සර්ව පාක්ෂික සමුළුවෙන් නැගිට ගියේ කවුද?
දකුණෙන් හමා එමින් තිබූ දේශපාලන සුළං උතුරට හැරීමට පටන් ගෙන ඇත. උතුරු සුළඟ කැළඹී ජාතිකවාදී චණ්ඩ මාරුතයක් අප කරා එළඹෙන ලකුණුද පහළ වෙමින් තිබේ. ඒ අනුව කලක් අළු යට වූ ගින්නක් පසුගිය සතියේ ඇවිලී ගියේය. ඒ සර්ව පාක්ෂික සමුළුව සමඟයි.
ශ්‍රී ලංකාවේ සියලුම පක්ෂවලට පසුගිය සතියේ සර්ව පාක්ෂික සමුළුව සඳහා ජනපතිගෙන් ඇරුයුම් ලැබී තිබුණි. හමුව පැවැතියේ පසුගිය බදාදා සන්ධ්‍යාවේය. කල් ඇතිවම සර්වපාක්ෂික සමුළුවට සහභාගී නොවන බව දන්වා තිබුණේ ජාතික ජන බලවේගයයි. බොරු වැඩවලට කාලය කා දැමීමට ජාතික ජන බලවේගය සූදානම් නැති බැවින් ජනාධිපති කාර්යාලයේදී පැවැත්වීමට නියමිත සර්ව පාක්ෂික සමුළුවට සහභාගි නොවන බව පාර්ලිමේන්තු මන්ත්‍රී විජිත හේරත් පවසා තිබුණි.
මේ අතර දෙමළ ජාතික මහජන පෙරමුණේ නායක ගජේන්ද්‍ර කුමාර් පොන්නම්බලම්ද සර්ව පාක්ෂික සමුළුව මඟ හැරියේය. ආරම්භක අවස්ථාවේදී සමගි ජන බලවේගයද සිටියේ සහභාගිත්වය පිළිබඳ දෙගිඩියාවකිනි. එහෙත් අවසන් මොහොතේදී සර්වපාක්ෂික සමුළුවට සහභාගිවීමට සමගි ජන බලවේගය තීරණය කළේය.
මේ අතර ආණ්ඩුවේ ප්‍රධාන පක්ෂය වන ශ්‍රී ලංකා පොදුජන පෙරමුණ වෙනුවෙන් ආරාධනාව ලැබී තිබුණේ එහි මහ ලේකම් සාගර කාරියවසම් මහතාටය.
''ඔබතුමාලාගෙන් සහභාගි වන නියෝජිතයෝ කවුද කියලා දන්වන්න.''
ආරාධනය සමඟම සංවිධායකයන් පොහොට්ටුවට එලෙස දන්වා තිබුණි. ඒ අනුව පොහොට්ටුවේ ප්‍රධාන ලේකම් සාගර කාරියවසම් මෙම රුස්වීම සඳහා සහභාගිවීමට පිරිසක් නම් කළේය. ඔවුන් සියලුදෙනාම දිස්ත්‍රික් නායකයන් වීමත් තවත් සුවිශේෂී කරුණක් විය.
''මේකට නම් මහින්ද මහත්තයත් සහභාගි විය යුතුයි.''
ආරංචි මාර්ග සඳහන් කළේ සර්ව පාක්ෂික සමුළුව කතාව කරළියට පැමිණීමත් සමඟ පොහොට්ටුව අභ්‍යන්තරයේ මෙවන් අදහසක් පැලපදියම් වී තිබූ බවකි. ඒ අනුව මෙම රුස්වීම සඳහා සහභාගී වන පොහොට්ටුවේ පිරිස සර්ව සර්වපාක්ෂික සමුළුව ආරම්භ වීමට පැය කිහිපයකට පමණ පෙර හිටපු ජනපති මහින්ද රාජපක්ෂ මහතාව ඔහුගේ නිවසටම ගොස් මුණගැසී ඇතැයි කියැවේ.
''මහින්ද රාජපක්ෂ මහත්මයා එක්කම මේ සමුළුවට සහභාගී වෙනවා නම් අපි මොනවද කතා කළ යුත්තෙ.''
