වන්නි දිසාවට දැන් විපක්ෂය අරහං
වන්නි දිසාවට දැන් විපක්ෂය අරහං
වන්නි දිස්ත්‍රික් පොදුජන සන්ධානයේ පාර්ලිමේන්තු අපේක්ෂක ජනක නන්ද කුමාර
දැන් ඔබ මහ මැතිවරණයට ඉදිරිපත් වෙන්නේ පළවෙනි වතාවට. මොනවද ජයග්‍රහණය ගැන තිබෙන බලාපොරොත්තු?
මට ලොකු වගකීමක් බාර දීලා තමයි වන්නි දිස්ත්‍රිකයට මාව එව්වේ. මම දැන් වන්නිය ගැන වන්නියේ මිනිස්සු ගැන හොඳට දන්නවා. ඒ ජනතාවගේ උවමනා එපාකම් මම මේ වනවිට හඳුනාගෙන තියෙනවා. ඒ නිසා ජාති භේදයකින් තොරව මේ වන්නිය වෙනුවෙන් වැඩ කරන්න මම සූදානම් වෙනවා.
පොහොට්ටුව ජනාධිපතිවරණයෙන් ගත්ත ගැම්ම දැන් නැහැ කියලා විපක්ෂය කියනවා. ඒ නිසා ආණ්ඩුවට ඔය කියන 2/3 ලබාගන්න පුළුවන් වෙයිද?
අද වත්මන් විපක්ෂය ගැන රටේ ජනතාව කළකිරිලා ඉන්නේ. අද මේ වන්නි දිස්ත්‍රික්කයේ ජනතාව දහස් ගණනක් එනවා ඔවුන්ට තියන ප්‍රශ්න කියන්න. ඒ ප්‍රශ්න ඇහුවම පේන්නේ මෙතෙක් කාලයකට වන්නියෙන් ඉදිරිපත් වුණ කිසිම අපේක්ෂකයෙක් ජනතාව ගැන හොයලා බලලා නැහැ කියලා. දමිළ ජනතාව වෙනුවෙන් පෙනී සිටින අපේක්ෂකයන්වත් ඔවුන් ගැන සොයා බලා නැහැ. ඒ නිසා බොහෝ දමිළ පක්ෂවල පාක්ෂිකයන් සහ යූ.එන්.පී පාක්ෂිකයන් බොහෝමයක් අපිත් සමඟ මෙවර එකතු වෙලා තියෙනවා. ඒ නිසා මේ තුනෙන් දෙකක ජයග්‍රහණ ගැන කිසිම සැකයක් නැහැ.
වන්නිය කියන්නේ දමිළ ජනතාව බහුතරයක් ඉන්න දිස්ත්‍රික්කයක්. මෙවර මහ මැතිවරණයට සිංහල අපේක්ෂකයන් හතර දෙනෙක් ඉදිරිපත් වෙනවා. ඔබ කොහොමද මේ දමිළ ජනතාවගේ ඡන්දය ලබා ගන්නේ?
දමිළ ජනතාවගේ ළඟට ගිහින් අපි හදවතට කතා කරන්න ඕන. මෙතෙක් වන්නියේ හිටපු කිසිම කෙනෙක් ජනතාවට කිසිම දෙයක් කරලා නැහැ. ජනතාවගේ ඡන්දයෙන් අපේක්ෂකයන් තමන්ගේ ව්‍යාපාර දියුණු කරගෙන තියන එක තමයි මෙතෙක් කාලයකට කරලා තියෙන්නේ. පාසල් සිසුන්ට, තරුණ තරුණියන්ට තියන ප්‍රශ්න ගැන කවුරැත් කතා කරලා නැහැ. දමිළ ජනතාව දැන් කියන්නේ නියම නායකයෙක්, රටට ගැලපෙන නායකයෙක් දැන් තමයි ආවේ කියලා. මිනිස්සු ළඟට ගිහින් මිනිස්සු රවට්ටලා ඡන්දය ගත්තම නැවත ඔවුන් ඡන්දය ලබා දෙන්නේ නැහැ. මිනිස්සුන්ගේ හදවතට කතා කරන්න ඕන. මිනිස්සු දන්නවා දැන් තමන්ගේ දුක හඳුනන්නේ කවුද කියලා. ඒ නිසා අනිත් අය අභියෝගයක් වෙන්නේ නැහැ මට. සිංහල වගේම දමිළ ජනතාවගේ ඡන්දත් මට ලබා ගන්න පුළුවන්.
