2019 දෙසැම්බර් 21 වන සෙනසුරාදා

විග්නේෂ්වරන්ගේ ඡන්ද ඇම

 2019 දෙසැම්බර් 21 වන සෙනසුරාදා, ප.ව. 12:30 34

තරගයක් පේනතෙක් මානයක නොතිබුණත් මෑන් ඔෆ් ද මැච් වෙන්න දඟලන දේශපාලනඥයෙක් උතුරෙන් බිහි වී සිටියි. දැන් ඉන්නේ උතුරේ වුණාට ඔහු තම වෘත්තීය ජීවිතයේ හොඳම හරිය ගෙවා දැම්මේ කොළඹය. කොළඹ සිටියදී අධිකරණ පද්ධතියේ ඉහළ ගෞරවයක් දිනූ ශ්‍රේෂ්ඨාධිකරණ විනිසුරුවරයකු වශයෙන් විශ්‍රාම ගියත් ඉන්පසුව යාපනයට ගොස් දේශපාලනයට බැස්සාට පසුව ඔහු වෙනස්ම පුද්ගලයකුගේ චරිතයට අවතීර්ණ වී සිටියි. ඔහු කුමන චරිතයකට ඇඳගත්තත් අපට කමක් නැත. එහෙත් ඔහුගේ චරිත ස්වභාවය රටේ අවුල් ජාලයක් ඇතිකිරීම දක්වා බලපෑම් කරන්නේ නම් අප කාටත් ඒ ගැන සොයා නොබලා සිටිය නොහැක. උතුරේ දේශපාලනඥයන් ඒ ගැන වැඩිපුර සැලකිල්ලක් දැක්වීම වඩාත් යහපත් වනු ඇත.

මේ දේශපාලනඥයා උතුරේ හිටපු මහ ඇමැති සී. වී. විග්නේෂ්වරන්ය. මහ ඇමැති පදවිය ලැබීමෙන් පසුවද ඔහු නිරතුරුවම සිටියේ බර බර ගාමිනි. ඇති දෙයට වඩා නැති දෙය ඔහුගේ විවේචනයට හසුවිය. මහ ඇමැති වශයෙන් උතුරට ඔහුගෙන් වූ සේවය ද ප්‍රශ්න කැරිණි. ඔහු තම අවධානය වඩාත් යොමු කළේ නිමක් නැති ප්‍රශ්නවල ගිලී සිටින යාපනය ඇතුළු උතුරේ ජනතාවගේ යහපතට වැඩ කරදීමට වඩා ආණ්ඩුව සමඟ අංගම්පොරයක යෙදීමටය. උඩ කරණම්, යට කරණම් ගසා අහසේ සිට ආණ්ඩුවේ නිලය අල්ලා පහරදීමට විග්නේෂ්වරන් දැරෑ හැම උත්සාහයකම ඉලක්කය වැරදී ගිය බව ගතවූ වසර පහක අතීතය දෙස සුපරීක්ෂාකාරී වන ඕනෑම කෙනකුට වටහාගැනීම අසීරැ නොවනු ඇත. පසු කාලයකදී ඔහු තමන්ට දේශපාලනය පැමිණීමට තමන්ට අතදුන් උතුරේ දේශපාලන නායකත්වය සමඟ ද ගැටුම් ඇති කරගත්තේය. එය අවසන් වූයේ තමන් වෙනම දේශපාලන වශයෙන් සංවිධානය වීමට පාර කපාගනිමිනි.

විග්නේෂ්වරන්ගේ දේශපාලන කල්ක්‍රියාවෙන් අපට වැඩක් නැත. එහෙත් ඔහු තමන් කරන කියන කතාවලින් රටේ අවුල් ඇති කිරීම පරමාර්ථ කොට ගෙන සිටී නම් ඒ ගැන අපගේ බලවත් විරෝධය ප්‍රකාශ කිරීමට නොපැකිලෙමු. මෑතකදී විග්නේෂ්වරන් ශ්‍රී ලංකාවට බෞද්ධ රටක් ලෙස පැවසීමට කිසිදු පුද්ගලයකුට අයිතියක් නොමැති බවට මත පළකරමින් නිකුත් කර තිබූ මාධ්‍ය නිවේදනය එවැනි අවුලකට මුලපිරීමක් බව අපගේ වැටහීමය. උතුර නැගෙනහිර තුළ කිසිදු සිංහල ජාතිකයකු ජීවත් වී නැති බවටත් දෙමළ ජනතාව මේ රටේ මුල් පදිංචිකරැවන් වන අතර සිංහලයන්ගේ නිජබිම වශයෙන් ශ්‍රී ලංකාව හැඳින්විය නොහැකි බවටත් එම මාධ්‍ය නිවේදනයේ සඳහන්ව තිබිණි. ඔහු තවදුරටත් කියා තිබුණේ ජාතීන් අතර බිඳවැටීම් හටගත්තේ ශ්‍රී ලංකාව සිංහල ජනතාවගේ බවට හිමිකම් කීමෙන් පසුව බවය.