මෙම පැනය නිරාකරණය කර ගැනීම පිරිසේ අරමුණ වී ඇත. කෙසේ වෙතත් මහින්ද රාජපක්ෂ මහතා හමුවීමත් සමග සියලුදෙනාගේම ස්ථාවරය වී ඇත්තේ මෙවැන්නකි.
''මේක බලය බෙදීම සම්බන්ධව කතා කළ යුතු වෙලාවක් නෙවෙයි. දැන් තියෙන්නෙ, රටේ ආර්ථික කටයුතු ශක්තිමත් කරලා රට ආර්ථික වශයෙන් නගා සිටුවන එක. මේක අනවශ්‍ය ප්‍රශ්නයක් පටලවා ගැනීමක්. රට ආර්ථික වශයෙන් තව පොඩ්ඩක් යහපත් වුණාට පස්සේ මේ ගැන කතාකරන්න පුළුවන්.''
ආරංචි මාර්ග සඳහන් කරන පරිදි මහින්ද රාජපක්ෂ මහතාගේද ස්ථාවරය මීට සමාන වී තිබේ. කෙසේ වෙතත් පොහොට්ටුවේ නියෝජිතයන් සහ හිටපු ජනපති මහින්ද රාජපක්ෂ මහතා අතර පැවති සාකච්ඡාවේදී රාජපක්ෂ මහතා තවත් විශේෂ කරුණක් පිරිසට සිහිපත් කර දී තිබේ.
''මේක බරපතළ ප්‍රශ්නයක්. අපේ ජනාධිපතිවරු හත් දෙනෙක් හිටියා. නමුත් ඒ කිසි කෙනකුටවත් ආණ්ඩුක්‍රම ව්‍යවස්ථාවට ඇතුළත්ව තිබූ දහතුන් වැනි ආණ්ඩුක්‍රම ව්‍යවස්ථා සංශෝධනය ක්‍රියාත්මක කරගන්න බැරිවුණා. රනිල් වික්‍රමසිංහ මහත්මයලගෙ පාර්ශ්වයේ ආණ්ඩුත් තිබුණ, අපේ ආණ්ඩුත් තිබුණා. ඒත් කාටවත් ක්‍රියාත්මක කරගන්න බැරි වුණා. මේක දැන් කරන්න යනවා කියන එක හරිම ලෙඩක්. ඇත්තටම මේ ගැන මන්ත්‍රීවරුන්ගෙන් විතරක් අහලත් වැඩක් නෑ. සිවිල් සංවිධාන, ජාති හිතෛෂී සංවිධාන එක්ක මේ ගැන කතා කරන්න ඕනෑ. මං මේකට සහභාගී වන එක වැඩක් නෑ. ඕගොල්ලො ගිහිල්ලා මේ ටික කියන්න"
මහින්ද රාජපක්ෂ මහතා සිදුකර තිබුණේ මීට සමාන පැහැදිලි කිරීමකි. මේ අතර මන්ත්‍රීවරුන් රාජපක්ෂ මහතාගෙන් පැනයක් විමසා තිබේ.
''මොකක්ද සර්... මේ හැමතැනම හැමෝම කියන්නේ සර් තර්ටීන් ප්ලස් (13+) දෙන්නම් කිව්වා කියලා. සුමන්තිරනුත් කියනවා ජනාධිපතිතුමත් කියනවා.''
මේ දවස්වල මේ දිනවල නිතර නිතර ඇසෙන ප්‍රශ්නයකි.
''හුඟක් දෙනාට ඕකෙ ඇත්ත කතාව අමතකයි. ඕක කිව්වේ මම නෙවෙයි ඉන්දියාවේ අගමැතිවෙලා හිටපු මන්මෝහන් සිං මැතිතුමා. යුද්දෙට පස්සෙ මම එතුමාව හම්බවෙන්න ගියා සංහිඳියාව පිළිබඳ සාකච්ඡා කරන්න. මම එතනදි කිව්වා පළාත් සභාවල මහජන නියෝජිතයන්ට ලැබෙන අවස්ථාව වැඩි කරන්න ඕනේ නම් රට තුළ උත්තර මන්ත්‍රණ සභාවක් ඇති කරන්න අපිට පුළුවන් කියලා. එය හරහා පළාත් මහා ඇමතිවරුන්ට පළාත් මන්ත්‍රීවරුන්ට මීට වඩා වැඩි දායකත්වයක් මහ ආණ්ඩුවට ලබා දෙන්න පුළුවන් කියලා මම කිව්වා.''
