පුංචි ආණ්ඩුවල හිටපු ලොක්කන්ගෙන් ජනපති‌ට ප්‍රශ්න පත්තරයක්
කුණාටුවට පෙරද පසුද මහා සමුදුරේ දැකගත හැක්කේ ගුප්ත නිහැඬියාවකි. ගෙවී ගිය සතියේ දේශපාලන පොර පිටියේ ද වූයේ එවන්ම නිහැඬියාවකි. දේශපාලන වේදිකාවේ අහුමුළුවල එකිනෙකාගේ කොඳුරා ගැනීම් යාන්තමින් අසන්නට ලැබුණි. පැති මාරු කුමන්ත්‍රණ වෙනුවෙන් සිදුවූ සියලු කතාබහ රහසිගත විය.
මීට සතියකට පමණ ඉහතදී බැසිල් රාජපක්ෂ මහතාගේ ප්‍රධානත්වයෙන් පොහොට්ටුව ප්‍රධාන කාර්යාලයේදී පොහොට්ටුවේ පළාත් පාලන ආයතන ප්‍රධානීන්ගේ රැස්වීමක් පැවැති බව අපි අනාවරණය කළෙමු.
මෙහි පැමිණි හිටපු ප්‍රාදේශීය සභා සභාපතිවරුන්, හිටපු නගරාධිපතිවරුන්, පළාත් පාලන ආයතන විසුරුවා හැරීමත් සමඟ නිර්මාණය වී ඇති ගැටලු රැසක් බැසිල් රාජපක්ෂ හමුවේ තබා ඇත. මැතිවරණය කල් යාම, අපේක්ෂක ඇප මුදල් නැවත ලබාගැනීම පමාවීම, පළාත් පාලන ආයතන තුළ නිලධාරීන්ගෙන් අදාළ වැඩ කොටස ඉටු නොවීම ආදී ප්‍රශ්න රැසක් මෙහිදී සාකච්ඡාවට ලක්විය.
“අපි මේ සම්බන්ධව ජනාධිපතිතුමාව දැනුවත් කිරීමයි සිද්ධ කරන්න ඕනෑ."
අවසානයේ පිරිස අතර නිර්මාණය වී ඇති එකඟතාවය අනුව පසුගිය සතියේ මෙම පිරිස ජනාධිපති රනිල් වික්‍රමසිංහ මහතාගෙන් සාකච්ඡාවක් ඉල්ලා තිබුණි.
එම සාකච්ඡාව පසුගිය සිකුරාදා ජනාධිපති ලේකම් කාර්යාලයේදී පැවැත්විණි. මෙම අවස්ථාවට සැලකිය යුතු පළාත් පාලන ආයතන ප්‍රධානීන් සංඛ්‍යාවක් පැමිණ සිටියහ. පොහොට්ටුව වෙනුවෙන් පාර්ලිමේන්තු මන්ත්‍රීවරුන් වන පොහොට්ටුවේ ලේකම් සාගර කාරියවසම් සහ මාධ්‍ය ප්‍රකාශක සංජීව එදිරිමාන්න ද මෙහි පැමිණ සිටියහ.
“නොමිනේෂන් දීලා, ඡන්දෙ කල් දාලා, අපිට පන්සලකට උත්සවයකට කිසිම වැඩකට යන්න බෑ. මේ මැතිවරණ නීති නිසා අපි ගොඩක් පීඩාවට පත්වෙලා ඉන්නේ."
පැමිණ සිටි බහුතරය ජනාධිපති හමුවේ ගැටලුව ඉදිරිපත් කරන්නට වූහ.
“අපි මේ සම්බන්ධව පාර්ලිමේන්තුව තුළ යමක් කරන්න බලනවා."
ආරංචි මාර්ග සඳහන් කළ පරිදි ජනපති ඇතුළු ආණ්ඩුවේ ප්‍රධානීන් ලබා දී ඇත්තේ එවන් පිළිතුරකි.
