මධූෂ්
ලංකාවට මාකඳුරේ මධූෂ් ඉන්දියාවට රැජිනි කාන්ත් මෙන් ප්‍රසිද්ධ චරිතයකි. එකම වෙනස රැජිනි කාන්ත් ඉන්දියාවට පමණක් නොව දකුණු ආසියාවටම සිටින ඉතාම ජනප්‍රිය දක්ෂ නළුවකු සහ සිනමාවේදියකු වශයෙන් විරුදාවලි ලබද්දී මාකඳුරේ මධූෂ් ශ්‍රී ලංකාවට පමණක් නොව දකුණු ආසියාවටම හිසරදයක් වෙමින් දරුණු ගණයේ කුඩු ජාවාරම්කරුවකු සහ පාතාලයේ ඝාතන මෙහෙයවන්නෙක් වශයෙන් ප්‍රසිද්ධියට පත්වීමය. රැජිනි කාන්ත් ඉන්දීය සිනමාව තුළ මත්ද්‍රව්‍ය ජාවාරමුන්ට, පාතාලයන්ට, දූෂිත පොලිස් නිලධාරීන්ට සහ දේශපාලනඥයන්ට එරෙහිව සටන් කරමින් දැවැන්ත වීරයකු වන විට මාකඳුරේ මධූෂ් මෙරට තුළදී මහ දවාලේ මිනී මරා රටින් රටට පැන ගොස් අවසානයේ ඩුබායි රටේ තැන්පත් වී සිටිමින් ශ්‍රී ලංකාව තුළ කුඩු ජාවාරම් සහ මිනීමැරැම් මෙහෙය වන දරුණු පාතාලයෙක් වශයෙන් අපරාධකරුවන්ගේ ලැයිස්තුවේ අංක එකටම ආවේය. එවන් චරිතයක් වූ මධූෂ් අවසානයේ ඩුබායිහිදී පසුගියදා එරට පොලීසියට කොටු විය. ඒ කෙසේවත් පැනගන්නට නොහැකි ආකාරයටය.
අප එසේ කියන්නේ මධූෂ් වරක් ඉන්දියාවේ පොලීසිය මගින් අල්ලාගෙන මෙරටට බාර දීමට සියලු කටයුතු සූදානම් කෙරෙද්දී එම අත්අඩංගුවෙන් මිදී එරටින් පලා ගිය ආකාරය සිහිපත් වීම නිසාය. ඔහු පැන්නා නොව මෙරට බලවතුන් කිහිපදෙනකුගේ උදව්වෙන් පැනගත් බවට තොරතුරැ ඒ කාලයේම මාධ්‍යවල පළවිය. එහෙත් එම කතා ඔක්කොම යට ගිය අතර ඔහු ඩුබායි රටේ සිටිමින් මෙරට පාතාලය මෙහෙයවන බවට තොරතුරු ඉන්පසුව වරින්වර හෙළි විය. පසුගිය කාලය තුළ මාකඳුරේ මධූෂ්ගේ නම නිරතුරැවම මධ්‍යවල රුව් දුන්නේය. දරුණු ගණයේ පාතාලයේ මරා ගැනීමක්, මහා පරිමාණ කුඩු ජාවාරමක් හෙළි වූ විට සැකකරැවන්ගේ ලැයිස්තුවේ මුලින්ම නම සඳහන් වන තරමට මධූෂ් වැඩකාරයෙක් විය. මිනී මැරැම්, පාතාලය සහ කුඩු ජාවාරම් තමන්ගේ විනෝදාංශ තරමට සමීප කරගත් මධූෂ් මේ තරම් බලපුළුවන්කාර චරිතයක් වූයේ නිකම්ම නොවන බව ඕනෑම කෙනකුට අවබෝධ කරගැනීම අපහසු නැත.
ඉන්දියාව, ලංකාව ඇතුළු බොහොමයක් ආසියානු රටවල මධූෂ් වැනි පාතාලයේ ගෝඩ් ෆාදර්ලාට ලොකුම හයිය ලැබෙන්නේ දේශපාලන බලවතුන්ගෙනි. පාතාලයේ තමන්ගේ සුරතලා වැඩ පෙන්වා පොලීසියේ විලංගුවලට හසුවන විට ඔහු වෙනුවෙන් පොලීසියට කෝල් එක දෙන්නේ දේශපාලන හාම්පුතාය. ගහට පොත්ත වගේ මේ සම්බන්ධය නිසා දේශපාලකයාත් පාතාලයත් දෙන්නාම රුකෙති. එහෙත් වලපල්ලට යන්නේ රටේ නීතියයි. පතුරැ යන්නේ රටේ අභිමානයයි.
