සජිත්ගේ නායකත්වයෙන් පුළුල් සන්ධානයක්
පාර්ලිමේන්තුව විවිධාකාර මාතෘකාවලින් උණුසුම් වනවිට සභාග සන්ධාන පිළිබඳ රහස් කතා තැන තැන අසන්නට ලැබුණි. යෝජනා චෝදනා සේම දුක්ගැනවිලිද මැති ඇමැති රැස් වූ සභා මැද ඉදිරිපත් වූයේය. ගෙවී ගියේ තවත් උණුසුම් දේශපාලන සතියකි.
සතිය අරඹන විට ජනාධිපති රනිල් වික්‍රමසිංහ මහතා රැඳී සිටියේ සිංගප්පූරුවේය. දෙදින නිල සංචාරයක් වෙනුවෙන් සිංගප්පූරුව බලා ගමන් කළ ජනපති රනිල් වික්‍රමසිංහ මහතා සිංගප්පූරු ජනාධිපතිනි හලීමා යෙකුබ් (Halimah Yacob) මහත්මිය සහ අගමැති ලීසියෙන් ලුන් (LEE HSIEN LOONG) ඇතුළු රාජත්‍රාන්තිකයන් හමුවිය.
මෙහිදී සිංගප්පූරුව ශ්‍රී ලංකාව අතර කාබන් විමෝචනය පිළිබඳ පාරිසරික ගිවිසුමක් අත්සන් කිරීමට කටයුතු යොදා තිබුණි. ඊට අමතරව ආරක්ෂාව, ආහාර සුරක්ෂිතතාව, පුනර්ජනනීය බලශක්තිය යන ක්ෂේත්‍රවලට අදාළව ඉදිරියේදී සහයෝගීතාව ඉහළ නංවා ගැනීම පිළිබඳවද සාකච්ඡා සිදුව තිබේ.
ශ්‍රී ලංකාවේ ජනාධිපති රනිල් වික්‍රමසිංහ මහතා මෙම සංචාරයේදී සිංගප්පූරු ආරක්ෂක අමාත්‍ය ආචාර්ය නෙං එං හෙන් (Ng Eng Hen), සිංගප්පූරුවේ තිරසර බව හා පරිසරය පිළිබඳ ඇමතිනී ග්‍රේස් ෆු හායි ඉයෙන් (Grace FU Hai yien) ඇතුළු එරට රජයේ ප්‍රබලයන් කිහිප දෙනකුද හමුවීමට කටයුතු කළේය.
දේශගුණික විපර්යාස පිළිබඳ ජනාධිපති ජ්‍යෙෂ්ඨ උපදේශක රුවන් විජයවර්ධන, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානී සාගල රත්නායක, ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්.එච්.එස්. සමරතුංග ඇතුළු පිරිසක් ජනපති සමඟ සංචාරයට එක්ව සිටියහ. කෙසේ වෙතත් ජනපතිගේ සංචාරයේ හේතුවෙන් පසුගිය සතියේ කැබිනට් රැස්වීමද නොපැවතුණි. එහෙත් සඳුදා දින අග්‍රාමාත්‍ය දිනේෂ් ගුණවර්ධන මහතාගේ ප්‍රධානත්වයෙන් ආණ්ඩු පක්ෂ මන්ත්‍රී කණ්ඩායම රුස්විය. ආරංචි මාර්ග සඳහන් කළේ මෙම හමුව සඳහා පාර්ලිමේන්තු මන්ත්‍රීවරු හැත්තෑ දෙනකු පමණ සිටි බවකි.
''පුරාවිද්‍යා පනතට සංශෝධනයක් එකතු කරමින් පුරාවිද්‍යා ස්ථාන, ස්මාරක ආරක්ෂා කරන නිලධාරීන් සඳහා තෑගි ලබාදීමේ ක්‍රමයක් නිර්මාණය කළ යුතුයි.''
