කොරෝනා ගරා යකා කර නොගනිමු
කොරෝනා වයිරසයේ මාරාන්තික බව විසින් ඇතිකරන කම්පනය රටටම දැනෙමින් තිබේ. දැනට මෙරටින් වාර්තා වී ඇත්තේ එක් රෝගියකු පමණි. එම රෝගියාද චීන ජාතික කාන්තාවක මිස ශ්‍රී ලාංකිකයකු නොවේ. සැකපිට දැනට රෝහල් ගතකරනු ලැබ සිටින ශ්‍රී ලාංකික වැසියන් කිසිවකුට හෝ මේ රෝගය වැළඳී ඇති බවට තොරතුරක් මේ සටහන තබන තුරු දැනගැනීමට නොතිබිණි. එසේ වූ පමණින් සියල්ල සැහැල්ලුවෙන් බැහැර කොට රෝගයේ අවදානම අමතක කළ යුතු නැත. එසේම අවශ්‍ය පමණට වඩා කලබල වී කොරස් කටේ අත දා ගැනීමට පවා නොහැකි තත්ත්වයටද කිසිවකුත් පත් විය යුතු නැත.
කලබල වී කටයුතු කිරීම වෙනත් අවදානම් සහ අනතුරුවලට දොරහැර දීමකි. මහනුවර කටුගස්තොට ආසන්න පාසලක හදිසියේ රෝගාතුර වූ දැරියක රෝහල් ගත කිරීමට එම පාසලේ කිසිවකු හෝ ඉදිරිපත් නොවීම මෙයට ප්‍රබල උදාහරණයක් සපයයි. මේ දැරිය හදිසියේ අසනීප වී අසාධ්‍ය වුවත් ඇය රෝහල් ගත කිරීමට කිසිවකු හෝ ඉදිරිපත්ව නැත්තේ කොරෝනා වයිරසයට තිබෙන බිය හේතුවෙන් යැයි සඳහන් වේ. ඒ පිළිබඳ නිසි ලෙස සිදුකෙරෙන පරීක්ෂණයකින් සියලු තොරතුරැ හෙළිවනු ඇතැයි අපේක්ෂා කරමු. දැනට පවතින්නේ කොරෝනා වයිරසයට බියවීම හේතුවෙන් එම දැරියට තව ඩිංගෙන් රෝහලේදී ලැබිය යුතු ප්‍රතිකාර පවා නොලැබී මහ අනතුරක් වීමට ඉඩ තිබූ බවය. පොලීසිය ඉදිරිපත් වී සුවසැරිය ගිලන් රියක් ගෙන්වා දැරිය රෝහල් ගත කිරීමෙන් ඇයගේ ජීවිතය බේරාගැනීමට හැකිව තිබිණි. මෙහිදී පාසලේ බලධාරීන් අඳබාලයන් සේ ක්‍රියාකරමින් තමන්ගේ සියලු වගකීම් පැහැර හරිමින් කටයුතු කර ඇති බව පෙනී යයි. එවැනි තත්ත්වයකට රට තුළ යළිත් ඉඩදිය යුතු නැත.
ඒ සඳහා සිදුකළ යුත්තේ කොරෝනා වයිරසය මගින් ආරක්ෂා වීම සහ එම රෝගයේ යථා ස්වභාවය පිළිබඳව නිවැරදි තොරතුරැ පමණක් අවබෝධ කරගැනීමට කටයුතු කිරීමය. චීනයේ තිබෙන ලෙඩේ කොතරම් මාරාන්තික වුවද එහි යථා තත්ත්වය පිළිබඳව සියලුම ජනමාධ්‍ය මගින් ජනතාව දැනුම්වත් කිරීම සිදුවෙමින් තිබේ. පාසල් ගුරුවරු ගුරුවරියන් ඇතුළු සියලු බලධාරීන්ට ජනමාධ්‍ය සහ වෛද්‍යවරුන් හරහා එම දැනුවත්භාවය ලබාගැනීම අපහසු නැත. එසේ තිබියදීත් සියල්ලන්ටම පළමුව ගුරුවර ගුරුවරියන් බියෙන් ත්‍රස්ත වී කටයුතු කිරීමට ගියොත් එහි ප්‍රතිඵල ඉතාම භයානක විය හැකිය. කටුගස්තොට පාසලේදී යන්තම් වැළැකී ගියේ එවැනි භයානක අවස්ථාවකි.
කොරෝනා වයිරසය පිළිබඳව රටේ ජනතාව දැනුම්වත් කිරීමේදී ජනමාධ්‍යවලටද පැවරෙන්නේ ලොකු වගකීමකි. තරගකාරී බව අතරින් තමන් මුදුනා වීමට කොරෝනා ව්‍යසනය යොදාගන්නවාට වඩා පවතින තත්ත්වයේ යථා ස්වභාවය පිළිබඳව නිවැරදි තොරතුරැ පමණක් ජනතාවට දැනෙන හැඟෙන සේ ලබාදීම ඉතා වැදගත්ය. මෙය මනුස්ස ජීවිත පිළිබඳ ගැටලුවක් මිස වෙළෙඳපොළේ තමන්ට හිමි කොටස වැඩිකර ගැනීමේ සටනක් බවට පත්කර නොගැනීම සියලු මාධ්‍යවල වගකීමය. එහෙත් ඇතැම් සමාජ මාධ්‍ය හරහා එම වගකීම අමු අමුවේම පැහැර හරිනු නිරීක්ෂණය කළ හැක. එය කනගාටුවකි. ජනතාව නොමග යවා කල දුටු කල වල ඉහ ගැනීමකි.