මහින්ද රාජපක්ෂ මහතා පිරිස් හමුවේ සිහිපත් කරන්නට වී ඇත්තේ දශකයක් පමණ පැරුණි දේශපාලන කතාන්දරයකි. අප ආරංචිමාර්ග පැහැදිලි කරන පරිදි ඔහු මේ පිළිබඳ දීර්ඝ පැහැදිලි කිරීමක් සිදුකර තිබේ.
''මම එහෙම කියනකොට මන්මෝහන් සිං අගමැතිතුමා හිනාවෙලා කිව්වා ජනාධිපතිතුමා එහෙනම් ඒක තර්ටීන් ප්ලස්නේ කියලා. මම එතකොට කිව්වා, ඒක නම් දන්නෙ නෑ ඔන්න ඕක තමා අපිට කරන්න පුළුවන් කියලා. කොහොම හරි ඊට පස්සේ මේක මම කිව්ව වගේ අපේ රටේ පැතිරුණා.''
මේ අතර සමගි ජනබලවේගයද සර්ව පාක්ෂික සමුළුවට සහභාගී වීම සම්බන්ධව දීර්ඝ වශයෙන් සාකච්ඡා කර ඇතැයි ආරංචිමාර්ග සඳහන් කරයි. පක්ෂයේ පිරිසක් මෙම සමුළුවට සහභාගි නොවිය යුතු යැයි ආරම්භයේදී සඳහන් කර ඇතැයි දැනගැනීම ලැබේ. සහභාගීත්වය සම්බන්ධවද ස්ථිර කිරීමට ඔවුන් දීර්ඝ කාලයක් ලබාගෙන ඇත්තේ එබැවිනි.
කෙසේ වෙතත් මෙම සාකච්ඡාවට අනිවාර්යයෙන්ම සහභාගී විය යුතු තවත් පිරිසක් මෙලෙස පවසා තිබේ.
''මෙතන සමහරු බලන් ඉන්නේ අපි මේ සාකච්ඡාව මගහරිනකල්. ඊටපස්සේ සහයෝගය දෙන්නෙ නෑ, ජාතික ප්‍රශ්නය විසඳන්න එකතු වෙන්න බෑ වගේ එක එක දේවල් කියලා අපිට ගහන්න පටන් ගනී.''
අවසානයේ මෙම සාකච්ඡාවට නාමිකව හෝ සහභාගි වීමට සමගි ජන බලවේගයේ මන්ත්‍රී කණ්ඩායම තීරණය කළහ. සාකච්ඡාව එතරම් ඵලදායී නොමැති නම් නියත වශයෙන්ම සර්ව පක්ෂික සමුළුවෙන් ඉවත්ව යාමට මෙහිදී ඔවුහු කල් ඇතිවම තීරණය කළෝය.
මෙවන් මතභේදාත්මක වටපිටාවක් තුළ බදාදා පස්වරුවේ ජනාධිපති ලේකම් කාර්යාලයේදී සර්වපාක්ෂික සමුළුව ආරම්භ විය. සමුළුව අරඹමින් පළමුව කතාකළේ ජනපති රනිල් වික්‍රමසිංහ මහතාය. ආණ්ඩුක්‍රම ව්‍යවස්ථාවේ 13 වැනි සංශෝධනය පිළිබඳව ද්‍රවිඩ පක්ෂ මන්ත්‍රීවරුන් සමඟ පමණක් සාකච්ඡා කිරීම ප්‍රමාණවත් නොවන බවත් එය සමස්ථ රටටම බලපාන කාරණයක් බැවින් සියලු පාර්ශ්ව සමඟ සාකච්ඡා කර තීන්දුවක් ගැනීම තම ස්ථාවරය බවත් ජනාධිපති රනිල් වික්‍රමසිංහ මහතා එහිදී සඳහන් කළේය.