මෙවර පාර්ලිමේන්තුවට උගතුන්, වියතුන්, බුද්ධිමතුන් යවන්න ඕන කියලා සමාජයේ මතයක් තිබුණා. නමුත් දූෂණ වංචාවලට සම්බන්ධ අය පොහොට්ටුව ලැයිස්තුවෙත් ඉන්නවා නේද?
අනිත් අය ගැන මම දන්නේ නැහැ. පොහොට්ටු පක්ෂය මම ගැන විශ්වාසයක් තියලා තමයි මට අපේක්ෂකත්වය ලබා දී තිබෙන්නේ. ඒ නිසා මම පක්ෂය වෙනුවෙන් කැපවෙලා ඒ වැඩ කොටස මගේ වගකීම අකුරටම ඉටුකරනවා කාටවත් කිසිවක් කියන්න බැරි විදියට. මේ ජනතාවට ජනතා සේවය වෙනුවෙන් කැපවෙන්න ජනතාව වෙනුවෙන් පෙනී සිටින්න මම ඕනැම මොහොතක ලෑස්තියි.
ඔබ මෙවර වන්නියේ ජනතාවට ලබා දෙන ලොකුම පොරොන්දුව මොකක්ද?
වන්නිය කියන්නේ මේ රටේ තියන දුෂ්කරම දිස්ත්‍රික්කයක්. මෙතෙක් හිටපු කිසිම අපේක්ෂකයකුගෙන්වත් ඉටු නොවුණ දේ ඔවුන් මගෙන් තමයි මෙවර බලාපොරොත්තු වෙන්නේ. වන්නියේ දරැවන් රටේ හොඳ තැනකට ගෙනැවිත් වන්නියේ දරැවන් වෙනුවෙන් ඔවුන්ගේ අනාගතය සුරක්ෂිත කරන එක තමයි මගේ එකම අරමුණ. මම අනිවාර්යයෙන්ම ඒක කරනවා.
ඉස්ලාම් අන්තවාදීන්ට උදව් කළේ රාජපක්ෂ පාලනයයි
සමගි ජන බලවේගයේ කොළඹ දිස්ත්‍රික් අපේක්ෂක පාඨලී චම්පික රණවක
අලුත් පක්ෂයට තිබෙන එකම අභියෝගය ආණ්ඩුවට වඩා එක්සත් ජාතික පක්ෂය නේද?
සමගි ජන බලවේගය හදන්න එජාප කෘත්‍යාධිකාරී මණ්ඩලයේ අනුමැතිය සජිත් ප්‍රේමදාස මහත්තයාට තියෙනවා. ප්‍රායෝගිකව ගත්තහම එජාපයේ සාමාජිකයෝ සමගි ජන බලවේගයත් එක්ක ඉන්නේ. අනික මේක හදලා තියෙන්නේ එජාපය මූලික කරගෙන නෙමෙයි. සෙසු සියලුම පක්ෂ හා බලවේග එකතුවෙලා. මේ හදලා තියෙන්නේ කෙළින්ම රාජ්‍ය බලය අල්ලගන්න. ආණ්ඩුවට එරෙහිව ජනබලයක් ගොඩනගලා අලුත් ආණ්ඩුවක් බිහිකරන්නයි අපේ අරමුණ. එහෙම නැතිව එජාපයට විරැද්ධව කිසිම සටනක් නැහැ. මොකද එජාපයේ සියලුදෙනා ඉන්නේ අපිත් එක්ක.
