බඩු මිල දැන්වත් බස්සමුද?
එළවළු, හාල් ඇතුළු බඩු මුල ඉහළ යාම ගැන පාරිභෝගිකයන් වන පොදු ජනතාව කතා කරති. වෙළෙන්දෝ සහ අතරමැදියෝ ද කතා කරති. ආණ්ඩුවත් කතා කරයි. විපක්ෂයත් කතා කරයි. එහෙත් ඉහළ නැග්ග බඩු මිල එසේමය. යන්තමින් එළවළුවක දෙකක මිල අඩු වනවිට ලොකු ලූනු මිල නගියි. මේ හේතුවෙන් බත්පතේ පමණක් නොව තෝසේ ඇතුළු උඳුවලින් හදන සෑම ආහාරයකම මිල ගණන් පවා ඉහළ ගොසිනි. බඩු මිල තවමත් අඩුවීමක් නැති බව සරලම කතාවයි.
එළවළු මිල ගණන් ඉතාම ඉහළ බවට චෝදනා නැගෙද්දී ආණ්ඩුව වෙනුවෙන් ලක්ෂ්මන් යාපා ඇමැතිවරයා වරක් පිළිතුරක් දුන්නේය. ඒ මීට මාස දෙකකට පමණ ඉහතදීය. ඔහු කියා තිබුණේ රටේ ජනතාව අපේ ආණ්ඩුව බලයට ගෙනාවේ අඩු මිලට එළවළු කෑමට නොවේ කියාය. එය ඒ දවසට හරියන මරැ පිළිතුරක් විය හැකි වුවද අදට ගැලපෙන්නේ නැත. ඒ වනවිට ගෝඨාභය රාජපක්ෂ මහතා බලයට පැමිණ ගතවී තිබුණේ සති කිහිපයක් පමණි. එහෙත් දැන් මාස 03ක් ඉක්මවා ගොසිණි. තවමත් ලබාදෙන්නේ එම පිළිතුරම නම් එය පිළිගැනීමට ජනතාව සූදානම් නොවන බව සඳහන් කිරීම අපේ යුතුකමකි. එළවළු, සහල් ඇතුළු සෙසු බොහෝමයක් පාරිභෝගික ද්‍රව්‍ය මිල ගණන් තවමත් අඩු වී නොමැති බව ඇමැතිවරැන්ට වඩා හොඳින් ජනතාව දැන සිටින බැවිනි.
ආණ්ඩුව හැමදාම බඩු මිල අඩු නොවීම පිළිබඳ හේතු දක්වමින් සිටීම ප්‍රමාණවත් නැත. හේතු දැක්වීම් ජනතාවගේ ජීවන වියදම් ප්‍රශ්නවලට විසඳුමක් නොවේ. ඔවුන්ට අවශ්‍ය වන්නේ දැනට පවතින මිලට වඩා අඩුවෙන් අඩුම තරමින් අත්‍යාවශ්‍ය ආහාර ද්‍රව්‍ය පමණක් හෝ දැරිය හැකි මිලට ලබාගත හැකි වැඩපිළිවෙළකි. එළවළු, පොල් ඇතුළු වෙනත් ආහාර වර්ගවල මිල ගණන් වැඩිවීමට විවිධ හේතු බලපා තිබෙන බව ජනතාව ද නොදන්නවා නොවේ. නමුත් විශේෂයෙන් සහල් මිල ගණන් දැනට වඩා අඩු කළ හැකි බවට ප්‍රබල මතයක් රට පුරා පවතී.
වත්මන් ජනාධිපතිවරයා බලයට පැමිණීමෙන් පසුව සහල් මිල රැපියල් 20කින් පමණ ඉහළ නැග්ග බවත් එයට වගකිවයුතු පිරිසක් සිටින බවත් ආණ්ඩුවේ ලොක්කෝ කියති. එහෙත් වඩාත් අවශ්‍ය වන්නේ එම වැඩි කළ මිල ගණන් පහත හෙලීමෙන් පසුව එවැනි කාරණා ගැන කතාකිරීමය. සෑම නිවෙසකම කුස්සියේ සහ කෑම මේසයේදී මේ දිනවල නිරන්තරයෙන් බඩු මිල පිළිබඳ කතාබහ කෙරෙන බවත් ඒවා ඇතැම්විට අවසන් වන්නේ ආණ්ඩුව කෙරෙහි දැඩි විවේචනවලින් බවත් ලොකු ලොක්කන් දැන සිටීම අවශ්‍යය.
