කඩුවෙන් තණකොළ කපන ඇමැතිලා සහ කාදිනල්තුමා
මෙරට රෝමානු කතෝලික පල්ලියේ ඉතිහාසයේ දෙවැනි වරට කාදිනල් ධූරයකින් පුදනු ලැබ සිටින්නේ වත්මන් කොළඹ අගරදගුරු අති උතුම් මැල්කම් රන්ජිත් හිමිපාණෝය. මීට පෙර කාදිනල් ධූරයකින් පිදුම් ලද මෙරට අගරදගුරුතුමකු වූයේ තෝමස් කාදිනල් කුරේ (1965-1988) හිමිපාණෝය. මැල්කම් රන්ජිත් අගරදගුරුතුමන් එම ධූරයට පත් කරනු ලැබීමට පෙර වතිකානුවේ අපෝස්තලීක දේවස්ථාන භාරකාර පියතුමකු වශයෙන් ද කටයුතු කර තිබේ. මේ රටේ සෙසු ආගමික නායකයන් සහ පොදු මහජනතාව සමඟ ඇසුරු කරන සමීපව කටයුතු කරන ආගමික නායකයකු වශයෙන් ද කාදිනල් තුමෝ ප්‍රසාදය දිනා සිටිති. සර්ව ආගමික සමුළුවලට ඉතා උද්‍යෝගයෙන් සහභාගි වන අති උතුම් කාදිනල් මැල්කම් රන්ජිත් වරක් ප්‍රකාශ කළේ මේ රටේ බුදු දහමට ප්‍රමුඛත්වය ලැබිය යුතු බවත් සෙසු ජාතික ආගමික පිරිස් බෞද්ධ ජනතාව සමඟ සහයෝගයෙන් කටයුතු කිරීම අවශ්‍ය බවත්ය.
මේ ආකාරයට රටේ ජනතාව අතරේ ප්‍රසාදය දිනා සිටින කෙළින් කතා කරන මැල්කම් රන්ජිත් කාදිනල්තුමා පාස්කු ඉරිදා සිදුවූ බෝම්බ ප්‍රහාරවලින් පසුව කටයුතු කළ ආකාරය මේ රටේ බහුතර ජනතාවගේ සිත් තුළ තදින්ම කා වැදී තිබේ. කිතුනු පල්ලි තුළ සිය ගණන් බැතිමතුන් මරැදැක සිටින අවස්ථාවක තමන් තුළ තිබිය යුතු සංයමය, ඉවසීම, බුද්ධිමත් බව භාවිත කරමින් කිතුනු ප්‍රජාවගේ කම්පනය සහ වේදනාව, කෝපය සහ වෛරය බවට පෙරළී යාමට තිබූ ඉඩකඩ කාදිනල් තුමෝ වළක්වා ගත්හ. සිදුවූ විපත්තියෙන් පසුව රටට කතා කිරීමට අවස්ථාව සැලසුණු පළමු අවස්ථාවේ පටන් මැල්කම් රන්ජිත් කාදිනල්තුමා ප්‍රකාශ කළේ මේ ප්‍රහාරය සිදුකළ පවිටු මිනිසුන්ගේ දුෂ්ට අරමුණු ඉටුකර ගැනීමට කිසිම ඉඩක් නොතබන ලෙසටය. කටුවපිටිය පල්ලියේ පිපිරැණු බෝම්බය හේතුවෙන් එක ගමක මළසිරුරු විශාල ගණනක් මිහිදන් වෙද්දී ඒ සඳහා රැස්වුණු ශෝකයෙන් පීඩිතව සිටි ජනතාව ආවේගශීලීව කටයුතු කිරීමට යාමෙන් වළක්වා ගැනීමට කාදිනල්තුමාගේ දයාබර වදන් හේතු වී තිබිණි. එතුමා දිගටම පෙන්වූ නොසැලෙන බව, මනස සන්සුන්ව පවත්වාගැනීම සහ ඉවසීම කම්පනයට පත්ව සිටි ජනතාව වෛරයෙන් මුදාගැනීමට සමත්ව තිබිණි. එයින් මහා විනාශයකට තිබූ ඉඩකඩ වැළැක්වී ගියේය. මේ සටහන තබන තුරැද එම තත්ත්වයෙන් වෙනසක් නොවීය.
මේ අතරවාරයේ අවස්ථා කිහිපයකදීම කාදිනල්තුමා සිය අදහස් රට හමුවේත් ලෝකය හමුවේත් ප්‍රකාශ කළ බව අපට අසන්නට දකින්නට ලැබිණි. ඒ අතරින් පසුගිය දිනක රටේ ආරක්ෂක කටයුතු සිදුවන ආකාරය දැඩිව විවේචනයට ලක් කරමින් කළ ප්‍රකාශ ගණනාවක්ම රටේම අවධානය දිනාගැනීමට සමත් වූ බව සඳහන් කළ යුතුය. මුස්ලිම් පල්ලිවල මෙතරම් කඩු තොග ගණනින් ඇත්තේ තණකොළ කැපීමට යැයි ප්‍රකාශ කරන මුස්ලිම් ආගමික කටයුතු භාර ඇමැතිවරයකු සිටින තත්ත්වයක් තුළ මෙවැනි විවේචන බලාපොරොත්තු විය යුතුය. බරපතළ ව්‍යසනයකට පසුව ද ඇතැමුන් රට ගැන නොසිතා තමන්ගේ දේශපාලන බලය පිළිබඳවම සිතාගෙන කටයුතු කිරීම කාදිනල්තුමාගේ ප්‍රබල විවේචනයට හසු විය. රටේ ආරක්ෂක කටයුතු සිදුකෙරෙන ආකාරය සම්බන්ධයෙන් තමන් සෑහීමකට පත් නොවන බවද මේ ආකාරයට දිගටම කටයුතු කිරීම හේතුවෙන් ජනතාව නීතිය අතට ගන්නා තත්ත්වයකට පත්වීමට පවා ඉඩ තිබෙන බවට ද අනතුරැ ඇඟවීමක් කළ කාදිනල්තුමා එසේ වුවොත් පාරට බසින එම ජනතාව සමඟ ඉදිරියෙන්ම යාමට තමන් ද ඉදිරිපත් වන බවද පැවසුවේ මෙරට දේශපාලන නායකත්වය බරපතළ පීඩනයකට හසු කරමිනි. ඒ සමඟ රජයෙන් පිරිනැමුණු වෙඩි නොවදින රථය ආපසු යැවීම මගින් ද කාදිනල්තුමා පෙන්වා දී තිබුණේ දැන් ලොකුම අවශ්‍යතාව රටේ ජනතාවගේ ආරක්ෂාව සැපයීම බවත් තමා හෝ ආගමික නායකයන්ගේ පමණක් ආරක්ෂා කිරීම පමණක් ප්‍රමාණවත් නොවන බවත්ය. මේ පණිවුඩය රජයේ බලධාරීන් විසින් කොතරම් දුරට ග්‍රහණය කරගත්තාදැයි අපි නොදනිමු.