අප දේශපාලන ආරංචිමාර්ග සඳහන් කළ පරිදි මෙවන් අදහසක් රැගත් යෝජනාවක් රුගෙන විත් තිබුණේ අමාත්‍ය විදුර වික්‍රමනායක විසිනි. කෙසේ වෙතත් පාර්ලිමේන්තු කණ්ඩායමේ ප්‍රතිචාරය එතරම් යහපත් නොවීය.
''ඒ අය කරන රාජකාරියට රජයෙන් වැටුපක් ගෙවනවා. මොකටද ආයේ තෑගි දෙන්න යන්නෙ. වික්‍රමාන්විත දෙයක් කරල නම් කමක් නෑ.''
ඊට අමතර මෙහිදී ප්‍රිමා පිටි ආනයනය සම්බන්ධවද විවාදයක් නිර්මාණ වී තිබේ. මෙම ආනයනය සඳහා අවසර ලබාදුන්නේ කවර පදනමකින්ද යන්න පිළිබඳ මෙම වාදය හටගත් බව කියැවේ. මේ අතර ආණ්ඩුවේ සිටින ජ්‍යෙෂ්ඨ ඇමතිවරුන් කිහිපදෙනකුගේ ක්‍රියාකලාපය පිළිබඳ ප්‍රබල විවේචනයක් සිදුකර ඇත්තේ ආණ්ඩු පක්ෂ කණ්ඩායම් මන්ත්‍රීවරුන් කිහිප දෙනකුගේ එකතුවෙනි. අමාත්‍යවරුන් පස්දෙනකු පමණ ඔවුන්ගේ මෙම දෝෂදර්ශනයට අසුව ඇත.
''අපිට කිසි වැඩක් කරගන්න බෑ. අපේ ඉල්ලීම්වලට ඇහුම්කන් දෙන්නෙත් නෑ. රැකියා කෝටාවක් දෙනවා කියලා නම් පහක් යෝජනා කරන්න කිව්වා. දැන් ඒගොල්ලන්ට ඕන අයට රස්සා දීලා. මේ අයගෙන් සත පහක වැඩක් නෑ. අපි තීරණයක් අරගෙන තියෙන්නේ ඊළඟ අයවැයේදී අමාත්‍යාංශ තුනක් අපි පරද්දනවා.''
ඉතා ප්‍රබල බරපතළ චෝදනාවක් ඔවුහු ඉදිරිපත් කරන්නට වූහ. ඒ පිළිබඳ වැඩිදුරටත් විස්තර විමසීම අග්‍රාමාත්‍ය දිනේෂ් ගුණවර්ධන මහතා කටයුතු කළේ එබැවිනි.
''ඇත්තටම මොනවද ඔය චෝදනා.''
''ඉස්කෝලයකට ළමයෙක් දාගන්න අපි දෙන ලියුම සත පහකට ගණන් ගන්නේ නෑ. විපක්ෂ මන්ත්‍රීවරුන්ට පුළුවන් ළමයි දාගන්න.''
කුරුණෑගල දිස්ත්‍රික්කයේ දයාසිරි ජයසේකර සහ තවත් විපක්ෂ දේශපාලනඥයෙක් අධ්‍යාපන අමාත්‍යංශයේ ආශීර්වාදය මත පාසල්වලට දරුවන් ඇතුළත් කරන බවට මෙහිදී චෝදනා එල්ල වී තිබේ. පාර්ලිමේන්තු මන්ත්‍රී මිලාන් ජයතිලකද එහිදී තවත් චෝදනාවක් ඉදිරිපත් කර තිබේ.
