සල්ලි බෙදන ආණ්ඩුකාරයෝ!
ලංකාව දන්සල් ගැන කප් ගැසූ රටකි. එහි හොඳ පැත්තක් තිබේ. එය ලෝක ප්‍රසිද්ධය. නරක පැත්තක්ද තිබේ. එය අප්‍රසිද්ධය. හොඳ පැත්තට අනුව ලංකාව තරම් ආහාර පාන දන් දෙන වෙනත් රටක් ලෝකයේම නැති බව කියැවෙයි. වෙසක් පොහොයට, පොසොන් පොහොයට පමණක් නොව හැම මාසෙකම පුරපසළොස්වක පොහෝ දිනවලත් දැන් දන්සල් දෙනු දැකිය හැක. නරක පැත්ත දේශපාලනඥයන්ගෙනි. ඡන්ද කාලය ළංවෙනවිට හෝල් සේල් එකේ විවිධ දන්සල් දෙන දේශපාලනඥයෝ වෙති. එහි එකම අරමුණ පින් රුස්කිරීම නොව ඡන්ද රුස්කිරීමය. කෑම බීම පමණක් නොව වතුර මෝටර්, පුටු, මේස පමණක් නොව කැති උදලු පවා දන්දෙනු ලැබේ. එ පමණද? නැත. සල්ලි පවා දන් දෙන දේශපාලනඥයෝ වෙති.
අපේ මේ පූර්විකාව ලිව්වේ එවැනි සල්ලි දන්සලක් පිළිබඳව අලුතෙන්ම අසන්නට ලැබුණු පුවතක් හේතුවෙනි. ඒ සඳහා මුල පුරා ඇත්තේ දකුණේ පළාත් ආණ්ඩුකාරතුමාය. එතුමා මේ තනතුරට පත්වී තවම වැඩිකලක් නැත. දාම් ලෑල්ලක ඉත්තන් එහාට මෙහාට කරන්නාක් මෙන් ආණ්ඩුකාරවරුන් මාරු කළ අවස්ථාවේ ඇති වූ පුරප්පාඩුවකට දකුණේ ආණ්ඩුකාරවරයා වශයෙන් හේමාල් ගුණසේකර මහතා පත්කරනු ලැබීය. එම පත්වීම ව්‍යවස්ථානුකූලව සිදුකරනු ලැබුවේ ජනාධිපති මෛත්‍රීපාල සිරිසේන මහතා විසිනි. හේමාල් ගුණසේකර මහතා සල්ලි දන්සල ජනාධිපතිවරයා ඉදිරියේදීම ක්‍රියාත්මක කරනු ලැබුවේ ඊට කෘතගුණ සැලකීමක් වශයෙන් දැයි අපි නොදනිමු. එහෙත් එතැන එසේ සිදුවිය.
දකුණු පළාත් ආණ්ඩුකාරවරයාගේ මේ සල්ලි දන්සල පොදු මහජනතාවට විවෘතවූවක් නොවේ. පොදු ජනතාවට සල්ලි බෙදාදීමේ වරදක් නැතැයි අපි එයින් අදහස් නොකරමු. දේශපාලන වාසි බලාගෙන අනුන්ගේ එකවුන්ට්වලින් ජනතාවට වුවද සල්ලි බෙදාදීම වරදකි. එසේ වුවද තමන්ගේ සල්ලි ප්‍රදේශයේ සැබෑ දිළිඳු ජනතාවට බෙදාදීම ගැන කාටවත් දොසක් කිවනොහැක. එසේ වුවද එයද ඡන්ද වාසි බලාගෙන සිදුකරන්නේ නම් එතැන සිදුවන්නේ යහපත් චේතනාවෙන් දන් දීමක් නොවේ. ඡන්ද දූෂණයකි. එය බලවත් වරදකි.
අදාළ සල්ලි බෙදීම සිදුව තිබෙන්නේ වැලිගම පිහිටි දකුණු පළාත් ආණ්ඩුකාරවරයාගේ නිවෙසේදීය. දකුණු පළාත් උපාධිධාරීන්ට ගුරුපත්වීම් ලබාදීමේ උත්සවයක් වැලිගම නගරයේදී පවත්වා තිබූ අතර එහි ප්‍රධාන අමුත්තා වශයෙන් සහභාගී වී සිටියේ ජනාධිපති මෛත්‍රීපාල සිරිසේන මහතාය. උත්සවයෙන් පසුව ආණ්ඩුකාර නිවෙසට ගිය ජනාධිපතිවරයා එහි සිටියදී දකුණු පළාතේ සියලුම ශ්‍රීලනිප ආසන සංවිධායකවරැන්ට රුපියල් ලක්ෂ 05 බැගින් ද ප්‍රාදේශීය සභා මන්ත්‍රීවරුන්ට රුපියල් ලක්ෂය බැගින් ද ආණ්ඩුකාරවරයා අත දිගහැර බෙදාදී ඇත්තේ එහි මුල් චෙක්පත් තුන ජනාධිපතිවරයා ලවා පිරිනැමීමෙන් පසුවය. මෙම සල්ලි දන්සලට මුදල් දකුණු පළාත් සභාවේ සංවර්ධන අරමුදලින් ලබාගෙන ඇති බවද සඳහන් විය.