සජිත් ප්‍රේමදාස එජාපයෙන් කඩලා එළියට ගත්තේ පාඨලී චම්පිකගේ උසිගැන්වීම මත කියලා චෝදනාවක් තිබෙනවා. ඒක ඇත්තද?
සජිත් ප්‍රේමදාසට නායකත්වය දෙන්න ඕන ඒ වගේම රනිල් වික්‍රමසිංහ මහත්තයා ඉවත් කරන්න ඕන කියලා සටන පටන් ගත්තේ 2005 ඉඳන්. ඔය අවුරැදු 15ක තිබුණ වේදනාව තමයි පසුගියදා පුපුරලා එළියට ගියේ. සජිත් ඕන කියලා කිව්වේ එජාප අභ්‍යන්තරය. ඒ අභ්‍යන්තරයෙන් ආපු ඉල්ලීම මත තමයි සජිත් ජනාධිපතිවරණයට එන්නේ. අන්න ඒ අභ්‍යන්තරයෙන් ආපු යෝජනාව ඇත්තටම රටට හොඳයි. ඇත්තටම රටට හොඳ නායකත්වයක් දැන් අවශ්‍යයි. රට විනාශ කරලා බැංකු මංකොල්ල කාලා විවිධ චෝදනා මත සිටින එජාපයකට වඩා අලුත් කණ්ඩායමක් තමා දැන් රටට අවශ්‍ය වෙලා තිබෙන්නේ. අන්න ඒ කණ්ඩායම තමයි දැන් පිහිටුවලා තියෙන්නේ. එය පිහිටුවන්න අපිටත් ආරාධනා කළා. ඒ වගේම කියන්න ඕන විවිධ චෝදනා තිබෙන බැංකු හොරැ වංචාකාරයෝ උත්සාහ කළා සජිත්ව තියාගෙන සජිත්ගේ ජනප්‍රියතාවයෙන් දිනන්න. අන්න ඒ බලාපොරොත්තු කඩවීම නිසා තමයි අපට ඔය චෝදනාව එන්නේ.
චම්පික කියන්නේ බෞද්ධ ඡන්දවලින් බෞද්ධයන්ට නායකත්වය දෙන්න ආපු නායකයෙක්. හැබැයි ඔහු කාලයක් එජාපයේ හිටියා. දැන් සජිත් ගාව ඉන්නවා. එජාපයේ අයට චෝදනාවක් තිබෙනවා බෞද්ධාගම විනාශ කළා කියලා. එහෙම තත්ත්වයක චම්පිකට දැන් බෞද්ධ පදනම තිබෙනවාද?
අපි බෞද්ධ පදනම මත හැදුණු කණ්ඩායමක්. සමානාත්මතාවය, දුකට පත්වූ අයට උදව් කිරීම වගේ ශිෂ්ඨාචාරයත් එක්ක බැඳුණු පාලනයක් අපට තිබෙන්නේ. එදා අපි එජාපයට එකතුවුණේ ප්‍රජාතන්ත්‍රවාදය උදෙසා. මොකද ඒ වනවිට තිබුණා පවුල් පාලනයක් ගෙනයාමට පුළුවන් දුෂ්ඨ ක්‍රමයක්. අන්න ඒක පරාජය කරන්න තමා අපි ඉදිරිපත් වුණේ. එහෙත් අපිත් එක්කත් හිටියා බෞද්ධ විරෝධී සහ සිංහල විරෝධී අදහස් ශරීරයට කාවැදුණු අය. ඒ වගේම නොගැලපෙන ආර්ථික ක්‍රමවලට යටවෙලා කොටු වුණු අය. අන්තිම පල් වංචනිකයොත් හිටියා. ඒ පිරිස නිසා ඔබ කිව්වා වගේ අපේ ජන පදනමටත් හානියක් සිදුවුණා. ඒ නිසයි අපිට ඒ ආපු ජනතා බලය ඉදිරියට ගෙනියන්න බැරිවුණේ. හැබැයි සමගි ජනබලවේගයේ එවැනි කණ්ඩායමක් නැහැ. ඒ වගේම කියන්න ඕන අපේ දැක්ම බෞද්ධ නොවන නායකයොත් මේ වනවිට පිළිඅරගෙන තිබෙනවා.
