තිත්ත ඇත්ත
විදුලිය කැපිල්ල සම්බන්ධයෙන් පසුගියදා අග්‍රාමාත්‍යවරයා ඉතා වැදගත් ප්‍රකාශයක් කර තිබිණි. මහජනතාවට විදුලිය ලබාදීමට නොහැකි වීමේ වගකීමෙන් මිදෙන්නට ආණ්ඩුවට කිසිම හැකියාවක් නැති බවය. එහි අනෙක් තේරුම විදුලිය කැපීමේ වගකීම මුළුමනින්ම ආණ්ඩුව බාරගත යුතු බවය. එය යථාර්ථය බව අපගේද පිළිගැනීමය. ඊට හේතුව කුමක් වුවද මූලික අවශ්‍යතාවක් වන බලශක්තිය දිනපතා පැය ගණනකට අත්හිටුවීමට සිදුවීම ආණ්ඩුවක් වශයෙන් ලැජ්ජා විය යුතු කරුණකි.
මෙහිදී විදුලි බල අමාත්‍යවරයා ද ට්විටර් පණිවුඩයක් තබමින් කියා තිබුණේ විදුලිය කැපීමට සිදුවීම සම්බන්ධයෙන් තමන් රට වැසියන්ගෙන් සමාව ඉල්ලන බවය. විදුලිය කැපීමේ ඉල්ලීම මුලින් එනවිට එය තමා වළක්වා ගත්තත් ස්වභාවධර්මය වෙනස් කළ නොහැකි නිසා එම තීරණයට හිස නැමීමට සිදු වූ බවද ඔහු කියා තිබිණි. කෙසේ වුවත් ඔහු එක් ප්‍රතිඥාවක් ලබා දීමට ද ක්‍රියා කර තිබේ. එනම් තමන්ගෙන් පසුව එන විදුලි බල අමාත්‍යවරයාට මේ අර්බුදයට මුහුණ දීමට සිදු නොවීම සඳහා ක්‍රියා කරන බවය. මැති ඇමැතිවරැන් ලබා දෙන පොරොන්දුවලට දැන් මේ රටේ තිබෙන්නේ ඉතාම බාල ගණයේ පිළිගැනීමක් වුවත් ආණ්ඩුවේ ජ්‍යෙෂ්ඨයකු වන විදුලි බල අමාත්‍යවරයා රටට ලබා දුන් එම පොරොන්දුව යථාර්ථයක් කරගැනීමට ඔහු කැපවෙනු ඇතැයි අපි බලාපොරොත්තු තබා සිටිමු.
එලෙස බලාපොරොත්තු රඳවාගෙන සිටින අතරම තවත් කරැණු කිහිපයක් ද පෙන්වා දීම සුදුසු යැයි අපි සිතමු. අද ආණ්ඩුව බලශක්ති අර්බුදයක් ගැන මහප්‍රාණ කතා කොතරම් කිව්වත් බලයට පැමිණි පසුව මේ දක්වා එකම බලාගාරයක් හෝ ඉදිකිරීමට ආණ්ඩුව අසමත් විය. ඒ යථාර්ථය මුලින්ම පිළිගැනීම අවශ්‍යය. අග්‍රාමාත්‍යවරයා ද ප්‍රකාශ කර තිබුණේ තමන්ගේ ආණ්ඩුව බලයට පැමිණීමෙන් පසුව 2015 අගෝස්තු සහ 2018 ඔක්තෝබර් අතර කාලය තුළ ඉන්දියාව, ජපානය සහ චීනය සමඟ ස්වභාවික ද්‍රව වායු බලාගාර තුනක් ඉදිකිරීමට ආණ්ඩු මට්ටමින් එකඟතාවකට එළඹුණු බවය. එහෙත් ඒ බලාගාර කිසිවක් ඉදි නොවූ බවද අග්‍රාමාත්‍යවරයා සඳහන් කර තිබුණි. ඒවා ඉදිකිරීමට නොහැකි වූයේ කාගේ අදක්ෂතාව නිසාදැයි අග්‍රාමාත්‍යවරයා ප්‍රශ්න කර තිබිණි.
තමන්ට පැය ගණනක් විදුලිය නොමැතිව ඉන්න සිදු වූයේ කාගේ අදක්ෂතාවක් නිසාද යන්න රටේ පාරිභෝගික ජනතාවට අදාළ ප්‍රශ්නයක් නොවේ. ඔවුන් දැන සිටින්නේ කොතරම් දක්ෂයන් ආණ්ඩුවේ සිටියත් තමන්ට පැය ගාණක් විදුලිය නොලැබෙන බව පමණි. කොළඹ නාගරික ජනතාවට නම් එයද අදාළ නැත. ඔවුන්ට විදුලිය කැපීමක් නැති හෙයිනි. ජනතාව නිතරම සිතන්නේ තමන් පත්කරගත් ආණ්ඩුව රටවැසියන්ගේ මූලික අවශ්‍යතා ඉටුකර දිය යුතු බවය. එය ඉටු නොවන විට ජනතාව එහි වැරැද්ද පටවන්නේ තමන්ගේ ආණ්ඩුවේ කරපිට මතය. එල්.එන්.ජී. බලාගාර ඉදි නොකෙරුණේ කවුරැන් නිසාද යන්න ගැන ඔවුන් උනන්දු වන්නේ නැත. ඔවුන් දැන් සිටින්නේ මේ ආණ්ඩුව යටතේ එකම බලාගාරයක් හෝ ඉදි නොකෙරුණු බව පමණි.
