ඇවිල්ලා තියෙන්නෙ විශේෂයෙන්ම ජනාධිපතිතුමා නිසා. ඒ ලබපු පන්නරය අරගෙන අපි නැවත ප්‍රතිසංධන කටයුතු කරලා අපේ පක්ෂය ගොඩනගන්න මහන්සි වෙන්න ඕනෑ.''
එක්සත් ජාතික පක්ෂයේ රටපුරා තවත් ආසන බල මණ්ඩල පිහිටුවීමට පසුගිය සතියක දෙකක කාලය තුළ විශාල උනන්දුවකින් කටයුතු කරමින් සිටියේය. ගාල්ල සහ හබරාදුව එජාප බල මණ්ඩල රැස්වීම ඉකුත්දා පැවැත්වුණි.
මෙහිදී එක්සත් ජාතික පක්ෂ පාර්ලිමේන්තු මන්ත්‍රී වජිර අබේවර්ධන මහතා විශේෂ කතාවක් කියා තිබුණි.
''ඒ විනාශ වෙච්ච ජාතිය වෙනස් කරන්න අලුත් මඟක් අවශ්‍යයි. අලුත් ආණ්ඩුක්‍රම ව්‍යවස්ථාවක් අවශ්‍යයි. අලුත් පක්ෂ ව්‍යවස්ථාවක් අවශ්‍යයි. රනිල් වික්‍රමසිංහ නමැති ජාතික නායකයා බෙදුනු, වැනසුණු ජාතිය නැවත නඟාසිටුවන්නේ කොහොමද කියලා කල්පනා කරනවා. ඒ අනුව මේ බලමණ්ඩල පිහිටුවලා ජූලි මාසයේදී රනිල් වික්‍රමසිංහ නායකතුමා විසින් පක්ෂ ව්‍යවස්ථාව වෙනස් කරන්න තිබෙනවා. ඊට පසුව රටේ ආණ්ඩුක්‍රම ව්‍යවස්ථාවත් වෙනස් කළ යුතුයි.''
තීරණාත්මකව බදාදා අග්‍රාමාත්‍ය දිනේෂ් ගුණවර්ධන මහතා ආණ්ඩුවේ සියලු පක්ෂ නායකයන්ට ජනාධිපති ලේකම් කාර්යාලයේ සාකච්ඡාවට ඇරයුම් යොමු කළේය. මේ ආරාධනය පොහොට්ටුවේ නායක මහින්ද රාජපක්ෂ මහතාට සේම, පොහොට්ටුවේ ජාතික සංවිධායක බැසිල් රාජපක්ෂ සහ පොහොට්ටුවේ ප්‍රධාන ලේකම් සාගර කාරියවසම් වෙත ද ලැබුණි.
මේ අතර බැසිල් සහ සාගර කැඳවා තමා මෙම සාකච්ඡාවට සම්බන්ධ නොවන බව හිටපු ජනපති මහින්ද රාජපක්ෂ මහතා පවසා ඇතැයිද දේශපාලන ආරංචි මාර්ග සඳහන් කළේය.
“ඔය දෙන්නම යනව නම් මමත් එන්න ඕනේ නෑ."
දේශපාලන ආරංචි අනුව මහින්ද රාජපක්ෂ මහතා සඳහන් කර ඇත්තේ බැසිල් රාජපක්ෂ සහ සාගර කාරියවසම් මෙම සාකච්ඡාව සහභාගි වන බැවින් තමා මේ සඳහා සහභාගි වීම අත්‍යවශ්‍ය නොවන බවයි.
කෙසේවෙතත් මහින්ද රාජපක්ෂ මහතා මෙම දෙපළ කැඳවා සාකච්ඡා කළ යුතු දෑ පිළිබඳ උපදෙස් ලබා දී ඇතැයි කියැවේ. දැනගැනීමට ලැබුණු පරිදි එය ජනපති සමඟ කතා කළ යුතු දෑ පිළිබඳ සහ කතා කළ යුතු ආකාරය පිළිබඳ යම් දේශපාලන පාඩමකි. අගමැතිගේ ඇරයුමෙන් බදාදා සවස් වරුවේ ජනාධිපති ලේකම් කාර්යාලයේදී පක්ෂ නායකයෝ රුස්වූහ. ජනපතිට සහ අගමැතිට අමතරව බැසිල් රාජපක්ෂ, සාගර කාරියවසම්, ටිරාන් අලස්, ජීවන් තොණ්ඩමන්, ඒ.එල්.එම්. අතාවුල්ලා ඇතුළු පිරිසක් මීට එක්ව සිටියහ. ජනපති වෙනුවෙන් වජිර අබේවර්ධන, සාගල රත්නායක ඇතුළු පිරිසක් ද මෙහි පැමිණ සිටියහ.
රැස්වීම අරඹමින් අග්‍රාමාත්‍ය දිනේෂ් ගුණවර්ධන මහතා කියා සිටියේ පක්ෂ නායකයන් සිදු කරනු ලැබූ ඉල්ලීම අනුව මෙම රැස්වීම කැඳවූ බවයි.