මේ වනවිට පාස්කු ප්‍රහාරයෙන් පස්සෙත් හරීන් ප්‍රනාන්දු මන්ත්‍රීවරයාගේ ප්‍රකාශත් නිසා කතෝලික ජනතාවගේ හිත් බිඳිලා තිබෙනවා?
ලෝකය පුරා ඇතිවෙලා තිබෙන ඉස්ලාමීය මූලධර්මවාදී පිබිදීම නිසා ලෝකය පුරාම ආගමික මතවාද කේන්ද්‍ර කරගත් ජනප්‍රිය දේශපාලන මතවාදයන් ඉස්මතුවෙලා තිබෙනවා. ඇමෙරිකාවත් ක්‍රිස්ත්‍රියානි මූලධර්ම තුළ පිහිටලයි කටයුතු කරන්නේ. ජර්මනියෙත් එහෙමයි. බ්‍රිතාන්‍යයෙත් එහෙමයි. ඉන්දියාව ගත්තාම හින්දු මූලධර්මවාදයට අන්තයි. හැබැයි ඔය තත්ත්වය ලංකාවෙත් ඇතිවේගෙන යනවා. ඇත්තටම පාස්කු ප්‍රහාරය නම් ඇතිවුණේ ඉස්ලාම් අන්තවාදීන් සුළු පිරිසක් නිසා. ඔය අන්තවාදී පිරිසට ඇත්තටම උදව් කළේ රාජපක්ෂ පාලනය. ඒ අයට ඕනෑ වුණේ මධ්‍යස්ථ මුස්ලිම් බලධාරීන් මර්දනය කරන්න. ඒකයි මේ ප්‍රශ්නය ඉතාමත් පරිස්සමෙන් හඳුනාගන්න ඕන.
ඔබලා හිතනවා දිනන්න. එජාපයත් හිතනවා දිනන්න. ආණ්ඩුව දිනන එකටත් එහා ගිහින් තුනෙන් දෙකක් බලාපොරොත්තු වෙනවා. ඔබ හිතන්නේ මොකක්ද ඒ ගැන?
ඔය තුනෙන් දෙක බලාපොරොත්තු වෙන්නේ මහින්ද රාජපක්ෂ මහත්මයාට බලය ඉවත් කරලා ගෝඨාභය රාජපක්ෂ මහත්මයාට බලය පවරන්න හදන කණ්ඩායමක්. කවද හරි හැබැයි ඔය කණ්ඩායම ගෝඨාභය රාජපක්ෂ මහත්මයාටත් ඔය වැඩේම කරනවා.
ජනතාවගේ ප්‍රශ්න කතා කරන්නේ එජාපය පමණයි
නුවරඑළිය එක්සත් ජාතික පක්ෂ අපේක්ෂක කේ.කේ. පියදාස
මොකද ඔබ දිගින් දිගටම අලියා තෝරගන්නේ?
අලියා තෝරා ගත්තේ මේක අභිමානවත් පක්ෂයක්. ඩී.එස්. සේනානායක මැතිතුමා සියලු ජාතින් එකතුකරලා තමයි මේ පක්ෂය හැදුවේ. මහා දැවැන්තයන් මේ පක්ෂය නියෝජනය කළා. මට පාර්ලිමේන්තු එන්න වරම් ලැබුණේ මේ පක්ෂය නිසා. ඒ නිසා මේ පක්ෂය එක්ක ඉන්න ඕන කියන මතයේ මම දිගටම හිටියා.
ජනතාව මෙවර මහ මැතිවරණයේදී අපේක්ෂකයන්ගේ වෙනසක් බලාපොරොත්තු වුණා නේද?