ආණ්ඩුකාරවරයකු යනු මහජන ඡන්දයෙන් පත්වූවෙක් නොවේ. තමන්ගේ නියෝජිතයා වශයෙන් ජනාධිපතිවරයා විසින් පත්කරනු ලබන්නෙකි. ආණ්ඩුකාරවරයකුගේ කාර්යභාරය වන්නේ පළාත් සභාව අක්‍රීය වී ඇති අවස්ථාවක එම පළාත් සභාවේ දෛනික පරිපාලන කටයුතු අකර්මණ්‍ය වීමට ඉඩ නොදී එය පවත්වාගෙන යාමට අවශ්‍ය පියවර ගැනීමය. එසේ තිබියදී පළාත් සභාව සතු අරමුදල් තමන්ට රිසිසේ තමන්ගේ පක්ෂ සංවිධායකවරැන්ට හෝ ප්‍රාදේශීය සභා මන්ත්‍රීවරුන්ට හෝ වෙනත් කිසිම පුද්ගලයකුට හෝ බෙදාදීමට අයිතියක් ආණ්ඩුකාරවරයකුට තිබිය නොහැක. පළාත් සභාවක අරමුදල් ගොඩනැගෙන්නේ ආණ්ඩුකාරවරැන්ගේ පෞද්ගලික මුදල්වලින් නොවේ. පළාතේ පොදු මහජනතාවගේ බදු මුදලිනි. මහජනතාව සතු බදු මුදල් මෙසේ තමාගේ පක්ෂයේ සංවිධායකවරුන්ට බෙදාදීම බරපතළ මුදල් අවභාවිතයක් වශයෙන් සැලකිය හැකිය. පළාත් සභාව විසිර වී අක්‍රීය වී තිබෙන තත්ත්වයක් තුළ එහි අරමුදල් පාක්ෂිකයන්ට බෙදාදීම සිදුකළේ කවර නීතියක් යටතේද යන්න ඔහු රටට පැහැදිලි කළ යුතුය. මේ මුදල් බෙදාදුන්නේ පළාතේ සංවර්ධන වැඩ ඉක්මන් කිරීමට වැනි තේරුමක් නැති නිදහසට කාරණා ඕනෑ තරම් ප්‍රකාශ වෙනු ඇත. එහෙත් රුපියල් ලක්ෂයකින් තබා ලක්ෂ 05කින් හෝ සංවර්ධනයට සිදුකළ හැකි කෙංගෙඩියක් නැති බව නොදන්නා කෙනකු නැත. මේ ලක්ෂ ගණන් ලබාදීමේ සැබෑ හේතුව වටහා ගැනීමට ජනතාවට අපහසුවක් ද නැත. අනෙක් අතට දකුණේ සංවර්ධන අරමුදල එක පක්ෂයක සංවිධායකවරුන්ට හා මන්ත්‍රීවරුන්ට බෙදාදීමේ නීතියක් ඇත්තේ කොහේ දැයි වහාම සොයා බැලීමද අවශ්‍යය.
එක පළාතක පමණක් ආසන සංවිධායකවරුන්ට සහ ප්‍රාදේශීය සභා මන්ත්‍රීවරුන්ට රටේ ජනතාව සතු මුදල් බෙදාදීමේ වැරැද්ද දකුණු පළාත් ආණ්ඩුකාරවරයාට නොතේරෙයි නම් ඒ බව වටහාදීමට ජනාධිපතිවරයාට හැකියාවක් තිබිණි. එය එසේ සිදුවීදැයි අපි නොදනිමු. සමහර විට ජනාධිපතිවරයා ඉදිරියේ වීරයකු වීමට ආණ්ඩුකාර හේමාල් ගුණසේකර මහතාට අවශ්‍යතාවයක් තිබුණද විය හැකිය. අවශ්‍යතාවය කුමක් වුවද එය ඉටුකරගැනීමට ඔහු යොදවා ගෙන ඇත්තේ වැරදි පිළිවෙතකි. මේ වැරදි පිළිවෙත සෙසු ආණ්ඩුකාරවරුන්ටත් බෝවුණොත් ඒ ඒ පළාත්වල මහජනතාවගේ බදු මුදල්වලට අබ සරණය.