''මට ඕනවුණා අපේ ගමේ එක ඉඩමක ප්‍රජාශාලාවක් ඇතුළු ගමට අවශ්‍ය පොදු ගොඩනැගිලි වගයක් ඇති කරන්න. ඉඩම් අමාත්‍යාංශය ඒක ප්‍රතික්ෂේප කරලා. ඒ ඉඩම වෙනත් කෙනෙක්ට බදු දුන්නා. දැන් ඒ කෙනා මගෙන් අහනවා අපිට ආයෙම බදු දෙන්න. මේක පුදුම ආණ්ඩුවක්. මේ වගේ ආණ්ඩුවල අපි ඉන්නේ මොකටද? විලිලැජ්ජයි.''
මේ අතර ධීවර රාජ්‍ය අමාත්‍ය පියල් නිශාන්තද තවත් චෝදනාවක් ඉදිරිපත් කළේය. ධීවර අමාත්‍යාංශයේ ලේකම්වරියගේ සේවා දීර්ඝ කිරීම දැඩි කලකිරීමකින් යුතුව ඔහු කතා කළේය.
''වයස හැටෙන් පස්සේ සේවා දීර්ඝ කිරීම් දෙන්නෙ නැහැ කියලා ආණ්ඩුව ප්‍රතිපත්තිමය තීරණයක් අරගෙන තියෙනවා. ඒත් අමාත්‍යාංශ ලේකම්ට එහෙම සේවා දීර්ඝ කිරීමක් දීලා. කොහොමද මේවා සිද්ධ වෙන්නේ. මේ වගේ වැඩවලට විරුද්ධයි.''
ඒ අනුව ඉඩම්, සංස්කෘතික, විදේශ රැකියා, ප්‍රවාහනය ඇතුළු අමාත්‍යංශ ගණනාවකට ආණ්ඩු පක්ෂ මන්ත්‍රී කණ්ඩායමෙන් චෝදනා ඉදිරිපත් විය. අවසානයේ මේ සියල්ලට පිළිතුරු බැඳීමට සිදුවූයේ අග්‍රාමාත්‍ය දිනේෂ් ගුණවර්ධන මහතාටය.
''මේවා මට විසඳන්න බෑ. කරුණාකරලා ජනාධිපතිතුමා ලංකාවට එනකන් ඉන්න. එතුමා ආවම ඒ ඇමැතිවරුත් ගෙනැල්ලා ඔබතුමාලවත් කැඳවලා මේක විසඳන්න පුළුවන්ද කියලා බලමු.''
පසුගිය සතියේ සමගි ජනබලවේගයේ පාර්ලිමේන්තු කණ්ඩායම් රැස්වීම විශේෂ එකක් විය. විපක්ෂනායක කාර්යාලයේ මෙවර කණ්ඩායම් හමුවට අනිවාර්යෙන්ම සහභාගි විය යුතු බව මන්ත්‍රීවරුන් වෙත දන්වා යවා තිබුණි.
ඒ අනුව කණ්ඩායම් රැස්වීමේදී නව සංධානයක් ගොඩනැගීම පිළිබඳ වැදගත් දැනුම්දීමක් විපක්ෂනායක සජිත් ප්‍රේමදාස මහතා විසින් සිදුකරන ලදැයි ආරංචි මාර්ග තහවුරු කළේය.
''මට අවසර දෙන්න. අපි පුළුල් සන්ධානයක් ගොඩ නගනවා. ඒ ගැන සෑම තොරතුරක්ම මෙතන ප්‍රකාශ කරන්න අමාරුයි.''
මේ අනුව සමගි ජනබලවේගයේ ප්‍රධානත්වයෙන් මෙතෙක් ගොඩනැගුණු සන්ධානවලට පරිබාහිරව වෙනත් විශේෂිත සංවිධානයක් ගොඩනැගීමට සූදානම් වන බව මෙහිදී පැහැදිලි විය. මෙම සන්ධානයේ සාමාජිකයන් පිළිබඳව සජිත් ප්‍රේමදාස මහතා ඉඟිකර තිබුණි.
