ඇත්ත කියන්න හැබැයි බයකරන්න එපා
පාසල් විවෘතය. එහෙත් සිසුන් නැත. කොළඹ මංමාවත් තවමත් සුපුරුදු මාර ට්‍රැෆික් තත්ත්වයට පැමිණ නැත. කොළඹ නගරය තුළට ඇතුළු වන වාහන සංඛ්‍යාවේ කැපීපෙනෙන අඩුවක් තිබීම ඊට හේතුවයි. රජයේ කාර්යාල, ආයතන, පෞද්ගලික සමාගම්, ආයතන තුළ වැඩ කිරීමේ තත්ත්වය යථා තත්ත්වයට පැමිණ නැති බවට සලකුණු බොහෝය. මේ සියලු ආයතනවල ප්‍රධාන මාතෘකාව තවමත් එකම පොදු කාරණයකට සීමා වී ඇත. නිලධාරීන් සේවක සේවිකාවන් වෙලාගෙන තිබෙන අවිනිශ්චිත බව, නොසන්සුන්කම තවමත් දකින්නට තිබේ. මේ තත්ත්වය තවදුරටත් පැවැතිය යුතුද? නැත. කිසිසේත්ම නැත. මේ අවිනිශ්චිතකම දුරලා සාමාන්‍ය තත්ත්වයට රට යළි හැකි ඉක්මනින් පැමිණිය යුතුය. එහෙත් ඒ සඳහා සපුරා තිබිය යුතු එක් කොන්දේසියක් වෙයි. රටේත් ජනතාවගේත් ආරක්ෂාව තහවුරු කිරීමය.
ආරක්ෂාව තහවුරැ වී ඇති බවට සහතිකය ලබාදිය හැක්කේ ආණ්ඩුව පමණි. ආණ්ඩුවේ අණ පරිදි ක්‍රියාත්මක ආරක්ෂක හමුදා, පොලීසිය සහ එස්.ටී.එස්. බලකාය එකතුව ඔවුන්ගේ රාජකාරිය අකුරටම ඉටුකරමින් සිටිති. එහි ප්‍රතිඵල මේ වනවිට හොඳින්ම දැකගත හැකිය. මරාගෙන මැරෙන බෝම්බකරුවන් ඇතුළු ත්‍රස්ත ක්‍රියා පිළිබඳ සැක සහිත පුද්ගලයෝ රාශියක් අත්අඩංගුවට ගනු ලැබ සිටිති. මරාගෙන මැරෙන පුහුණු පන්ති පැවැත්වූ බව කියන නිවෙස්, පුපුරණ ද්‍රව්‍ය සහ ඒවා සඟවා තබාගෙන සිටි පුද්ගලයන්, ත්‍රස්ත ක්‍රියා සඳහා ආරක්ෂක මධ්‍යස්ථාන වශයෙන් යොදවාගෙන තිබූ ඉඩම්, වතු සහ දේපොළ, මේ බොහෝ භාණ්ඩ සහ පුද්ගලයන් අත්අඩංගුවට ගත හැකි වූයේ ආරක්ෂක හමුදා සහ පොලීසිය මගින් සිදුකරන ලද මෙහෙයුම්වල ප්‍රතිඵල වශයෙනි.
එවැනි සාර්ථක වැටලීම් සිදුකිරීමට අවශ්‍ය තොරතුරැ සෑහෙන ප්‍රමාණයක් අන්තවාදී ක්‍රියාවලට එරෙහි මුස්ලිම් ජනතාව තුළින්ම ලැබුණු බව සඳහන් වීමද සතුටට කරැණකි. ආගමික අන්තවාදය කරපින්නා ගත් ත්‍රස්තවාදීන් තමන්ගේ ආගමට හෝ ඇදහීමට විරැද්ධ වන ඕනෑම පුද්ගලයකු මරාදැමිය යුතු සතුරකු වශයෙන් දකින බව මේ සියලු දෙනා විසින්ම අවබෝධ කරගත යුතුය. එවැනි ආගමික අන්තවාදී කල්ලි මුලිනුපුටා දමන තුරු මේ ප්‍රශ්නයෙන් ගැලවීමක් නැත. මේ අවස්ථාවේ දී ඒ සඳහා වඩාත්ම අවශ්‍ය වන්නේ අන්තවාදයට හිස නොනමන, ශ්‍රී ලංකාවට, ශ්‍රී ලංකාවේ ජනතාවට ආදරය කරන ඔවුන් සමඟ සහයෝගයෙන් කටයුතු කිරීමට කැමැත්ත දක්වන මුස්ලිම් ජනතාවගේ සහයෝගයයි. එම සහාය මේ රටේ ආරක්ෂාවට ඉතාම වැදගත් සාධකයක් බව පෙන්වා දිය යුතුය. අන්තවාදී මුස්ලිම් සුළු පිරිසෙන් සෙසු මුස්ලිම් ජනතාව වෙන්කොට හඳුනා ගැනීම අවශ්‍යය.
ත්‍රිවිධ හමුදා, පොලීසිය, එස්.ටී.එෆ්. පමණක් නොව අපගේ බුද්ධි අංශ නිලධාරීන්ට ද ඔවුන් මෙතෙක් පෙන්වා ඇති ත්‍රස්ත මර්දන කටයුතුවල ඵලදායී, කාර්යක්ෂම සාර්ථකත්වය සම්බන්ධයෙන් අප සියලු දෙනාගේම ප්‍රණාමය හිමිවෙයි. ඔවුන්ට තම මෙහෙයුම් කටයුතු සාර්ථකව ඉටුකළ හැකි වන්නේ සියලු දෙනා නිහඬ වන පරිසරයක් තුළ නොවේ. සියලු දෙනා විසින් අවශ්‍ය තොරතුරැ ලබාදීමෙන් දක්වන සහාය වැදගත්ම සාධකයයි.
