රනිල් සජිත් බදාගන්න ටී.එන්.ඒ. බෙදෙයි
මන්ත්‍රණ කුමන්ත්‍රණ අතරේ රැවිලි ගෙරවිලි ද නොඅඩුව දක්නට ලැබුණු සතියක් ගෙවී ගියේය. අලි පොහොට්ටු හවුලේ සාකච්ඡා කරඇරීමට පොහොට්ටු නායකයන් කටයුතු කර තිබුණි. ආණ්ඩුව අභ්‍යන්තරයේ නිර්මාණය වීමට නියමිත නව සන්ධානයක් පිළිබඳවද තිරයේ පිටුපස කතා පැතිර ගියේය. ඖෂධ ගැටලුවට විපක්ෂය වැඩි බරක් තබන බව පෙනී ගියේය. පළාත් පාලන ආයතන සහ පළාත් සභා පිළිබඳ ආණ්ඩුව පාර්ශ්වයෙන් ඉදිරිපත් වෙමින් තිබෙන යෝජනාවලටද විපක්ෂය පෙරළා චෝදනා කරන්නට විය. ජනපතිගේ ඉන්දීය සංචාරයට උතුරෙන් බාල්දි පෙරළෙන්නට පටන්ගෙන තිබුණි.
ශ්‍රී ලංකා පොදුජන පෙරමුණ එක්සත් ජාතික පක්ෂය ඇතුළු ආණ්ඩුවේ පාර්ශ්වය සමගිව වැඩ කිරීමේ අරමුණෙන් වරින් වර එක් වී සාකච්ඡා කිරීමට තීන්දු කෙරුණේ මීට සති කිහිපයකට ඉහතදීය. එහි දෙවැනි අදියරේ සාකච්ඡාව පසුගිය සතියේදී පැවැත්වුණි. කෙසේවෙතත් මෙවර මෙම සාකච්ඡාව සඳහා පොහොට්ටුවේ ප්‍රධානීන් වන සාගර කාරියවසම් ඇතුළු ජ්‍යෙෂ්ඨයෝ සහභාගී නොවූහ.
විවිධ වැඩ රාජකාරි පිළිබඳ සඳහන් කරමින් මෙම පිරිස සාකච්ඡාව මගහැර ඇතැයි දේශපාලන ආරංචි මාර්ග සඳහන් කළේය. කෙසේ වෙතත් මේ වනවිටත් ජනාධිපති රනිල් වික්‍රමසිංහ මහතා සමඟ වැඩ කරමින් සිටින, ශ්‍රී ලංකා පොදුජන පෙරමුණ නියෝජනය කරන පාර්ලිමේන්තු මන්ත්‍රී නිමල් ලන්සා ඇතුළු මැති ඇමැති කණ්ඩායම මෙම රැස්වීම සඳහා සහභාගි වී තිබේ.
''අපි සන්ධානයක් හදනවා. දැනටමත් පාර්ලිමේන්තුවේ අපිට මන්ත්‍රීවරුන් 44 දෙනෙක් ඉන්නවා. සම්පූර්ණ ප්‍රමාණය හැටක් කර ගැනීම තමා අපේ බලාපොරොත්තුව.''
මෙම සාකච්ඡාවට සමගාමීව ජනපති හිතෛෂී ලන්සා පාර්ලිමේන්තු කණ්ඩායමේ ඇතැමකු මෙවන් අදහස් පළකර ඇතැයි දේශපාලන කරළියේ ආරංචි පැතිර යයි.
කෙසේවෙතත් මෙම සන්ධාන කතාව ශ්‍රී ලංකා පොදුජන පෙරමුණට ආරංචි වීමත් සමඟ එම පිරිස සමඟ මන්ත්‍රීවරුන් 44 දෙනකු නොමැති බව පොහොට්ටුවේ ජ්‍යෙෂ්ඨයන් සඳහන් කර තිබේ.
“ඔය කියන විදිහට එයාලට මන්ත්‍රීවරු 44 ක් නෑ. ඔය හදාගෙන ඉන්න ලැයිස්තුවෙන් මන්ත්‍රීවරු ගොඩක් දෙනා ඉන්නේ අපිත් එක්ක."
