එජාප පරාජය පිළිගන්න බෑ

එක්සත් ජාතික පක්ෂයේ හිටපු පාර්ලිමේන්තු මන්ත්‍රී පාලිත තෙවරප්පෙරුම

• එජාප නායකත්වයට මාත් සුදුසුයි
• බොරුවෙන් ජීවත් වෙන අය මට පේන්න බෑ
• මගේ දේශපාලනේ සජිත් මහත්තයට විරුද්ධයි
• බාල වැඩ කළ අය තියාගත්ත එක අපේ වැරැද්දක්
• මෙච්චර ඡන්ද ගන්න ආණ්ඩුව මොකද්ද කළේ
• ජරා වැඩ කරන මිනිස්සු එක්ක මට ගමනක් නෑ
• රට හරි පාරට ගත්තේ යහපාලනයයි

මන්ත්‍රීතුමා මොකද මේ යූ.ඇන්.පී එකට වුණේ?

යූ.ඇන්.පී එක එහෙම වෙන්න ඕන පක්ෂයක් නෙවේ. අපි ගියපාර ජනාධිපතිවරණයේදී ලක්ෂ 58ක් විතර ගත්තා. ඒකෙන් ලක්ෂ 15ක් විතර ගෙනාවේ අපේ නායකතුමා උතුරැ නැගෙනහිරින්. එක්සත් ජාතික පක්ෂය මේ වගේ දරැණු පරාජයකට ලක්වෙන්න තරම් තත්ත්වෙකට ඇදවැටිලා නෑ. ඒ නිසා ඒක පිළිගන්න බෑ.

එක්සත් ජාතික පක්ෂයට ඇත්තටම මොකද වුණේ?

අපි පිරිමි කියලා විශ්වාස කරපු කණ්ඩායමක් පක්ෂෙ කඩාගෙන වෙනත් පැත්තකට ගිය එක තමයි පක්ෂෙට වුණේ.

ඒ නිසා පක්ෂෙට මිනිස්සු නැති වුණා?

නෑ. පක්ෂෙට මිනිස්සු නැති වුණා නෙවෙයි. එහෙනම් ඉතින් අපිත් යන්න එපැයි. අපි හිටියනේ. ඒකට හේතු වුණේ මැතිවරණයේදී ලොකු බලපෑම් ටිකක් ආවා. ඒ කොරෝනා කාලේ ඡන්දෙ තිබ්බ නිසා.

පාලිත තෙවරප්පෙරුමටත් යන්න තිබ්බනේ සජිත් එක්ක.

මම පිරිමියෙක්. මම චීත්ත අඳින වැඩ කරන්නේ නෑ. සජිත් මහත්මයත් එක්ක ගියේ ඒ වගේ අය. එක්සත් ජාතික පක්ෂෙ හිටගත්තේ පිරිමි ටික. මට මං ගැන විශ්වාසයක් තියෙනවා. අනික එක පැත්තක් නෙවෙයිනේ

එජාපයට මෙහෙම ඡන්ද අඩු වුණේ ඇයි?

ඇත්තටම මේකට හේතුව තමයි ඡන්දය තිබ්බෙ පස්වැනිදා. ගණන් කළේ ඊට පහුවෙනිදා. ඒක වරදක්.

ඔබ ඔය වටෙන් කියන්න හදන්නේ මේ මැතිවරණයෙන් වංචාවක් වුණා කියලද?

අනිවාර්යයෙන්ම වෙලා තියෙනවා. මේක අපි කාටත් හිතාගන්න බැරි වෙන්න ලස්සන ගේමක් ගැහුවා.

දැන් එතකොට මේක ආණ්ඩුවේ වැඩක් වෙන්න එපැයි. එහෙනම් සජිත්ගේ පැත්තේ අය ඇතුළට ආවේ කොහොමද?

ඒක මෙහෙමයි. ඔයා හිතන්න මෙච්චර ඡන්ද ප්‍රමාණයක් ආණ්ඩුවට එන්න තරම් ආණ්ඩුව මොකද්ද මේ රටට කළේ? සජිත් මහත්තයා අපිත් එක්ක හිටියනම් ඔය 2/3 එන්නේ අපිට. ආණ්ඩුව කොරෝනා වසංගතයත් හරියට අඳුරගත්තෙ නැති කට්ටියක්නේ. මිනිස්සුන්ට හරි සැලකුමක්වත් දුන්නෙ නෑනේ.

ඔය කියන වංචාවක් වුණානම් ඇයි ඔබගේ පක්ෂයේ නායකයෝ ඒ ගැන වචනයක්වත් කතා කරන්නෙ නැත්තේ?