මෙහිදී පළාත් පාලන ආයතන නිලධාරී පාලනය යටතේ අකර්මණ්‍ය වීම පිළිබඳව ද මෙම පිරිස ජනපති වෙත කරුණු පැහැදිලි කර ඇතැයි කියැවේ. ඒ සම්බන්ධවද වැඩපිළිවෙළක් ක්‍රියාත්මක කිරීම ඒ අනුව සිදුවනු ඇත.
ගෙවී ගිය සතියේ විපක්ෂයේ ප්‍රධාන දේශපාලන පක්ෂය වන සමගි ජන බලවේගයේ අළු යට පැවැති ගිනි කෙමෙන් දළුලා වැඩෙන බවක් පෙනී ගියේය. දේශපාලන ආරංචි මාර්ග සඳහන් කළේ ජනපතිගේ ඇතැම් වැඩපිළිවෙළ සඳහා සහාය දැක්විය යුතු බව කියන පිරිස සහ ධනපති විරෝධීන් අතර මෙම ගින්න ඇවිල යමින් ඇති බවකි.
මේ බව පැහැදිලිව පෙනී ගිය එක්තරා සිදුවීමක් පසුගිය සතියේ සිදුවිය. මාධ්‍යවේදීන්ගේ ප්‍රශ්න කිරීමක් අතරතුරදී එක්සත් ජාතික පක්ෂයට එකතුවීම පිළිබඳ සජබ මන්ත්‍රිනී රෝහිණී කවිරත්න මෙලෙස පැවසුවාය.
“මේ රටේ අනාගතය වෙනුවෙන් අපි හැමෝම එකතුවෙලා තීන්දු තීරණ ගත යුතුයි. ඒක කරන්නෙ මහ ගෙදර ඉඳන්ද පස්සේ ගියපු ගෙදර ඉඳන්ද, කියන එක අදාළ වෙන්නේ නෑ. අපි රටේ ජනතාව වෙනුවෙන් කොතැන ඉඳලා හරි වැඩ කරන්න ඕනෑ."
මේ අතර සජිත් ප්‍රේමදාස සහ රනිල් වික්‍රමසිංහ එකට එකතු විය යුතුය යන්න ද ඇය අනුමත කළාය.
“ඒක බොහොම සාධාරණ ඉල්ලීමක්. දෙන්නා එකතුවෙලා යා යුතුයි."
මේ අතර එක්සත් ජාතික පක්ෂය දෙසින් ද සජබ ජනාධිපති හිතෛෂින් වෙත දිගටම කොළ එළි දල්වන්නට විය.
“රනිල් වික්‍රමසිංහ මහත්මයා ජනාධිපති වුණේ සජබ ඡන්දත් අරගෙන. ඒක මතක තියාගන්න ඕනේ."
එලෙස පසුගිය සතියේ සඳහන් කර ඇත්තේ එක්සත් ජාතික පක්ෂයේ සභාපති පාර්ලිමේන්තු මන්ත්‍රී වජිර අබේවර්ධනය.
“සජබ කී දෙනෙක් ජනාධිපතිතුමාට පොරොන්දුවෙලා ඡන්දය පාවිච්චි කළාද, කලින් දවසේ රාත්‍රී අපි මුණගැහිලා කතා කරල ගියා. එතුමන්ලා කිව්වා මොන සාකච්ඡා තිබුණත් අපේ ඡන්දය ඔබතුමාට කියලා."
පසුගිය සතියේදී ශ්‍රී ලංකා නිදහස් පක්ෂය දෙසින් ද විවිධ දේශපාලන ආරංචි ලැබෙමින් තිබුණි. පක්ෂය හැර ගිය පිරිස් තමන් වෙත ආකර්ශනය කර ගැනීමේ විශේෂ වැඩසටහනක් ශ්‍රීලනිපය දියත් කරමින් සිටින බව ඒ අනුව පෙනී ගියේය. ශ්‍රී ලංකා නිදහස් පක්ෂය සංවිධානය කරන සෑම වැඩසටහනකටම එම පිරිසට ආරාධනා කිරීමට ඔවුහු අමතක නොකළහ.