මෙහිදී වැඩිදුරටත් කරුණු පැහැදිලි කළ ජනාධිපති රනිල් වික්‍රමසිංහ මහතා කියා සිටියේ පවතින ගැටලු විසඳීම සඳහා නව නීති සම්මත කිරීමේ බලය තමාට පමණක් නොව මීට පෙර සිටි විධායක ජනාධිපතිවරුන් හත්දෙනාටද නොතිබූ බවයි. පවතින ගැටලු විසඳා ගැනීම වෙනුවෙන් නව නීති සම්මත කිරීමේ බලය තිබෙන්නේ පාර්ලිමේන්තුව සතුව බවත්, තමා සිදු කරන්නේ රට වෙනුවෙන් අදාළ යෝජනා ගෙන ඒම පමණක් බවත් ජනාධිපතිවරයා වැඩිදුරටත් සඳහන් කොට තිබුණි.
මෙම අවස්ථාවට අග්‍රාමාත්‍ය දිනේෂ් ගුණවර්ධන, කතානායක මහින්ද යාපා අබේවර්ධන, විපක්ෂනායක සජිත් ප්‍රේමදාස, හිටපු ජනාධිපති මෛත්‍රීපාල සිරිසේන, දෙමළ ජාතික සන්ධානයේ නායක පාර්ලිමේන්තු මන්ත්‍රී ආර්. සම්බන්ධන්, එම්.ඒ. සුමන්තිරන්, ශ්‍රී ලංකා පොදුජන පෙරමුණේ මහ ලේකම් පාර්ලිමේන්තු මන්ත්‍රී සාගර කාරියවසම්, පාර්ලිමේන්තු මන්ත්‍රීවරුන් වන ඩලස් අලහප්පෙරුම, විමල් වීරවංශ ඇතුළු සැලකිය යුතු පිරිසක් පැමිණ සිටියහ.
සර්ව පාක්ෂික සමුළුව අවස්ථාවේදී පක්ෂ නායකයෝ බොහෝදෙනෙක් සිය අදහස් දැක්වීම් සිදුකළහ. මෙහිදී හිටපු ජනාධිපති මෛත්‍රීපාල සිරිසේන මහතා ශ්‍රී ලංකා නිදහස් පක්ෂය වෙනුවෙන් කතා කළේය. ඔහු ජනාධිපතිවරයාටත් වඩා වැඩි කාලයක් ගනිමින් තමන්ගේ පාලන සමයේ කළ හැකිවූ සහ නොහැකි වූ දේවල් පිළිබඳ පැහැදිලි කර ඇතැයි කියැවේ. ඒ අනුව ඔහු මිනිත්තු හතළිහකට වඩා වැඩි කාලයක් ගත් බව දේශපාලන ආරංචි මාර්ග සඳහන් කරයි.
ශ්‍රී ලංකා පොදුජන පෙරමුණු ප්‍රධාන ලේකම් සාගර කාරියවසම් මෙහිදී කතාකොට ඇත. මහින්ද රාජපක්ෂ මහතා සමඟ පැවති සාකච්ඡාවේදී එකඟ වූ අදහස් ඔවුන් එහිදී ඉදිරිපත් කර තිබේ.
''මේ වෙලාවේ බලය බෙදීම වගේ ප්‍රශ්නයක් පටලවා ගන්නවා කියන එක එතරම් සුදුසු නෑ. මේ වෙලාවේ ප්‍රමුඛතාවය ලබාදිය යුත්තේ ආර්ථිකය යථා තත්ත්වයට පත්කිරීමට.''
මෙහිදී පොහොට්ටුව පාර්ශ්වයෙන් තවත් අදහසක් ඉදිරිපත්ව තිබේ. ඔවුන් කියා ඇත්තේ ගෝඨාභය රාජපක්ෂ මහතාගේ ජනවරම රනිල් වික්‍රමසිංහ මහතා ඉදිරියට ගෙන යන බවයි.
