දොරවල් ඇරියත් පරෙස්සමින්
අප රට මුහුණදෙන කොවිඩ්-19 කොරෝනා වසංගතයට එරෙහි සටන තවම නිම වී නැත. ගෙවී ගිය සතිය තුළදී ආසන්නව දිනකට අලුත් රෝගීන් 25ක් පමණ හමුවී තිබිණි. රෝගය මුල් මාසය තුළදී පාලනය වී තිබූ ආකාරය අනුව මෙය යහපත් තත්ත්වයක් නොවන බව බැලූ බැල්මට පෙනී යයි. එහෙත් ඒ තත්ත්වය වැලිසර නාවික හමුදාවේ කඳවුර ආශ්‍රිතව හැටගැනුණු පොකුරේ බලපෑම බවත් එයින් පරිබාහිරව රෝගීන් හඳුනාගෙන ඇත්තේ 10කටත් අඩු පිරිසක් බවත් වාර්තා වී තිබීම රෝගය සමාජය තුළ පාලනය වී ඇති බවට සාක්ෂියකි. එහෙත් රෝගය සමාජගත වීමේ අවදානමෙන් තවමත් අපේ රට මිදී ඇතැයි සතුටු විය නොහැක.
ලබන 11 වැනිදා (සඳුදා) සිට රට සාමාන්‍ය බවට පත් කිරීමේ පළමු අදියර ක්‍රියාත්මක වන්නේ මේ පසුබිම යටතේය. පසුගිය මාර්තු 11 වැනිදා මෙරට පළමු කොරෝනා රෝගියා වාර්තාවීමෙන් පසුව මාර්තු 20 වැනිදා සිට රටපුරා ඇඳිරි නීතිය පනවනු ලැබූ අතර එයින් රට &ලොක්ඩවුන්* තත්ත්වයට පත් කෙරිණි. ඊට පෙර දින තුනක් රජයේ විශේෂ නිවාඩු දින වශයෙන් ප්‍රකාශයට පත් කර තිබූ බැවින් රට මේ වනවිට මාස දෙකකට ආසන්න කාලයක් පවතින්නේ වසා දැමුණු තත්ත්වයෙනි. වරින්වර සතියේ දිනවල රෝගයේ අවදානම නොමැති දිස්ත්‍රික්කවල ඇඳිරි නීතිය ලිහිල් කෙරුණත් එය එම ප්‍රදේශවල දෛනික රාජකාරි කටයුතු යථා තත්ත්වයට පත්කිරීමට තරම් ප්‍රමාණවත් නොවීය. පැහැදිලි වෙනසක් දැකගැනීමට නම් රටේ ප්‍රධාන පරිපාලන සහ වාණිජ දිස්ත්‍රික්කය වන කොළඹ ඇතුළු බස්නාහිර පළාත සක්‍රීය විය යුතුය. 11 වැනිදා ඇරුඹෙන්නේ එම සක්‍රීය කිරීමේ වැඩපිළිවෙළේ පළමු අදියර බව රජය කියයි.
ඇඳිරි නීතිය පවතින අතරවාරයේම රට ලොක්ඩවුන් තත්ත්වයෙන් ටිකින් ටික මුදාගැනීම රජයේ අරමුණ බව ප්‍රකාශ වී තිබේ. සෞඛ්‍ය බලධාරීන්ගේ පූර්ණ අධීක්ෂණය යටතේ මේ කටයුතු සිදුකිරීමට රජය වගබලාගත යුතු වෙයි. ඊට ඉහළම ප්‍රමුඛත්වය හිමිවිය යුතුය. රට එකතැන පල්වෙමින් වසා දැමුණු තත්ත්වයෙන්ම දිගටම පවතිනවාට වඩා පියවරින් පියවර හෝ එම තත්ත්වයෙන් මිදීමට කටයුතු යෙදීම සම්බන්ධයෙන් රටේ ජනතාවගේ පොදුවේ කැමැත්තක් තිබෙන බවද හඳුනාගත හැකිය. එහෙත් සියලු තීරණ ගත යුතු වන්නේ ජනතාවගේ ජීවිතවල ආරක්ෂාවට නිසි තැන ලබාදෙමින් බවට විශේෂයෙන් බලධාරීන්ගේ අවධානය යොමුවීම අවශ්‍යය. එහිදී ජනතාවගේ කර මතද ප්‍රබල වගකීමක් රුඳී තිබේ. රජය මගින් මේ ලබාදෙන සීමිත අවසරය අවභාවිත නොකිරීමට වගබලා ගැනීමයි.
