ආණ්ඩුවේ කපටිකම් හෙළි කළ යුතුයි: සජබ මන්ත්‍රීවරු කියති
තවත් විවිධාකාර දේශපාලන සිදුවීම් රැසක් වාර්තා වුණු සතියක් ගෙවී ගියේය. වත්මන් ජනපතිගේ යුරෝපා සංචාරය, හිටපු ජනපතිගේ උපන්දින සාදය දේශපාලන කරළියේ මාතෘකාවී තිබුණි. ආණ්ඩුවේ ඇමැතිකම් නොලද්දන්ගේ සෝ තැවුල්ද විපක්ෂයේ ආණ්ඩු විරෝධයද එක ලෙස වැඩි වන්නට විය.
හිටපු ජනපති ගෝඨාභය රාජපක්ෂ මහතා පිළිබඳ ඉකුත් සතියේ විශේෂ අවධානයක් යොමුවූයේ ඔහුගේ ජන්ම දිනය පසුගිය සතියට යෙදී තිබීම හේතුවෙනි. ජනපති ධුරයෙන් නික්ම යාමෙන් පසුව දේශපාලන කරළියට නොපැමිණි ගෝඨාභය රාජපක්ෂ මහතා, අත්‍යවශ්‍ය උත්සවයකට මිස වෙනත් කිසිදු දේශපාලන කටයුත්තකට සහභාගී නොවුණි.
එහෙත් මෙවර හිටපු ජනාධිපතිවරයාගේ 74 වැනි ජන්ම දිනය නිමිත්තෙන් ජුනි 20 වැනිදා කොළඹ නාරාහේන්පිට ගෞතම විහාරයේ විශේෂ බෝධි පූජාමය පිංකමක් සංවිධානය විය. එම පිංකම සංවිධානය කිරීමට කටයුතු කර තිබුණේ හිටපු ජනාධිපතිවරයාගේ පෞද්ගලික ලේකම් සුගීෂ්වර බණ්ඩාර ඇතුළු පිරිසකි. රාජපක්ෂ මහතාගේ සමීපතමයකු වූ මෙම විහාරයේ විහාරාධිපති ඕමල්පේ සුමනරතන හිමියෝද මෙම කටයුත්ත සඳහා මූලිකත්වය ගත්හ.
මෙරට ප්‍රධාන පෙළේ භික්ෂූන් වහන්සේ රැසකටත්, ආණ්ඩුවේ හිටපු සහ වත්මන් මැති ඇමතිවරුන් රැසකටත් මෙම පිංකමට ඇරයුම් ලැබුණි. කෝට්ටේ කල්‍යාණි සාමග්‍රී ධර්ම මහා සංඝ සභාවේ මහනායක ඉත්තෑපානේ ධම්මාලංකාර හිමියෝ මෙහි මුලසුන දැරූහ. අස්ගිරි පාර්ශ්වයේ අනුනායක වෙඬරුවේ උපාලි හිමියෝද මෙහි වැඩම කර සිටියහ. මීට අමතරව ආචාර්ය බෙල්ලන්විල ධම්මරතන හිමි, රෝහණ පාර්ශ්වයේ අනුනායක ඕමාරේ කස්සප හිමි, මුරුත්තෙටුවේ ආනන්ද හිමි, අතපත්තුකන්දේ ආනන්ද හිමි, මහාචාර්ය මැදගොඩ සුමනතිස්ස හිමි ඇතුළුව භික්ෂූන් වහන්සේලා හැට එක් නමක් පමණ මෙහි වැඩම කර සිටියහ.
මෙම අවස්ථාවට එක්වූ දේශපාලඥයන් අතර චමල් රාජපක්ෂ, ප්‍රසන්න රණතුංග, සාගර කාරියවසම්, මහින්දානන්ද අලුත්ගමගේ, නිමල් ලන්සා, උදේනි අතුකෝරල, විජිත බේරුගොඩ, පියල් නිශාන්ත ඇතුළු මැති ඇමැතිවරුන් රැසක්ද වූහ. කතානායකවරයා වෙනුවෙන් ඔහුගේ පෞද්ගලික ලේකම් චමීර යාපා අබේවර්ධනද මෙම අවස්ථාවට එක්විය.