ඔව් වෙනසක් බලාපොරොත්තු වුණා. පක්ෂයක් ලෙස අපි නවකයන් මෙවර මැතිවරණයට ඉදිරිපත් කරලා තියෙනවා. ඒ වගේම පැරුණි අපේක්ෂයන් රුසක් මෙවරත් එජාපයෙන් තරග වදිනවා. අත්දැකීම් තිබෙන පිරිසකුත් තරග කරන්න අවශ්‍යයි. අපි කවදාවත් දේශපාලනයේ නම කැත කරගෙන නැහැ. ඒ වගේම පක්ෂයට විරැද්ධව වැඩකරලත් නැහැ. ඇතැමුන් වාසි බලාගෙන මැතිවරණවලට ඉදිරිපත් වෙනවා ඇති. නමුත් මම එහෙම නැහැ. මම හැමදාම ජනතාව එක්ක හිටපු මිනිහෙක්
දැන් සමගි ජන බලවේගයේ නායක සජිත් කියනවා සිරිකොත අල්ලනවා කියලා. එක්සත් ජාතික පක්ෂයේ රනිල් කියනවා අරලියගහ මන්දිරය අල්ලනවා කියලා. රටේ ජනතාවට තිබෙන මූලික ප්‍රශ්න මේවාද? ජනතාවට වෙන ප්‍රශ්න නැද්ද?
ජනතාවගේ ප්‍රශ්න අද වෙනකොට කථා කරන්නේ එක්සත් ජාතික පක්ෂය විතරයි. වෙන අය කවුරැත් ජනතා ප්‍රශ්න ගැන කථාකරන්නේ නැහැ. රනිල් වික්‍රමසිංහ මහත්තයට අරලිය ගහ මන්දිරය අල්ලන්න වුවමනාවක් නැහැ. එතුමා එතැන හිටියනේ දේශපාලන වේදිකාවේ කියන කථා සමහරැ ලොකුකරලා තමයි කියන්නේ. දැන් මේ දේශපාලන වශයෙන් මොනවත් කරන්න බැරි වුණාම නායකත්වයට ගහන එක තමයි පුරැද්දට ගිහින් තියෙන්නේ. මමත් කාලයක් තිස්සේ පක්ෂයේ ඉන්නවනේ. සජිත් මහත්තයට සිරිකොත අල්ලන්න වුවමනා නැහැ. එතුමාත් කාලයක් හිටියනේ සිරිකොතේ. එතුමාලා වෙනම ප්‍රතිපත්තියක හිටිය නිසා තමයි එතුමාට සිරිකොත අහිමිවුණේ. ජනතාව එක්ක ඉන්නව නම් ඔය කිසි ප්‍රශ්නයක් නැහැනේ.
2019 ජනාධිපතිවරණයේ එකට ඉඳලත් දිනන්න බැරිවුණ ඔබලා දෙකට බෙදිලා මහ මැතිවරණයට ගියාම ජනතාව ඡන්දය දෙයි කියලා හිතනවද?
එක්සත් ජාතික පක්ෂය කවදාවත් දෙකට බෙදිලා නැහැ. සැබෑ එක්සත් ජාතික පාක්ෂිකයන් දන්නවා එක්සත් ජාතික පක්ෂය තියෙන්නේ කොතැනද කියලා. දැන් 2019 ආණ්ඩුව පේදුරැතුඩුවේ සිට දෙවුන්දරතුඩුව දක්වා ඇමරිකාවට විකුණනවා කියලා කිව්වා. ජාතිවාදය ඇවිස්සුවා. ඒ වගේම සජිත් ප්‍රේමදාස මහතාත් බලෙන් වගේනේ අගමැති අපේක්ෂකත්වයට ආවේ. නමුත් රනිල් මැතිතුමා ඒකට අවස්ථාව දුන්නා. එහෙම කරලා අන්තිමට කකුලෙන් ඇද්දා කියලා කියනවා. නමුත් වුණේ මොකකද කියලා රටේ ජනතාව දන්නවා.