පොහොට්ටුවේ මන්ත්‍රීවරුන් කිහිප දෙනකු සහ සමගි ජන බලවේගයේ මන්ත්‍රීවරුන් කිහිප දෙනකු ද එකතු කර ගනිමින්, සුළු පක්ෂ සහයෝගයත් සහිතව මෙම සංවිධානය ගොඩනැගීමට නියමිත බව කියැවේ. කෙසේවෙතත් දේශපාලන ආරංචි මාර්ග සඳහන් කරන පරිදි මෙම සන්ධානය කල්යල් බලා නිසි වෙලාවෙදි නිර්මාණය කළ යුතු බව, ජනපති හිතෛෂී දේශපාලන කණ්ඩායම් විසින් තීරණය කර ඇත.
මේ අතර අමාත්‍ය ධූර නොලැබීමෙන් අමනාප වී සිටින පොහොට්ටුවේ ජ්‍යෙෂ්ඨයන් මනාප කර ගැනීම සඳහා ද යම් වැඩපිළිවෙළක් ක්‍රියාත්මක වෙමින් ඇති බවට පසුගිය සතියේ වාර්තා පළවිය. ඒ අනුව ඇමැති ධූර බලාපොරොත්තුවෙන් සිටින මන්ත්‍රීවරුන්ගේ පවුල්වල සාමාජිකයන්ට රජයේ ඉහළ තනතුරු පිරිනැමීමක් සිදුවීමට යන බවට දේශපාලන ආරංචි මාර්ග කියා සිටියි. එහෙත් බොහෝ දෙනෙක් එම තනතුරු සහ වරප්‍රසාද ප්‍රතික්ෂේප කර ඇත. ඒ බව එස්.බී. දිසානායක ඇතුළු මන්ත්‍රීන් පිරිසක් ප්‍රසිද්ධියේම කියා තිබේ.
ආණ්ඩුව අභ්‍යන්තරයේ යම් කමිටුවක් හෝ ආයතනයක් නිර්මාණය කොට එහි සාමාජිකත්වය මෙම මන්ත්‍රීවරුන් වෙත ලබා දී ඔවුන් බලාපොරොත්තු වෙන වරප්‍රසාද ලබාදීමක් සිදුවිය හැකි බවට ද ඉකුත් සතියේ වාර්තා පළ වී තිබුණි. කෙසේවෙතත් ශ්‍රී ලංකා පොදුජන පෙරමුණ අභ්‍යන්තර ආරංචි මාර්ග සඳහන් කරන්නේ මෙවන් කිසිදු දෙයකින් පොහොට්ටුවේ අමාත්‍ය ධූර බලාපොරොත්තු වන ජ්‍යෙෂ්ඨයන් සනසාලිය නොහැකි බවකි.
මේ අතර පසුගිය සතියේ ජනපති රනිල් වික්‍රමසිංහ මහතා විශේෂ කාර්යයකට අතගසා තිබුණි. ඒ අනුව වික්‍රමසිංහ මහතා ජනාධිපති වීමෙන් අනතුරුව පළමු වතාවට ආණ්ඩුවේ සියලු මන්ත්‍රීවරුන් සිය බිරින්ඳෑවරුන් සමඟ සාදයකට කැඳවීමට තීරණය කර ඇත. ආණ්ඩු පක්ෂයේ සිටින පාර්ලිමේන්තු මන්ත්‍රීවරුන් එකසිය විසි දෙදෙනාට සහ ඔවුන්ගේ බිරින්ඳෑවරුන්ට එළඹෙන 18 වැනිදා රාත්‍රී භෝජනයක් සඳහා ජනපතිගෙන් ඇරුයුම් ලැබී තිබේ.
එළඹෙන සතියේ ආරම්භ වීමට නියමිත ජනපතිගේ ඉන්දීය සංචාරය පිළිබඳව ද දේශපාලන කරළියේ කතාබහ නිර්මාණය වී තිබේ. සංචාරය ආරම්භ වීමට දින කිහිපයක් තබා, නිල සංචාරයක් සඳහා ඉන්දීය විදේශ ලේකම් විනේ මෝහන් ක්වාත්‍රා මහතා ශ්‍රී ලංකාව වෙත පැමිණීම ද සුවිශේෂී තත්ත්වයක් යැයි ඇතැමෙක් සඳහන් කරති.
පසුගිය අඟහරුවාදා ඉන්දීය විදේශ ලේකම් විනේ මෝහන් ක්වාත්‍රා මහතා සහ ජනාධිපති රනිල් වික්‍රමසිංහ මහතා අතර සාකච්ඡාවක් ආරක්ෂක අමාත්‍යාංශ පරිශ්‍රයේදී පවත්වා තිබුණි. දෙරට අතර ද්විපාර්ශ්වික සබඳතා තවදුරටත් වැඩිදියුණු කර ගනිමින්, දෙරටේම ජනතාවට ප්‍රතිලාභ සැලසෙන අයුරින් ඉදිරි ආර්ථික සහ සමාජයීය අරමුණු ජය ගැනීම පිළිබඳ මෙහිදී දීර්ඝ ලෙස සාකච්ඡා වූ වාර්තා කර තිබුණි.