''අපි ආණ්ඩුවෙන් ගැලවිච්ච කණ්ඩායම් එක්ක සහ ආණ්ඩුව ඇතුළේ ඉන්න තවත් කණ්ඩායමක් එක්ක අපි අදහස් හුවමාරු කරගනිමින් යනවා. ඒ නිසා මේ සම්බන්ධ කටයුතු කරගෙන යන්න මට අවසර දෙන්න.''
නායකත්වයේ තීරණයට මෙහිදී කිසිවකුත් විරෝධය පා නොමැත. විපක්ෂනායකවරයාට අවශ්‍ය පරිදි මෙම නව සන්ධානය ගොඩනැගීම ඒ අනුව සිදුවනු ඇත.
මේ අතර පසුගිය දිනවලදී සමගි ජනබලවේගයේ විවිධ මන්ත්‍රීවරුන් එකිනෙකට පරස්පරව කතා කිරීම සම්බන්ධව සජබ කණ්ඩායමේ සාකච්ඡාවක් ඇතිවූ බව ආරංචි මාර්ග සඳහන් කරයි.
''පක්ෂයක් විදිහට අපි එකට යන්න ඕනෑ. අපි අදහස් ප්‍රකාශ කරන විට එක අදහසක් ප්‍රකාශ කරන්න ඕනෑ.'' විපක්ෂනායක සජිත් ප්‍රේමදාස මහතා මන්ත්‍රීවරුන්ට තරමක් අවධාරණාත්මකව පවසා තිබේ.
මෙම අවස්ථාවේදී පාර්ලිමේන්තු කණ්ඩායමේ නොසිටියත් පාර්ලිමේන්තු කණ්ඩායම් රැස්වීම්වලට ඇරයුම් ලබන හිටපු පාර්ලිමේන්තු මන්ත්‍රී මුජිබර් රහුමාන් විපක්ෂනායකවරයා වෙත පෙරළා ප්‍රශ්නයක් යොමුකර ඇත.
''නායකතුමා, මේ ගිය සතියෙ කරල තිබුණ කතාවක්, ආණ්ඩුවට සහාය දැක්වීමක් ගැන. මොකක්ද ඒ කතාව.''
ආරංචිමාර්ග සඳහන් කරන පරිදි මෙම ප්‍රශ්නයට විපක්ෂනායකවරයා පිළිතුරු බැඳ ඇත්තේ තරමක ආවේගයෙනි.
''මුලින්ම මගේ කතාවේ අන්තර්ගතය බලන්න...'' මුජිබර් රහුමාන්ද මෙහි පසුබා නැතැයි කියැවේ.
''අන්තර්ගතය තේරෙන්නෙ නැති නිසා තමයි අහන්නේ. මේකෙන් වැරදි අදහසක් යනවා.''
''නෑ... නෑ... එහෙම දෙයක් නෙවෙයි අපි කිව්වේ. හොඳ දේකට විතරක් සහයෝගය දෙනවා කියලා කිව්වේ.''
කණ්ඩායම් රැස්වීම සංවිධානය වුණු මෙම සංවාද විපක්ෂ නායකවරයා විසින් අවසානයේ කෙටියෙන් පිළිතුරු දෙමින් එලෙස අවසන් කළ බව ආරංචි මාර්ග සඳහන් කළේය.
ගෙවී ගිය සතියේ දේශපාලන කරළිය කැළඹූ තවත් සිදුවීමක් වූයේ වරාය සහ සිවිල් ගුවන් සේවා කැබිනට් අමාත්‍යවරයා සහ රාජ්‍ය අමාත්‍යවරයා අතර හටගත් මත ගැටුමයි. වරාය හා ගුවන් සේවා රාජ්‍ය අමාත්‍ය ප්‍රේමලාල් ජයසේකර මෙම සටනට මුලපිරීය. ඔහු කොළඹදී මාධ්‍ය හමුවක් පවත්වමින් වරාය, නාවුක හා සිවිල් ගුවන් සේවා අමාත්‍ය නිමල් සිරිපාල ද සිල්වා ඉලක්ක කර දැඩි චෝදනාවක් එල්ල කරමින් ප්‍රකාශයක් නිකුත් කළේය.
