ප්‍රබල විපක්ෂයක් නැතුව මොන සටන්පාඨද?

 

පොදුජන පෙරමුණේ මාතර දිස්ත්‍රික් පාර්ලිමේන්තු අපේක්ෂක  හිටපු අමාත්‍ය ලක්ෂ්මන් යාපා අබේවර්ධන

මාතර දිස්ත්‍රික්කයේ නේද ලංකාවේ වැඩිම මනාප පොරයක් තියෙන්නේ. කොහොමද ඔලුව උස්සන්නේ?
මාතර දිස්ත්‍රික්කයේ පොදුජන පෙරමුණට තිබෙන ඡන්ද ප්‍රතිශතය ගොඩක් වැඩියි. ඒ නිසා මාතර දිස්ත්‍රික්කයට තේරෙන මන්ත්‍රිවරැ සංඛ්‍යාවත් වැඩියි. එතකොට මේ ලැයිස්තුවේ දහදෙනාම උත්සාහ කරනවා මනාප සංඛ්‍යාව ගන්න. මොකද මාතරට ශක්තිමත් විපක්ෂයක් ඇත්තෙත් නැහැ. එතකොට මේක මනාප සටනක් බව පේනවා. ඇත්තටම තාත්තයි පුතයි ඉල්ලුවත් අයියයි මල්ලියි ඉල්ලුවත් මේක සාමාන්‍ය දෙයක්.

මේ මැතිවරණයේදී ඔබලාගේ පක්ෂයේ අලුත් සටන් පාඨ මොනවත් නැහැ නේද? පරණ සටන් පාඨම තමයි දකින්න තියෙන්නේ?
නැහැ. අපි සෞභාග්‍යයේ දැක්ම වැඩසටහන ක්‍රියාත්මක කිරීමට තමයි මේ ජනවරම ජනතාවගෙන් ඉල්ලා සිටින්නේ. එතකොට අපිට සටන් පාඨයක් අවශ්‍ය වෙන්නේ නැහැ. මොකද හේතුව අපි ජනාධිපතිවරයා තෝරා පත්කරගෙන අවසන් මේ වනවිට. දැන් අපිට තියෙන්නේ ජනාධිපතිවරණයේ ඉදිරිපත් කරපු ඒ දැක්ම ක්‍රියාවට නංවන්න. ඒ වෙනුවෙන් අපිට පාර්ලිමේන්තුව තුළ තුෙනන් ෙදකක බලයක් අවශ‍්‍ය වෙනවා. සටන් පාඨ දෙන්න ප්‍රබල විපක්ෂයක් ඉන්න ඕන. අද වෙනකොට රටේ ප්‍රබල විපක්ෂයක් නැහැ.

පොහොට්ටුව පක්ෂයේ ප්‍රබල චරිතයක් වන ප්‍රසන්න රණතුංග දිගින් දිගටම ශ්‍රිලනිපයට පහර ගහනවා. මේ වගේ තත්ත්වයක් යටතේ කොහොමද තුනෙන් දෙකක් ගන්නේ?
පෞද්ගලිකව යම් යම් සිද්ධීන් ඇතිවෙන්න පුළුවන්. ඒවා මහ ලොකුවට හිතන්න දෙයක් නැහැ. ඒවා දේශපාලනයේ සාමාන්‍ය දේවල්. නමුත් ලොකු ගැටලුවක් නැහැ. දැන් විපක්ෂය දෙකට බෙදිලා ඉන්නේ. ඔවුන් තමයි එකිනෙකාට කුළල් කා ගන්නේ. ඒ වගේම වත්මන් රජය කොවිඩ් වසංගතය සාර්ථකව පාලනය කළා. ඒ වෛරසයෙන් මුළුරටම බේරා ගත්තා. ජනතාව ඒ කළගුණ ඉටුකරන්න බලන් ඉන්නවා. මේ මැතිවරණයේදී ඒ වගේම වත්මන් ජනාධිපතිවරයාගේ රාජ්‍ය පරිපාලනය යට සැඟවී ඇති ඡන්දයක් තිබෙනවා. ජනතාව අතර එහෙම වුණාම තුනෙන් දෙකක් ලබාගන්න එක අපිට අභියෝගයක් නෙවෙයි.