ඒ සමඟ රටේ ආණ්ඩු පක්ෂ, විපක්ෂ සියලු දේශපාලනඥයන්ටද යමක් කිව යුතුව තිබේ. කොරෝනා වෛරසය සහ එමගින් ලොවපුරා ඇතිව තිබෙන කලබැගෑනිය තම තමන්ට ලකුණු දමාගැනීමේ අවස්ථාවක් කර නොගත යුතු වීමයි. මෙය දේශපාලන භූමියේ ලකුණු එකතු කරන අවස්ථාවක් නොවේ. එකිනෙකාට චෝදනා කරගනිමින් මාධ්‍ය සාකච්ඡා පැවැත්වීම රටේ ජනතාවගේ හාස්‍යයට පවා ලක්වෙමින් තිබේ. පීඩාවට පත්ව සිටින්නේ රටේ පොදුමහ ජනතාව බව අමතක නොකළ යුතුය. දේශපාලන බලවතුන්ට නම් අවශ්‍ය තරමට ආරක්ෂා වීමට සියලු පහසුකම් තිබේ. එහෙත් ජනතාවගෙන් බහුතරය ගමන් කළ යුත්තේ තදබද වූ බස්රථ සහ කෝච්චිවලය. පාරට බැස්සත් විශාල ජනකායක් සමඟ ගැවසීමට ඔවුන්ට සිදුවෙයි. ආරක්ෂා කළයුතු වන්නේ ජනතාවයි. මේ නිසා ආණ්ඩුවේත් විපක්ෂයේත් සියලු දේශපාලන පක්ෂ නායකයන් කොරෝනා වෛරසය ගැන කතාකළ යුතු වන්නේ එකම හඬකින් බව අපගේ වැටහීමය. කොරෝනා වෛරසයට ආණ්ඩුවේ මන්ත්‍රීවරයා හෝ විපක්ෂයේ මන්ත්‍රීවරයා කියා වෙනසක් නැත බාල පොලිටික්ස් වලින් වැළකී සද්භාවයෙන් කටයුතු කිරීමට සියලු දේශපාලනඥයන්ට ඥානය පහළ වේවායි අපි ප්‍රාර්ථනා කරමු.
මේ අතර චීනයේ වෙසෙන ශ්‍රී ලාංකික සිසුන් සම්බන්ධයෙන්ද රටේම අවධානය යොමුවීම වැදගත්ය. ඔවුන් සියලුදෙනා නිරැපද්‍රිතව මෙරටට ගෙන්වා ගැනීමට හැකිවනු ඇතැයි අපි අපේක්ෂා කරමු. ඔවුන් ගෙන්වා ගැනීමෙන් පසුව දියතලාවට යැවීම සහ ගුවන්තොටේදී එම සිසුන් පරීක්ෂා කරන ආකාරය පිළිබඳව විවිධ මත පැන නැගී තිබේ. එම මත අතුරින් වඩාත්ම සුදුසුම ක්‍රමය තෝරාගැනීම බලධාරීන්ගේ වගකීමකි. මෙවැනිම තත්ත්වයකට මුහුණ දී සිටින සෙසු රටවල් කටයුතු කරන ආකාරය පිළිබඳව විමසිලිමත්වීමද මෙහිදී ප්‍රයෝජනවත් වනු ඇත.
කොරෝනා වෛරසයෙන් ගැලවීමට මුඛ ආවරණ පැළඳීම පමණක් ප්‍රමාණවත් නොවන බවද කිව යුතුය. මේ නිසා මුඛ ආවරණ භාවිතය මහා විශාල ගැටලුවක් බවට පත්කර ගැනීම අවශ්‍ය නැත. එය පිරිසිදු ලේන්සුවකින් වුවද කරගත හැක. වඩාත් වැදගත් වන්නේ කොරෝනා වෛරසය පිළිබඳව නිවැරදි දැනුම ලබාගැනීමය. ඒ ගැන ශ්‍රී ලාංකික විශේෂඥ වෛද්‍යවරයකු වන හොංකොං සරසවියේ මහාචාර්ය මලික් පීරිස් ප්‍රකාශ කරන්නේද මේ ලෙඩේට අනවශ්‍ය අන්දමට කලබල වීමෙන් පලක් නැති බවය. එවැනි විශේෂඥ අවවාද කෙරේ වඩාත් සැලකිලිමත්වන්නැයි අපි ජනතාවට කියමු.