කතා සාප්පුව වසා දමමු
රටම තිගස්සමින්, ඇසූ දුටු සියලු දෙනාගේ නෙතට කඳුළු නංවමින් පසුගිය පාස්කු ඉරිදා (21) සිදු කෙරැණු මහා මිනිස් ඝාතනය වළක්වා ගැනීමට නොහැකි වූයේ බුද්ධි අංශ තොරතුරැ සඳහා ප්‍රතිචාර දැක්වීමට ප්‍රමාද වීම නිසා හෝ කිසිසේත් ප්‍රතිචාර නොදැක්වීම නිසා බව මේ වනවිට පැහැදිලි වී තිබේ. මෛත්‍රීපාල සිරිසේන ජනාධිපතිවරයා ද රනිල් වික්‍රමසිංහ අග්‍රාමාත්‍යවරයා ද කළ ප්‍රකාශවලින් පැහැදිලිව පෙනී ගියේ ආණ්ඩුවේ ඉහළම තලයේ සිදු වූ බුද්ධි තොරතුරු නිසි ලෙස කළමනාකරණය නොවීම හේතුවෙන් බිහිසුණු සිද්ධිය වළක්වා ගැනීමට තිබූ අවස්ථාව ගිලිහී ගොස් ඇති බවය. මෙය රටක් වශයෙන් අප සියලු දෙනාම ලජ්ජාවටත් භීතියටත් පත්කර තිබෙන බව පවසන්නේ කනගාටුවෙනි.
ජනාධිපතිවරයා ජාතිය අමතා කළ ප්‍රකාශයේදී සඳහන් කර තිබුණේ බෝම්බ ප්‍රහාර තර්ජන පිළිබඳව තමන්ට දැනුම් දීමක් නොසිදු වූ බවත් එසේම ඉන්දියාවෙන් සහ ඇතැම්විට අමෙරිකාවෙන් පවා ලැබී තිබූ ඔත්තු සේවා අනතුරැ ඇඟවීම් පිළිබඳව තමා දැනුම්වත් නොකළ බවත්ය. විනාශයේ බරපතළකම සලකන විට එවැනි වැරුද්දක් යම් නිලධාරියකු හෝ නිලධාරීන් පිරිසක් හෝ විසින් සිදුකර තිබිණි නම් එය මෙරට බුද්ධි අංශ ඉතිහාසයේ යළි මැකිය නොහැකි කළු පැල්ලමක් ඇතිකර තිබෙන බව පෙන්වා දිය යුතුය. අග්‍රාමාත්‍යවරයා ද ප්‍රකාශ කළේ තමන්ට මෙවැනි ප්‍රහාරයක් සිදුවිය හැකි බවට කිසිදු තොරතුරක් නොලැබුණු බවය. එය කිසිවකු අතින් හෝ සිදු වූ බරපතළ අතපසුවීමක් බව සඳහන් කළ යුතුය. නමුත් දැන් වහාම සිදු කළ යුක්කේ එම අතපසුවීම් පිළිබඳ ගැටලු පසුව විසඳාගැනීමට ඉඩ තබා මින් අනතුරැව එවැනි විනාශයක් කිසිම අවස්ථාවක හෝ සිදු නොවන තැනට වගබලාගැනීමය. ලොවේ මෙවැනි අන්තවාදී ඉස්ලාම් කල්ලි ප්‍රහාරවලට ලක්වූ සියලු රටවල් ඉන්පසුව ඒ ආකාරයේ බරපතළ සිදුවීම්වලට ඉඩ නොතැබූ බව මෙහිදී සැලකිල්ලට ගැනීම අවශ්‍යය.
යළි මෙවැනි සිද්ධීන් වළක්වා ගැනීමට නම් පළමුවෙන්ම කළ යුත්තේ ප්‍රහාරයට වගකිව යුතු සංවිධානය හෝ සංවිධාන හඳුනාගැනීමය. ලොවේ දරුණුම ත්‍රස්ත සංවිධානයේ කොන්ද කඩා ඔවුන්ගේ පරාජයට පාර කැපූ ඉතා දක්ෂ, පළපුරුදු බුද්ධි නිලධාරීන් පිරිසක් සිටින අපේ රටට එවැනි ඉලක්ක ජයගැනීම මහ ලොකු ගැටලුවක් නොවන බව අපි තරයේම විශ්වාස කරමු. එම නිලධාරීන් විසින් ආවරණය කරනු ලබන ජාතික ආරක්ෂාව පිළිබඳ බුද්ධි සේවා කටයුතුවලට දේශපාලන ඇඟිලි ගැසීම් සිදු නොවන තාක් එම කාර්යයන් නිසි පරිදි ඉටු කෙරෙනු ඇති බව අපගේ වැටහීමයි. වගකිවයුතු සංවිධානය හඳුනාගැනීමෙන් පසුව එම සංවිධානය මුලිනුපුටා දැමීමට අවශ්‍ය විධි විධාන යෙදීම ආණ්ඩුවේ කාර්යභාරයයි. රටේත් ජනතාවගේත් ආරක්ෂාව තමන්ගේ ප්‍රමුඛතා ලේඛනයේ අංක 01 බව වටහාගැනීම ආණ්ඩුවේ වගකීමය.