මේ රටේ දේශපාලන බල අධිකාරිය තුළ අප හැමදාමත් දුටුවේ රටේ පොදු මහ ජනතාවට වඩා තමන්ගේත් තමන්ගේ ඥාති සමූහයාගේ සහ ගජ මිතුරන්ගේත් අවශ්‍යතා ගැන සැලකිලිමත් වන ආකාරයයි. ආරක්ෂක තත්ත්වය සම්බන්ධයෙන් කටයුතු කිරීමේදීද එහි වෙනසක් නැත. මේ තත්ත්වය දැන්වත් වෙනස් විය යුතු බවට වන ප්‍රබල පණිවුඩයක් පාස්කු ඉරිදා මෙරට ඉතා දරුණු ත්‍රස්ත ප්‍රහාරයක් එල්ල කළ ඉස්ලාම් අන්තවාදී සුළු පිරිසක් විසින් ලබා දී තිබේ. මෙරට ආරක්ෂක හමුදා සහ පොලීසිය තමන්ට පැවරැණු රාජකාරී ඉතාම කාර්යක්ෂම, උනන්දුවෙන් සහ කැපවීමෙන් සිදුකරන බවද ඒ සමඟ පැවසිය යුතුය. එසේ නොවන්නට සති දෙකක් වැනි සුළු කාලයක් තුළදී මේ තරමින් හෝ ත්‍රස්තවාදී ක්‍රියාවල සුලමුල සොයාගැනීමටත් වරදකරුවන් විශාල ප්‍රමාණයක් හඳුනාගැනීමටත් හැකියාවක් ලැබෙන්නේ නැත. නමුත් මේ තත්ත්වය ඇතුළේ සිදුවන දේශපාලන ගේම් හේතුවෙන් සියල්ල වෙනස් වී යාමට ඉඩ තිබේ. දැනට වුවද බරපතළ චෝදනා සහ සැක එල්ල වී තිබෙන රජයට සම්බන්ධ මැති ඇමැතින්ගෙන් කිසිදු ආකාරයක ප්‍රකාශයක් හෝ සටහන් කර ගැනීමට ක්‍රියා නොකිරීම ජනතාව අතර ප්‍රබල කතිකාවක් ඇතිකර තිබේ. කාදිනල්තුමා පවසන තමාට සෑහීමකට පත්විය නොහැකි ආරක්ෂක තත්ත්වය පිළිබඳ ප්‍රකාශයට මෙයද හේතුවක් වීමට හොඳටම ඉඩ තිබේ. එවැනි තත්ත්වයක් රට තුළ පැවතීම අනාගතයට කෙරෙන අනතුරු ඇඟවීමක් බව පැහැදිලිය.
ත්‍රස්තවාදී පුහුණුව ලබා මෙරටට පැමිණෙන පුද්ගලයන් අත්අඩංගුවට ගැනීමට හෝ මේ රට තුළ සිදුවන ඇතැම් ත්‍රස්ත ක්‍රියාවලට සැක සහිත පුද්ගලයන් අත්අඩංගුවට ගැනීමට හෝ නීති රීති ප්‍රමාණවත් නැතැයි යන්න ද කාදිනල්තුමා විසින් ප්‍රතික්ෂේප කර තිබිණි. එතුමන් පවසන්නේ දැනට පවතින නීති රටේ ආරක්ෂාව සම්බන්ධ කටයුතුවලදී ප්‍රමාණවත් බවය. අවශ්‍ය දේ සිදුනොකර මේ තත්ත්වය ඇතුළේත් දේශපාලන වාසි ගැනීම, ජනතාව මර්දනය කිරීම්, ඡන්ද කුට්ටි කඩාගත හැකි තම තමන්ගේ දේශපාලන හිතවතුන් රැකගැනීම වැනි කරුණු ජාතික ආරක්ෂාවට වඩා වැදගත් කොට සැලකීම ඉදිරියේ දී බරපතළ ප්‍රතිවිපාක ඇති කිරීමට හේතුවනු ඇතැයි යන අනතුරු ඇඟවීම කාදිනල්තුමාගේ ප්‍රකාශවල ගැබ් වී තිබෙන බව අපට නම් හොඳින්ම පෙනේ. ඒ බව නොපෙනෙන දේශපාලනඥයන් සිටී නම් ඒ සිටින්නේ බොරැවට ඇස් වසාගෙන බවද පෙන්වා දීමට කැමැත්තෙමු.