වර්තමාන ආණ්ඩුව අතට අහුවෙන සෑම අවස්ථාවකම හිටපු යහපාලන ආණ්ඩුවට පහර ගහනවා. කෝ ඔබතුමාලාගේ පක්ෂයෙන් ඒකට කිසිම උත්තරයක් නැහැනේ?
එක්සත් ජාතික පක්ෂයේ අය විතරක් නෙවෙයිනේ යහපාලනයේ හිටියේ. දැන් ආණ්ඩුවට හේත්තුවෙලා ඉන්න අයත් ඒ යහපාලනයේ හිටියා. ඒ යහපාලනයේ හිටපු ඇතැම් පිරිස් නිසා තමයි අපිට සමහර අණපනත් සම්මත කරගන්න බැරිවුණේ. චෝදනා කරන්න පුළුවන් ඕනෑම අයෙකුට. නමුත් ඔය චෝදනා කරපු අය යහපාලනයෙන් කරපු වැඩ ගැන කියන්නේ නැහැනේ.
සක්‍රීය දේශපාලනයේ නියැලුණු අයකු ලෙස මෙවර මහ මැතිවරණයේදී ඔබ ජනතාවට දෙන පොරොන්දුව මොකක්ද?
යහපාලන ආණ්ඩුව කාලයේ අපි කරගෙන ආපු වැඩපිළිවෙළ මේ වනවිට නතරවෙලා තිබෙනවා. අපි ඒ වැඩපිළිවෙළ ඉදිරියට ගෙනියන්න බලාපොරොත්තු වෙනවා. ජනතාවට තිබෙන සියලු ප්‍රශ්නවලට විසඳුම් දෙන්නත් වතුකරයේ දමිළ ජනතාවගේ ප්‍රශ්න විසඳා ජීවන තත්ත්වය නගා සිටුවීමටත් අපි බලාපොරොත්තු වෙනවා.
අනුරාධපුරෙන් 7ක් මෙදා පාර මැතිසබේට
ශ්‍රී ලංකා නිදහස් පොදුජන සන්ධාන අනුරාධපුර දිස්ත්‍රික් අපේක්ෂක දුමින්ද දිසානායක
ශ්‍රී ලංකා නිදහස් පක්ෂය සන්ධානගත වුණාට පොහොට්ටුවේ අය ශ්‍රී ලංකා නිදහස් පක්ෂයේ අයට බනිනවා. ඇත්තටම ශ්‍රීලනිපයට කෙනහෙළිකම් වෙනවා නේද?
සාමාන්‍යයෙන් පාර්ලිමේන්තු ඡන්දයකදී එක පක්ෂයක අය පවා රණ්ඩු සරැවල් වෙනවා. නමුත් අපි සන්ධානයක් හැටියට ගෝඨාභය රාජපක්ෂ මහත්මයා ගැන විශ්වාසය තියලා එතුමා වෙනුවෙන් ජයග්‍රහණය උදෙසා අපි මේ වෙනකොට ඡන්ද ව්‍යාපාරය කරගෙන යනවා. විශේෂයෙන් තමන්ගේ මනාපය වෙනුවෙන් ඔය වගේ කියන කතාවලට පක්ෂයක් හැටියට උත්තර දෙන්න යන්නෙ නෑ.
දුමින්ද දිසානායක ඉස්සර වගේ නෙවෙයි. දැන් නිහඬයි. මොකද දුමින්ද කැපිල්ලකට අහුවෙලාද?
දුමින්ද දිසානායක කාගෙවත් කැපිල්ලකට ලක්වෙලා නෑ. අපේ ආණ්ඩුවේ 2/3 හදාගන්න අනුරාධපුරෙන් හතක් යවන්න දුමින්ද දිසානායක මේ වෙනකොට වැඩ කරගෙන යනවා.
දුමින්ද දිසානායක අනුරාධපුරෙන් හතක් යවන්න කියන්නේ ඇයි අනිත් පක්ෂ මැරිලද?