මේ අතර ඩලස් පිල සහ ශ්‍රීලනිපය අතර තීරණාත්මක සාකච්ඡා පැවැත්වෙමින් ඇති බවද දේශපාලන ආරංචි මාර්ග සඳහන් කළේය. ඩලස් අලහප්පෙරුම, නාලක ගොඩහේවා සහ වසන්ත යාපා බණ්ඩාර ශ්‍රී ලංකා නිදහස් පක්ෂයේ නායකයන් මුණගැසී පැවැත්වූ සාකච්ඡාවල යම් සාර්ථකත්වයක් වන බව කියැවුණි.
මේ අතර 13 වැනි ව්‍යස්ථා සංශෝධනය හරහා ජනාධිපතිවරයා සිදු කරනු ලබන දේශපාලන ක්‍රියාකාරකම් හෙළා දකින බව ශ්‍රී ලංකා නිදහස් පක්ෂය පසුගිය සතියේ සඳහන් කළේය. මෙම ප්‍රකාශය සිදු කර තිබුණේ ශ්‍රීලනිප ජ්‍යෙෂ්ඨ උප සභාපති මහාචාර්ය රෝහණ ලක්ෂ්මන් පියදාස මහතාය. රට ප්‍රජාතන්ත්‍රවාදී දේශපාලන අර්බුදයකට ගමන් කරමින් ඇති බව ද ඔහු වැඩිදුරටත් සඳහන් කර තිබුණි.
පසුගිය සතියේ ජනාධිපති රනිල් වික්‍රමසිංහ මහතා සුවිශේෂී ගමනක් ගියේය. ඒ මඩු පල්ලියේ මංගල්‍යයට සහභාගී වීමේ අරමුණෙනි. මෙහිදී මන්නාරම පිළිබඳ ජනපති විශේෂ අනාවරණයක් සිදු කළේය.
“මඩු මාතාව වැඩ සිටින මෙම මන්නාරම ප්‍රදේශය පුනර්ජනනීය බලශක්තිය බහුලව ඇති ප්‍රදේශයක්. මෙහි ඇති සූර්ය ශක්තිය, සුළං ශක්තිය සහ හරිත ශක්තිය සමඟ මන්නාරම දිස්ත්‍රික්කය බලශක්ති කේන්ද්‍රස්ථානයක් ලෙස ගොඩනැගිය හැකියි.
එසේම පූනරීන් බලශක්ති නගරයක් බවට පත් කිරීමටත් අප සැලසුම් කර තිබෙනවා. මෙම සෑම සංවර්ධන කටයුත්තක්ම සිදු කරන්නෙ මේ ශුද්ධ භූමිය හා වනාන්තර ආරක්ෂා වන අන්දමින් බව මම කියන්න කැමැතියි. එමෙන්ම මෙම ප්‍රදේශවල සංවර්ධන කටයුතුවලදී මෙහි පියතුමන්ලාගේ අවවාද අනුශාසනා ලබාගන්නා ලෙස මම නිලධාරීන්ට දැනුම් දී තිබෙනවා.''
මේ අතර ලබන සැප්තැම්බර් 15 වැනිදා සිට තාලෙයිමන්නාරම සිට කොළඹ දක්වා නගරාන්තර ශීඝ්‍රගාමී දුම්රිය සේවාවක් ආරම්භ කරන බව ජනපති සඳහන් කළේය.
පසුගිය සතියේ පාර්ලිමේන්තු මන්ත්‍රී විමලවීර දිසානායක මහතා අපූරු අනාවරණයක් සිදු කර තිබුණි. පාර්ලිමේන්තු මන්ත්‍රීවරුන් නිතර නිදහසේ ගැවසෙන කෝට්ටේ, මාදිවෙල මන්ත්‍රී නිවාස සංකීර්ණය අවට ස්පා 42ක් පවතින බව ඔහු සඳහන් කළේය. ආයුර්වේද නමින් පවත්වාගෙන යන මෙම ස්පාවල එක අයකුගෙන් රුපියල් 5000ක් ගන්නා තැන්ද ඇති බව ඔහු පවසා තිබුණේ දෙහිඅත්තකණ්ඩිය ප්‍රාදේශීය සම්බන්ධීකරණ කමිටුව රුස්වීමට එක්වෙමිනි.