ඔබලා මොන දේ කිව්වත් ඒ කියන දේවල් කරන්න රටේ ආර්ථිකය ශක්තිමත් වෙන්න ඕන. රටේ පවතින තත්ත්වය එක්ක ඔබලා කොහොමද ඔය කියන වැඩකටයුතු කරන්නේ?
දැන් හැමෝම කියනවා රටේ ආර්ථිකය කඩාවැටිලා කියලා. නමුත් මේ වනවිට ලංකාවේ, ආසියාවේ විතරක් නෙවෙයි මුළු ලෝකයේම ආර්ථිකය කඩා වැටිලා. ඒකට ප්‍රධානතම හේතුව තමයි මුළු ලෝකයටම බලපෑව කොරෝනා වසංගතය. රට වැටිලා තිබෙන තත්ත්වයෙන් ගොඩඑන්න අපි මැතිවරණයෙන් පස්සේ සියලුම කටයුතු ක්‍රියාත්මක කරනවා. අපේ අපනයනයන් දියුණු කරනවා. වගා සංග්‍රාමයක් අරඹලා රට ස්වයංපෝෂිත කරන්න අපි බලාපොරොත්තු වෙනවා. කොහොමත් මේ රට ගොඩනැගීමේ උපාය මාර්ග තිබෙන්නේ අප සතුව පමණයි.

ඔබ මෙවර ජනතාවට ලබාදෙන  විශාලතම පොරොන්දුව මොකක්ද?
දේශපාලකයෙක් ලෙස ජනතාව රවටන පොරොන්දු මම කිසිදිනක ලබාදී නැහැ. වර්තමාන ජනාධිපති ගෝඨාභය රාජපක්ෂ මැතිතුමාට අවශ්‍ය කරන පාර්ලිමේන්තුවක් නිර්මාණය කරලා දෙන්න කියලා තමයි මම කියලා තියෙන්නේ. ගහමරා ගන්න, පාර්ලිමේන්තුවට බන්ධනාගාර බසයෙන් එන පිරිසක් නෙවෙයි,ජනතාවට වැඩක් කරන පිරිසක් පාර්ලිමේන්තුවට එවන්න ඕන පසුබිමක් නිර්මාණය කරන්න කියන එක තමයි මම ජනතාවගෙන් ඉල්ලා සිටින්නේ.

I හසිත් අංජන

 

අපට ගහන්න ගහන්න අපි ශක්තිමත් වෙනවා

 

සමගි ජනබලවේගය ජාතික සංවිධායක රංජිත් මද්දුමබණ්ඩාර

එක පැත්තකින් ඔබ තරග කරනවා. අනිත් පැත්තෙන් එජාපය. ඔබ දෙගොල්ලො අභියෝග කරගන්නවා මිසක් ආණ්ඩුවට අභියෝගයක් වෙන පාටක් නෑ. මොකද ඒ?
අපිට කවුරුත් අභියෝගයක් නෙවෙයි. විශේෂයෙන් එජාපයේ සුළුතර කණ්ඩායම විශේෂයෙන්ම අභියෝගයක් නෙවෙයි. අපිට අභියෝගය තියෙන්නේ පොදුජන පෙරමුණත් එක්ක. එහෙම නැතුව ඔය එජාපයේ සුළුතරයක් එක්ක කොහෙත්ම අපිට අභියෝගයක් නෑ. 