පැහැදිලිවම අපි අනුරාධපුරෙන් 7ක් පාර්ලිමේන්තුවට යනවා මේ පාර. අනිත් පක්ෂ අපිට අභියෝගයක් නෙවෙයිනේ.
අලුත් සන්ධානයේ සමහර අය චෝදනා කරනවා මෛත්‍රීපාල සිරිසේන මහත්මයා එක්ක ගමනක් නෑ ශ්‍රීලනිපය ඕන 2/3 හදාගන්න විතරයි කියලා. ඇත්තටම තමන්ගේ නායකත්වය එහෙම විවේචනයට ලක්වෙමින් එකට ඉන්න පුළුවන්ද?
එහෙම විවේචනයක් නෑ. මොකද ශ්‍රී ලංකා නිදහස් පොදුජන සන්ධානයේ සභාපති එතුමා. ඒ නිසා අමුතු විවේචන, අමුතුවෙන් රුකගන්න උවමනා නෑ.
විපක්ෂයෙන් චෝදනා කරනවා ආණ්ඩුව කෝවිඩ් 19 ඡන්ද ව්‍යාපාරයේ කොටසක් බවට පත්කරගෙන කියලා?
ඇත්තටම ආණ්ඩුවට ඒ ප්‍රශ්නෙ බරක්. හේතුව මොකද විශාල අභියෝගයක් වුණා ඒක මර්දනය කිරීම. අපිට ඒකෙන් දේශපාලන වාසියක් අමුතුවෙන් ගන්න ඕන නෑ. දේශපාලනය කරන්න යන්නෙත් නෑ එවැනි තත්ත්වයකින්. අපිට උවමනාව තියෙන්නේ ආර්ථිකය ගොඩනගලා ජනතාවට අවශ්‍ය පහසුකම් ටික ලබාදෙන්න.
විපක්ෂයෙන් චෝදනා කරනවා නැවත ඔබලා බලය ඉල්ලන්නේ සුපුරැදු දූෂණ වංචා සිදුකරලා ගසාකෑම් සිදුකරන්න කියලා. ජනතාව ගැන කිසිම කැක්කුමක් නෑ කියලත් ඔවුන් චෝදනා කරනවා.
අපි ජනතාවට කියනවා ගෝඨාභය රාජපක්ෂ මහත්මයා ගැන විශ්වාසය තබලා අපට ඡන්දෙ දෙන්න කියලා. මේ වර්තමානයේ ඇතිවෙලා තියෙන තත්ත්වය අපි බලාපොරොත්තු වුණ තත්ත්වය නෙවෙයි. ඒත් අගෝස්තු 5 වැනිදායින් පස්සේ අපි අලුතින් හදන ආණ්ඩුවත් එක්ක ජනතාව වෙනුවෙන් කැප වෙන, ජනතාව වෙනුවෙන් වැඩ කරන කණ්ඩායමක් හදනවා කියලා.
හැබැයි විපක්ෂය කියන්නේ ඔය 2/3 ඉල්ලන්නේ ඒකාධිපති පාලනයට අරන් යන්න කියලා.
එහෙම කිසිම දෙයක් නෑ. අපිට තියෙන්නේ 2/3 බලයත් එක්ක රට නැගිටවීමේ අරමුණක්. ඒ නිසා ඒ ගැන බයවිය යුතු නෑ.
අවසාන වශයෙන් අහන්නේ ඔබ අනුරාධපුරේ බර්ටිගේ පුතා. බර්ටිගේ පුතා එක්ක තරග කරන්න මේ පාර අලුත් කණ්ඩායමක් ඉන්නවා. හැමපාරම වගේම මේ පාරත් උඩින්ම එන්න පුළුවන් වෙයි කියලා හිතනවද?
බර්ටිගේ පුතාට කිසිම වෙලාවක අනුරාධපුරෙන් බලපෑමක් නෑ. අනුරාධපුරේ මිනිස්සුන්ට බර්ටිගේ පුතා ගැන විශ්වාසයි.
හසිත් අංජන / ගයාන් ගාල්ලගේ