“අපි මේ රැස්වීම කැඳවූවේ ආණ්ඩුවේ ඉදිරි කටයුතු පිළිබඳ සාකච්ඡා කරන්නත්, පක්ෂ සමගිය තියාගන්නත් ඕනෑ නිසා."
මෙහිදී ජනාධිපති රනිල් වික්‍රමසිංහ මහතා ද කතා කළේය.
“පහුගිය සතියේ අපි රැස්වීම කැඳවපු වෙලාවේ පක්ෂ නායකයන්ගේ රැස්වීමක් තියමු කියලා පොහොට්ටුව යෝජනා කළා. ඒ නිසා තමා මම මේ රැස්වීම කැඳවූයේ."
මේ ආදී වශයෙන් මෙම හමුව කැඳවීමට හේතු පැහැදිලි වන අතරේ පොහොට්ටුවේ ප්‍රධාන ලේකම් සාගර කාරියවසම් ද විශේෂ කතාවක් සිදු කළ බව දේශපාලන ආරංචි මාර්ග කියා සිටියි.
“ස්තුතියි ජනාධිපතිතුමා අපේ ඉල්ලීමට කන් දීලා මේ රැස්වීම කැඳවීම සම්බන්ධව. නමුත් කාරණා කිහිපයක් තියෙනවා අපිට, ඔබතුමාට කියන්න. පක්ෂයකින් තනිව පාර්ලිමේන්තු ආපු ඔබතුමාව, ජනාධිපති විදිහට පත් කළේ අපි. පොහොට්ටුව විදිහට අපි තනි තීරණයක් අරගෙන ඔබතුමාව පත් කළා. නමුත් අදටත් අපි හිතනවා අපි ගත්ත තීරණය හරි. ඔබතුමාට ආර්ථිකය හදන්න කියලා බාර දුන්නා. ඔබතුමා ඒක හරියට කරලා තියෙනවා. අපේ පක්ෂයේම අපේක්ෂකයෙක් ජනාධිපති අපේක්ෂකත්වයට එද්දි අපි ඔහුට විරුද්ධව ගිහිල්ලා ඔබතුමාට උදව් කළා. ලොකු ලොකු විවේචන ආවා. හරි අමාරුවෙන් ඔබතුමාට ඡන්දය දෙන්න අපේ සමහර අයව එකඟ කර ගත්තේ."
සාගර කාරියවසම්ගේ පැහැදිලි කිරීම් අතරේ ආණ්ඩුවේ අභ්‍යන්තර ප්‍රතිපත්ති අතර පවතින නොගැලපීම් සම්බන්ධ කරුණු ඔහු සභාව හමුවේ තැබූ බව කියැවේ.
“ජනාධිපතිතුමනි, පොහොට්ටුව කියලා කියන්නෙ වෙනම පක්ෂයක්. අපේ පක්ෂයත් ඔබතුමාගේ පක්ෂයත් අතර වෙනස් ප්‍රතිපත්තින් තියෙන්නෙ. අපේ ප්‍රතිපත්ති විශ්වාස කරන අයගේ ඡන්දයෙන් තමයි අපි බලයට පත්වුණේ. අපි ක්‍රියා කරන්න ඕනෑ අපිට ජන්දය ලබාදුන්න අයගේ බලාපොරොත්තු ඉටු කරන්න. ඒ නිසා ඔබතුමත් එක්ක ගන්න සමහර තීරණවලට අපි එකඟ වෙනවා. එකඟ වෙන්න බැරි තීරණවලදී අපි කියන්නම් අපිට එකඟ වෙන්න බැහැ කියලා. අපිට අපේ ස්වාධීනත්වය නැති කර ගන්න බෑ මොනම තත්ත්වයක් යටතේවත්. ඒක අපේ අයිතියක්. ඔබතුමාට මොනවා හරි වෙන්න ඕනේ නම්, ඒ ගැන අපි අපේ පක්ෂ නායකයන් එක්ක කතා කරලා ඔබතුමාට උදව් කරන්නම්."
කෙසේවෙතත් මෙම කතාවට ජනපතිගෙන් ලැබී ඇත්තේ සුහද ප්‍රතිචාරයකි. ඉදිරියට එලෙස වැඩ කරගෙන යා හැකි බව ජනපති පවසා තිබේ.
සාගර කාරියවසම් මෙම සභාව හමුවේ කරුණු පැහැදිලි කිරීමක් සිදු කර ඇත. ආරංචි මාර්ග සඳහන් කරන පරිදි මෙවර ඔහු පවසා ඇත්තේ මෙවන් අදහසකි.
“මෙතනදි තව කාරණාවක් කියන්න ඕන නෑ ජනාධිපතිතුමා. අපිට පක්ෂයක් විදියට ප්‍රශ්න තියෙනවා. අපිට උදව් කරපු සමහර පුද්ගලයන් ජ්‍යෙෂ්ඨයන් සිටිනවා. ඔවුන්ට අපි තනතුරු ලබා දීල තිබුණෙ. පහුගිය දවස්වල ඒ අයව නොදන්වා ඉවත් කරන්න පටන් අරගෙන තිබුණා. අපේම වෘත්තීය සමිති ක්‍රියාකාරීන් ඉන්නවා. ඔවුන් හා තාඩන පීඩන හිරිහැර සිද්ධ වෙන්න පටන් අරගෙන තිබුණා. මේ තත්ත්වය අපි බලයට පත් කරපු ආණ්ඩුවකින් සිද්ධ වුණාම අපිට ප්‍රශ්න ඇතිවෙනවා.