විධිමත් සැලැස්මකට අනුව අත්‍යාවශ්‍ය සේවා ක්‍රියාත්මක නොවීම මෙවැනි ව්‍යසනවලට හේතුව බව හඳුනාගත හැකිය. බලාගාර ඉදිකිරීම ආණ්ඩුවේ යෝජනාවක් වනවිට විදුලි ඉංජිනේරුවරු ඊට විරුද්ධ වෙති. මේ දෙපිරිස අතර සංහිඳියාවක් ගොඩනැගී බලාගාර හදන තැනට වැඩ කෙරෙන විට මහජන උපයෝගිතා කොමිසම ඒ මැදට කඩාපනී. අප මේ සඳහන් කරන්නේ ඔවුන්ගේ සේවය අවතක්සේරු කිරීමට නොවේ. එහෙත් විදුලි බලාගාරයක් ඉදිකරනවාට වඩා තමන්ගේ මිනුම් දඬු මත ක්‍රියාත්මක වීම වඩා වැදගත් යැයි සිතා ඊට ප්‍රමුඛත්වය දී කටයුතු කිරීම වගකිව යුතු කොමිසමක නිවැරදි පිළිවෙත යැයි අපි නොසිතමු. අප මේ කියන කරැණු වර්තමානයට පමණක් නොව අතීතයට ද අදාළය. එහෙත් අනාගතයේදී එසේ සිදු නොවිය යුතු බව අපි අවධාරණය කරමු.
සැලසුම් රහිතව වැඩ කිරීමේදී රටක සංවර්ධන ක්‍රියාවලියේදී ලබාගත හැකි ජයග්‍රහණ සීමා වෙයි. මෙය විදුලියට පමණක් නොව වෙනත් ක්ෂේත්‍රවලට ද අදාළය. අපේ රටේ මහා මාර්ගයක් ඉදි කිරීමේදී වුවද වෙනත් සංවර්ධන යෝජනා ක්‍රමයකදී වුවද මේ තත්ත්වය දැකගත හැකි වෙයි. සැලසුම් සකස් කිරීමේදී සිදුවන මතගැටුම් හේතුවෙන් ඇතැම් පාරවල් හැදෙන්නේ කඩින් කඩය. එසේ හදන පාරවල් සම්පූර්ණ කර කාපට් දැමීමෙන් පසුව යළිත් තැනින් තැන හාරනු ලැබේ. ඒ වෙනත් යටිතල පහසුකම් සැපයීම සඳහාය. හොඳට හැදූ පාරේ උදේට ගමන් කරන ජනතාව සවසට දකින්නේ යළිත් තැනින් තැන හාරා විනාශ කර දැමූ පාරකි. මේ තත්ත්වය කොළඹ නගරය ඇතුළත පමණක් නොව අවට තදාසන්න නගරවල ද දැකිය හැක.
මහනුවර අධිවේගී මාර්ගයේ ඉදිකිරීම් ද වරින් වර ඇණ හිටියි. දැන් පැවසෙන්නේ ඊළඟ අදියර සඳහා ණය සැපයීමට ජපන් බැංකුවක් තදබල කොන්දේසි දමා ඇති බවය. ඊට හේතුව වෙන කිසිවක් නොව අප ඉහත සඳහන් කළ අසංවිධානාත්මක බව, සැලසුම් අවිධිමත් වීම සහ පාරදෘශ්‍යභාවය පිළිබඳ පවතින ගැටලුය. සංවර්ධන වැඩවලදී වෙනත් රටවල්වල බලධාරීන් සහ ආයතන පෙන්නුම් කරන සෘජු, අනම්‍ය ප්‍රතිපත්ති සහ සැලසුම් සහගත බවට වඩා අප සිටින්නේ හත්ගව්වකටත් වඩා පසු පසිනි. මේ වැරදි හදාගැනීමකින් තොරව කඩිනම් සංවර්ධනයක් බලාපොරොත්තු වීමත් විහිළුවකි.
අපේ රටට හැදෙනවා නම් මේ විදුලිය අර්බුදය වශයෙන් හඳුන්වන ලයිට් කැපිල්ලම හොඳ අවස්ථාවකි. එහෙත් අපට නම් පෙනෙන්නේ මෙවර ද වැස්ස ලැබී ලයිට් කැපිල්ල නැවතීමෙන් පසුව ඊළඟ ලයිට් කැපිල්ල එනතුරැම සිදුවන්නේ කතා කිරීම පමණක් බවය.