පසුගිය සතියේ අප හෙළිදරව් කළ පරිදි ගෙවී ගිය සති අන්තයේ පොහොට්ටු පක්ෂය සංවිධානය කළ නුවරඑළියේ විශේෂ වැඩසටහන පැවැත්වුණි. රාජ්‍ය අමාත්‍ය පියල් නිශාන්ත, රාජ්‍ය අමාත්‍ය ජානක වක්කුඹුර සහ පාර්ලිමේන්තු මන්ත්‍රී ඩී. වීරසිංහ මෙම වැඩසටහනේ ප්‍රධාන සංවිධායකයින් වූහ. මන්ත්‍රීන්ට ඇරයුම් කළේ මහ ලේකම් සාගර කාරියවසම්ය.
මෙහි කැපී පෙනෙන අංගය වූයේ ක්‍රිකට් තරගයි. මෙවර පොහොට්ටුවේ පිරිස පිල් කිහිපයකට බෙදී තරඟ කරන්නට වූහ. ඒ අතර තරඟය නරඹන්නට හිටපු ජනපති මහින්ද රාජපක්ෂ මහතාටද පැමිණියේය.
''සර් සෙල්ලම් කරනවා නේද?''
මහින්ද රාජපක්ෂ මහතාව පිළිගන්නා අතර මන්ත්‍රීවරු විමසන්නට වූහ.
''සෙල්ලම් කරන්නෙ නෑ. බලන්න ඉන්නම්...'' යැයි පවසමින් මහින්ද රාජපක්ෂ මහතා ප්‍රේක්ෂකාගාරය අසුන් ගත්තේය. පසුව මන්ත්‍රීවරුන් එකිනෙකා පැමිණ හිටපු ජනාධිපතිවරයාට ආචාර කරන්නට විය. ඒ අතර විහිලුවක් කරන්නද මහින්ද රාජපක්ෂ මහතා අමතක කෙළේ නැත.
''මං කිව්වා මටත් බැට් කරන්න ඕනෑ කියලා.'' සිනාසෙමින් තමන්ට බෝලය දැමිය යුතු ආකාරය පිළිබඳවද හිටපු ජනාධිපතිවරයා සඳහන් කළේය.
මේ අතර පිටියට පැමිණි මහින්ද රාජපක්ෂ හිටපු ජනාධිපතිවරයාට කාසියේ වාසිය උරගා බැලීමේ අවස්ථාවටත් එක්වීම සිදුවිය. අනතුරුව පන්දු කිහිපයකට ඔහු මුහුණ දුන්නේය. මහින්ද රාජපක්ෂ මහතා පිතිකරණයේ යෙදුණි. ඒ අනුව මන්ත්‍රීවරුන් පිරිස හිටපු ජනාධිපතිවරයා පිරිවරාගෙන කෑකෝ ගසන්නට විය.
''සර් දිගටම ගහන්න...'' යැයි ඇතැමෙක් කියනු ඇසුණි.
එසේම පිත්තේ පන්දුව දැවටෙන විට තවත් පිරිසක් කෑගැසුවේ. ''සර් මාරයි නියමයි'' යනුවෙන් කියමිනි. ඇතැමුන් විස්තර විචාරකයන් මෙන් ''ඔව්, ආරක්ෂාකාරී පාරක්'' යනුවෙන් කියන්නට වූ අතර කඩුළු රකින්නන් දෙදෙනකුද රුඳී සිටිනු දැකගත හැකි විය.
මෙම තරඟාවලිය අවසානයේ රාත්‍රි භෝජන සංග්‍රහය සංවිධානය කර තිබුණේ සිරිපාල ගම්ලත් මහතාට අයත් නුවරඑළියේ පිහිටි නිවසකය. මෙම අවස්ථාවේද දේශපාලනය නොඅඩුව දක්නට ලැබී ඇත.
''අපි එකට ඉන්න ඕනෑ. අරයාගේ මෙයාගේ ගැටවලට අහුනොවී...''
ජ්‍යෙෂ්ඨයන් පොඩ්ඩන්ට මෙම අදහස කාවද්දන්නට උත්සාහ ගන්නා බව පෙනී ගියේය. රාත්‍රී සාදය සඳහා මන්ත්‍රීවරියන්ද ඇතුළුව පනහකට ආසන්න පිරිසක් සහභාගි වී ඇතැයි ආරංචි මාර්ග සඳහන් කළේය.