මේ අතර ජනාධිපතිවරයාගේ නිල සංචාරය ආරම්භ වීමට මත්තෙන්ම උතුරේ සහ කඳුකරයේත් ද්‍රවිඩ පක්ෂ ඉන්දීය රජයට විවිධ බලපෑම් සිදු කරමින් සිටියි. ඒ අනුව පසුගියදා පැවැති රැස්වීමකදී දෙමළ ප්‍රගතිශීලී පෙරමුණු නායක මනෝ ගනේෂන් මහතා අපූරු කතාවක් කියා තිබුණි. ඔහු පවසා තිබුණේ ලංකා ජනාධිපති දිල්ලියට පැමිණෙන විට ඔහු වෙනුවෙන් හුදෙක් සාද පමණක් නොපවත්වා ජාතික ප්‍රශ්නය ඇතුළු සමස්ත දෙමළ ජනයාගේ ගැටලු ගැන තිරසර විසඳුමක් ලබාදීමට ඉන්දීය අග්‍රාමාත්‍යවරයා කටයුතු කළ යුතු බවකි.
‘’අපේ ප්‍රශ්න ගැන මැදිහත් වෙන්න ඉන්දීය අගමැතිවරයාට වගකීමක් තියෙනවා. ජාතික ප්‍රශ්නයට විසඳුමක් දෙන්න මැදිහත්වීමේ උවමනාව ඉන්දියාවට තියෙනවා. ඒ ගැන රනිල් වික්‍රමසිංහ ලංකා ජනාධිපති එක්ක සාකච්ඡා කරන්න කියලා උතුරු නැගෙනහිර දෙමළ දේශපාලන නායකයෝ දැනටමත් ඉන්දීය අගමැතිට ලියලා තියෙන්නේ.''
දේශපාලන ආරංචි මාර්ග සඳහන් කරන පරිදි 13 වැනි ව්‍යවස්ථා සංශෝධනය සම්බන්ධව ද මෙම ඉන්දීය සංචාරය අතිශය තීරණාත්මක එකක් වනු ඇත.
රනිල් වික්‍රමසිංහ ජනාධිපති ධූරයට පත්වීමෙන් පසු පළමුවරට සිදුවන මෙම ඉන්දීය සංචාරය ජූලි 21 වැනිදායින් ඇරුඹේ. මෙම නිල සංචාරයට ඩග්ලස් දේවානන්දා, කාංචන විජේසේකර, අලි සබ්‍රි යන ඇමැතිවරුන් සහ ජනාධිපති කාර්ය මණ්ඩල ප්‍රධානී සාගල රත්නායක එක්වනු ඇතැයි ආරංචි මාර්ග සඳහන් කරයි.
මේ අතර 18 වැනිදා මැති ඇමැති සාදයට පූර්වයෙන් උතුරු නැගෙනහිර දේශපාලන පක්ෂ සමඟ සාකච්ඡාවක් සිදු කිරීමට ජනපති තීරණය කර ඇතැයි ද දේශපාලන ආරංචි මාර්ග සඳහන් කරයි. මෙදින පස්වරු 3 ට පාර්ලිමේන්තු සංකීර්ණයේදී පැවැත්වීමට නියමිත මෙම සාකච්ඡාව සඳහා අදාළ පාර්ශ්වය වෙත දැනටමත් ආරාධනා ලැබී ඇතැයි කියැවේ.
13 වැනි ආණ්ඩුක්‍රම ව්‍යවස්ථා සංශෝධනය යටතේ යෝජනා වී ඇති ආකාරයට බලය බෙදීමේදී මතුවන ගැටලු සම්බන්ධයෙන් මෙහිදී සාකච්ඡාව වනු ඇත. විශේෂයෙන්ම බලය බෙදීම සම්බන්ධව රජයට සහ උතුරේ දේශපාලන පක්ෂවලට එකඟ විය හැකි කරුණු සඳහා මෙහිදී ප්‍රමුඛස්ථානයක් ලැබෙනු ඇතැයි ආරංචි මාර්ග සඳහන් කරයි. ජනාධිපතිවරයාට නිශ්චිතවම ඉන්දියානු සංචාරය අතරතුරදී පළාත් සභා බලය බෙදීම පිළිබඳව සාකච්ඡා කිරීමට සිදුවනු ඇත. ආරංචි මාර්ග සඳහන් කරන පරිදි ඒ සඳහා මෙම සාකච්ඡා පූර්ව සූදානමකි.