විග්නේෂ්වරන් මේ පදනම් විරහිත අසත්‍ය ප්‍රකාශය නිකුත් කළේ‍ උඩ පැන නිලයක් අල්ලා ආණ්ඩුවට පහරදීමට නම් එය බරපතළ වැරදීමක් බව ඔහුට පෙන්වාදීමට කැමැත්තෙමු. රටක ඉතිහාසය ඉදිරියෙන් එන මහ මැතිවරණයේදී ලකුණු එකතු කරගැනීමේ මෙවලමක් වශයෙන් යොදවා ගැනීම මේ ප්‍රකාශයේ යටි අරමුණු බව හඳුනාගැනීම අමාරැ නැත. තමන් කැමැති දේශපාලනයක නිරත වීමට විග්නේෂ්වරන් මහතාට තිබෙන අයිතියට අපි ගරු කරමු. එහෙත් එම දේශපාලනය රටේ සාමකාමී ජනතාව කුලප්පු කොට අරගලයක් ඇතිකරමින් ඒ හරහා ඡන්ද රැස්කරගැනීම අරමුණු කරගෙන සිදු කරන්නක් නම් අපි එය දැඩිව හෙළා දකිමු. ජාතීන් අතර වෛරය වපුරවා රට භේදභින්න කොට රටම අවුස්සා ලබාගත හැකි ජයග්‍රහණයක් නැති බව ඔහුට පෙන්වා දීමටද කැමැත්තෙමු. මෙවැනි දුරදිග නොබලා සිදුකරන පදනමක් නැති වාචාල කතාවලට දෙමළ ජනතාවගෙන් වුවද සහායක් නොලැබෙන බව අපගේ වැටහීමය. රටේ ඉතිහාසය පිළිබඳව විග්නේෂ්වරන්ට ගැටලුවක් ඇත්නම් ඒ සඳහා තමන් කැමති විශ්ව විද්‍යාලයකින් ඉතිහාසය හැදෑරීම මෙවැනි බොරු පතුරනවාට වඩා හැම අතින්ම නම්බුකාර බවද ප්‍රකාශ කරමු.

විග්නේෂ්වරන්ගේ ප්‍රකාශය පිළිබඳව පුරාවිද්‍යා චක්‍රවර්තී එල්ලාවල මේධානන්ද හිමියන් අපගේ දේශය පුවත්පතට ප්‍රකාශ කර තිබුණේ මේ රටේ සිංහල - දෙමළ - මුස්ලිම් සහෝදරත්වයෙන් ජීවත් වන බවත් මහා වංශයේ සඳහන් සෑම කරුණක්ම පුරාවිද්‍යාත්මක කැණීම් සහ සෙල්ලිපිවලින් ඔප්පු වී තිබෙන බවත්ය. ආචාර්ය ඕමල්පේ සෝභිත හිමියන්ගේ මතය වන්නේ බලලෝභී දේශපාලනය හේතුවෙන් ඔහු මෙවැනි වාචාල කතා කියන බවය. සිංහල බෞද්ධ ජනතාවට බැණ වැදීමෙන් දෙමළ ජනතාවගේ ඡන්දය බලාපොරොත්තු වීම නිෂ්ඵල ක්‍රියාවක් බවද උන්වහන්සේ පෙන්වා දෙති.

අපට කියන්න තිබෙන්නේ ද ඒ ටිකමය. ඒ සමඟ උතුරේ ජනතාව මෙවැනි දැඩි අන්තවාදී සාවද්‍ය කතා හේතුවෙන් මුළා කරගැනීම නම් පහසු නොවනු ඇති බව අපි විශ්වාස කරමු. ත්‍රස්තවාදීන්ගේත් යුද්ධයේත් බිහිසුණුකම හොඳින් අත්විඳ තිබෙන ඔවුන් තමන්ගේ ලේ උණුසුම් කරන මෙවැනි බොරු පූචානම් කතාවලට තවදුරටත් මුළාකර ගත නොහැකි බව අපගේ වැටහීමය. විග්නේෂ්වරන් කළ යුත්තේ ඉදිරි මහ මැතිවරණයට තරග කිරීමට පෙර තමන්ගේ දැනුම පරීක්ෂා කර ගැනීම බව අපගේ අදහසය. දේශපාලනය තුළ බම්මන්නකු වීමට වඩා එය නම්බුකාරය.