වරාය ආශ්‍රිතව විශාල වංචා දූෂණ විශාල ප්‍රමාණයක් සිදුවන බවත් තවදුරටත් තමන් මේ පිළිබඳව කට වසාගෙන සිටීමට සූදානම් නැති බවත් රාජ්‍ය අමාත්‍ය ප්‍රේමලාල් ජයසේකර සඳහන් කළේය. මේ පිළිබඳව දැනටමත් ජනාධිපති රනිල් වික්‍රමසිංහ මහතාට දන්වා යවා ඇති බවත් ඉදිරියේදී තමන් අමාත්‍ය ධූරයෙන් අස්වීමට වුවත් සූදානම් බවත් අමාත්‍යවරයා කීය.
“මේක හොර ගුහාවක්. මම එකපාරටම නිලධාරීන් තරහ කර ගන්න කැමැති නෑ. මම තව පොඩි කාලයක් බලනවා වැඩක් කරගෙන යන්න. නැතිවුණොත් ඇමැතිවරයා එක්ක ගනුදෙනු කරන සියලුම නිලධාරීන්ගේ තොරතුරු හෙළි කරනවා ඊළඟ මාධ්‍ය සාකච්ඡාවේදී. මං ළඟ තියෙනවා. මම එකපාරටම කරන්නෙ නෑ. පොඩ්ඩක් ඉන්නකෝ තව මාසයක් ඇතුළත මම දෙන්නම්."
අමාත්‍යවරයා සහ නිලධාරීන් තමාට වැඩ කිරීම සඳහා කිසිදු සහයෝගයක් ලබා නොදෙන බවද ඔහු වැඩිදුරටත් සඳහන් කළේය. මෙවන් බරපතළ චෝදනා රුසක් එල්ල වූ මෙම මාධ්‍ය හමුවට කැබිනට් අමාත්‍ය නිමල් සිරිපාල ද සිල්වාගෙන් එතරම් සැලකිය යුතු ප්‍රතිචාරයක් නොවුණි.
එහෙත් ප්‍රේමලාල් ජයසේකරගේ ක්‍රියාව පිළිබඳ ආණ්ඩුවේ ලොකු කුඩා තැන්වල විශාල කතාබහක් ඇතිවිය.
“අපිටත් ඕකම තමා කරන්න වෙන්නේ. ඇමැතිලා නිලධාරීන් එක පැත්තක. ගෝඨාභය ජනාධිපතිතුමා කළා වගේ විෂය කලින්ම ගැසට් කළා නම් ඉවරයි."
මෙලෙස සඳහන් කර තිබුණේ මීට සමාන ගැටලුවලට මුහුණ දෙන රාජ්‍ය අමාත්‍යවරුන් කිහිප දෙනෙකි.
පසුගිය සතියේ ශ්‍රී ලංකා නිදහස් පක්ෂයේ අභ්‍යන්තර තීන්දු තීරණ පිළිබඳව ද අනාවරණයක් සිදුවිය. ඒ අනුව ශ්‍රී ලංකා නිදහස් පක්ෂයේ මහලේකම් දයාසිරි ජයසේකර ශ්‍රීලනිප සංවත්සර උත්සවය කුරුණෑගලදී පැවැත්වීමට සියලු සංවිධාන කටයුතු සූදානම් කර තිබේ. එහෙත් පක්ෂ ගැටුම් සමනය කර ගනිමින් ශ්‍රීලනිපයට යළි එක්වූ අමාත්‍ය මහින්ද අමරවීර ඇතුළු පිරිස මෙම සංවත්සර උත්සවයේ සංවිධාන වගකීම තමන් වෙත පවරාගෙන ඇතැයි කියැවේ.