හැබැයි ඒ පැත්තෙ අය වැඩියෙන්ම ගහන්නේ ඔබලටනේ. මොකද්ද ඒ ගැටලුව?
අපි ප්‍රබලයෝ වෙනකොටනේ ඒ අය ගහන්නේ. ඒ අයගේ ඡන්ද පදනම අඩු වෙනකොට ඒ අය අපිට ගහනවා. ඒ අය ගහන්න ගහන්න අපේ ඡන්ද පදනම ශක්තිමත් වෙනවා. ඒ නිසා ඒ කණ්ඩායම මේ රටේ ප්‍රතික්ෂේප කණ්ඩායමක්.

ඔබලා එජාපයෙන් ඉවත් වුණාට එජාපයේ තැන රැකගන්න නඩු මගට ගියා. නඩුවත් පරාදයි. මොකටද දාලා ආපු එකක් ආයෙ අල්ලගන්න හදන්නේ?
අපි උසාවියෙන් පරාජය වෙලා නෑ. උසාවියෙන් අපට වාරණ නියෝගයක් දුන්නෙ නෑ. අතුරු තහනම් නියෝගයක් සඳහා තවම නඩුව පවතිනවා. ඒ අය දැන් නොයෙක් නොයෙක් දේවල් කියනවා. මොකද පරදින බව දන්න නිසා.

ඇයි ඔබ එජාපයේ අය සුළුතර කණ්ඩායමක් හැටියටද සලකන්නේ? ඒ අයටත් කට්ටිය ඉන්න නිසානේ ඡන්දෙට යන්නේ?
පසුගිය ආණ්ඩුවේ පහළොස්දෙනයි ඒ පැත්තේ ඉතුරු වෙලා ඉන්නේ. අසූවක් ඉන්නේ අපිත් එක්ක. ඒකයි සුළුතර කණ්ඩායම කියන්නේ. 

කවදහරි එජාපය හිමිවෙන්න ඕන සුළුතර කණ්ඩායමටද නැත්නම් බහුතර කණ්ඩායමටද?
ජනතාව තීන්දු කරයි ඇත්තටම කාටද අයිති විය යුතු කියලා. ලබන 5 වැනිදා වැඩියෙන්ම කාටද කැමති කියලා ජනතාව පෙන්නුම් කරයි.

ආණ්ඩුව ඉල්ලනවා 2/3ක බලයක්. ඔබලා ජයග්‍රහණයක් ඉල්ලනවා. ආණ්ඩුව 2/3ක්ම ඉල්ලන්නේ ජයග්‍රහණය ගැන සැකයක් නැති නිසා නේද?
මේ රටේ ඡන්ද ක්‍රමය අනුව කාටවත් 2/3 ගන්නත් බෑ. 2/3ක් දෙන්නෙත් නෑ. ඒ අය උත්සාහ කරන්නේ ආණ්ඩුක්‍රම ව්‍යවස්ථාව වෙනස් කරන්න. නැවත ස්වාධීන කොමිෂන් සභා අහෝසි කරලා සුපුරුදු ඒකාධිපති පාලනයකට යන්න. එදා ජනාධිපති ගැන විශ්වාස කරලා ඡන්දෙ දුන්න මිනිස්සු අද කලකිරිලා අපිත් එක්ක එකතු වෙලා ඉන්නවා. 

ආණ්ඩුවෙන් මේ දවස්වල ගේන චෝදනාව තමයි ගිය ආණ්ඩුවේ වැරදි පරිපාලනය නිසා අද වෙනකොට උග්‍ර ආර්ථික අර්බුදයකට මුහුණ දෙන්න වෙලා කියන එක?
ආණ්ඩුවට බැරිනම් බැරි දේ නොකියා අපිට දොස් කියලා වැඩක් නෑ. අපි මිනිස්සුන්ට සහනයක් වුණානම් පඩි වැඩි කළානම් ආර්ථික බරෙන් නිදහස් කරන්න ජනතාව තීන්දු කරයි අපිට ආණ්ඩුව නැවතත් අපිට බාරදෙන්න. 