මේ සමඟම පැතිර ගොස් තිබුණු තවත් කතාවක් අනුව කියැවුනේ ගම්පහ දිස්ත්‍රික්කයේ ආණ්ඩුවේ ප්‍රබලයෙක්, පොහොට්ටුවේ මන්ත්‍රීන්ගේ නුවරඑළිය ගමන වළකාලන්නට උත්සාහ දරා ඇති බවකි.
''තේරුමක් නෑ. ඕගොල්ලෝ ඔය වගේ වැඩවලට යන්න එපා...''
මෙවන් පෙළඹවීමක් ලද දෙතුන් දෙනෙකු මෙම අවස්ථාවට සහභාගී වී නොමැති බව දේශපාලන ආරංචි මාර්ග සඳහන්. කෙසේ නමුත් විවිධ බලපෑම් මත වුව බහුතරයක් දෙනා මීට සහභාගි වී ඇතැයි ආරංචි මාර්ග ඔස්සේ දැනගැනීමට ලැබුණි.
පසුගිය සතියේ ලංසා සන්ධානය දෙසින්ද විවිධ කතා අසන්නට ලැබුණි. නිවේදනයක් ද නිකුත් විය. ''ආණ්ඩුක්‍රම ව්‍යවස්ථාවේ 13 වැනි සංශෝධනය ආණ්ඩුක්‍රම ව්‍යවස්ථාව තුළ දැනටත් අන්තර්ගත වන අතර, ඒ යටතේ රටේ සියලු ජනතාවට පිළිගත හැකි බලය බෙදීමකට වර්තමාන ජනාධිපති රනිල් වික්‍රමසිංහ මහතා සියලු දේශපාලන පක්ෂවල අදහස් ලබාගනිමින් ක්‍රියාත්මක කිරීමට යාමේදී, ශ්‍රී ලංකා පොදුජන පෙරමුණේ ලේකම් සාගර කාරියවසම් මහතා විසින් එයට විරුද්ධව අදහස් ප්‍රකාශ කරනුයේ ඔවුන්ගේ දෙබිඩි පිළිවෙත රට ඉදිරියේ ප්‍රදර්ශනය කරමිනි.'' මෙලෙස සඳහන් කරමින් මෙම නිවේදනය නිකුත් කොට තිබුණේ පාර්ලිමේන්තු මන්ත්‍රී නිමල් ලංසා විසින්මය.
මෙම කණ්ඩායමේම ආරංචි මාර්ග ඔස්සේ දැනගැනීමට ලැබුණේ පසුගිය සතියේ ඔවුන්ගේ කණ්ඩායමේ තවත් රහස් සාකච්ඡාවක් පාර්ලිමේන්තු මන්ත්‍රී පියංකර ජයරත්න මහතාගේ පිටකෝට්ටේ නිවසේදී පවත්වා ඇති බවකි. අනුර යාපා, දුමින්ද දිසානායක යන මන්ත්‍රීවරුන් සහ රජයේ අමාත්‍ය තනතුරු දරන ප්‍රබල අමාත්‍යවරුන් හත්දෙනෙකු සහ ජ්‍යෙෂ්ඨ මන්ත්‍රීවරුන් කිහිප දෙනකුට මීට සහභාගි වූ බව ඔවුන් සඳහන් කරයි.
කෙසේ වෙතත් පසුගිය සතියේ පොහොට්ටුවේ ප්‍රධාන ලේකම් සාගර කාරියවසම් සඳහන් කර තිබුණේ රට බංකොලොත් වී ඇති අවස්ථාවේ 13 සංශෝධනය ක්‍රියාත්මක කිරීම එතරම් ප්‍රඥාගෝචර නොවන බවකි.