එවැනි තොරතුරැවලට ක්ෂණිකව ප්‍රතිචාර දැක්වීමෙන් ලබාගත හැකි ප්‍රතිඵල සම්මන්තුරේ සයින්දමරැදු ප්‍රදේශයේ සහ කල්මුණේ ප්‍රදේශයේ වැටලීම්වලින් පෙනී ගියේය. විශාල පිරිසකට මරණය ගෙන දීමට කැසකවමින් සිටි පිරිසක් සහ බෝම්බ තොගයක් සමඟ එම පිරිසටම තමන්ගේ පවුලේ සාමාජිකයන් මරාගෙන මැරෙන්නට සිදු වූයේ පොලිස් කොස්තාපල්වරයකු ප්‍රදේශවාසී මුස්ලිම් ජාතිකයන් කිහිප දෙනකුගෙන් ලද තොරතුරක් ඔස්සේ ක්ෂණිකව ක්‍රියාත්මක වීමෙනි.
මේ කරුණු කෙසේ වුවද ආරක්ෂක හමුදා, පොලීසිය සහ රටේ සාමාන්‍ය ජනතාව ක්‍රියා කරන තරම් ඕනෑකමකින් සහ වගකීමකින් අපේ දේශපාලන නායකයන් ක්‍රියා කරනවාද යන සැකය මතුවෙමින් තිබේ. ජාතික ආරක්ෂාව පිළිබඳව පාර්ලිමේන්තුවේ පැවැති විවාදයේ දී ෆීල්ඩ් මාර්ෂල් සරත් ෆොන්සේකා කියා තිබුණේ තමන් බලධාරියා නම් පාසල් විවෘත කිරීමට දැන්ම ඉඩ නොදෙන බවය. එසේම ඉදිරි දින කිහිපයක් තුළ සිදුවිය හැකි බෝම්බ ප්‍රහාර ගණනාවක් පිළිබඳව ලැබුණු තොරතුරු ද ඔහු හෙළි කළේය. මෙවැනි තොරතුරක් ලැබුණා නම් ඒ පිළිබඳව ක්‍රියා කළ යුත්තේ මීට වඩා වගකීමක් සහිතව බව අපගේ විශ්වාසයයි. විශේෂයෙන් විවෘත කළත් වැසූ තත්ත්වයේ පවතින පාසල් පද්ධතිය යළි සක්‍රීය කිරීමට උත්සාහ දැරෙන පසුබිමක දෙමාපියන් සහ දූ දරැවන් තුළ අනවශ්‍ය ලෙස බිය සහ සැකය වැඩෙන ප්‍රකාශ සිදුකිරීම යහපත් දෙයක් නොවන පෙන්වා දිය යුතුය.
පාසල්වලට යළි සිසු දරැවන් එනවා නම් ඔවුන්ට උපරිම ආරක්ෂාව ලබාදිය යුතු බවට විවාදයක් නැත. එහෙත් පාසල් කවදාවත් විවෘත කළ නොහැකි මට්ටමේ ප්‍රකාශ සිදුකිරීම ඊට පිළිතුරක් නොවේ. ත්‍රස්තවාදීන්ගේ එක් උපක්‍රමයක් වන්නේ ජනතාවගේ සිත් බියෙන් සහ සැකයෙන් පුරවා දැමීමය. එය ඔවුන් සලකන්නේ තමන්ගේ ජයග්‍රහණයක් වශයෙනි. ඒවාට උඩගෙඩි දෙන කතාබස් සහ ක්‍රියාවලීන් වැළැක්වීමේ ආදර්ශය ලැබිය යුත්තේ දේශපාලන නායකයන්ගෙනි.
එසේම ජාතික ආරක්ෂාව විහිළුවකට ගන්නා ඇතැම් &මෝඩ චූන්* කාරයන් ද අපේ රටේ හිඟ නැත. ෆේස්බුකිය මෙවැනි පුද්ගලයන්ට රජදහනක් වී ඇති සැටියක් පෙනේ. බොහෝ දෙනකු වගකීමකින් ෆේස්බුකියේ කටයුතු කළ ද කිහිප දෙනකු විසින් රට වඩාත් අවුල් කරන ව්‍යාපාරයක් ඒ තුළින් ගෙන යන බවට ද චෝදනා එල්ල වෙමින් තිබේ. බෝම්බ පිපිරීමෙන් &ආතල්* ගන්නා මිනිසුන් සිටින රටක් ගැන මීට පෙර අප නම් අසා නැත.
අප සියලු දෙනාම උත්සාහ දැරිය යුත්තේ මේ පවතින තත්ත්වයෙන් ගොඩ ඒමටය. රටේ ආරක්ෂාව තහවුරු කර ගනිමින් රට සාමාන්‍ය තත්ත්වයට හැකි ඉක්මනින් ළඟාකර ගැනීමටය. ඒ සඳහා ඉහළම ආදර්ශය සැපයිය යුත්තේ දේශපාලන නායකත්වයෙන් බවට කතා දෙකක් නැත. මේ සමඟ පැවසිය යුත්තේ ඉතාම සක්‍රීය සමාජ මාධ්‍ය ජාලයක් පවතිද්දී අල්ලාගන්නා කඩු සහ පිහි මාධ්‍ය ඔස්සේ ප්‍රදර්ශනයට පනවා ඇති වාරණය ප්‍රායෝගික නොවන බවය. එය ජනතාව තුළ සැක - බිය වැඩි කරවන පියවරක් වීමට ද ඉඩ තිබේ.