ඔබලගේ ආණ්ඩුවේ නායකයෝ දෙන්නා ඉන්නේ දැන් දෙපැත්තේ. මෛත්‍රීපාල මහත්තයත්, රනිල් වික්‍රමසිංහ මහත්තයත් දැන් ඉන්නේ ඔබලාට විරුද්ධව. විරුද්ධ කණ්ඩායම් දැන් වැඩියි නේද?
බලන්න පුළුවන්නේ මෛත්‍රීපාල මහත්මයත් එක්ක කීදෙනෙක් ඉන්නවද රනිල් වික්‍රමසිංහ මහත්මයත් එක්ක කීදෙනෙක් ඉන්නවද කියලා. අද රටේ බහුතරයක් ඉන්නේ සජිත් ප්‍රේමදාස මහත්මයත් එක්ක. ජනතාවට අවශ්‍ය වෙලා තියෙන්නේ රටට ආදරේ කරන වංචාවෙන් තොර පාලකයෝ ටිකක්. ඒකතමයි මේ හොඳම කණ්ඩායම.

ජනතාව හොයන්නේ උගත් බුද්ධිමත් අවංක කණ්ඩායමක්. දැන් ඒ කණ්ඩායම කොයි පැත්තෙද ඉන්නේ?
දැන් පේනවා ඇති අපිත් එක්ක හිටිය සහ පහුගිය ආණ්ඩුවල හිටිය කට්ටිය කොතනද ඉන්නේ කියලා. ඒ අයට තියෙන චෝදනා මොනද කියන එක. ඒ නිසා හොඳම සහ පිරිසිදු කණ්ඩායම් ඉන්නේ අපිත් එක්ක. ඒ ගැන අමුතුවෙන් තර්ක කරන්න උවමනාවක් නෑ.

I ගයාන් ගාල්ලගේ

 

අපි කරපු වැඩ කොටස මේ ආණ්ඩුවටවත් එදා කරන්න බැරිවුණා

 

එක්සත් ජාතික පක්ෂ කෑගල්ල දිස්ත්‍රික් පාර්ලිමේන්තු අපේක්ෂක සන්දිත් සමරසිංහ

එජාපය දෙකට කැඩිලා ඡන්දෙට ගිහින් රටේම යූඑන්පී පාක්ෂිකයන්ගේ කොන්ද කඩල නේද තියෙන්නේ?
එක්සත් ජාතික පක්ෂය දෙකට කැඩිලා නැහැ. නමුත් මේ එජාපය හැරදා ගියපු අය පක්ෂයට විශාල හානියක් කරලා තියනවා. එක්සත් ජාතික පක්ෂයත් එක්ක එක්සත් ජාතික පාක්ෂිකයන් කෙලින් හිටගෙන ඉන්නවා. මීට පෙරත් යම් යම් උදවිය එක්සත් ජාතික පක්ෂය කඩාගෙන ගිහින් තියනවා. නමුත් ආයේම කාලයකට පස්සේ ඔවුන් නැවතත් එක්සත් ජාතික පක්ෂයට එකතු වෙලා තියනවා. එක්සත් ජාතික පක්ෂය කියන්නේ කාටවත් කඩන්න පුළුවන් පක්ෂයක් නෙවෙයි.

යූඑන්පී එකට මෙච්චර ප්‍රශ්න තියෙද්දි කරන්නේ කඩගෙන ගියපු සජිත්ලට පහර දෙන එක නේද? එහෙම කරලා කොහොමද ඔබලා ඡන්ද ගන්නේ?
එක්සත් ජාතික පක්ෂයෙන් ගිය සජිත් මහත්තයා ගැනවත් අනෙකුත් පක්ෂයෙන් ගිහින් සමගි ජන බලවේගය පිහිටුවා ගත් අය ගැනවත් අපිට කථාකරන්න වෙලාවක් නැහැ. ඒ අය තමයි එක්සත් ජාතික පක්ෂයේ ඉන්න අපිට සහ නායකත්වයට දිගින් දිගටම පහර දෙන්නේ. අපි එහෙම කරන්නේ නැහැ. අපි රටේ ජනතාවගේ ප්‍රශ්න ගැන තමයි කතා කරන්නේ. පක්ෂයෙන් ගිය අය ගැන කථා කරන්න යොදවන්න කාලයකුත් අපිට නැහැ.

