පුංචි කැබිනට්ටුවේ වගකීම
විශාල ජනවරමක් ලබාගනිමින් ශ්‍රී ලංකාවේ හත්වැනි විධායක ජනාධිපතිවරයා වශයෙන් තේරීපත් වූ ගෝඨාභය රාජපක්ෂ මහතා පසුගිය අඟහරැවාදා තම රාජකාරි ඇරැඹීය. ඉන්පසුව බ්‍රහස්පතින්දා (21) අග්‍රාමාත්‍යවරයා වශයෙන් මහින්ද රාජපක්ෂ මහතා දිව්රුම් දුන් අතර සිකුරාදා 15 දෙනකුගෙන් යුත් අන්තර්වාර ඇමැති මණ්ඩලය පත් කරනු ලැබීය. මහ මැතිවරණය පවත්වා ස්ථිරව රජයක් පත්කර ගන්නා තුරැ ඉදිරි මාස කිහිපයේ දී ගෝඨාභය රාජපක්ෂ මහතාගේ රජය සමන්විත වන්නේ එම අන්තර්වාර ඇමැති මණ්ඩලයෙනි.
ආණ්ඩුක්‍රම ව්‍යවස්ථාවට අනුව 30 දෙනකු පත් කළ හැකි වුවද මෙලෙස ඇමැති මණ්ඩලය තාවකාලිකව හෝ 15 දෙනකුට සීමාවීම සම්බන්ධයෙන් මේ රටේ බහුතරයක් ජනතාව නම් පසුවන්නේ සතුටු සිතිනි. හිසේ කෙස් ගාණට ඇමැතිවරුන් සිටින රටක් වශයෙන් ලෝක විහිළුවකට ලක්ව තිබූ මෙරට ඇමැති මණ්ඩලය තාවකාලිකව හෝ මේ තරමට අඩුවීම රටවැසියන් බොහෝ දෙනකුට අදහා ගැනීමට පවා අසීරු වන්නට ඇත. එහෙත් එය සිදුවී තිබේ. එය ජනාධිපතිවරයාගේ තීන්දුවකි. ජනාධිපතිවරණය පැහැදිලි විශාල වැඩි ඡන්දයකින් ජයගත් ජනාධිපතිවරයකු පත් වී සිටින විට පාර්ලිමේන්තුවේ බහුතරයක් නොමැති වීම ඊට හරස් විය යුතු නැත. ඒ අතින් සිදු වූ මෘදු බල හුවමාරැව ප්‍රජාතන්ත්‍රවාදය අගයන සියලු දෙනාගේම ප්‍රසාදයට හේතුවෙයි. ඉන්පසුව පත් කෙරැණු භාරකාර ඇමැති මණ්ඩලය මේ ආකාරයට 15 දෙනකුට සීමා කිරීමෙන් නව ජනාධිපතිවරයා ද රටට ලබා දී ඇත්තේ ඉහළ ආදර්ශයකි. එම තීන්දුව ද ජනතාවගේ ඉහළම පිළිගැනීමට ලක්වෙනු ඇත.
අපේ රට මේ වන විට මුහුණ දී සිටින ඉතා සංකීර්ණ ගැටලු ගණනාවකට ක්‍රමානුකූලව විසඳුම් සෙවීමේ අභියෝගයකට නව ජනාධිපතිවරයා මුහුණ දී සිටී. විශේෂයෙන්ම මහා අගාධයකට වැටී තිබෙන රටේ ආර්ථිකය ගොඩගැනීම, රටේ සියලු ජනකොටස් අතර ගොඩනැගෙමින් තිබූ සැකය අවිශ්වාසය දුරැකර සාමකාමී පරිසරයක් බිහි කිරීම, ජාතික ආරක්ෂාව ශක්තිමත් කිරීමට අවශ්‍ය පියවර ගැනීම, රටේ කර්මාන්ත සහ ව්‍යාපාර ඉහළ තලයකට ඔසොවා තැබීම ඒ අතුරින් කිහිපයක් පමණි. ඒ සමඟ පසුගිය වසර කිහිපය තුළදී දැඩි ලෙස පීඩාවට පත්ව සිටි රටේ පොදු මහජනතාව ද සහන කිහිපයක් හෝ අපේක්ෂාවෙන් සිටිති. මේ සියල්ල මහ මැතිවරණයට පෙර කෙටි කාලයක් තුළදී ඉටුකළ නොහැක. එහෙත් තම පාලන කාලය තුළදී එම බලාපොරොත්තු ඉටු කරන බවට පැහැදිලි ඉඟියක් මුල් දින කිහිපය තුළදී නව ජනාධිපතිවරයා විසින් ගන්නා ලද තීන්දු මගින් පෙන්වා දී තිබේ. එම තීන්දුවලට ගරැ කරමින් ඔහුගේ පාලනයට හැකි හැම සහායම දැක්වීම අන්තර්වාර කැබිනට් මණ්ඩලයේ ලොකුම වගකීමය.