බඩු මිල අඩු නොවීමට හේතු වශයෙන් සමහරැ කොරෝනා වෛරසයේ බලපෑම පවා පෙන්වා දෙති. එය අර්ධ සත්‍යයකි. චීනයෙන් ශ්‍රී ලංකාව සමහර ආහාර ද්‍රව්‍ය ආනයනය කළත් බඩු මිල බැස්සීමට නොහැකි වීමට එකම හේතුව වශයෙන් කොරෝනා වෛරසය පෙන්වීම සත්‍යය නොවේ. එසේ නොවිය යුතුය. සැබෑ හේතු හඳුනාගෙන ඒවාට පිළියම් යෙදීම අවශ්‍යය. ඒ සඳහා කටයුතු කිරීමේදී ආණ්ඩුවේ සියලු දෙනාගේම උනන්දුව සහ ඕනෑකම තිබීම අවශ්‍යය. එක අතකින් මිල නංවා ජනතාව ගසා කන කූඨ අතරමැදියන් ගැන නිසි ලෙස ක්‍රියා නොකර ලබන සතියේදී මිල බසීවි යැයි බලාපොරොත්තු දීම නිශ්ඵලය.
වරක් සහල් මිල ප්‍රශ්නය විසඳීමට ජනාධිපතිවරයා බලයට පත්වූ විගසම පෞද්ගලිකවම මැදිහත් වී ක්‍රියා කළේය. එයට ජනතාවගේ පැසසුම් ද හිමිවිය. පසුගිය දිනවල උඩුදුම්බර ප්‍රදේශයේ එළවළු වවන ගමකට සංචාරයක නිරත වූ අවස්ථාවේදී ද ජනාධිපතිවරයා ඒ ප්‍රදේශයේ ගොවීන් සහ වෙළෙඳුන් හමුවී මේ ගැටලුවේ විවිධ පැති විමසා බලා තිබිණි. එහි රුස්ව සිටි රාජ්‍ය නිලධාරීන්ට ද ජනාධිපතිවරයා උපදෙස් ලබා දී තිබුණේ වවාගත් එළවළු විකුණාගත නොහැකිව දුක් විඳින ගොවීන්ගේත් ඒවා වැඩි මිලට ගැනීමට සිදුවන පාරිභෝගිකයාගේත් ගැටලු විසඳීමට උදව් විය හැකි වැඩපිළිවෙළක් සකස් කරන ලෙසටය. එය යහපත් ක්‍රියාමාර්ගයක් සේ අපි හඳුන්වමු.
එසේ වුවද රටේ ජනාධිපතිවරයාට මේ හැමදෙයටම සැමවිටම යොමුවීමට හැකියාවක් නැත. වෙලාවක් ද නැත. එවැන්නක් ජනතාව අපේක්ෂා කරන්නේ ද නැත. සිදුවිය යුත්තේ සහල් සහ එළවළු ද සෙසු අත්‍යවශ්‍ය ආහාර ද්‍රව්‍ය ද මිල ගණන් වසරේ සෑම කාලයකදීම හැකිතාක් දුරට ජනතාවට දැරිය හැකි මට්ටමක රඳවා තබාගැනීමට සුදුසු දීර්ඝකාලීන වැඩපිළිවෙළක් සැකසීමය. ශිතාගාර හා ගබඩා වැනි ස්ථාන රටට අවශ්‍යය. එවැනි සැලසුම් හැදීමට සහ ඒවා ක්‍රියාත්මක කිරීමට දක්ෂ නිලධාරී පැළැන්තියක් අප රටේ සිටින බවද අපි දනිමු. අවශ්‍ය වන්නේ ඔවුන්ට එම කාර්ය පවරා දී දේශපාලන ඇඟිලිගැසීම් නොකර සිටීමට අදාළ ඇමැතිවරැන් ක්‍රියා කිරීමය. උඩුදුම්බර ප්‍රදේශයෙ තක්කාලි වවන ගොවියාට කිලෝවක් රැපියල් 50ට විකුණාගැනීමට නොහැකිව තිබියදී කොළඹ පාරිභෝගිකයන් ඒවාට රැපියල් 300ක් ගෙවා මිලට ගැනීමට සිදුවීම් වැනි බරපතළ විෂමතා වළක්වා ගතහැකි වන්නේ එවිට පමණි. ඒ වෙනුවට ඒ ඒ ප්‍රදේශවල බලවත් දේශපාලනඥයන් ගොවීන්ගේත් පාරිභෝගිකයන්ගේත් රීරිමාංස උරා බොන ජාවාරම්කාර අතරමැදියන්ට උඩගෙඩි දෙමින් ඔවුන් රුකගැනීමට උත්සාහ ගත්තොත් සහල්, එළවළු මිලට දෙවියන්ගේම පිහිටය.