ඔබලාගේ පක්ෂ නායකයන් මැතිවරණ වේදිකාවල පොරොන්දු ලබාදෙනවා. නමුත් ජනතාව කියන්නේ ඔබලා හිටපු වසර හතරහමාරක කාලය තුළ දැන් කියන කිසි දෙයක් කරන්න බැරිවුණා කියලා. එහෙම තියෙද්දී කොහොමද ජනතාවට මේ පොරොන්දු දෙන්නේ?
අපේ වසර හතරහමාරක කලය තුළ අපි ජනතාවට කරපු දේවල් ගොඩක් තිබෙනවා. කොමිෂන් සභා ස්ථාපනය කළා. මාධ්‍ය නිදහස ඇති කළා. ගම්පෙරළිය මගින් රටේ ගම්මානවලට වැඩකළා. රාජ්‍ය සේවකයන්ගේ වැටුප වැඩි කළා. අත්‍යවශ්‍ය බෙහෙත් වර්ග 48ක මිල අඩුකළා. ජනතාවට සහන ලබාදීලා ජනතාවගේ බදුබර අඩු කළා. වැඩකටයුතු විශාල ප්‍රමණයක් අපි කළා. අපි කරපු තරම් වැඩ කොටසක් වත්මන් ආණ්ඩුව බලයේ ඉන්න කාලයේදිවත් කරන්න බැරිවුණා.

මෙවර මැතිවරණයේ ආණ්ඩුවට 2/3ක් ගන්න ලොකු ඉලක්කයක් තිබෙනවා. ඔබලාගේ එක්සත් ජාතික පක්ෂයට තිබෙන ඉලක්කය මොකක්ද?
ඉලක්කයක් තිබුණට ආණ්ඩුවට 2/3 බලයක් ලබාගන්න අමාරැයි කියන එක මුලින්ම කියන්න ඕන. අපේ පක්ෂයට එක ඉලක්කයක් නෙවෙයි තියෙන්නේ. අපිට ජනතාවගේ සියලු ප්‍රශ්නවලට විසඳුම් ලබාදෙන වැඩපිළිවෙළක් තමයි තියෙන්නේ. එමෙන්ම රටේ දරුවන්ගේ අධ්‍යාපනය නගා සිටුවීමට අපි බලාපොරොත්තු වනවා. රට විදේශයන්ට ණය නොවී රටේ ආර්ථිකය ගොඩගන්න වැඩපිළිවෙළක් අපි සකසනවා. ඒ වගේ ඉලක්ක රාශියක් තිබෙන පක්ෂයක් එක්සත් ජාතික පක්ෂය කියන්නේ.

මැතිවරණය අතළඟ තියාගෙන පක්ෂය ඇතුලේ කුළල් කාගන්න තත්ත්වයක් තිබෙනවා නේද?
අපේ එක්සත් ජාතික පක්ෂයේ ඉන්න පිරිස් වටේ කිසිම කුළල් කා ගැනීමක් නැහැ. අපේ පක්ෂය දෙකට වෙන්කරන්න උත්සාහ දරණ අය තමයි ඔවැනි කථා පතුරුවන්නේ. අපි පක්ෂයක් ලෙස එකට වැඩ කරනවා. ඒ වගේම අපි ආණ්ඩුවත් එක්ක ඩීල් දාන්න යන්නේ නැහැ. කවදාවත් ආණ්ඩුවත් එක්ක ඩීල් දාන යන අය තමයි ඔවැනි කථා පතුරුවන්නේ. එක්සත් ජාතික පක්ෂය ගැන අපේ වැඩපිළිවෙළ අපි කරගෙන යනවා.