කරැණු එසේ වුවද මාකඳුරේ මධූෂ්ලා වැනි අපරාධකරුවන් පසුපස හඹා යන පොලීසියේ ලොක්කෝ ද මෙරට සිටිති. මධූෂ්ලාගේ කල්ලි එකිනෙකා ගැටෙමින් මිනී මරා ගනිද්දී, කුඩු ජාවාරම් මෙහෙයවද්දී ඔවුන් පන්නා ගොස් තම ජීවිතය පවා පරදුවට තබා අල්ලාගෙන නීතිය ඉදිරියට ගෙන ඒමට ඔවුන් සමත්ය. එහෙත් දේශපාලනඥයන්ගේ කටු ලෙව කන ඇතැම් නිලධාරීන් සුළු පිරිසක් නිසා පාතාලය මඬින කටයුතු අඩාල වන අවස්ථාද තිබේ. හරිනම් මධූෂ් වැනි අපරාධකරැවකු කොටු කරගත යුතුව තිබුණේ මේ රටේදීමය. එහෙත් එසේ නොවී ඔහු ඩුබායි රටට පැනගෙන එහි සිට මෙරට පාතාලය හසුරැවන තරමට උසස් වූයේ එවැනි කටුකන නිලධාරීන් සහ දේශපාලනඥයන් කිහිපදෙනකු නිසා විය යුතුය. ඔහු සමඟ කොටු වූ ශ්‍රී ලාංකික 25 දෙනා අතර ද එවැනි පුද්ගලයන් සිටීමට ලොකු ඉඩකඩක් තිබේ.
මධූෂ් සම්බන්ධයෙන් ඊළඟට සිදුවන්නේ කුමක්ද යන්න ගැන මේ රටේ සියලු දෙනා තුළම ලොකු කුතුහලයක් තිබේ. අල්ලාගත් මධූෂ් ලංකාවට එවයිද නැතහොත් එරටදීම ඔහුට එරෙහිව නීතිය ක්‍රියාත්මක වෙයිද යන ප්‍රශ්නය ද බොහෝ දෙනා අසති. පොලිස් විශේෂ කාර්ය බලකාය, පොලිස් මත්ද්‍රව්‍ය නාශක කාර්යංශය සහ සංවිධානාත්මක අපරාධ විමර්ශන කොට්ඨාශය භාර ජ්‍යෙෂ්ඨ නියෝජ්‍ය පොලිස්පති එම්. ආර්. ලතීෆ් මහතා අපගේ සහෝදර ලංකාදීප පුවත්පතට කියා තිබුණේ මධූෂ් ඇතුළු කණ්ඩායම මෙරටට ගෙන්වා ගැනීමට රාජ්‍ය තාන්ත්‍රික මට්ටමින් කටයුතු කරගෙන යන බවයි. ඔහු මෙරටට ගෙන්වාගෙන ඔහුට එරෙහිව පවතින නඩු කටයුතු හැකි තරම් ඉක්මනින් අවසන් කොට නීතිය ක්‍රියාත්මක කරනු දැකීමට මේ රටේ අති බහුතර ජනතාව කැමති වනු ඇති බවට සැකයක් නැත. එහෙත් සාමාන්‍යයෙන් සිදුවන පරිද්දෙන් මේ අල්ලාගැනීමට අකැමැති ලොකු බලවතුන් අතලොස්සක් හෝ සිටින බවද සහතිකය. මේ නිසා ශ්‍රී ලංකාවට මධූෂ් ගෙන්වා ගැනීම වැදගත් බව පවසන අතරම අප කියන්නේ එසේ ගෙන්වා ගන්නවා නම් ඔහුට යළිත් පැන යාමට කිසිදු ඉඩක් නොතැබිය යුතු බවය. මධූෂ් මෙරට පොදු ජනතාවට අපරාධකරුවකු වූවාට පොදු නොවන සමහරැන්ට ඔහු සුරතලකු වීමට තිබෙන ඉඩකඩ ඊට හේතුවය.
කෙසේ වුවත් මධූෂ් ඩුබායිහිදී අත්අඩංගුවට පත්වීම යනු මේ රටේ කුඩු ජාවාරම්වල, පාතාල අපරාධවල සහ මිනී මරා ගැනීම්වල අවසානය නොවන වගත් මතක තබා ගැනීම අවශ්‍යය. ඔහු මෙරට නොසිටියත් ඔහුගේ අණට කීකරැ වන ගෝලයෝ රොත්තක්ම මෙරට සිටිති. හැකි ඉක්මනින් ඔවුන් ද අත්අඩංගුවට ගැනීමට කටයුතු කිරීම අත්‍යාවශ්‍යය. ඒ සඳහා වන කැපවීම පොලීසියේ නිලධාරීන්ට තිබෙන බව අපි දනිමු. අවශ්‍ය වන්නේ ඔවුන්ගේ රාජකාරිවලට බාධා කිරීමෙන් වැළකී සිටීම පමණක් බව සර්ව-බලධාරීන්ට පෙන්වා දීමට කැමැත්තෙමු.