හැබැයි එකක් කියන්න ඕනෑ. මේ ඔක්කොම කරන්නෙ එක්සත් ජාතික පක්ෂ නායකයෝවත්, එක්සත් ජාතික පක්ෂයෙන් පත්වෙච්ච අයවත් නෙවෙයි. පොහොට්ටුවෙන්ම පත්වෙච්ච ඇමැතිවරු ටිකක්. ඒකත් මම කියන්න ඕනෑ."
ජනපති මීට ද දක්වා තිබුණේද නම්‍යශීලී ප්‍රතිචාරයකි.
“නෑ නෑ සාගර, ඒ ගැන කලබල වෙන්න ඕන නෑ. ඕගොල්ලන්ට මොනවා හරි ප්‍රශ්නයක් තියෙනවා නම් මාව කන්ටැක් කර ගන්න. මාව සම්බන්ධ කර ගන්න අපහසු වුණොත් ජනාධිපති කාර්ය මණ්ඩල ප්‍රධානී සාගල රත්නායක ඉන්නවා, එයාට දැනුම් දෙන්න. සාගලට විසඳන්න බැරි වුණොත් මං මැදිහත් වෙලා අනිවාර්යෙන් විසඳලා දෙනවා."
මෙම සාකච්ඡාව ඉදිරියට ඇදෙන අතර බැසිල් රාජපක්ෂද සභාව අමතා තිබේ.
“අපේ මන්ත්‍රීවරු කියනවා ජනාධිපතිතුමා, අපේ ජනාධිපතිතුමා හිටපු කාලෙටත් වඩා ඔබතුමාගේ කාලේ මොනවා හරි ප්‍රශ්නයක් ගැන කතා කර ගන්න ඕනේ නම් ඔබතුමාව හරි, සාගල රත්නායක හරි, ජනාධිපති ලේකම් කාර්යාලය හරි සම්බන්ධ කරගෙන ඒ ප්‍රශ්න කතා කරන්න පුළුවන් කියලා. ඒක බොහොම හොඳ තත්ත්වයක්. අපේ අගමැතිතුමා නම් ටෙලිෆෝන් එකට ගන්න බෑ. මං හිතන්නෙ එතුමා හරි බිසී.''
බැසිල් රාජපක්ෂ මෙහිදී කාලීන දේශපාලන ප්‍රශ්න කිහිපයක් පිළිබඳ ඉඟි කරමින් යමක් සඳහන් කර තිබේ.
“දැන් ජනාධිපතිතුමා, ඔබතුමාගෙන් ජනතාව ප්‍රධාන වශයෙන් බලාපොරොත්තු වෙන්නෙ රටේ ආර්ථිකය නගා සිටුවීම. ඒ නිසා මෙතන ප්‍රධානම කාරණාව ආර්ථිකය නගා සිටුවීම. අපි ඒකට උදව් කරන්නම්. ඕන වෙලාවක උදව් කරන්නම්. හැබැයි මේ ආණ්ඩුව ඉදිරියට යනකොට වෙන වෙන ප්‍රශ්නවල එල්ලුණොත් මේ ගමන යන්න බැරි වෙනවා. ඒ නිසා මේ ගමන අපි පරිස්සමෙන් යන්න ඕනෑ."
මේ ආකාරයෙන් දිගින් දිගටම සාකච්ඡා ඇතිවූ මෙම රැස්වීම් අවසානයේ පිරිස තීරණය කළේ මසකට වරක් මෙම පිරිස හමුවී සාකච්ඡා කිරීමටයි.
මේ අතර ජනාධිපති රනිල් වික්‍රමසිංහ මහතා ජූනි 17 වැනිදා ලන්ඩනයේ සහ ප්‍රංශයේ නිල සංචාරයක් සඳහා පිටත්ව යාමට නියමිතය. ප්‍රංශ සංචාරය අතරතුරදී ජනාධිපතිවරයා පැරිස් සමාජයේ (Paris club) සාමාජිකයන් හමුවීමට නියමිත බවද වාර්තා වේ. මෙරට ණය අර්බුදය නිරාකරණය කිරීම සම්බන්ධව සහ ණය ස්ථායිතාව ඇති කිරීම සඳහා මෙම සංචාරය අතිශය තීරණාත්මක වනු ඇතැයි දේශපාලන විචාරකයෝ සඳහන් කරති. මෙම සංචාරයේදී දින 5 කට ආසන්න කාලයක් ජනාධිපති රනිල් වික්‍රමසිංහ මහතා යුරෝපයේ රුඳී සිටිනු ඇත.
I චමිඳු නිසල් ද සිල්වා