පැය දෙකක් පමණ පැවති මෙම පූජාවෙන් අනතුරුව හිටපු ජනපති ගෝඨාභය රාජපක්ෂ පැමිණ සිටි පිරිස සමඟ සුහදව කතාබහ කළේය. පිරිස ඔහුට සුබපැතුම් එක් කළහ. කෙසේ වෙතත් කටයුතු අවසානයේ පිටත්ව යාම සඳහා එළියට පැමිණෙන අවස්ථාවේදී මාධ්‍යවේදීහු හිටපු ජනාධිපතිවරයා වටකොටගෙන වර්තමාන දේශපාලන තත්ත්වය පිළිබඳ ප්‍රශ්න කරන්නට වූහ. කෙසේ වෙතත් එම පැණවලට පිළිතුරු දීමට ඉදිරිපත් නොවූ හිටපු ජනපති සිනහ සී සිය මෝටර් රියෙන් එතැනින් පිටව ගියේය.
හිටපු ජනාධිපති ගෝඨාභය රාජපක්ෂ මහත්මා ජන්ම දිනයදා රාත්‍රියේ රැදී සිටියේ මිරිහානේ සිය පෞද්ගලික නිවසේය. එදින ගෝඨාභය රාජපක්ෂ මහතාට සුබපැතුම් එක් කිරීමට ප්‍රභූන් රැසක්ද පැමිණියහ. ආරංචි මාර්ග අනුව ත්‍රිවිධ හමුදාපතිවරු, ආරක්ෂක මාණ්ඩලික ප්‍රධානී ශවේන්ද්‍ර සිල්වා, ආරක්ෂක ලේකම් කමල් ගුණරත්න යන අයද ඒ අතර වූහ. සන්ධ්‍යාවේදී පැමිණ සුභපැතුම් එක්කොට ගියේ පාර්ලිමේන්තු මන්ත්රී නාමල් රාජපක්ෂ මහතායි.
නාමල් රාජපක්ෂ මහතා පිටත්ව යාමෙන් අනතුරුව, අප ආරංචි මාර්ග තහවුරු කළ පරිද්දෙන් රාත්‍රී අටට පමණ හිටපු ජනපති බැහැ දැකීමට විශේෂ පිරිසක් නොකියාම පැමිණ තිබේ. හිටපු ජනපතිට සර්ප්‍රයිස් පාටියක් ලබාදීමේ අරමුණින් මෙම පිරිස පැමිණ ඇත. කොළඹ තරු පංතියේ හෝටලයකින් ආහාරපානද රැගෙන මෙලෙස හිටපු ජනපති හමුවීමට පැමිණ තිබුණේ මහින්දානන්ද අලුත්ගමගේ ප්‍රමුඛ කරගත් පාර්ලිමේන්තු මන්ත්‍රීවරුන් හතළිස් දෙනකුගෙන් පමණ සමන්විත කණ්ඩායමකි.
හිටපු ජනාධිපතිවරයා මෙදින ආගමික වතාවත්වලට අමතරව සාදයක් සංවිධානය කර නොතිබුණි. එහෙත් හදිසියේ පැමිණි අමුත්තන් සාදය ආරම්භ කළ අතර රාත්‍රී නවයේ සිට පාන්දර එක පමණ වනතුරු සාදය පැවති බව ආරංචි මාර්ග තහවුරු කරයි. ප්‍රසන්න රණතුංග, කෙහෙළිය රඹුක්වැල්ල, කනක හේරත්, කාංචන ජයරත්න, මධුර විතානගේ, මිලාන් ජයතිලක, කපිල අතුකෝරල ඇතුළු මැති ඇමැතිවරුන් විශාල පිරිසක් මෙම සාදයට එක්ව ඇත. දේශපාලන කතාබහ මෙන්ම පහුගිය විත්ති පිළිබඳ සතුටු සාමීචියේ යෙදීම්ද මෙහිදී දක්නට ලැබුණු බව ආරංචි මාර්ග සඳහන් කරයි.