I හසිත් අංජන

 

 

ගොටුකොළ ගුණයි කියලා පරිප්පු කන දේශපාලනේ වෙනස් කළ යුතුයි

 

ජාතික ජන බලවේගය මාතර දිස්ත්‍රික් අපේක්ෂක සුනිල් හඳුන්නෙත්ති

පසුගිය ඡන්ද ප්‍රතිඵලත් එක්ක මෙවර ජාතික ජනබලවේගයට විශාල අභියෝගයක් තියෙනවා. මොකද්ද ඔබ දකින ඒ අභියෝගය?
අපිට තියෙන ලොකුම අභියෝගය තමයි මිනිස්සුන්ට අතීතය සිහිපත් කරන එක. මිනිස්සුන්ට දේශපාලන අවබෝධය ලබාදෙන්න ඕන. ඔය රැවටීමේ දේශපාලනය වෙනුවට ඇත්ත දේශපාලනය කියාදෙන එක තමයි අපිට අභියෝගය.

හැබැයි ආණ්ඩුව කියන්නේ ජනාධිපතිතුමාගේ වැඩපිළිවෙළ ඉදිරියට ගෙනියන්න 2/3ක බලයක් ඕන කියලා. එතකොට ජනතාව බලන් ඉන්නේ 2/3 දෙන්නනේ?
දැන් බලන්න ජනාධිපති බලයට එනකොට කිව්වා කවුරු නැති වුණත් එතුමට කරන්න පුළුවන් කියලා. දැන් කියනවා එතුමට වැඩ කරන්න හොඳ ශක්තිමත් කණ්ඩායමක් 2/3 බලයක් එක්ක බිහිකරන්න ඕන කියලා. එතකොට පැහැදිලිව පේනවා මෙතන වෙන්නේ ජනතාව අමු අමුවේ රැවටීමක්. බලන්න පසුගිය අවුරුදු 5 ගත්තම ඔය හිටිය අය කරපු දේවල් එක්ක සසඳද්දි අපි හයදෙනා ඊටවඩා දහස් ගුණයකට වැඩ කරා. එතකොට ජනතාවට මිම්මක් තියෙන්න ඕන ආණ්ඩුවට 2/3ක් දෙනවද නැත්නම් අපි කරපු කාර්යභාරය ඉදිරියට අරගෙන යනවද? අපේ පාර්ලිමේන්තු නියෝජනය ශක්තිමත් කරනවද කියලා.