ගෝඨාභය රාජපක්ෂ මහතා ජාතිය අමතා කළ ප්‍රකාශයේ දී සියලුම ශ්‍රී ලාංකිකයන්ගේ අයිතිවාසිකම් රුක දීමට ක්‍රියා කරන බවටත් ඔවුන්ට සේවය කරන බවටත් ප්‍රතිඥා දෙමින් රටේ යහපත සඳහා විධායක බලතල භාවිත කිරීමට පසුබට නොවන බවටත් කළ ප්‍රකාශය කෙරෙහි සියලු දෙනා අවධානය යොමු කළ යුතු වෙයි. මහජනතාවට ආණ්ඩු එපා වෙන්නේ බඩු මිල වැඩිවීම, බදු වැඩිවීම වැනි හේතූන් නිසාම නොවේ. තමන් දුක් විඳිද්දී හැම අතින්ම පීඩාවට පත් වෙද්දී මැති ඇමැතිවරැන් ඩියුට් ෆ්‍රී කාර්, සුඛෝපභෝගී කාර්යාල, හිතේ හැටියට කාර්ය මණ්ඩල ඇතුළු වෙනත් පහසුකම් සහ රට සවාරි වැනි සුවිශේෂ වරප්‍රසාද භුක්ති විඳිමින් රටට වැඩක් නොකර සිටිනු දැකීම ආණ්ඩු එපා වීමට ලොකුම හේතුවකි. තමන්ගේ දූ පුතුන් ඉහළ අධ්‍යාපන සුදුසුකම් ලබා රස්සාවක් නැතිව සුසුම් හෙළද්දී යන්තම් හෝ සුදුසුකමක් නැති අය දේශපාලන පන්දම් එළි පිහිටෙන් රුකියා කරනු දකින විටදී, රාජ්‍ය දේපළ අවභාවිතයේ යොදවනු දකින විටදී, හොරා කනවා දකින විටදී ආණ්ඩු එපා වෙයි. ඉදිරි කෙටි කාලය තුළදී හෝ මේ මහප්‍රාණ වැරදි කිරීමෙන් වැළකී සිටීමට භාරකාර ඇමැති මණ්ඩලයත් ඔවුන්ට සම්බන්ධ සෙසු පිරිසත් කටයුතු කරයි නම් එය ඉදිරි අනාගතය පිළිබඳ ජනතාව තුළ අලුත් බලාපොරොත්තු ඇති කරවන්නකි. විය යුත්තේ ද එයයි.
ජනාධිපතිවරයා ඇමැතිවරැන්ට යම් යම් දැනුම්දීම් කර ඇති බවත්, අමාත්‍යාංශවල මුදල් නාස්ති වන බොරු සෝබන වැඩ සහ රුකියා ලබාදීම්වලින් වැළකී සිටින ලෙසට අවවාද කර ඇති බවත් අපට දැනගන්නට තිබේ. නව ඇමැති මණ්ඩලය පත් කිරීමෙන් පසුව කළ කතාවේදී ජනාධිපතිවරයා මේ සම්බන්ධව යම් ඉඟි ලබා දුන්නේය. ආරම්භයේදීම එවැනි උපදෙස් සහ අවවාද ලබාදීම ඉතා වැදගත් කටයුත්තක් සේ අපි දකිමු. ඇමැතිවරයකු මොන වැරුද්දක් කළත් කාට හෝ රස්සාවක් ලබා දුන්නත් මේ වැරදි සියල්ල යන්නේ ජනාධිපතිවරයාගේ කරපිටිනි. රටේ ජනතාව ආණ්ඩුවේ ක්‍රියාකාරීත්වය මනින්නේ ජනාධිපතිවරයාගේ ක්‍රියා කලාපයෙනි. ඇමැති මණ්ඩලය හික්මවා ගැනීමට නොහැකි නම් ජනතාව දොස් කියන්නේ ජනාධිපතිවරයාට මිස ඇමැතිවරැන්ට නොවේ. මෙය සියලු ඇමැතිවරැන් තරයේම සිතට ගත යුතු බව සඳහන් කරමු. මේ සඳහා අතීත උදාහරණ ඕනෑ තරම් සොයාගත හැකිය.
අලුතින් දිව්රැම් දුන් ඇමැති මණ්ඩලයේ සිටින්නේ අලුත් ඇමැතිවරැන් නොවේ. මේ සියලු දෙනා මීට පෙර ද ඇමැතිකම් දැරූ පුරුදුකාරයෝ වෙති. තමන් වැඩේ වරද්දා ගත්තේ කොතැනද යන්න ගැන ද ඔවුන්ට හොඳ අවබෝධයක් තිබිය යුතුය. තුට්ටු දෙකේ සෝබන වැඩ, කතා සාප්පු දැමීම, පමණක් නොව රටම හිනස්සා අලුත් ජනාධිපතිවරයා ද අමාරැවේ දමන සිල්ලර වැඩ කිරීමෙන් ද වැළකී සිටීමට ඔවුන්ට හැකියාව තිබිය යුතුය. දැන් බලයට පත්ව සිටින්නේ අලුත් ජනාධිපතිවරයකු බව මේ කවුරැත් අමතක නොකළ යුතුය. තම අතේ තිබෙන්නේ මහ මැතිවරණයට පෙර ආණ්ඩුව මැන බැලීමේ ලිට්මස් ටෙස්ට් එක බව අවබෝධ කරගෙන කටයුතු කිරීම හැම අතින්ම යහපත්ය.