කෙසේ වෙතත් ගෝඨාභය රාජපක්ෂ හිටපු ජනාධිපතිවරයාගේ පාර්ශ්වයෙන් ලැබෙන ආරංචි අනුව ඉදිරි සතියේ ඒ මහතා විදෙස් සංචාරයක නිරත වීමට නියමිතය. එය වන්දනා ගමනකි. අප ආරංචි මාර්ග පැවසූ පරිදි හිටපු ජනාධිපති ගෝඨාභය රාජපක්ෂ මහතා පිටත්ව යාමට සූදානමින් සිටින්නේ කාම්බෝජය සහ ලාඕසය බලාය.
මේ අතර පසුගිය සතියේ සමගි ජනබලවේගයටද වටිනා තිළිණයක් ලැබුණි. එම තිළිණය ලැබුණේ විපක්ෂනායක සජිත් ප්‍රේමදාස මහතාගේ බිරිඳ වන ජලනි ප්‍රේමදාස මහත්මිය වෙතයි. එය ගෞරව නාමයකි. දියතලාව කහගොල්ල ශ්‍රී සුදර්ශනාරාම පුරාණ විහාරස්ථානයේදී පැවති උත්සවයකදී ජලනි ප්‍රේමදාස මහත්මිය ශ්‍රී සම්බුද්ධ ශාසනය උදෙසා කළ මෙහෙවර සලකා බලමින් ‘ශ්‍රී සුගත ශාසන ප්‍රසාදිනී’ සම්මානය ඇයට ප්‍රදානය කිරීම භික්ෂූන් වහන්සේ අතින් සිදු කෙරිණි.
මෙත්මුණිගම සිරිසුමන නාහිමි, කහත්තේවෙල සිරිනිවාස නාහිමි, නින්දානේ චන්දවිමල නාහිමි ප්‍රමුඛ මහා සංඝරත්නය මෙම අවස්ථාවට වැඩම කර සිටියහ. මෙම අවස්ථාවට විපක්ෂනායක සජිත් ප්‍රේමදාස මහතාද එක්ව සිටියේය. මෙහිදී සභාව අමතමින් කතාකළ විපක්ෂ නායකවරයා රටපුරා අලුතින් චෛත්‍යය දහසක් ඉදිකර බුද්ධාගම තව තවත් ප්‍රචලිත කිරීම තම අරමුණ බව සඳහන් කළේය.
''මේ වනවිට රට පුරාවටම චෛත්‍ය රාජයාණන් වහන්සේලා පමණක් දොළොස් නමක් ඉදිකරලා සසුනට පූජාකරලා තියෙනවා. අපේ පළමු බලාපොරොත්තුව දිස්ත්‍රික්කයට එක බැගින් 25ක්, දෙවැනි බලාපොරොත්තුව දිස්ත්‍රික්කයකට 4 බැගින් 100ක්. තුන්වැනි බලාපොරොත්තුව ලොකු එකක්, දිස්ත්‍රික්කයකට 40 බැගින් බැගින් චෛත්‍ය රාජාණන් වහන්සේ දහසක් ඉදිකිරීම. රජයේ මුදල් උපයෝගී කරගෙන නෙවෙයි, ශ්‍රද්ධාවන්ත බෞද්ධ පින්වතුන්ගේ ආශිර්වාදය යටතේ වැඩ කටයුතු සිදුවෙන්නෙ.''
පසුගිය සතියේදී සමගි ජන බලවේගය සිය පාර්ලිමේන්තු කණ්ඩායම කැඳවා විශේෂ සාකච්ඡාවක් පැවැත්වූ බවටද දේශපාලන ආරංචි මාර්ග සඳහන් කරයි. පාර්ලිමේන්තුවට ඉදිරිපත් කෙරෙන දූෂණ විරෝධී පනත් කෙටුම්පත සම්බන්ධයෙන් විපක්ෂය අනුගමනය කරන ක්‍රියාමාර්ග පිළිබදව මෙහිදී සාකච්ඡා කර ඇතැයි කියැවේ.
''මේ පනතට සහයෝගය දෙන්න ඕනෑ. අඩුපාඩු වගේම ආණ්ඩුව කරන කපටිකම ගැනත් ජනතාවට කියන්න ඕනෑ.''
