ජනතා අපේක්ෂාව
මේ දවස්වල රටේ ජනතාවට බඩකට පුරා අහන්න, දකින්න ලැබෙන්නේ මධූෂ් ගැන කතා සාගරයකි. ඔහු ඩුබායි රටේදී අත්අඩංගුවට පත්වූ ආකාරය පමණක් නොව ඔහුගේ පවුලේ වතගොත, මධූෂ් නමට ඉදිරියෙන් ලියැවී ඇති මිනීමැරැම්, බරපතළ ගණයේ අපරාධ, ගෝලබාලයන්ගේ වැඩ මේ කී නොකී බොහෝ දේ පිළිබඳ තොරතුරු මාධ්‍යවලද පළවන්නේ, විකාශය කෙරෙන්නේ තොග ගණනිනි. මෙතෙක් රටේ තිබූ එකම ප්‍රශ්නය මධූෂ් අල්ලාගැනීම පමණක් තරමට කතා දිග්ගැසෙමින් තිබේ. දැන් ඔහු අල්ලාගෙන අවසානය. එහෙත් අපේ රටේ ප්‍රශ්න එතැනින් ඉවර වෙයිද?
අප කියන්න උත්සාහ කරන්නේ මධූෂ් අල්ලාගැනීම වැදගත් නොවන බවක් නොවේ. ඔහු පමණක් නොව ඔහුගේ සියලු අපරාධ වැඩවලට සහාය දුන් සියලු දෙනාට එරෙහිව අප්‍රමාදව නීතිය ක්‍රියාත්මක වීම අවශ්‍ය බවට කතා දෙකක් නැත. මධූෂ් කරන ලදැයි සැලකෙන තුච්ඡ ගණයේ අපරාධ සහ මහා පරිමාණ කුඩු ජාවාරම්වල ස්වභාවය අනුව ඔහු නීතිය ඉදිරියට පමුණුවා පරසක්වළ ගැසීමද ප්‍රමාණවත් නැතැයි කිව යුතුය. එහෙත් මේ හෝරාවේ රටේ සියලු ප්‍රශ්න මධූෂ්ගේ පිටින් යටපත් කර දැමීමට කවුරැන් හෝ කටයුතු කරන්නේ නම් එය බරපතළ වැරැද්දක් බව පෙන්වා දෙමු. එය ජනතාවගේ අවශ්‍යතා නොසලකා හැරීමකි. එසේ වීමට ඉඩ දිය යුතු නැත.
පසුගිය සති කිහිපයක්ම රට පැවැතියේ ෂට්ඩවුන් මූඩ් එකකය. රජයේ වැදගත් ආයතන ගණනාවක්ම ක්‍රියාත්මක වූයේ ඔලුවක් නැති තත්ත්වයෙනි. ආණ්ඩුව තවමත් රජයේ ආයතන ලොක්කන්ගේ පුරප්පාඩු පුරවමින් සිටී. ඇතැම් ආයතනවල ප්‍රතිපත්තිමය සහ පරිපාලනමය තීන්දු ගැනීමට කිසිවකුත් නැත. රාජ්‍ය බැංකුවලද මේ තත්ත්වය සති ගණනක් පැවැති අතර අවසානයේ ලංකා බැංකුවට පමණක් සභාපතිවරයකු පත්කර තිබේ. එහෙත් දැන් කාලයක් තිස්සේ දේශීය ආදායම් බදු දෙපාර්තමේන්තුවට සහ සුරාබදු දෙපාර්තමේන්තුවට අධ්‍යක්ෂ ජනරාල්වරැන් නැත. රජයට විශාලම ආදායම් ලබාදෙන මෙවැනි ආයතනවල ලොක්කන් නොසිටීම නිසැකවම එම ආයතනවලින් ලැබෙන ආදායම පහත දැමීමට හේතුවෙයි. ඒ ගැන ආණ්ඩුවට තවමත් හැඟීමක්, දැනීමක් නැති බව පෙනෙන්නට තිබේ. එහෙත් තමන් පත්ව සිටින අක්‍රීය තත්ත්වය මධූෂ්ලාගේ කතා පිටින් දමා අත සෝදාගැනීමට ආණ්ඩුවේ බලධාරීන්ට හැකියාවක් නැති බව මෙහිදී පෙන්වාදීම අවශ්‍යය.
ඒ සමඟ කිවයුතු වන්නේ උග්‍රවෙමින් පවතින ආර්ථික අර්බුදයේ පීඩනයට රටම තවදුරටත් හසුවෙමින් තිබෙන බවය. ලෝකයේ තෙල් බැරලයක මිල සාපේක්ෂව ඩොලර් 64ක් වැනි අඩු මට්ටමක පැවැතියද එහි වාසිය අපට ලැබෙන්නේ නැත. ඩොලරයට එරෙහිව රුපියල බරපතළ ලෙස අවප්‍රමාණ වී තිබීම ඊට හේතුවය. තරුණයන් වෙනුවෙන් රැකියා උත්පාදනයක් තිබෙන බවක් පෙනෙන්නට නැත. තවමත් උපාධිධාරීහු රැකියා ඉල්ලා කොළඹට පැමිණ පැමිණ විරෝධතා පෙළපාළි ගොස් පොලීසියේ වතුර පහරින් හොඳට නාගෙන කඳුළුගෑස් පහරද කාගෙන ආපසු දුවති. රටේ උගත් තරුණ පරපුරට මෙසේ සැලකීම කිසිසේත් යුක්ති සහගත නැත. උපාධිධාරීන් රජයේ රැකියාම ඉල්ලමින් හඬ නැගීම පිළිබඳ අපටද විවේචනයක් තිබෙන නමුත් රජය ඒ ප්‍රශ්නයට ලබාදෙන එකම විසඳුම විරෝධතාකරුවන්ට ජල ප්‍රහාර එල්ල කිරීම නම් එය අපට පිළිගත නොහැකිය. ආණ්ඩුවක් තිබිය යුත්තේ පොදු ප්‍රශ්නවලට විසඳුම් සෙවීමට මිස ඒවා යටපත් කිරීමට නොවේ. මධූෂ් ඇල්ලුවා කියා උපාධිධාරීන්ගේ රුකියා ප්‍රශ්නය අවසන් නොවන බව මතක තබාගත යුතුය.
