අකාලයේ වැටෙන පොරොන්දු වැස්ස!
මැතිවරණ සහ පොරොන්දු ගහට පොත්ත මෙනි. පොරොන්දු නැතිව මැතිවරණයක් තිබිය නොහැක. මැතිවරණයක් ඇත්තේ කොතැනද එතැන පොරොන්දු විමානයකි. මැතිවරණ කාලයේදී මහජනතාවගේ වැඩිපුරම බැණුමට ලක්වෙන වචනයක් ඇත්නම් ඒ පොරොන්දුය. කොතරම් බැන්නත් රටේ ජනතාවත් පොරොන්දු නැති මැතිවරණයක් කවදාවත් බලාපොරොත්තු වන්නේ නැත. බැණ බැණ අහවලා මොනවද දෙනවා කියන්නේ යැයි අසා විමසා බලන සිරිතෙන් ඔවුන් කවදාවත් මිදෙන්නේ නැත.
ඡන්ද කාලෙදි දෙන බොහොමයක් පොරොන්දු හරියට ලව් කරන කාලෙදි කොල්ලා කෙල්ලටත් කෙල්ල කොල්ලාටත් දෙන පොරොන්දුවලට දෙවැනි නැත. අහගෙන සිටින විට හරිම මිහිරිය. ඒවා ඉටුවෙනවා නම් ජීවිතේ දිව්‍ය ලෝකයක් වන තරමට වටින බව සිතට දැනෙයි. එහෙත් ඒ පොරොන්දු සැබෑ ජීවිතයේදී ඉටුවෙන්නේ ඉතාම කලාතුරකිනි. එවැනි කලාතුරකින් ඉටුවන ඡන්ද පොරොන්දු ද තිබෙන බවත් සඳහන් කරමු. නමුත් බොහොමයක් පොරොන්දු කවදාවත් ඉටුකෙරෙන්නේ නැත. ඒවා ඉටුකිරීම ද කළ නොහැකිය. ඉටුකළ නොහැකි පොරොන්දු ලබා නොදිය යුතු බව කීමට අපි මේ සටහන තබන්නෙමු
අපේ රට, ලෝකය තාක්ෂණික වශයෙන් දියුණු නොවූ කාලයක නම් ඉටුකළ නොහැකි ඡන්ද පොරොන්දු කෙරෙහි යම්තාක් දුරකට ජනතාවගේ විශ්වාසය රඳවාගත හැකිය. &හඳෙන් හෝ ගෙනැත් හාල් බෙදන කතාත් සියලු දෙනාට සතියකට ධාන්‍ය රාත්තල් 08ක් ලබාදෙන කතාත් අපට ඇසුණේ එවැනි යුගවලදීය. එහෙත් මෙවැනි කඩවෙන පොරොන්දු දැන් යුගයට වලංගු නැත. නමුත් තවමත් ඉටුකිරීමට ප්‍රායෝගිකව අපහසු පොරොන්දු දෙන බව අසන්නට ලැබේ. එවැනි පොරොන්දු පිළිබඳව මහජනතාව තුළද කිසියම් විවේචනයක් තිබෙන බව ඒ පොරොන්දු ලබාදෙන අපේක්ෂකයන් දැන සිටීම අවශ්‍යය. පොරොන්දු ලබාදෙන අවස්ථාවේ කන් බිහිරි වන අත්පොළසන්, ඔල්වරසන් නැගුණත් වේදිකාවේ සිදුකෙරෙන කතා අසාගෙන නිවෙස්වලට යන බොහොමයක් දෙනා ඉටුකළ නොහැකි පොරොන්දු පහසුවෙන් හඳුනාගන්නා බව අමතක නොකළ යුතුය. පෙර කලදී මෙන් නොව මේ යුගයේදී ජනතාව බොහොමයක් පොරොන්දු පිළිබඳව ගණන් හදති. කිරා මැන බලති. මේවා කොහේ කරන්ද බොරැවට කෑගැහැව්වට කියා ඉන්පසුව ඒවා හිතෙන් අතහැර දමති. මෙවර ජනාධිපතිවරණයේ අපේක්ෂකයන් විසින් ජනතාව රුවටීමට ලක් කරන එවැනි පොරොන්දු ලබාදීමෙන් වැළකී සිටීම යහපත් බව සඳහන් කරනු කැමැත්තෙමු.
ආර්ථිකමය වශයෙන් සැලකුවහොත් අපේ රට ඉන්නේ ඉතාම අමාරැ අඩියක බව යථාර්ථයයි. ආසියානු සංවර්ධන බැංකුවේ නිර්ණායකය අනුව ආර්ථික වර්ධනය අතින් ශ්‍රී ලංකාව සිටින්නේ දකුණු ආසියාවේ අන්තිමටය. කොටින්ම ඇෆ්ගනිස්ථානයටත් පහළිනි. එවැනි තත්ත්වයක් පවතිද්දී එකවරම අලුත් නායකයකු ආ පමණින් රටේ ආර්ථිකය පිම්මේ වර්ධනයක් වනු ඇතැයි බලාපොරොත්තු වීම මෝඩකමකි. කුමන පොරොන්දුව ලබාදුන්න ද එය පවතින යථාර්ථය සමඟ ගලවා ගැනීමට හැකි විය යුතුය. එසේ නැතිනම් එවැනි පොරොන්දුවක තිබෙන විශ්වසනීයභාවය රටේ ජනතාව විසින් ප්‍රශ්න කෙරෙනු ඇත. විශේෂයෙන් රටේ උගත් තරුණ පරපුර තමන්ට විශ්වාස කළ නොහැකි පොරොන්දු අවඥාවෙන් බැහැර කරන තත්ත්වයක් උද්ගත වී තිබේ. කාලාන්තරයක් තිස්සේ පැවැති ඡන්දවලදී ඉටුකළ නොහැකි පොරොන්දු ලබාදීමේ ප්‍රතිඵලය එයයි.