අපි හැමෝම ඒ ගැන සාකච්ඡා කරනවා. අපි මේකේ කොනක් හොයනවා. දැන් මගේම සිද්ධිය බලන්න. මගේ මතුගම ආසනේ කුරැවිල කියලා පැත්තක් තියෙනවා. එතන ඡන්ද මධ්‍යස්ථානේ ඡන්ද හයසිය ගාණක් වැටිලා තිබුණා. හැබැයි කළුතර ගෙනල්ලා පෙට්ටිය හැලුවට පස්සේ එතන තිබ්බේ හාරසිය ගාණයි. දෙසිය ගාණක් අඩුයි. සමහර පෙට්ටිවල දෙක තුන අඩුයි. 

ඔබ ඔය මතුගම ගැන කතා කළාට, මම අහන්නේ මුළු රටෙන්ම එජාපයට ඡන්ද අඩු වුණේ කොහොමද?

ඔයාලා මාධ්‍යවේදීන්නේ. බලන්නකො රටේ සමස්ත ප්‍රතිඵලය එකයිනේ. මම මේ කියන්නේ මගේ අදහස.

ඉතින් ඔබ ඔච්චර දන්නවනම් මේක නීතිමට පැත්තට ගන්න පුළුවන්නේ?

අනේ මට ඔය නීතිය පැත්තට යන්න අවශ්‍ය නෑ. මම කියන්නේ මට දැනෙන දේ.

ඔබ හිතන්නෙ නැද්ද එජාපය බලය තියෙන කාලේ ජනතාව එක්ක තිබුණ ගනුදෙනුව අඩු වීම නිසා මේ තත්ත්වය උදාවුණා කියලා?

මේ තරම් අඩු වෙන්න තරම් එජාපය මිනිස්සුන්ගෙන් ඈත් වෙලා තිබුණේ නෑ. එජාපයට ආව චෝදනාව තමයි හොරැ ඇල්ලුවේ නෑ කියලා. ඉතින් ඒ චෝදනාව දාන මිනිස්සු මේ වගේ හොරුන්ව රජ කරයිද?

සජිත් මහත්මයනම් කියන්නේ එජාප පාක්ෂිකයො ඡන්දෙ දුන්නේ එතුමට කියලා.

(සිනාසෙයි) සජිත් මහත්තයට ලැබුණ ඡන්දයක් නෑ. සජිත් මහත්තයා යූ.ඇන්.පීයට කළේ අපහාසයක්. රටේ ඔයිට වඩා යූ.ඇන්.පී කාරයෝ ඉන්නවා.

හොඳ නැද්ද සජිත් ප්‍රේමදාස එක්ක එකතු වෙලා දේශපාලනය පටන්ගත්තොත්?

මමනම් සජිත් ප්‍රේමදාස එක්ක දේශපාලනය කරන්න කිසිම දවසක යන්නෙ නෑ. මේ කරපු කෙනහෙළිකමට මමනම් ජීවිතේට යන්නෑ. අනිත් කට්ටියනම් කොහොමද දන්නෑ. 

දේශපාලනයේ මිතුරොත් නෑ හතුරොත් නෑ නේද?

ඒක ඇත්ත. හැබැයි පක්ෂෙට ජරා වැඩ කරන මිනිස්සු එක්ක මට ගමනක් නෑ. තමන්ට කිරි දීලා උස්මහත් කරපු පක්ෂයට පයින් ගහලා පැනලා ගිය මිනිස්සුත් එක්ක දේශපාලනය කරන්න බෑ.

ඔබත් කාලයක් කිව්වා නේද සජිත්ට නායකයත්වය දෙන්න කියලා?

කවදාවත් කියලා නෑ. 

ඇයි ඔබ තියන නායකත්වය පිළිගන්නේ? මොකද්ද තියෙන විශේෂත්වය?

මේ තියෙන නායකත්වය අවුරැදු කීපයකට කලින් අයින් වුණානම් අද වෙනකොට ආයෙ ගෙන්නනවා. අනිවාර්යයෙන්ම රනිල් වික්‍රමසිංහ මහත්මයා මේ වෙද්දී  පක්ෂයේ ඉන්නවා.

දැන් මේ ප්‍රශ්නෙත් එක්ක පක්ෂය ඇතුළේ සමහර අය කියනවා මම තමයි පක්ෂෙ නායකත්වයට සුදුසු කියලා? දැන්වත් පිළිගන්නෙ නැද්ද නායකත්වය වෙනස් වෙන්න ඕන කියලා?