ඔය කොහොම කිව්වත් ජනතාව ඉන්නේ හොරු, දූෂිතයෝ පාර්ලිමේන්තුවට යවන්න ඕන නෑ කියන අදහසින්. හැබැයි ඡන්දෙකට ගියාම අර බහුතර මතය ඔබලට විරුද්ධව ඉන්නේ. මොකද්ද ඒකට හේතුව?
ඕකනේ ඇත්ත කතාව. මිනිස්සු දැන්වත් තේරුම්ගන්න ඕන හැමදාම පාර්ලිමේන්තු යවලා අරූ දූෂිතයි මූ දූෂිතයි කියනවට වඩා පාර්ලිමේන්තුවේ 225ම ඕනෙ නෑ කියනවට වඩා දූෂිතයෙන් තොර අවංක පිරිසක් පාර්ලිමේන්තු යවන්න. හැබැයි මෙහෙම ප්‍රශ්නෙකුත් තියෙනවා. මිනිස්සු ඡන්දය දෙන්නේ පොඩි පොඩි අරමුණු වෙනුවෙන්. රස්සාවක් ගන්න, පොලීසිවලින් බේරෙන්න, බලය රැකගන්න වගේ කාරණාත් එක්ක. හැබැයි ජනතාවට පොදු ප්‍රශ්නයක් එනකොට ඒ ජනතාවම කියනවා ඇයි විපක්ෂයේ අය කතා කරන්නෙ නැත්තේ කියලා. ශක්තිමත් විපක්ෂයක් නෑ කියනවා. ඊටවැඩිය හොඳ නැද්ද ශක්තිමත් විපක්ෂයකට වඩා දූෂණයෙන් තොර පිරිසිදු පාර්ලිමේන්තු විනය රකින ආණ්ඩුවක් රටට බිහිකරගන්න. ඕකට හොඳ උදාහරණයක් තියෙනවා. විභාගෙට යන ළමයි විභාගෙට උත්තරේ ලියනවා ගොටුකොළ ගුණයි කියලා. හැබැයි ගෙදර ගිහින් කන්නේ පරිප්පු. ඒ වගේම තමයි කැඳ පෝලිමට වඩා අරක්කු පෝලිම දිගයි. කැඳ ගුණයි කියලා දැන දැනම තමයි ඒ පෝලිම අඩු. ඔන්න ඔය පොදු කාරණා මේ සමාජය තුළ තියෙනවා. ඒ නිසා ඕක ඡන්දෙට විතරක් පොදු දෙයක් නෙවෙයි.

ඒ කියන්නේ ජනතාවට දේශපාලන සෙන්ස් එකක් නැද්ද?
ඔව්. මම හැමදාම කියනවා වගේ ජනතාවට අකුරැවල සාක්ෂරතාවය ඉහළ තැනක තිබ්බට ජනතාවගේ දේශපාලන සාක්ෂරතාවය තියෙන්නේ බිංදුවේ. ඒකට හේතුව තමයි මේ මැතිවරණ ක්‍රමයේ ජනතාව පුරුදු කරලා තියෙන්නේ පොරොන්දුවලට නිසා. හැබැයි ඒ පොරොන්දු ඉෂ්ඨ වෙන්නෙ නෑ කියලා දැන දැනම ජනතාව ඒ පොරොන්දු පස්සේ දුවනවා. ඇත්තටම ඡන්දදායකයා දන්නෑ ඡන්දෙ දෙන්නේ මොකකටද කියලා. ඡන්දදායකයා ඡන්දෙ දියයුත්තේ ප්‍රතිපත්ති සම්පාදනයට. ජනතාව හදන්න ඕනේ ලෝ මේකර්ස්ලා හෙවත් නීති සම්පාදකයෝ. එහෙම නැතුව ලයිට් කණු වගේ ඇවිල්ලා අත උස්සන්න නරකයි ජනතාවට.

හැබැයි මේ අලුත් පරම්පරාවත් ඉන්නවනේ මේ රට වෙනස් කරන්න ඕන කියන මතයේ?
කණගාටුයි කියන්න අලුත් පරම්පරාවක් ඉන්නේ අර සාම්ප්‍රදායික දේශපාලන අදහස් තුළමයි. ඒකමයි දුක. අපි හිතනවා අවුරැදු හැට හැත්තෑවක දෙමව්පියන්ට වෙනස් කරන්න බැරි දේශපාලන ක්‍රමය තරුණ පරම්පරාව වෙනස් කරයි කියලා. මොකද නවීන තාක්ෂණයත් එක්ක. ඒත් කියන්න කණගාටුයි ඔවුනුත් දැන් වන්දනාමාන කරන තැනකට පත්වෙලා. ඕක තමයි විවෘත ආර්ථිකයේ මිනිස්සුන්ගේ මොළ විකෘති කිරීමේ තර්කානුකූල ක්‍රමය. අද ඡන්දය තනිකර වෙළෙඳ භාණ්ඩයක් වෙලා.

I ගයාන් ගාල්ලගේ