මන්ත්‍රීවරුන්ගෙන් සැලකිය යුතු පිරිසක් මෙහිදී මතුකර ඇත්තේ මෙවන් අදහසකි. ඒ අනුව මෙහිදී මන්ත්‍රීවරුන් ම මෙම පනතේ පවතින අඩුපාඩු සහ ගැටලු පිළිබඳව දැනුවත් කිරීමටද සමගි ජනබලවේගය පියවර ගෙන තිබේ.
ඒ අනුව මෙම සාකච්ඡාවෙන් පසුව මාධ්‍ය හමුවට පැමිණි සමඟ ජන බලවේගයෙ බොහෝ පාර්ලිමේන්තු මන්ත්‍රීවරු මෙම පනතේ පවතින අඩුපාඩු පෙන්වා දෙන්නට වූහ. විපක්ෂයේ ප්‍රධාන සංවිධායක ලක්ෂ්මන් කිරිඇල්ල මහතා මෙවන් ප්‍රශ්නයක් මතු කර තිබුණි.
''ඉස්සරහට බලපාන විදිහට තමයි මේ පනත හදලා තියෙන්නේ. අපි අහන්න ඉන්නේ පහුගිය අවුරුදු දහය පහළොව ඇතුල තුළ සිද්ධ වුණු වංචා දූෂණවලට මෙය පනතින් නඩුදාන්න පුළුවන්ද කියන එක.''
පසුගිය සතියේ ජනපතිගේ යුරෝපා සංචාරයක කාගේත් අවධානය දිනාගත් ප්‍රමුඛ සිදුවීමක් විය. සංචාරය අතරේදී ජනාධිපති රනිල් වික්‍රමසිංහ මහතා විශේෂිත පුද්ගලයන් ගණනාවක් මුණගැසී තිබුණි. සංචාරය අතර යුරෝපීය පාර්ලිමේන්තුවේ හිටපු බ්‍රිතාන්‍ය මන්ත්රී සහ එක්සත් රාජධානියේ වර්තමාන ජනාධිපති දූතයකු වන නිරංජන් දේවා ආදිත්‍යගේ උපන්දිනය සැමරීමට ජනාධිපති වික්‍රමසිංහ මහතා ලන්ඩන්හී කාල්ටන් ක්ලබ්හීදී එක් විය.
ආසියානු පන්නයේ ආහාර සහිතව සංවිධානය කර තිබූ මෙම සාදයට ප්‍රභූවරු රැසක් සහභාගී වී සිටියහ. ඒහි වීඩියෝ පටයක්ද සමාජ මාධ්‍යයේ සංසරණය වූයේය. මේ අතර ජනාධිපති රනිල් වික්‍රමසිංහ මහතා එක්සත් රාජධානි සංචාරයේදී පොදුරාජ්‍ය මණ්ඩලීය මහ ලේකම් පැට්‍රීෂියා ස්කොට්ලන්ඩ් මහත්මිය හමුවී වූයේය. එහිදී සිදුකළ ද්වීපාර්ශ්වික සාකච්ඡා වලදී ඩිජිටල්කරණ වැඩසටහන් පිළිබඳ, දේශගුණ විපර්යාස පිළිබඳ සාකච්ඡා සාකච්ඡා වූ බව වාර්තා විය.
පසුගිය සතියේ මාධ්‍යයේ යම් කැළඹීමක් ඇති කළේ සංචාරයක් අතර ජනාධිපති රනිල් වික්‍රමසිංහ මහතා හා ලයිකා මොබයිල් හිමිකරු සුභාෂ්කරන් අලි රාජා හමුවීම සම්බන්ධවයි. මාධ්‍ය වාර්තා වලට අනුව එම හමුව ලන්ඩනයේ හිල්ටන් හෝටලයේදී සිදුව තිබුණි. මෙහිදී ශ්‍රී ලංකාවේ ආයෝජන සිදුකිරීම සඳහා දෙමළ ඩයස්පෝරාව උනන්දු කිරීමට මැදිහත්වන ලෙස ජනපති ලයිකා මොබයිල් සභාපති වරයාගෙන් ඉල්ලා සිටි බව මාධ්‍ය වාර්තා කොට තිබුණි. එසේම දමිළ සිරකරුවන් නිදහස් කිරීම පිළිබඳව ද මෙහිදී සාකච්ඡා වී ඇති බව ඇතැම් වෙබ් අඩවි අඩවි වාර්තා කළේය.