රජයේ තීරණවලට අනුව රාජ්‍ය ආයතන, සංස්ථා, මණ්ඩල පමණක් නොව පෞද්ගලික ආයතනද සීමිත ලෙස විවෘත කිරීම 11 වැනිදා සිට සිදුවනු ඇත. අපේ රටට වඩා දරුණු ව්‍යසනකාරී තත්ත්වයකට මුහුණ දී සිටින රටවල් පවා මේ වනවිට තම රටවල වසා දමා ඇති දොරගුළු විවෘත කිරීමට යම් යම් පියවර ගනිමින් සිටී. අසල්වැසි ඉන්දියාවද බරපතළ තත්ත්වයකට මුහුණ දෙමින් සිටියත් ප්‍රධාන නගරය වන නවදිල්ලිය ඇතුළු නගර ගණනාවක පැවැති දැඩි සීමා ලිහිල් කර තිබේ. බරපතළම විනාශයකට මුහුණදුන් ඇමෙරිකාව සහ යුරෝපයේ ප්‍රධාන රටවල්ද රෝගයේ භීෂණය පවතිද්දීම කාර්යාල සහ ව්‍යාපාරික ආයතන සීමිත මට්ටම්වලින් විවෘත කිරීමට පියවර ගෙන ඇති බවත් මහජනතාවට පනවා තිබූ සීමා මායිම්ද යම් ප්‍රමාණයකින් ලිහිල් කිරීමටද ක්‍රියාකරන බවත් වාර්තා වී තිබේ. තම ආර්ථිකය යම් පමණක හෝ ස්ථාවර මට්ටමින් පවත්වාගෙන යාම එම රටවල අරමුණය. එසේ වුවද අපේ රට මේ විවෘත කිරීම්වලට යා යුතු වන්නේ රැවුලත් කැඳත් දෙකම බේරාගැනීමේ අධිෂ්ඨානයද ඇතිවය. ක්‍රම ක්‍රමයෙන් හෝ රට යථා තත්ත්වයට පත්විය යුතුය. ආර්ථිකය නිසි මඟට ගතයුතුය. එහෙත් ඒ සමඟ මෙතෙක් දුරට රැකගෙන ආ රෝගයේ පාලනය යළිත් ගිලිහී යාමට ඉඩදිය යුතු නැත.
අපේ රටේ ජනතාවගේ ආහාර, ජලය, ඖෂධ සහ බලශක්ති වැනි මූලික අවශ්‍යතා සම්පූර්ණ කර දීමට රජය මගින් යෙදූ වැඩපිළිවෙළ සාර්ථක වී තිබේ. එහෙත් එදිනෙදා ආදායමින් ජීවත් වූ ලක්ෂ සංඛ්‍යාත ජනතාවකට සිය ආදායම් අහිමි වීම විසඳුමක් නොපෙනෙන බරපතළ ගැටලුවකි. ඔවුන්ට සහනය ලැබීමට නම් මේ රට විවෘත විය යුතුය. එසේම පෞද්ගලික ආයතන බොහොමයකට සියලු නිෂ්පාදන කටයුතු ඇණහිට තිබීම හේතුවෙන් ඒවායේ සේවය කළ පිරිස්ද එම ආයතන හරහා වෙනත් සේවා සපයමින් දිවි ගෙවූ විශාල පිරිසද ලොකු අමාරැවක වැටී සිටිති. සමෘද්ධිලාභීන්ද කෘෂිකර්මයේ දිවි ගෙවූ පිරිස්ද සිටින්නේ මේ තත්ත්වයෙනි. රජය රුපියල් පන්දහසේ දීමනාව ලබා දෙමින් මේ තත්ත්වයට තාවකාලිකව පිළියම් යෙදීමට කටයුතු කළත් එය දිගින් දිගටම සිදුකළ නොහැක. රටේ ජනතාවගේ ජීවන රටාව ක්‍රමානුකූලව ආරම්භ කිරීමට රට විවෘත කිරීමට කටයුතු යෙදීමෙන් පමණක් මේ ගැටලුවලට විසඳුම් ලබාගත හැකිය.
රජය දැන් ආරම්භ කිරීමට යන්නේ එවැනි බොහොමයක් ගැටලුවලට ස්ථීර විසඳුම් ලබාදීමේ එම වැඩපිළිවෙළේ මූලික පියවරය. එය සාර්ථක වනු දැකීම අප කාගේත් ප්‍රාර්ථනයයි. කාර්යාලවල සේවය කළ පිරිස්වලට ගෙවල්වලට වී නිකම් සිටීම දැන් එපා වී තිබේ. පාසල් ගිය ළමුන්ගේ තත්ත්වයද එසේමය. එදිනෙදා ස්වයං රැකියාවල යෙදුණු පිරිසද බලා සිටින්නේ තමන්ගේ කටයුතු ආරම්භ කිරීමට අවස්ථාව ඉක්මණින් උදාවනතුරුය. එහෙත් මේ සියලු දෙනා රට සාමාන්‍ය තත්ත්වයට පත් කිරීමේ වැඩපිළිවෙළට සහාය දැක්විය යුතු වන්නේ &පළමුව තම ආරක්ෂාව* පදනම මත පිහිටමිනි. රජයටත් එය අදාළය.