සහරාන් හොල්මං නවත්වමු
සහරාන් කල්ලියේ හොල්මං කිරීම් තවම අවසන් වී නොතිබීම ගැන නොයෙකුත් කතා තවමත් වරින්වර අසන්නට ලැබෙයි. ඔහුගේ සමීප ඥාතීහු රටේ විවිධ ප්‍රදේශවලදී අත්අඩංගුවට පත්වෙති. සැක සහිත බැංකු ගනුදෙනු, ලොවේ විවිධ රටවලින් විවිධ සංවිධානවලට ඩොලර්, පවුම් පොම්ප කරනු ලැබීම්, අන්තවාදී අදහස් ප්‍රචාරයට ඉඩ සැලසෙන ඉගැන්වීම් ගැන කතා තවම ඉවර නැත. ඒ අතර සහරාන්ගෙන් අවි පුහුණුව ලද තවත් අන්තවාදී කල්ලි සාමාජික පිරිසක් ද පසුගිය දිනවල අත්අඩංගුවට ගනු ලැබූහ. ඒ අතර රටේ සියලුම දෙනා එකම නීතියකට අනුගත විය යුතු බවටත් සෙසු ජනවර්ග සහ ආගම්වලින් වෙනස් බව පෙන්නුම් කරන නීති වෙනස් කළ යුතු බවටත් රට තුළින් නැගුණු හඬ යටපත් වී මුස්ලිම් නීති වෙනස් නොකළ යුතු බවට වන අන්තගාමී හඬ යළි ඉස්මතු වෙමින් තිබෙන බවත් පෙනෙන්නට තිබේ. මේ තත්ත්වය කාගේත් අවධානයට යොමු විය යුතුය.
පාස්කු ඉරිදා බෝම්බ ප්‍රහාරයට ජාත්‍යන්තර අයි.එස්. ත්‍රස්තවාදයේ ලේබලයද අලවා තිබේ. ඊට අමතරව වෙනත් ජාත්‍යන්තර උසිගැන්වීම් තිබුණු බවට ද චෝදනා එල්ල විය. මේ අතර බෝම්බ ප්‍රහාරයට සෘජුවම සම්බන්ධ බවට තොරතුරු හෙළි වී තිබූ නොමැරී සිටි සියලු දෙනා අත්අඩංගුවට ගනු ලැබූ බවට සඳහන් වුවත් තවමත් වරින් වර ඊට සම්බන්ධ පිරිස් ගැන තොරතුරු ලැබේ. මරාගෙන මැරුණු පිරිස සහරාන් කල්ලියේ ක්‍රීම් එක වශයෙන් සලකනු ලැබුවද එවැනි පිරිස් යළි බිහිවීම වැළැක්වීමට අවශ්‍ය සියලු ආරක්ෂක පියවර ගැනීම්ද මේ සමඟම සිදුවිය යුතුය. එය අද හෙට අවසන් වන කාර්යයක් නොවිය යුතුය. ඒ ගැන රටේ ජනතාවගේ අවධානය ගිලිහී යාමට ඉඩ නොතැබීම බලධාරීන්ගේ වගකීමක් බවද පෙන්වා දීමට කැමැත්තෙමු.
පාස්කු ඉරිදා ප්‍රහාරය ගැන කරැණු සොයන පාර්ලිමේන්තු විශේෂ කාරක සභාවේදී මේ සම්බන්ධව බොහෝ තොරතුරු අනාවරණය වෙමින් තිබේ. එහිදී වරක් ෆීල්ඩ් මාෂල් සරත් ෆොන්සේකා ප්‍රකාශ කළේ සහරාන් කල්ලියේ ත්‍රස්තවාදය අවසන් යැයි සිතීම මුළාවක් බවය. මේ රට තුළ ත්‍රස්ත කල්ලිවල ක්‍රියාකාරීත්වය සහ ඒවා මර්දනය කිරීම සම්බන්ධයෙන් සරත් ෆොන්සේකා මහතා සතු දැනුම සහ අවබෝධය ගැන කිසිවකුටවත් අභියෝග කළ නොහැක. ත්‍රස්තවාදය සම්බන්ධයෙන් ඔහු සිදු කරන ප්‍රකාශ ගැන රටේ ආරක්ෂාව භාරව කටයුතු කරන සියලු දෙනාගේ අවධානය යොමු වීම අවශ්‍යය. ඒ ගැන නිසි පියවර ගැනීමත් අවශ්‍යය.
ඕනෑම ත්‍රස්තවාදී කල්ලියක හෝ සංවිධානයක හෝ ස්වභාවය වන්නේ එක් තැනකින් එය මර්දනය කළත් බරපතළ පිළිකාවක් මෙන් තවත් තැනකින් වෙනත් ස්වරෑපයකින් එය මතුවීමට ඉඩකඩ තිබීමය. පිළිකාවක් වළක්වා ගැනීමට වඩා එය මර්දනය කිරීම අපහසුය.