මෙවර ඡන්දයට අපේක්ෂකයන් 35 දෙනකු ඉදිරිපත් වී සිටියද සටන ඇත්තේ ගෝඨාභය රාජපක්ෂ සහ සජිත් ප්‍රේමදාස අතරය. මේ හේතුවෙන් එම දෙදෙනාත් ඊට අමතරව අනුර කුමාර දිසානායකත් තමන් හමුවේ තබන පොරොන්දු පිළිබඳව ජනතාව වැඩියෙන් සැලකිල්ල දැක්වීම බලාපොරොත්තු විය යුතුය. මේ තිදෙනාම අපේක්ෂකයන් වශයෙන් අලුත් මුහුණු වුවද ප්‍රධාන දේශපාලන ධාරාව තුළ කාලයක් තිස්සේ ක්‍රියාත්මකව සිටියෝ වෙති. තමන් කතා කරන්නේ කාටද, කුමක්ද යන්න පිළිබඳව ඔවුන්ට හොඳ අවබෝධයක් තිබිය යුතුය. වඩාත් වැදගත් වන්නේ රටේ නායකත්වය බලාගෙන සටන් කරන ගෝඨාභය සහ සජිත් ලබාදෙන පොරොන්දුය.
සෑම දෙයකම මිල බස්සන, බොහෝ දේවල් නොමිලේ ලබාදෙන, සෑම සිසුවකුටම සරසවි අධ්‍යාපනය දීම, පැය 24 පුරාම සේවය කිරීම වැනි පොරොන්දු බහුතර ජනතාවගේ පිළිගැනීමට ලක් නොවන බව සඳහන් කළ යුතුය. අපේ රටේ අද පවතින ආර්ථික තත්ත්වය අනුව නොමිලේ දීම්, බිල් බැස්සීම් වැනි පොරොන්දු තමන් රුවටීමට ලබාදෙන පොරොන්දු බව දැන් නොදන්නා කෙනකු නැත. ඒවා හුදෙක් බලයට පත්වීම සඳහා පමණක් උපයෝගී කර ගන්නා &බොරැ* බව වටහා ගැනීමට අසීරැ නැත. එදිනෙදා ජීවිතයේදී දැඩි ලෙස පීඩාවට පත්ව සිටින පොදු මහජනතාව ඊළඟට එන නායකයාගෙන් සහන බලාපොරොත්තු වීමේ වරදක් නැත. එහෙත් සහන ලබාදිය යුත්තේ රටේ පවතින සැබෑ තත්ත්වය සැලකිල්ලට ගැනීමෙන් අනතුරැව පමණි. එසේ නොවුණොත් එය රට රුවටීමක් පමණි.
සහන ලැබීම ජනතාවගේ අපේක්ෂාවක් වුවද ඉදිරියේදී රට ගොඩනංවන ආකාරය පිළිබඳව ලබාදෙන පොරොන්දු කෙරෙහිද ජනතාව දැඩි අවධානයක් යොමු කරනු ඇත. ඉදිරි වසර 05ක කාලය තුළදී රටේ ගමන් මග පිළිබඳව කිසියම් අදහසක් ඇතිකර ගැනීමට එවැනි පොරොන්දු ආධාර වෙයි. මේ නිසා එවැනි පොරොන්දු කෙරෙහි ජනතාව වඩාත් විමර්ශනාත්මකව බලපානු ඇති බව සිතාගත යුතුය. අලි දෙන්නම්, කොටි දෙන්නම් වැනි පොරොන්දු වෙනුවට අපේ රට ඉදිරි වසර කිහිපයේදී ඉහළ ස්ථානයකට ඔසවා තැබීමට ක්‍රියාත්මක කරන වැඩපිළිවෙළ පැහැදිලිව ප්‍රකාශ කළ හැකි නම් එය විශ්වාසය දිනාගත හැකි මට්ටමක පවතින්නේ නම් එවැනි පොරොන්දු කෙරෙහි ජනතාව වඩාත් අවධානය යොමු කරන බව කිව යුතුය. ඉදිරි දිනවලදී තම තමන්ගේ අනාගත වැඩපිළිවෙළ එළිදැක්වීමට බලාපොරොත්තුවෙන් සිටින ප්‍රධාන අපේක්ෂකයන් කිහිප දෙනාම ඒ බව සිතට ගැනීම වැදගත් වන බවත් දැන දැනම බොරු පොරොන්දු ලබාදීමෙන් වළකින ලෙසත් සියලු අපේක්ෂකයන්ට දැනුම් දීමට කැමැත්තෙමු.