ඒ අනුව හෙට්ටිපොළදී පැවැත්වීමට නියමිතව තිබුණු සංවත්සර සැමරුමේ ස්ථානය ද මාරු වී ඇත. ආරංචි මාර්ග සඳහන් කරන පරිදි ශ්‍රී ලංකා ජයවර්ධනපුර කෝට්ටේ පිහිටි ප්‍රධාන පෙළේ හෝටල් පරිශ්‍රයකදී සමුළුව පැවැත්වීමට නියමිත‍ය. වියදම් පිළිබඳ විශාල වගකීමක් මෙම පිරිස භාරගන්නා බවට වාර්තා පළ වී තිබේ.
මේ සඳහා ශ්‍රීලනිප නායක මෛත්‍රීපාල සිරිසේන මහතාගේ අනුමැතිය ද හිමිව ඇතැයි කියැවේ. මේ සමඟම දේශපාලන කරළියේ පැතිර යන කතාවකට අනුව ඉදිරියේදී ශ්‍රිලනිප මහලේකම් ධූරයේ ද වෙනසක් සිදුවිය හැකිය. කෙසේ වෙතත් මත ගැටුම් කටකතා අතරේ පාර්ලිමේන්තු මන්ත්‍රී දයාසිරි ජයසේකර "දිනක මා" නමින් නව ගීතයක් එළිදැක්වීමට කටයුතු කර තිබීම ද සුවිශේෂීය.
මේ අතර පසුගිය සතියේ අවස්ථා කිහිපයකදී පාර්ලිමේන්තුව ද උණුසුම් විය. ශ්‍රී ලංකා ක්‍රිකට් ආයතනය සම්බන්ධයෙන් විගණකාධිපති කාර්යාලය විසින් නිකුත් කළ විගණන විමසුම් කෙටුම්පත සම්බන්ධයෙන් බ්‍රහස්පතින්දා පාර්ලිමේන්තුවේදී පැවැති විවාදය ඒ අතරින් එක් අවස්ථාවක් විය.
විවාදය ආරම්භ වීමට සුළු මොහොතකට පෙර විගණන කෙටුම්පතේ ඇති කරුණු දක්වමින් ශ්‍රී ලංකා ක්‍රිකට් ආයතනයේ නිලධාරීන් සම්බන්ධයෙන් අපහාසාත්මක ප්‍රකාශයක් නිකුත් කිරීම වළක්වාලමින් මන්ත්‍රී හේෂා විතානගේට වාරණ නියෝගයක් නිකුත් වී තිබුණි. ඒ ක්‍රිකට් ආයතනය අධිකරණයෙන් සිදු කළ ඉල්ලීමකට අනුවයි.
ඒ අනුව පාර්ලිමේන්තුව කල් තැබීමේ විවාදය ආරම්භ කිරීමට පෙර නියෝජ්‍ය කතානායක අජිත් රාජපක්ෂ විසින් පාර්ලිමේන්තුවට දැනුම් දී සිටියේ අධිකරණය හමුවේ නඩු කටයුතු කිහිපයක් විභාග වන බැවින් විවාදයේදී ඒ පිළිබඳව සැලකිලිමත් වන ලෙසයි. ඒ අනුව ආරම්භයේදීම උණුසුම්ව ඇරුඹි මෙම විවාදයේදී පක්ෂ විපක්ෂ අදහස් රුසක් හුවමාරු විය.
පළාත් ක්‍රිකට් කමිටුවල කටයුතු කරන බොහෝ දෙනා දේශපාලනයට මෙන්ම ශ්‍රී ලංකා ක්‍රිකට් ආයතනයට ද සම්බන්ධ බව හෙළි කළේ මන්ත්‍රී හේෂා විතානගේය.