මමනම් පිළිගන්නෙ නෑ. එහෙම පිළිගන්නවනම් ඒ හා සමාන නායකයෙක් ඉන්න ඕන. 

වජිර අබේවර්ධන කියනවා නේද පක්ෂ නායකත්වයට ඔහු සුදුසුයි කියලා?

වජිර මහත්මයා කියන්නේ දක්ෂ නිර්මාණශීලී මනුස්සයෙක්. හැබැයි අපි ලෑස්ති නෑ වජිරට විරැද්ධව රවීට අත උස්සන්නවත්, රවීට විරැද්ධව වජිරට අත උස්සන්නවත්. එහෙම අපෙන් බලාපොරොත්තු නොවී වජිර ආවොත් හොඳයි. එහෙම නැතුව අපිට බෑ එකඑක්කෙනාට අත උස්සන්න.

හිතෙන්නෙ නැද්ද පක්ෂය දෙකට කැඩිලා නිසා එජාප පාක්ෂිකයෝ දැන් එජාපයෙන් ඈත් වෙලා කියලා?

අඩුවීමක් තියෙනවා. නමුත් මේ තරම් අඩුවෙන්න විදිහක් නෑ.

අපි දැකලා තියෙනවා පාලිත තෙවරප්පෙරැම මිනිස්සුන්ට බැහැලා උදව් කරන මනුස්සයෙක්. එහෙව් මිනිහා කොහොමද පැරදුණේ?

ඒකනෙ මම කිව්වේ මම ඒක විශ්වාස කරන්නෙ නෑ කියලා. මං ඒ මිනිස්සුන්ට බනින්නෙ නෑ. ඒ මිනිස්සු ඒ තරම් ගුණමකු නෑ.

ඔබ හිතන්නේ පක්ෂය කුමක් කළ යුතුද?

පක්ෂය දැන් එකතු වෙන්න ඕන. පාරට බැහැලා මිනිස්සු එක්ක කතා කරලා පක්ෂය නැවත ගොඩනගන්න ඕන. මිනිස්සු කැමතියි එහෙම වෙනවනම්. දවසටම මට කෝල් එනවා සෑහෙන ප්‍රමාණයක්. ඒ ගැන කියලා.

ඔබ කියන්නේ රනිල් වික්‍රමසිංහ මහත්මයාගේ නායකත්වය යටතේ පක්ෂය නැවත ගොඩනගන්න ඕන කියලද?

දැන් එතුමා පක්ෂයෙන් ඉවත් වෙනවා කියලනේ තියෙන්නේ. 

එතුමා ඇත්තටම පක්ෂයෙන් ඉවත් වෙනවද?

නෑ. එතුමා කිව්වා පක්ෂයෙන් ඉවත් වෙන්න කැමති කෙනෙක් නායකත්වය ඉල්ලන්න කියලා.

ඔබ කියන්නේ එතුමා ඉවත් වෙන්න ඕන නෑ කියලා?

ම්..... අනේ මට තේරෙන්නෑ ඔය කිසි දෙයක්

දැන් ඔබගේ දේශපාලන අනාගතය කොහොමද තීරණේ කරන්නේ?

මම මේක හිතාගෙන ආපු ගමනක් නෙවෙයි. ඉබේම ආපු ගමනක්. මම ගොඩක් මහන්සි වුණා. හැබැයි මම තනතුරු බලාගෙන වැඩ කළේ නෑ. මම හැමදාම තනතුරේ ගෞරවය ආරක්ෂා කරපු මනුස්සයෙක්.

ඔබ කිව්වා නේද නැවත දේශපාලනය කරන්නේ නෑ. දැන් ඇති කියලා?

ඇත්තටම හොඳටම ඇති දැන්. මම මේ පාරත් ඉල්ලන්නෙ නෑ කියලා හිතාගෙන හිටියේ. ඒත් සජිත් මහත්මයා කරපු දේ නිසා ඉල්ලන්න සිද්ධ වුණා.

ඔබ සජිත් ප්‍රේමදාස කණ්ඩායමට විරුද්ධව තමයි දේශපාලනය කරන්න ගත්තේ?

නෑ. මම සජිත් ප්‍රේමදාස මහත්මයට විරුද්ධව තමයි දේශපාලනේ කරන්නේ. 

එහෙම විරුද්ධ අය තව ඉන්නවද ඔබට?

මම අජිත් පී. පෙරේරාට විරුද්ධයි. චම්පිකට විරැද්ධයි. ඔය වගේ විරුද්ධ කණ්ඩායමක් ඉන්නවා මට දිරවන්නෙ නැති.