පසුගිය සතියේදී සෞඛ්‍ය ක්ෂේත්‍රයේ නිර්මාණය වෙමින් පවතින ගැටලු පිළිබඳව සමගි ජන බලවේගය දැඩි අවධානයක් යොමු කළේය. ඒ අනුව පසුගිය බ්‍රහස්පතින්දා සෞඛ්‍ය ක්ෂේත්‍රයේ වෘත්තිකයන් පිරිසක් පාර්ලිමේන්තු සංකීර්ණයට කැඳවා විශේෂ සාකච්ඡාවක් පැවැත්වීමට විපක්ෂ නායක සජිත් ප්‍රේමදාස මහතා කටයුතු කර තිබුණි.
මෙම සාකච්ඡාවේ විශේෂත්වයක් ද විය. ඉතිහාසයේ ප්‍රථම වතාවට පාර්ලිමේන්තුව තුළ විපක්ෂ නායකවරයකු විසින් ස්ථාපිත කළ කමිටු පළමු සාකච්ඡාව ලෙස මාධ්‍ය මෙය හඳුන්වා තිබේ. මෙම කමිටුව පසුගිය බ්‍රහස්පතින්දා පාර්ලිමේන්තු සංකීර්ණයේ කමිටු අංක 8 ශාලාවේදී පැවැත්විණි.
එහිදී බංකොලොත් රටේ, ජනතා මුදල් නාස්ති කරමින්, වංචා, අක්‍රමිකතා තුළින් ගුණාත්මකභාවයෙන් අඩු බාල ඖෂධ සහ වෛද්‍ය උපකරණ ගෙන්වීම මෙන්ම ඒවායේ සැබෑ තොරතුරු රටට සැඟවීමත්, ඒවා පිළිබඳ සත්‍ය කතා කරන වෛද්‍ය ක්ෂේත්‍රයේ විවිධ වෘත්තිකයන් දඩයම් කිරීමත් රජයේ ක්‍රමවේදය වී ඇති බව විපක්ෂ නායකවරයා සඳහන් කර තිබුණි.
මීට අමතරව පසුගිය සතිය තුළදී ඩෙංගු මර්දනය පිළිබඳව ද විපක්ෂ නායකවරයා බලධාරීන් සමඟ සාකච්ඡා කර තිබුණි.
මේ අතර පසුගිය සතියේ මාධ්‍ය කිහිපයක් වාර්තා කර තිබුණේ අනාගතයේ බිහිවන සමගි ජන බලවේගයේ ආණ්ඩුවක මුදල් අමාත්‍ය ධූරය පිළිබඳව කල් ඇතුවම අර්බුදයක් නිර්මාණය වී ඇති බවකි. සජබ ආරංචි මාර්ග අනුව සමගි ජන බලවේගයේ ආර්ථික විශේෂඥයන් පිළිබඳ විපක්ෂ නායකවරයා එතරම් පැහැදීමකින් පසු නොවන බව ඒ අනුව කියැවිණි.
“ඔය කියන අයට නම් නෙවෙයි, අපේ ආණ්ඩුවක මුදල් ඇමැතිකම හම්බවෙන්නෙ."
පැතිර යන කතා අනුව මෙලෙස සඳහන් කර ඇත්තේ සජිත් ප්‍රේමදාස මහතාමය. ආණ්ඩුවේ සිට විපක්ෂයට පැමිණි ආර්ථික විශේෂඥයකු ලෙස සැලකෙන ආචාර්යවරයකුගේ නමක් මෙහිදී ඔහු පැවසූ බවට මන්ත්‍රීවරුන් අතර කටකතාවක් පැතිර ගොස් ඇතැයි කියැවේ.
කෙසේවෙතත් පසුගිය සතියේ පළව තිබූ වාර්තා අනුව ආචාර්ය හර්ෂ ද සිල්වා ඇතුළු සමගි ජන බලවේගයේ ආර්ථික විශේෂඥයන් කිහිප දෙනාම යම් කලකිරීමකින් පසුවන බවද කියැවේ.
“අපි ඉතින් එයාගෙ ආර්ථික උපදේශකලා නෙවෙයිනෙ. අපෙන් වැඩ ගන්නවා විතරයි. අපිට කිසි වැඩක් නෑ."