“මධ්‍යම පළාතේ සභාපති ලෙස හිටපු මහ ඇමැති සරත් ඒකනායක, පුත්තලම දිස්ත්‍රික්කයේ ක්‍රිකට් කමිටුවේ සභාපති පාර්ලිමේන්තු මන්ත්‍රී චින්තක මායාදුන්න, නුවරඑළිය දිස්ත්‍රික්කයේ සභාපති ලෙස සී.බී. රත්නායක, රත්නපුර දිස්ත්‍රික්කයේ සභාපති ලෙස කංචන ජයරත්න."
මේ අතර ලංකා ප්‍රිමියර් ලීග් ක්‍රිකට් තරගාවලිය සම්බන්ධයෙන් ගැටලු පවතින බවත් එම තරගාවලියේදී නීතිවිරෝධී ක්‍රිප්ටෝකරන්සි සහ ඔට්ටු ඇල්ලීමේ සමාගම් ප්‍රවර්ධනය කිරීමක් සිදුවූ බවත් අධිකරණ අමාත්‍ය විජයදාස රාජපක්ෂ ප්‍රකාශ කළේය.
“LPL තරගාවලියේදී බොහෝදුරට ක්‍රිප්ටෝකරන්සි ප්‍රවර්ධනය කිරීමේ වැඩසටහන් රාශියක් ක්‍රියාත්මක වුණා. T20 ෆ්‍රුන්චයිස් පදනම් කරගත් ලීගයේ මාතෘකා අනුග්‍රහය දක්වලා තියෙන්නේ Sky Fare කියන නීතිවිරෝධී ඔට්ටු ඇල්ලීමේ අක්වෙරළ වෙබ් අඩවියක්. අපේ රටේ නීතිය අනුව ඒවා තහනම්."
මෙරට ක්‍රීඩා සංගම් තහනම් වීම හරහා අපහසුතාවයට පත්වන්නේ පාර්ලිමේන්තු මන්ත්‍රීවරුන් 225 දෙනා නොව අදාළ ක්‍රීඩාවේ යෙදී සිටින ක්‍රීඩක ක්‍රීඩිකාවන් බව කීවේ හිටපු ක්‍රීඩා අමාත්‍යවරයකු වන පාර්ලිමේන්තු මන්ත්‍රී නාමල් රාජපක්ෂය.
“අපිට මෙතැන ඉඳන් කතා කරන්න පුළුවන්. කටින් ක්‍රිකට් ගහන්න බැහැ. පිට්ටනියට ගියාම පැයට කිලෝමීටර් 150ක වේගයෙන් බෝල දානකොට බැට් එක දාගන්න අපිට බැහැ."
මෙම විවාදයට ජාතික ජන බලවේගයේ නායක අනුර කුමාර දිසානායක ද මැදිහත් විය. ශ්‍රී ලංකාවේ ක්‍රිකට් ක්‍රීඩාවට අත්වී ඇති ඉරණමට ශ්‍රී ලංකා ක්‍රිකට් ආයතනය වගකිව යුතු බව ඔහු කීවේය.
“මේ වන විට ක්‍රිකට් ආයතනයේ බලය මාෆියා කල්ලි කිහිපයක් අතර සැරිසරන බැවින් ඔවුන්ගෙන් එම ආයතනය බේරාගැනීමට වහාම පියවර ගත යුතුයි."
ක්‍රිකට් ආයතනය සම්බන්ධව ඇති ව්‍යවස්ථාව වෙනස් කිරීමට කටයුතු කළ යුතු බවත්, දකුණු අප්‍රිකාවේ ද මෙවැනි තත්ත්වයක් පැවතීම නිසා එරට ක්‍රීඩා අමාත්‍යවරයා නව නීති සම්පාදනය කොට ඒ සම්බන්ධව ජාත්‍යන්තර ක්‍රිකට් කවුන්සිලයට දැනුම් දීමක් සිදු කළ බවත් අනුර කුමාර දිසානායක මහතා මෙහිදී වැඩිදුරටත් කියා සිටියේය.
I චමිඳු නිසල්