ඔබ එහෙම විරැද්ධ වෙන්න ඔබට මොනවද කළ අසාධාරණකම්?

නෑ අපි ඇත්ත දකිනවා ඇත්ත විදිහට. ඔය කියන කට්ටිය බොරුවෙන්මයි ජීවත් වෙන්නේ. බොරැව ඇත්ත වගේ රඟපාන එක තමයි අපිට පේන්න බැරි. ඒ වගේම තමයි රාජිත, වෙල්ගමත් මට පෙන්නන්න බෑ. මිනිහෙක්ට ඉස්සෙල්ලා ප්‍රතිපත්තියක් තියෙන්න ඕන.

මේ ඔක්කොටම හේතුව යහපාලන ආණ්ඩුවේ අඩුපාඩු කියලා හිතෙන්නෙ නැද්ද?

අපෝ අඩුපාඩු තිබුණා. ඔය බාල වැඩ කරපු මිනිස්සු තියාගත්ත එකේ වැරැද්ද තමයි. හැබැයි යහපාලන ආණ්ඩුව විශාල වැඩකොටසක් කළා. රට හරි පාරට ගෙනාවේ ඒ ආණ්ඩුව.

දැන් කියන්න එජාපයට හම්බුණ එකම මන්ත්‍රී ධූරයට කවුද පත්කළ යුත්තේ?

රටේ අයුක්තිය අසාධාරණය වෙනුවෙන් කතා කරන්න පුළුවන් ඒ එකම මන්ත්‍රීකම දෙන්න ඕන රනිල් වික්‍රමසිංහ මහත්මයට.

ඔබ සුදුසු නැද්ද ඒ මන්ත්‍රී ධූරයට?

අනේ මටනම් ඒක සුදුසු නෑ. මට ඕවා තේරෙන්නෙත් නෑ. මම දන්නෙ මිනිස්සුන්ට උදව් කරන්න. 

දැන් පක්ෂෙ එකතු කරන්න අදහසක් නැද්ද?

අපි ඒක අනිවාර්යයෙන්ම නිවැරදි කරනවා. 

දැන් සජිත් ප්‍රේමදාස මහත්මයා පක්ෂෙට එකතු වෙලා ගමනක් ගියොත් ඔබ මොකද්ද ගන්න තීරණේ?

අපි මේ කරන්නේ ඒ වැඩේ තමයි. හැමෝම කතා වෙන්නේ ඒ දේ කරන්න. මුල්ම දවසේ ලක්ෂ්මන් විජේමාන්න මහත්මයා තමයි යෝජනා කළේ සජිත් ප්‍රේමදාස මහත්මයා ගේමු කියලා. ඊටපස්සේ තමයි අකිල, දයා ගමගේ, රවී, වජිරලා ඉල්ලන්න ගත්තේ නායකත්වය. දැන් හැමෝම ඉල්ලනවා. ඒ නිසා මාත් ඉල්ලුවා.

ඔබ හිතන නායකත්වය කවුද ඊළඟට පත්වෙන්න ඕන?

රනිල් මහත්මයට බැරිනම් ඊළඟට හොඳම කෙනා කරු මහත්මයා. එතුමා හොඳ බැලන්ස් නායකයෙක්. හැබැයි ඒ වගේම කියන්න ඕන වජිර මහත්මයත් දක්ෂ නිර්මාණශීලී නායකයෙක්. වජිර මහත්මයා කිව්වා ඔය සජිත් මහත්මයා ගාව ඉන්න අය එයාට ගන්න පුළුවන් කියලා.

ඔබට හැකියාවක් නැද්ද නායකත්වය ගන්න?

රවීට වඩා මට හැකියාවක් තියෙනවා ජනතාව එක්ක ගනුදෙනු කරන්න.

ඇයි රවී කරුණානායකව ඔබ උදාහරණෙකට ගත්තේ?

නෑ මම සමස්තයක් හැටියට හැමෝගැනම කියන්නේ මේ. මම කියන්නේ මගේ යුතුකම මට කරන්න පුළුවන්.

ඒ කියන්නේ ඔබ සුදුසුයි නායකත්වයට?

මම සුදුසුයි අනිවාර්යයෙන්ම. එදා හැමෝම නායකත්වය ඉල්ලද්දි මමත් කිව්වා මම සුදුසුයි කියලා. අපිටත් පුළුවන් නායකත්වය දරන්න.

 ගයාන් ගාල්ලගේ