ජනාධිපති රනිල් වික්‍රමසිංහ මහතා ශ්‍රී ලංකාවේ ආර්ථිකය කෙරෙහි තීරණාත්මක සාකච්ඡා කිහිපයකට ද මේ අතර සහභාගී වී තිබුණි. නව ගෝලීය මූල්‍ය ගිවිසුමක් සඳහා වන සමුළුවට සහභාගී වීම සඳහා ජනාධිපති රනිල් වික්‍රමසිංහ මහතා පැරීසියට පැමිණි අවස්ථාවේදී අමෙරිකානු භාණ්ඩාගාර ලේකම් ජැනට් යෙලන් මහත්මිය හමුව ඇත. ශ්‍රී ලංකාවේ ජාත්‍යන්තර මූල්‍ය අරමුදලේ වැඩසටහන අනුමත කිරීම සහ ශ්‍රී ලංකාවේ ප්‍රතිසංස්කරණ න්‍යාය පත්‍රයේ ශක්තිමත් දේශීය හිමිකාරීත්වය පිළිබඳ සතුටු වන බව ඇය එහිදී පවසා තිබේ.
පසුගිය සතියේ ජාතික ජනබලවේගය දෙසින්ද තරමක අමුතු කතාවක් අසන්නට ලැබුණි. ඒ අනුව කියැවුණේ තවත් වසරක් රනිල් වික්‍රමසිංහ ජනාධිපතිවරයා මෙලෙස රට පාලනය කළොත් මාලිමාවේ ආණ්ඩුවක් බලයට පැමිණියත් රට ගොඩනැගීමට අපහසු වන බවකි. මෙලෙස පවසා තිබුණේ ජාතික ජන බලවේගය විධායක කමිටු සාමාජික හිටපු පළාත් සභා මන්ත්රී නලින් හේවගේය.
රනිල් වික්‍රමසිංහ රට විනාශ කිරීමෙන් පසුව ආණ්ඩු බලයක් ලැබුණත් ජාතික ජන බලවේගය භාරගැනීමට සූදානම් නැති බවත් ඊට පෙර රටේ ජනතාව මාලිමාවට බලය ලබාදිය යුතු බවත් ඔහු පවසා තිබුණි. එසේම රනිල් වික්‍රමසිංහ මහතා විනාශ කළ රට නැවත ගොඩගැනීමට නොහැකි අවස්ථාවක රට භාරගතහොත් රටේ මිනිස්සු මාලිමාවේ සාමාජිකයන්ටද පහරදෙනු ඇති බවත් හේවගේ මහතා වැඩිදුරටත් සඳහන් කළේය.
පසුගිය සතියේ ජාතික ජාතික ජනබලවේගයේ නායක පාර්ලිමේන්තු මන්ත්රී අනුර කුමාර දිසානායක මහතාද සංචාරයක් වෙනුවෙන් විදෙස්ගත විය. ඒ අනුව ඔහු ඔස්ට්‍රේලියාවේ සිටින ශ්‍රී ලාංකිකයන් හමුවී ජනහමු මාලාව පැවැත්වීමේ අරමුණෙන් ජූනි 23 වැනිදා ශ්‍රී ලංකාවෙන් පිටත්ව ගියේය.
ඔස්ට්‍රේලියාවේ මෙල්බර්න් ගුවන් තොටුපලේ අනුර කුමාර දිසානායක මහතා පිළිගැනීමට ඔස්ට්‍රේලියාවේ වෙසෙන ශ්‍රී ලාංකිකයන් පිරිසක් පිළිගැනීමේ උත්සවයක්ද සංවිධානය කොට තිබුණි. ඒ අනුව සතියක සංචාරය අතරතුරදී ඔස්ට්‍රේලියාව පුරා, මෙල්බර්න්, බ්‍රිස්බර්න්, පර්ත්, ඇඩිලේඩ්, සිඩ්නි යන ප්‍රදේශවල ජනහමු මාලාවක් පැවැත්වීමට අනුර කුමාර දිසානායක මහතා සූදානමින් සිටින බව ආරංචි මාර්ග තහවුරු කරයි.