''හැටනම ලක්ෂයක් ජනතාව ඡන්දෙ දුන්නෙ පරණ ක්‍රමය වෙනස් කරන්න. නව ව්‍යවස්ථාවක් හදන්න. ජනාධිපති නීතිඥ රොමේෂ් ද සිල්වා මහතා යටතේ ඒ කටයුතු ඉදිරියට ගියා. පහුගිය කාලයේදී එයට බාධා වුණ නිසා තමා නතර වුණේ. බලය බෙදන එක නෙවෙයි අපි කරන්න ඕන. ඒ පොරොන්දුව ඉටුකරන එක ගැන.''
මේ අදහස සරත් වීරසේකර සහ සනත් නිශාන්ත යන පොහොට්ටුවේ පාර්ලිමේන්තු මන්ත්‍රීවරුද අනුමත කළහ.
විපක්ෂනායක සජිත් ප්‍රේමදාස මහතාද සමගි ජන බලවේගය නියෝජනය කරමින් සර්ව පාක්ෂික සමුළුවට පැමිණ සිටියේය. ඔහුද දහතුන් වැනි ව්‍යවස්ථා සංශෝධනය සහ බලය බෙදීම සම්බන්ධව ඉතිහාසය සහ වර්තමාන තත්ත්වය කතා කළේය. සංහිඳියා සංකල්ප පිළිබඳවද පැහැදිලි කළේය.
''ආණ්ඩුව ආණ්ඩුවේ යෝජනා ඉදිරිපත් කරන්න. අපි මෙතැනට ඇවිල්ලා නිකම් කතා කරලා වැඩක් නෑ. ආණ්ඩුව තමන්ගේ යෝජනාව ඉදිරිපත් නොකර අපි මේ විදිහට කතා කරන එකේ තේරුමක් නෑ.''
විපක්ෂනායකවරයා අවසානයේ මතුකළේ එවන් අදහසකි. පසුව රුස්වීම අවසන් වීමට පෙර ඔහු සභාවෙන් පිටව ගොස් තිබේ. මෙහිදී අදහස් දැක්වූ හෙලිකොප්ටර් සංධානයේ පක්ෂනායක පිරිස අතරින් මතුවූයේ එකිනෙකට විරුද්ධ මතයන් බව ආරංචි මාර්ග සඳහන් කරයි. ඩලස් අලහප්පෙරුම කියා තිබුණේ මෙවන් කතාවකි.
''ජනාධිපතිතුමා කියන සංහිඳියාව ඇති කිරීම, බලය විමධ්‍යගත කිරීම සිදුකළ යුතු දේවල්. නමුත් මට මේ අය අවංකව මේ දේවල් කරනවා කියලා විශ්වාසයක් නෑ. ඒ නිසා මේකට සහාය දෙන්න බෑ.''
හෙළිකොප්ටර් සන්ධානය නියෝජනය කරන විමල් වීරවංශ උදය ගම්මන්පිල යන පක්ෂ නායකයෝ බලය බෙදීමට දැඩි විරෝධයක් පළ කළහ. ඔවුහු ඒකීයත්වය අගය කළහ. කෙසේ වෙතත් එම සංධානයේම පාර්ලිමේන්තු මන්ත්‍රී වාසුදේව නානායක්කාර මහතා කීවේ වෙනත් කතාවකි.
''මොන සන්ධානෙ හිටියත් මගේ ඇඟේ තියෙන්නේ වාමාංශික ලේ. ඒ නිසා මං මේකට සහයෝගය දෙනවා.''
ඔහු අනුව යමින් කොමියුනිස්ට් පක්ෂය වෙනුවෙන් පැමිණ සිටි වීරසුමන වීරසිංහ මහතාද බලය බෙදීමට සහාය පළ කළේය.
''මේක කරන්න ඕනෑ දෙයක්. මාත් පළාත් සභාවෙන් ආපු කෙනෙක්. ඒ නිසා මේකෙ වටිනාකම මං දන්නවා. අපි මේකට සහයෝගය ලබාදෙනවා.''