මේ අතර රනිල් වික්‍රමසිංහ ජනාධිපතිවරයාට සහ සමගි ජන බලවේගයට උදව් කිරීම සම්බන්ධව දෙමළ ජාතික සන්ධානය තුළ ද යම් මත බෙදීමක් නිර්මාණය වී ඇතැයි පසුගිය සතියේ දැනගැනීමට ලැබුණි.
“ජනාධිපතිවරණයකදී අපි උදව් කරන්න ඕන ප්‍රධාන විපක්ෂය වන සමගි ජන බලවේගයට."
“නෑ මේ වෙලාවේ අපි උදව් කරන්න ඕන අපිත් එක්ක දීර්ඝ කාලීනව සුහදව කටයුතු කරපු පුද්ගලයා වන රනිල් වික්‍රමසිංහ ජනාධිපතිවරයාට."
විශාල සහ කුඩා කණ්ඩායමක් ලෙස මෙම මතවාද දෙක දෙමළ ජාතික සන්ධානය තුළින් මේ වන විටත් පෙනෙන්නට පටන්ගෙන ඇතැයි අප ආරංචි මාර්ග සඳහන් කරයි.
පසුගිය සතියේ විශාල දේශපාලන සහ සමාජ ආන්දෝලනයකට තුඩු දුන්නේ අධිවේගයට බාධා වූ පඬු කරඳ ගහ කැපීම සම්බන්ධ සිදුවීමයි. මෙම සිදුවීමට අමාත්‍ය බන්දුල ගුණවර්ධන මහතාගේ නම ද පැටලී තිබුණි. ඔහු මේ සිදුවීම් හා සම්බන්ධව ප්‍රකාශ කිහිපයක් ද සිදු කළේය. කෙසේවෙතත් මේ පිටුපස පැවැති අපූරු කතාවක් දේශපාලන ආරංචි මාර්ග අප වෙත සඳහන් කළේය.
පඬු කරඳ ශාකය සම්බන්ධව පසුගිය දිනවල ඇතිවූ ආන්දෝලනාත්මක තත්ත්වය නිසාම, ගස් කැපීමට අවසර ලබාගැනීම වෙනුවෙන් කැබිනට් පත්‍රිකාවක් ඉදිරිපත් කිරීමට බන්දුල ගුණවර්ධන මහතා කටයුතු කර තිබුණි. පඬු කරඳ ගස් කිහිපයක්ම අවට ප්‍රදේශවල ඇති බව සොයා බලා මෙම ගස කැපීමට ඔහු අවසර ඉල්ලා තිබූ බව කියැවේ.
“මොකටද බන්දුල මේ ගස් කපන්න කැබිනට් පේපර්ස්?"
කැබිනට්ටුවේදී මෙලෙස විමසා ඇත්තේ ජනපති රනිල් වික්‍රමසිංහ මහතාය.
“අපෝ එහෙම කියන්න එපා සර්. මේක හරි විශේෂ ගහක්. මහණ කරලා, සිවුරු පොරවලා තියෙන්නේ. මේක කපන්න ගියාම ලොකු ප්‍රශ්නයක් ඇතිවෙනවා. අනේ ඒක මට නම් කරන්න බෑ. ඔබතුමාලා මේ ගැන කැබිනට් එකෙන් තීරණයක් ගන්න."
මෙහිදී ඇමැති බන්දුල ගුණවර්ධනගේ ඉල්ලීම සාධාරණීකරණය කරන්නට ද අමාත්‍යවරුන් කිහිප දෙනකු ඉදිරිපත් වූ බව කියැවේ.
“ඔව් ජනාධිපතිතුමා අපි මේ ගැන කැබිනට් එකෙන්ම තීන්දුවක් ගත්තා නම් හොඳයි."
කෙසේ හෝ මෙම ගස කැපීම සඳහා අවසානයේ අවසරය ලැබී ඇත්තේ මෙම කැබිනට් පත්‍රිකාව අනුමත වීමත් සමඟයි.
පසුගිය සතියේ මෙම ගස කපා ඉවත් කිරීමට බලධාරීන් කටයුතු කර තිබුණි. ඒ සමඟම විශාල ආන්දෝලනයක් ඇතිවූ අතර පරිසර සංවිධාන සහ ක්‍රියාකාරීහු විශාල වශයෙන් විරෝධතා ගොනු කරන්නට වූහ. ගස කපා වළ දමා ඇති බවට බොහෝ දෙනෙක් චෝදනා කළහ. ඇමැති බන්දුල වෙත ද චෝදනා එල්ල විය.