''බලය බෙදීමේ යෝජනාවලිය කියන කාරණය මේ අවස්ථාවේ අවශ්‍ය දෙයක් නොවන බැවින් බලය බෙදීමේ කාරණය පැත්තකට දමා ප්‍රධානම ප්‍රශ්නය වන ආර්ථිකය නැංවීමේ කටයුත්තට ඍජුව මැදිහත්වෙලා සෙසු දේවල් අමතක කරන ලෙස ජනාධිපතිවරයාගෙන් ඉල්ලා සිටිනවා...''
පසුගිය දෙසතිය තුළ ජාතික ජනබලවේගයටද අර්බුද කිහිපයකට මුහුණ දීමට සිදුවිය. මෝල්ටාවේ ආයෝජනයක් පිළිබඳ වූ ප්‍රකාශයක් හේතුවෙන් සමාජ මාධ්‍යයේ ඔවුන් වෙත ප්‍රහාරයක් එල්ල විය. මේ චෝදනාව කරළියට ගෙන ආවේ පෙරටුගාමී පක්ෂයේ දුමින්ද නාගමුවය. අනුර දිසානායක සහ ජවිපෙය මහජන ආරක්ෂක අමාත්‍යය ධුරය දරන ටිරාන් අලස් හරහා මෝල්ටාවේ මුදල් ආයෝජනය කර ඇති බව ඒ අනුව කියැවුණි.
කෙසේ වෙතත් මෙය හා සම්බන්ධව ජාතික ජන බලවේගයෙ නිල ප්‍රතිචාරයක් දක්වන්නට ගියේ නැත. එහෙත් රෑපවාහිනී වැඩසටහනකදී මෙම චෝදනාව ඉදිරිපත් කල දුමින්ද නාගමුව ඉදිරියේ ජවිපෙ හිටපු මන්ත්‍රී වෛද්‍ය නලින්ද ජයතිස්ස මෙලෙස ප්‍රශ්න කර කළේය.
''දැන් මේ ළඟදි කියනවා ටිරාන් අලස් එක්ක යුරෝපය දූපතක් අපි අරගෙන තියෙනවද, නැත්තං අපි එහේ සල්ලි දාලා තියනවද මොකක්දෝ එකක්. කවුරුහරි ඉන්නව නම් මේ සම්බන්ධව හරියට විස්තර සහිතව කියන්න.''
දුමින්ද නාගමුව ද මීට ප්‍රතිචාරයක් දක්වුයේය.
''දැන් ටිරාන් ගිහිල්ලා තියෙනවනේ සී.අයි.ඩී එකට. සී.අයි.ඩී එකට අපි තොරතුරු ඔක්කොම ගෙනියන්නම්. පුළුවන්නම් අපිව කැඳවන්න කියන්න.''
මෙම කතාව ඉකුත් සතිය පුරා තවදුරටත් විවිධාකාර පුද්ගලයන් විසින් වර නගන්නට වූහ. මෙම මුදල් ආයෝජනය සිදුකර ඇත්තේ මෝල්ටාවේ නොවන බව කීවේ ජන අරගල ව්‍යාපාරයේ සාමාජික විදර්ශන කන්නන්ගරය. එම සල්ලි ආයෝජන සිදුකර ඇත්තේ බ්‍රිටිෂ් වර්ජින් අයිලන්ඩ්ක ගිණුමහි බව ඔහු පැවසීය.
මේ අතර සති අන්තය එළඹෙන විට දැනගැනීමට ලැබුණේ ජනාධිපති රනිල් වික්‍රමසිංහ මහතා තවත් විශේෂිත සංචාරයක් වෙනුවෙන් සිංගප්පූරුව බලා පිටත්ව යාමට සූදානම් වෙන බවකි. මෙම සංචාරය දින හතරක සංචාරයක් වන බවත් ඒ අනුව එළඹෙන සඳුදා කැබිනට් මණ්ඩල රුස්වීමද කල් දැමීමට සිදුවනු ඇති බවත් දේශපාලන ආරංචි මාර්ග ඔස්සේ දැනගැනීමට ලැබුණි. ඒ අනුව ඉදිරි සතියද දේශපාලන වශයෙන් තරමක් සන්සුන් සතියක් කර ගැනීම ආණ්ඩුවේ අපේක්ෂාව බව පෙනී ගියේය.
I චමිඳු නිසල් ද සිල්වා