මේ අතර මුස්ලිම් මන්ත්‍රීවරුන් නිහඬතාවය ආරක්ෂා කරමින් සභාවේ රැදී සිටීමද කැපී පෙනුණි. කෙසේ වෙතත් ද්‍රවිඩ පක්ෂ නියෝජනය කරන පක්ෂ නායකයන් මෙහිදී අදහස් දැක්වූහ. සම්පන්දන්, සුමන්තිරන්, මනෝ ගනේෂන්, විග්නේෂ්වරන් ඒ අතරින් ප්‍රධානීන් විය. බලය බෙදීමේ අවශ්‍යතාවය ඔවුන් අවධාරණය කළේය.
''බලය බෙදන්න කතාකරන්න ඉස්සෙල්ලා. තියන්න නියමිත පළාත් සභා ඡන්දය තියල ඉමු.''
බොහෝ පක්ෂ නායකයෝ මෙම මතයම එළඹ සිටියහ. මේ අතර ද්‍රවිඩ ජාතික සන්ධානයේ සුමන්තිරන් මන්ත්‍රීවරයා සිය අදහස් දැක්වීමෙන් සභාව තරමක් උණුසුම් විය. ඉහත අවස්ථාවලදී විවිධ දේශපාලන නායකයන් ලබාදුන් පොරොන්දු ඔහු සිහිපත් කළේය. අවසානයේ ඔහුද පළාත් සභා මැතිවරණය පැවැත්වීමේ අවශ්‍යතාවය අවධාරණය කරන්නට විය.
මැතිවරණ කතාවට පිළිතුරු ලබාදීමට ජනපති රනිල් වික්‍රමසිංහ මහතා ඉදිරිපත් විය.
''මිස්ටර් සුමන්තිරන්, කේක් ගෙඩිය තියාගන්නයි, කන්නයි දෙකක් කරන්න බෑ එකපාර. එක්කෝ බලය විමධ්‍යගත කරමු. නැත්නම් ඡන්දෙ තියමු. දෙකක් එකපාර කරන්න බෑ. කේක් ගෙඩිය තියාගන්නවද කපනවද කියලා ඔයා තීරණය කරන්න.
කිසිදු පිළිගත හැකි එකඟතාවයක් නිර්මාණය නොවුණත් පැය දෙකහමාරකට වැඩි වෙලාවක් සර්ව සර්වපාක්ෂික සමුළුව පැවතියේය. පසුවද විවිධ දේශපාලන පක්ෂ මේ හා සම්බන්ධව ප්‍රකාශ නිකුත් කරන්නට විය.
පාර්ලිමේන්තු මන්ත්‍රී නිමල් ලන්සා ඇතුළු දැනට පාර්ලිමේන්තුවේ ස්වාධීන වූ මන්ත්‍රී පිරිසක් එක්ව ගොඩනගන ලද නව සන්ධානයේ කාර්යාලය රාජගිරියේ ලේක් ඩ්‍රයිව් නො 118 ස්ථානයේ විවෘත කිරීමද පසුගිය තිරය පිටුපස දේශපාලන උණුසුම් කළේය. දේශපාලන ආරංචි ආරංචිමාර්ග සඳහන් කරන පරිදි නිමල් ලන්සා ඇතුළු මන්ත්‍රී පිරිසක් කොළඹ පිහිටි ප්‍රධාන පෙලේ හෝටලයක හා තවත් ස්ථාන කිහිපයකදී හමුවී නව සන්ධානයේ ඉදිරි කටයුතු ගැන සාකච්ඡා කොට තිබේ.
ප්‍රධාන දේශපාලන පක්ෂ 5ක් සමඟ මේ වනවිටත් සාකච්ඡා අවසන් කර ඇති අතර ඉදිරි සතියේ තවත් පක්ෂ කිහිපයක් සමඟ සාකච්ඡා කිරීමට ලන්සා ඇතුළු මන්ත්‍රී කණ්ඩායම වෙලාව වෙන්කර ගෙන ඇති බව එම පාර්ශ්වයේ ආරංචි මාර්ග වැඩිදුරටත් සඳහන් කරයි. මේ අතර අනුර ප්‍රියදර්ශන යාපා, සුසිල් ප්‍රේම්ජයන්ත, ලසන්ත අලගියවන්න, නිමල් ලන්සා, දුමින්ද දිසානායක, නලින් ප්‍රනාන්දු, මහින්ද අමරවීර, ප්‍රියංකර ජයරත්න ඇතුළු පිරිසක් පසුගියදා ප්‍රවාහන අමාත්‍යංශයේදී හමුවූ අවස්ථාවක මේ පිළිබඳ සාකච්ඡා කර ඇතැයි කියැවේ.