රටේ කෘෂිකාර්මික ක්ෂේත්‍රයේද නොවිසඳුණු බරපතළ ගැටලු තිබේ. වසර ගණනාවකට පසුව මෙවර මහ කන්නයේ අස්වැන්න ඉතා ඉහළ අගයක් ගනු ඇතැයි ප්‍රකාශ වෙමින් තිබේ. එහෙත් එම අස්වැන්න අවසානයේ රටේ පාරිභෝගිකයාට සෙතක් නොකරන්නේ නම් ඉන් පළක් නැත. මහා පරිමාණ වීමෝල් හිමිකරුවන් විසින් රටේම සහල් මිල පාලනය කිරීම වැළැක්වීමට තවමත් කිසිදු ක්‍රියාමාර්ගයක් ගන්නා බවක් නොපෙනේ. රටේ සහල් අතිරික්තයක් තරමට නිෂ්පාදනයක් තිබුණත් වෙළෙඳපොළේ මිල අඩු වන්නේ නැත්නම් කොතැනක හෝ බරපතළ වැරුද්දක් තිබිය යුතුය. රටේ මහජනතාවට අඩු මිලට සහල් ලබාදීමට නම් ඒ සඳහා සැලසුම් සකස් කළ යුතු වෙයි. ඊට අවශ්‍ය ප්‍රතිපත්ති තීන්දු ගැනීමද අප්‍රමාදව සිදුකළ යුතුය. මධූෂ් ගෙන්වාගන්නා දිනය ගැන ඇඟිලි ගනිමින් සිටිනවාට වඩා ඒ ගැන අවධානය යොමුකිරීම අවශ්‍ය බව පෙන්වා දෙමු.
මේ අතර රටේ මීළඟ අයවැය ඉදිරිපත් කිරීමට ඇත්තේ සති දෙක තුනක කාලයක් පමණි. ඒ සඳහා ප්‍රමාණවත් සංවාදයක් රට තුළ ඇති බවක් පෙනෙන්නට නැත. අයවැය ගැන පැවැතිය යුතු උණුසුමද මධූෂ් අල්ලාගැනීමෙන් මතුවූ ඌෂ්ණයට යටපත් වී ගොස් ඇති බවක් පෙනේ. රටේ විවිධ කොටස් අතරේ අයවැය ගැන සංවාදයක් ඇතිනොවීමේ ප්‍රතිඵලය සමහරවිට එහි යෝජනා ඉදිරිපත් කිරීමේදී බලාගත හැකිවනු ඇත. මැතිවරණ වර්ෂයක් වීම නිසා ජනතාවද සහන බලාපොරොත්තු වීම සාමාන්‍ය දෙයකි. එහෙත් රටේ පවතින ආර්ථිකය තුළ එවැනි බලාපොරොත්තු ඉටුවේදැයි යන්න නම් සැක සහිතය.
ජාතික ආණ්ඩු කතාව සහ නව ආණ්ඩුක්‍රම ව්‍යවස්ථාවක් ඉදිරිපත් කිරීමද මේ වනවිට යටපත්ව ගොස් ඇති තවත් මාතෘකා දෙකක් වෙයි. මධූෂ්ලා ගැන උණු උණුවේ ප්‍රවෘත්ති ලැබෙන අතරේ රටේ ජනතාවට කිසිසේත් නොදිරවන ඇමැති පට්ටම් වැඩි කරන ජාතික ආණ්ඩු යෝජනාව පාර්ලිමේන්තුව තුළින් සම්මත කර ගැනීමටත් තිබෙන ඉඩකඩ බැහැර කළ නොහැකිය. දැනට පවතින දේශපාලන බල අරගලය තුළ සිදුනොවිය හැකි කිසිවක් නැත. අපට කිව හැකි වන්නේ කුමන පියවරකට ගියත් රටේ ජනතාවට සාධාරණය ඉටුවිය යුතු බවය.
අප මෙහි පෙන්වා දුන්නේ කරුණු කිහිපයක් පමණි. මධූෂ්ගේ කතාවට යටපත් වූ මෙවැනි තව කතා බොහෝය. මේ සියල්ල ගැන රටේ ජනතාව හොඳ අවධානයකින් බලාසිටින බව නම් අපි දනිමු. මධූෂ් පමණක් නොව ඔහුගේ ගෝලබාලයනුත් අල්ලාගෙන ඔවුන්ට උපරිම දඬුවම් ලබාදෙනු ඇතැයි යන බලාපොරොත්තුව සේම තමන්ට බලපාන රටේ සෙසු ප්‍රධාන ප්‍රශ්න කෙරෙහිද ප්‍රමාණවත් අවධානයක් යොමුවනු ඇතැයි යන්න ඔවුන්ගේ ඒකායන බලාපොරොත්තුවය.