මේ අතර අමාත්‍යවරයා ශ්‍රී ලංකාවේ සියලු දුම්රිය ස්ථානවල පඩු කරඳ ගස් සිටුවීමේ ව්‍යාපෘතියක් ආරම්භ කර තිබුණි. ඒ අනුව අනුරාධපුරය, යාපනය, කිළිනොච්චිය යන දුම්රිය ස්ථානවල මෙම ශාක රෝපණය පසුගිය සතියේ සිදුවිය.
කතරගම දෙවියන්ගේ මල් මාලයේ ද පඬු කරඳ මල් දැකගත හැකි බවත්, ඒ නිසාම මෙම ශාකයට කතරගම දෙවියන්ගේ ඇල්ම බැල්ම ලැබෙන බවත් බන්දුල ගුණවර්ධන මහතාට දැනගැනීමට ලැබී ඇතැයි ආරංචි මාර්ග සඳහන් කරයි. ඒ නිසාවෙන් අද ඉරිදා දිනයේදී කතරගම පූජා භූමියට ගොස් කතරගම දෙවියන්ට පඬු කරඳ පැළ කිහිපයක් පූජා කිරීමට අමාත්‍යවරයා කටයුතු කරනු ඇත. දෙමුහුන් ශාක කිරි වෙහෙරේ සිට කතරගම දේවාලය දක්වා රෝපණය කිරීම සිදුවනු ඇතැයි අප ආරංචි මාර්ග වැඩිදුරටත් සඳහන් කරයි.
පසුගිය සතියේ ජාතික ජන බලවේගය ද ආසන බල මණ්ඩල කිහිපයක රැස්වීම් සංවිධානය කර තිබුණි. එම රැස්වීම්වලදී රටේ ආර්ථික බංකොලොත්භාවයට හේතු සෙවීමට පත් කළ පාර්ලිමේන්තු විශේෂ කාරක සභාව පිළිබඳ ජාතික ජන බලවේගය දැඩිව විවේචන ඉදිරිපත් කරනු දැකගත හැකිවිය. මෙම කමිටුවෙන් ඉවත් වීමට සමගි ජන බලවේගය සහ ජාතික ජන බලවේගය කල් ඇතිවම තීරණය කළේය.
මේ අතර ජනතා විමුක්ති පෙරමුණ කරන්දෙණිය ප්‍රාදේශීය සභාව ජය ලබන බව සමීක්ෂණයකින් හෙළි වී ඇතැයි කරන්දෙණිය ආසන බල මණ්ඩලය ඇමතූ අනුර කුමාර දිසානායක මහතා පැවසීය. ඔහු නිශ්චිතවම ජය ලබන ප්‍රාදේශීය සභා දෙකක් පිළිබඳව ද ඉඟි ලබා දී තිබුණි.
මීට අමතරව පසුගිය සමයේ කරන්දෙණිය අවට ප්‍රදේශ කිහිපයක සිදුවු ඝාතන සහ පාතාල ක්‍රියාකාරකම් පිළිබඳව ද ඔහු කතා කර තිබුණි.
“දකුණේ අපරාධ රැල්ල දිගින් දිගටම ඉහළ යනවා. දිනෙන් දිනම පාතාල ක්‍රියාකාරකම් වැඩිවෙනවා. මේ හේතුවෙන් සාමකාමී ජනතාව බියට පත්වෙලා. නීතියේ ආධිපත්‍යය දුර්වල නිසයි මේ තත්ත්වය ඇතිවී තියෙන්නෙ. ප්‍රධාන පක්ෂ දෙකේම පාතාලය රජ කළා. සොත්ති උපාලි රනිල්ගේ කෘතධිකාරී මණ්ඩලයේ ප්‍රබල සාමාජිකයෙක්ව සිටියා. සංජීව කියන පාතාල සාමාජිකයා චන්ද්‍රිකාගේ පෞද්ගලික ආරක්ෂකයෙක්. දකුණේ පාතාල නායකයන් වන වම්බොට්ටා කරළියට ගෙනාවේ මහින්ද රාජපක්ෂයි. නාමල් බබා පාතාලය පෝෂණය කරනවා. ප්‍රබල දේශපාලකයන් තමන්ගේ ත්‍රාඩ වැඩවලට පාතාල අපරාධකරුවන් යොදාගන්නවා."
I චමිදු නිසල් ද සිල්වා