සහරාන් කල්ලියේ පිළිකාව ද කාත්තන්කුඩියෙන් අවසන් වුවත් රටේ වෙනත් ප්‍රදේශයකින් මතුවීමට තිබෙන ඉඩකඩ ගැන ප්‍රමාණවත් අවධානයක් දැක්විය යුත්තේ එබැවිනි. මේ ගැන අග්‍රාමාත්‍ය රනිල් වික්‍රමසිංහ මහතා පාර්ලිමේන්තු විශේෂ කාරක සභාව හමුවේ ප්‍රකාශ කර තිබුණේ සහරාන් සමඟ තේ බීපු කෙනාගේ සිට සියලු දෙනා අත්අඩංගුවට ගතයුතු බවය. ඒ ගැන විවාදයක් නැත. එහෙත් ඒ සමඟ කිවයුතු වන්නේ සහරාන්ලා සමඟ ප්‍රසිද්ධියේ හෝ අප්‍රසිද්ධියේ හෝ ගනුදෙනු කළ සියලු දේශපාලනඥයන් සම්බන්ධයෙන් ද සියලු තොරතුරැ හෙළිකර ගැනීම අවශ්‍ය බවය. ඔවුන්ට එරෙහිව චෝදනා තිබේනම් ඒ සියල්ල ගැන රටේ සියලු දෙනාටම සෑහීමකට පත්වන ආකාරයට විමර්ශනය කිරීම අවශ්‍යය. දේශපාලන හේතු මත ඔවුන් සියලු චෝදනාවලින් නිදහස් කිරීම ත්‍රස්තවාදයට අතවැනීමක් විය හැකිය. මේ පිළිබඳ වැරදිකරුවන් සොයා ඔවුන් අධිකරණය ඉදිරියට පැමිණවීම සඳහා ස්වාධීන කොමිෂන් සභාවක් පිහිටුවන්නැයි විපක්ෂ නායක මහින්ද රාජපක්ෂ මහතා කර ඇති ඉල්ලීම ද ඉතා වැදගත් වන්නේ එබැවිනි.
සහරාන්ලාට රට තුළ බෝම්බ වැළක් පුපුරුවා හැරීමට ගතවූයේ විනාඩි කිහිපයකි. එහෙත් ඒ සඳහා ඔවුන්ගේ සූදානම වසර කිහිපයක් තිස්සේ සිදුවිය. ඒ ගැන රටේ ආරක්ෂක අංශවලට තොරතුරු ලැබී තිබුණු බවත් සහරාන් අත්අඩංගුවට ගැනීමට වරෙන්තු ගණනාවක් නිකුත් කර තිබූ බවත් සඳහන් වෙයි. ඒ කාලයේ ඔහු ත්‍රස්ත පුහුණු කඳවුරැ පවා පවත්වාගෙන ගොස් තිබිණි. ඔහුගේ සගයන් කිසියම් විනාශකාරී ක්‍රියාවකට පෙළගැසෙන බවත් ඒ ගැන අනාවැකි පළකරමින් ත්‍රස්ත ක්‍රියා කිහිපයක් සිදු වූ බවත් ඒ කාලයේම සියලු දෙනා දැන සිටියහ. එහෙත් ඔවුන් පිළිබඳ පරීක්ෂණ සිදු කර සියලු තොරතුරු හෙළිදරව් කරගෙන ඔවුන් අත්අඩංගුවට ගැනීමට ක්‍රියාකර නැත. ඒ නිසා මේ විනාශකාරී ක්‍රියාව නවත්වා ගැනීමට තිබූ අවස්තාව මගහැරී යාම රටේ ආරක්ෂාවේ ඛේදවාචකයකි.
මෙතරම් හොඳින් ක්‍රියාත්මක ආරක්ෂක සේවාවක් ඇති අපේ රටේ එවැනි ආරක්ෂක හිඩැසක් ඇති වූයේ කෙසේදැයි හෙළිකර ගැනීම අත්‍යවශ්‍ය කරැණකි. එය අනාගතයේදී යළිත් මෙවැනි ඛේදවාචකයක් ඇතිවීම වළක්වා ගැනීමට උපකාරයක් වනු ඇත. දැන් රටේ තැනින් තැන සුළු වශයෙන් හෝ සිදුවන අන්තවාදී ක්‍රියාවන්ට සම්බන්ධ සිදුවීම් ගැන දැඩි අවධානයකින් යුතුව කටයුතු කිරීම ඒ සමඟ අත්‍යවශ්‍ය බවත් යළිත් පෙන්වා දීමට කැමැත්තෙමු.
ත්‍රස්තවාදයෙන් විනාශ වන්නේ එම ත්‍රස්ත කල්ලි විසින් ඉලක්ක කරන පිරිස පමණක් නොවේ. එම ත්‍රස්ත කල්ලි පමණක් නොව රට ද එයින් විනාශ වීම සිදුවෙයි. මේ සඳහා ශ්‍රී ලාංකික අපට තරම් වෙනත් කිසිම රටකට අත්දැකීම් නැත. එම අත්දැකීම්වලින් නිසි ප්‍රයෝජන නොගතහොත් අනාගතයේදී මීට වඩා භයානක ත්‍රස්තවාදයකට මුහුණ දීමට සිදුවනු ඇත. නමුත් අපේ රටේ එතරම් අවාසනාවන්ත යැයි අපි කිසිසේත් නොසිතමු.