පසුගිය සතියේ කරළියේ ප්‍රධාන භූමිකාවකට පණ පෙවීමට හිටපු පාර්ලිමේන්තු මන්ත්‍රිනී හිරුණිකා ප්‍රේමචන්ද්‍ර මහත්මිය සමත් විය. සමගි ජන බලවේගය ජාතික සංවිධායක තිස්ස අත්තනායක මහතාද සම්බන්ධ වූ රුස්වීමකදී ප්‍රසිද්ධියේම, සමගි ජන බලවේගයේ වත්මන් තත්ත්වය පිළිබඳව තමන් කලකිරීමට පත්වන බව ඇය පැවසීම හේතුවෙනි.
“හරීන්ලත් එක්ක රෑ තිස්සේ පබ්වල බොන අපේ පක්ෂෙ කට්ටිය කවුද කියලා මම නායකතුමාට කියලත් තියෙනවා. මම දන්නවා උදේට සජිත් සර්ගේ රැස්වීමේ ඉඳගෙන ඉන්නවා. රූට ගිහිල්ලා ඒවල කතා කරපු ඔක්කෝම එකේ රිපෝට් එක දෙනවා රනිල්ට. මුන් එක්ක ද අපි පක්ෂ කරන්න හදන්නේ. මෙහෙම මිනිස්සු එක්ක ද අපි ආණ්ඩුවක් ගන්න හදන්නේ. ඉන්නවනම් ඉන්න තැනක හරි විදිහට ඉන්න ඕනෑ.''
එය සමගි ජනබලවේගය සංවිධානය කළ ජන පවුර වැඩසටහනකි. හිරුණිකා ප්‍රේමචන්ද්‍ර තවදුරටත් මෙලෙසද පැවසීය.
''පහුගිය දවස්වල මගෙන් ගොඩක් අය ඇහුවා ඇයි මේ මාධ්‍යවල පෙනී ඉන්නේ නැත්තෙ කියලා. මොකක්ද හේතුව කලකිරීමක්ද කියලා. ඔව් කලකිරීමෙන් හිටියෙ. අපි මේක ඇතුළෙ මැරීගෙන වැඩකරනවා. හිරගෙවල්වල යනවා. අත්අඩංගුවට පත්වෙනවා. නොයෙකුත් කතා අහගන්නවා. මේ හැමදේම කරන්න පුළුවන් කමකට නෙවෙයි. හැබැයි අපි ගැන කිසිම තැකීමක් හඳුනාගැනීමක් නෑ. අනේ ඒක ඔයා කරපු වැඩේ හොඳයි කියලා අගයීමකුත් නෑ. අර දෙපිටකාට්ටු මිනිස්සුම තමා වටේ තියාගෙන ඉන්නේ. මුං කරන දේකුත් නෑ. නායකතුමා වෙනුවෙන් කරන වැඩකුත් නෑ. මේ තත්ත්වය වෙනස් වුණේ නැත්නම් අපිට ජනාධිපතිවරණයක් දිනන්න හිතන්නවත් බෑ.''
පසුගිය සමයේ දැඩි ආන්දෝලනයක් ඇති කළ කුරුන්දි විහාරයේ නිරීක්ෂණ චාරිකාවකට පිවිතුරු හෙළ උරුමයේ නායක උදය ගම්මන්පිල මහතා ඇතුළු එම පක්ෂයේ කණ්ඩායමක් බදාදා එක්ව තිබුණි. මෙම පිරිස කුරුන්දි ස්ථූපය අබියස සත්‍යක්‍රියාවකට ද එක් විය.