එම සන්ධානයේ මංගල රුලිය ලබන වසරේ ජනවාරි 19 වෙනිදා පැවැත්වීම පිළිබඳව ඔවුන් සාකච්ඡා කළ බවක් ලන්සා පාර්ශ්ව ආරංචිමාර්ග සඳහන් කරයි. ඒ වනතෙක් මේ ගැන ගමින් ගමට ගොස් ජනතාව දැනුවත් කිරීම සඳහා විශේෂ වැඩපිළිවෙළක් සකස් කිරීමටද මෙම කණ්ඩායම තීරණය කර තිබේ. පසුගියදා ජනාධිපති රනිල් වික්‍රමසිංහ මහතා සහ නිමල් ලන්සා අතරද විශේෂ හමුවක්ද පැවති බව එම ආරංචි මාර්ග වැඩිදුරටත් සඳහන් කරයි. මෙම නව දේශපාලන ව්‍යාපාරය පිළිබඳව මෙහිදී සාකච්ඡා වී ඇතැයි කියැවේ.
ජනාධිපති රනිල් අගමැති මෝදිට දුන් සුවිශේෂ තෑග්ග
ශ්‍රී ලංකා ජනාධිපති රනිල් වික්‍රමසිංහ මහතාගේ දෙදින ඉන්දීය නිල සංචාරය අතරතුර දී ඉන්දීය අග්‍රාමාත්‍ය නරේන්ද්‍ර මෝදි මහතා වෙත සුවිශේෂී තිළිණයක් ප්‍රදානය කෙරුණි. ඒ අනුව රීස් ඩේවිඩ්ස් පඬිවරයා විසින් සංග්‍රහ කරන ලද පාලි භාෂාවෙන් ලියැවුනු ත්‍රිපිටකයේ වෙළුම් සියල්ල ඉංග්‍රීසි පිටපත්ද සහිතව ඉන්දීය අග්‍රාමාත්‍යවරයා වෙත ප්‍රදානය කිරීමට ශ්‍රී ලංකා ජනාධිපතිවරයා කටයුතු කළේය. මෙම ග්‍රන්ථ ලන්ඩනයෙන් විශේෂයෙන්ම ගෙන්වා තිබිණි.
දෙරට අතර පවතින ගැඹුරු අධ්‍යාත්මික සහ හා සංස්කෘතික සම්බන්ධතාවය සංකේතවත් කිරීමෙන් මෙම ප්‍රදානය සිදුවිය. මෙම ත්‍රිපිටක වෙළුම් සියල්ල ශ්‍රී ලාංකීය ශිල්පීන් අතින් තේක්ක ලීයෙන් නිමැවූ ආකර්ෂණීය පොත් රාක්කයක බහා ප්‍රදානය කෙරුණි. දිල්ලියේ හයිද්‍රබාද් නිවසේ ඉන්දීය අග්‍රාමාත්‍ය නරේන්ද්‍ර මෝදි මහතා සමඟ පැවති සාකච්ඡාව අවසානයේ ජනාධිපති රනිල් වික්‍රමසිංහ මහතා මෙම ප්‍රදානය සංකේතවත් කරමින් ධම්මපදයේ වෙළුමක් ඉන්දීය අග්‍රමාත්‍යවරයා පිරිනැමීය. පොත් රාක්කයේ ඡායාරෑප සහ ඒ පිළිබඳ විස්තර කෙරෙන ලියවිල්ලකුත් ඉන්දීය අග්‍රාමාත්‍යවරයා වෙත ලබාදීමට වික්‍රමසිංහ මහතා කටයුතු කළේය. මෙම පොත් රාක්කය තුළ තැන්පත් කර ඇති ත්‍රිපිටකය පාලි සහ ඉංග්‍රීසි පිටපත් වෙළුම් 91 කින් සමන්විතය.
I චමිඳු නිසල් ද සිල්වා