ජාතික තව්හිද් ජමාත් සංවිධානය මේ දරුණු ත්‍රස්ත ප්‍රහාරයේ මූලිකයා බව මේ වනවිට හඳුනාගෙන තිබේ. එම සංවිධානය මෙරට පවතින මුස්ලිම් ජන කොටස් අතරින් එකක් බවත් එයින් වපුරණ අන්තවාදී ප්‍රචණ්ඩකාරී අදහස්වලට නැඹුරැතාවයක් දක්වන්නේ සුළු පිරිසක් බවත් සඳහන්ය. එහෙත් මෙවැනි දරුණු සංවිධානයකට සුළු පිරිස මහ පිරිසක් බවට පත්කර ගැනීමට මහලොකු කාලයක් යන්නේ නැත. උතුරේ කොටි සංවිධානය ද මුලින් ආරම්භ වූයේ ඉතා සුළු පිරිසකගෙන් බව අපගේ යුද්ධයේ ඉතිහාසයේ ලියැවී තිබේ. කොටින්ගේ මතවාද සහ ක්‍රියාකාරකම් වෙනස් බව සත්‍යයකි. නමුත් ත්‍රස්තවාදය යනු ත්‍රස්තවාදයම පමණි. බෝම්බ පුපුරුවා අහිංසක නිරායුධ ජනතාව ඝාතනය කිරීම, දේවස්ථාන පුපුරැවා දැමීම, සංචාරක හෝටල්වල බෝම්බ පිපිරවීම රුදුරු ත්‍රස්තවාදය මිස වෙනත් කිසිවක් නොවේ. මෙවැනි මීලේච්ඡ ක්‍රියා මේ ලොවේ කිසිදු ආගමකට ධර්මයකට එකඟ නැති බව සියලු දෙනාම වටහාගත යුතුය. මුලින්ම එය පිළිගත යුතු වන්නේ මේ රටේ වසර සිය ගණනාවක් තිස්සේ සිංහල මිනිසුන් සමඟ සමගියෙන් විසූ මෙරට මුස්ලිම් ජනතාව බව අපි තරයේ විශ්වාස කරමු.
විනාඩි ගණනාවක් තුළදී මිනිස් ජීවිත 350ක් විනාශ කිරීම කිසිදු ආගමකට ධර්මයකට එකඟ නොවන බව පිළිගත හැකිනම් ඊළඟට සිදුවිය යුත්තේ ලොවේ සකල මානව වර්ගයාට එරෙහිව ක්‍රියාත්මක වන ජාතික තව්හිද් ජමාත් සංවිධානයේ වැලගිය මුලගිය තැන් සොයා ගැනීමට සියලු සහාය ලබාදීමය. මෙහිදී ද මුස්ලිම් ජන සමාජයට පැවරෙන්නේ විශාල වගකීමකි. මේ වනවිට මුස්ලිම් සංවිධාන ගණනාවක් ඉදිරියට පැමිණ කියා ඇත්තේ මුස්ලිම් නමට මුවා වී මිනිස් ඝාතන සිදු කරන ත්‍රස්ත කල්ලිවල සාමාජිකයන් තමන් මුස්ලිම් බව කියාගත්තත් ඔවුන් මුස්ලිම් නොවන බවය. එසේනම් කුමන ජාතියකට අයත් වුවත් ත්‍රස්තවාදියා යනු ත්‍රස්තවාදියාම බව සලකා ඔවුන්ට එරෙහිව බුද්ධි අංශවලට තොරතුරැ ලබාදීමට මුස්ලිම් ජනතාව ද ඉදිරිපත් වීම අවශ්‍යය. මේ ත්‍රස්ත ක්‍රියා නැවැත්විය හැක්කේ එවැනි තීරණාත්මක පියවර ගැනීම තුළින් පමණි. නැතහොත් කවදා හෝ සිදුවන්නේ මේ අන්තවාදී කල්ලියේ බෝම්බ සහ කුවක්කු මේ රටේ මුස්ලිම් ජනතාව දෙසට ද හැරීමය. ත්‍රස්තවාදයේ ස්වභාවය එයයි.
අපේ රට යළිත් මීට වසර 10කට පෙර තිබූ තත්ත්වය වැටිය යුතු නැත. එකිනෙකා කෙරෙහි සැකයෙන් බලන, දැඩි ලෙස පීඩනයකට ලක් වන, සැක, බිය වෙලාගත් එවැනි රටක් සමාජයක් යළිත් බිහිවනු දැකීමට මෙරට සිංහල ජනතාව පමණක් නොව මුස්ලිම් ජනතාව ද කැමැති නොවනු ඇත. කුමන අන්තවාදී සංවිධානය වුවත් මේ බෝම්බ ප්‍රහාරයට වගකිව යුතුනම් එම සංවිධානවල සියලු දෙනා නොපමාව අත්අඩංගුවට ගෙන නීතිය ඉදිරියට පැමිණවීමට පියවර ගැනීම ආණ්ඩුවේ වගකීමය. එපමණක් නොව තීන්දු තීරණ ගැනීම ද ඉතා ඉක්මනින් සිදුවීම මෙහිදී වැදගත්ම සාධකයකි. වැඩකට නැති නිවේදන නිකුත් කිරීම්, කමිටු පත්කිරීම්, ප්‍රකාශ නිකුත් කිරීම හා සාකච්ඡාවලින් සිදුවන්නේ කටයුතු ප්‍රමාද වීම පමණි. අවශ්‍ය වන්නේ ආණ්ඩුව සෘජු තීරණ ගනිමින් අප්‍රමාදව ඒවා ක්‍රියාවට නැංවීමය. එවිට ජනතාවගෙන් අවශ්‍ය සහයෝගය ද ලැබෙනු ඇත. එසේ නොවුණොත් ඊළඟ බෝම්බය පිපිරීමෙන් පසුවද කීමට සිදුවනු ඇත්තේ &අපට තොරතුරැ ලැබුණේ නෑ යන්න පමණි.