මේ අතර මුලතිව් දිස්ත්‍රික්කයේ කුරුන්තූර්මලෙයි ශිව දේවාලය පිහිටා තිබූ ස්ථානයේ අධිකරණ නියෝග නොතකා ඉදිකළ චෛත්‍යය වන්දනා කිරීමට පැමිණෙන දකුණේ දේශපාලනඥයන් ජාතිවාදය ඇවිස්සීමට කටයුතු කරන බවට බව පවසමින් වන්නියේ දේශපාලඥයන් පිරිසක් විරෝධතාවයක්ද සංවිධාන කර තිබුණි. කුරුන්තූර්මලෙ අපිට ඕනෑ, උතුරු සහ නැ‌ෙඟනහිර දෙමළ නිජ භුමියයි, කුරුන්තූර්මලෙ දෙමළ අපේ සම්පතක්, අපේ ඉඩම් අපිට ඕනෑ, වැනි සටන් පාඨ පවසමින් මෙහි පැමිණි පිරිස විරෝධතාවල නිරත වූ බව කියැවුණි.
''කොළඹ ඉන්න මන්ත්‍රීවරු මෙතනට ඇවිත් ජාතිවාදය අවුස්සන විදියට කටයුතු කරනවා. ඒ අය නිතරම කුරුන්තූර්මලෙයි ඇවිත් මේ වැඩේ කරන්නේ තමන්ගේ ඡන්ද කුට්ටිය රුකගන්න. විශේෂයෙන්ම ජාතිවාදී දේශපාලකයෝ.”
උතුරු පළාත් සභාවේ හිටපු මන්ත්රී තුරෙයිරාසා රවිහරන් මෙම අවස්ථාවට එක්වෙමින් දකුණෙන් පැමිණ පිරිස සම්බන්ධයෙන් මෙලෙස චෝදනා කර තිබිණි. කෙසේ වෙතත් උදය ගම්මන්පිල මහතාගේ සංචාරය බාධාවකින් තොරව සිදුවුණි. මෙහිදී අදහස් දැක්වූ උදය ගම්මන්පිල මහතා එදින පැවති විරෝධතාවය පිළිබඳවද සඳහන් කළේය.
''දෙමළ දේශපාලකයා සහ දෙමළ ජනතාව අතර බරපතළ වෙනසක් තියෙනවා. දෙමළ ජනතාව අතර ජාතිවාදය අවුස්සන්න හදන දෙමළ දේශපාලකයන් දෙමළ ජනතාව ප්‍රතික්ෂේප කරනවා කියන එක අපි අද දැක්කා. හිටපු පළාත් සභා මන්ත්රී රවිහරන් විසින් අපේ ගමනට එරෙහිව සංවිධානය කරන ලද උද්ඝෝෂණය සඳහා පැමිණ සිටියේ 26 දෙනයි. එමනිසා අපි එන්නත් කලින් රවිහරන් තම උද්ඝෝෂකයන්ද රැගෙන පිටත් වෙලා තියෙනවා.''
''ඒ වගේම මෙම පුරාවිද්‍යා ප්‍රදේශයේ වන රක්ෂිතයේ වගා කටයුතු සිදුකළ පුද්ගලයන් අපව ඉතා සුහදව පිළිඅරගෙන ඔවුන්ගේ ප්‍රශ්න ඔවුන්ගේ දුක්ගැනවිලි අපට ඉදිරිපත් කළා. අපි දෙමළ ජනතාවට කිව්වෙ ඔයගොල්ලන්ගෙ ජීවිකාව රුකෙන්නත් ඕනෑ. ඒ වගේම ලෝක උරුමයක් වෙච්ච අපේ පුරාවස්තු, මෙම භූමිය රුකෙන්න ඕනෑ. එමනිසා ඔබේ ඉඩම පුරාවිද්‍යා වටිනාකමක් තියෙනවා නම් වගාව සඳහා වෙනත් භූමියක් ඔබට තෝරා ගැනීමට සිදුවන බවයි.''
මෙම අවස්ථාවට කුරුන්දි විහාරය, සපුමල්ගස්කඩ රජමහ විහාරයෙහි උභය විහාරාධිපති, උතුරු පළාතේ ප්‍රධාන සංඝනායක ගල්ගමුවේ සාන්තබෝධි හිමි ඇතුළු භික්ෂූන් භික්ෂූන් වහන්සේලා පිරිසක්ද එක්ව සිටියහ.
I චමිඳු නිසල් ද සිල්වා
