වාසි වගේම අවාසි තීන්දුත් ගන්න වෙනවා

කථානායක මහින්ද යාපා අබේවර්ධන

• අකමැත්තෙන් වුණත් පක්ෂග්‍රාහී දේශපාලනයෙන් මිදෙන්න වෙනවා
• චණ්ඩි මන්ත්‍රීලා එදත් හිටියා අදත් ඉන්නවා
• හිටපු කථානායකතුමාගේ සාධනීය දේවල් ඉදිරියටත් ගෙන යනවා
• ප්‍රශ්න ඇතිවෙන මැතිසබයක් මම බලාපොරොත්තු වෙන්නෙ නෑ
• ව්‍යවස්ථාව ගෙන ඒම ආණ්ඩුවේ වගකීමක්
• මන්ත්‍රීවරු හැමෝම තමන්ගේ වගකීම් තේරුම් ගත යුතුයි

 

 

 

 

කථානායකතුමනි, ඔබ පක්ෂ විපක්ෂ හැමෝගෙම ඒකමතික කැමැත්ත මත පත්වුණ කථානායකවරයා. ඔබට ඒ ගැන මොකක්ද හිතෙන්නේ?

ඒ ගැන ඇත්තටම සතුටක් තිබෙනවා. හැමෝම මම ගැන විශ්වාසය තියලා තිබෙනවා. 

ඔබ දැන් ලංකාවේ තුන්වැනි පුරවැසියා. උත්තරීතර පාර්ලිමේන්තුවේ ප්‍රධානියා. ඇත්තද මෙවැනි තනතුරක් ලබාදෙන්න තීරණය කළාට පස්සේ ඔබ එයට අකමැති වුණා කියන්නේ?

සාමාන්‍යයෙන් කථානායක තනතුරේ ඉතිහාසයෙත් එහෙමනේ තියෙන්නේ. ඉතිහාසෙ ඉඳන් ගත්තම කථානායක ධුරයට පත්කරන පුද්ගලයා ඒ තනතුරට කැමැත්තක් නැහැ. එංගලන්ත පාර්ලිමේන්තු ඉතිහාසය තුළ කථානායකවරයා කථානායක පුටුවේ වාඩිකරවලා තියෙන්නෙත් බලෙන් ඇදන් ගිහිල්ලා. අන්න ඒ සම්ප්‍රදාය තමයි දැනුත් ඔය පෙන්වමින් පක්ෂ විපක්ෂ දෙන්නෙක් කතානායකව එක්කරගෙන ගිහිල්ලා කථානායක පුටුවේ වාඩි කරවන්නේ. (සිනාසෙයි) ඒක ඉස්සර කාලේ ඉඳන්ම තිබුණ දෙයක්. 

විශේෂයෙන් ඔබ ජනතා ඡන්දයෙන් පත්වුණු කෙනෙක්. ඒ වගේම හිටපු කැබිනට් අමාත්‍යවරයෙක්. ජනතාවට තමන්ගේ සේවය ලබාදෙන්න බැරිවෙයි කියන අකැමැත්ත නිසාද කථානායක තනතුරට අකමැති වුණේ?

මේක බරපතළ තනතුරක්. අපි මෙතෙක් කල් යෙදිලා හිටියේ පක්ෂග්‍රාහී දේශපාලනයේ. අපිට මේ තනතුරෙන් පස්සේ ඒ පක්ෂග්‍රාහී දේශපාලනයෙන් මිදෙන්න වෙනවා. ඒක ඉතින් අකමැත්තෙන් වුණත් කරන්න වෙනවා. මොකද කාටවත් පක්ෂග්‍රාහී වෙන්න බැහැ මේ තනතුරේ ඉන්නකොට. 

මේ කථානායක ධූරය ඔබගේ දේශපාලන අනාගතය ඇත්තටම ආභරණයක් වේවිද? අවාසියක් වේවිද?

මෙහෙමයි. අපි ක්‍රියාකරන ආකාරය අනුව ජනතාව බලලා ගන්නා තීන්දුව වාසි වෙන්නත් පුළුවන්. අවාසි වෙන්නත් පුළුවන්. මොකද ජනතාව බලාපොරොත්තු වෙන්නේ ජනතාව ඡන්දෙ දීලා පත්කරගත්ත මන්ත්‍රීවරයා ඔවුන්ගේ අවශ්‍යතා ඉටුකරයි කියලා. ඒක ඉටුකර ගන්න පුළුවන් වුණොත් ප්‍රශ්නයක් ඇතිවන්නේ නැහැ. 

ඔබ 1983 තමයි ඉස්සෙල්ලාම පාර්ලිමේන්තුවට තේරීපත් වුණේ. එදා ජේ.ආර්. ජයවර්ධන ආණ්ඩුවෙන් පළාත් පාලන පනත ගෙනාපු වෙලාවේ ඔබ නවක මන්ත්‍රීවරයෙක් හැටියට එයට විරැද්ධවී විශාල ප්‍රශ්න රුසකට මුහුණ දීමට සිදුවුණා. ඒ අතීතය ටිකක් මතක් කළොත්?

නෑ. එදා වුණේ මගේ හිතට විරැද්ධව ඡන්දයක් පාවිච්චි කරන්න සිදුවුණා. මම ඒ වෙලාවේ කිව්වා මට ඒක කරන්න බැහැ කියලා. ඇත්තටම එදා වුණු කාරණය ඕක තමයි. 

ඇත්තද එදා ඔබට තර්ජනවලට ලක්වෙන්නට පවා සිදුවුණා කියන්නේ?

විශාල තර්ජනවලට නෙවෙයි මම තනියෙන් නිසා යම් යම් විරෝධතාවලට ලක්වන්නට සිදුවුණා. ඒවාට ඉතින් මම තනියෙන් මුහුණ දුන්නා. ඒවා ඉතින් දේශපාලන අත්දැකීම් තමයි.

කථානායකතුමනි, සාමාන්‍යයෙන් මිනිස්සුන්ට පසුගිය කාලයේදී පාර්ලිමේන්තුව සම්බන්ධයෙන් එතරම් සුභවාදී දැක්මක් තිබුණේ නැහැ. බොහෝ දෙනා චෝදනා කළා අපිට 225ම එපා කියලා. 225ම දියවන්නාවේ ගිල්වන්න ඕනෑය කිව්වා. ඒකට හේතුව වුණේ පාර්ලිමේන්තුවේ විනය සම්බන්ධයෙන් ඇතිවුණ අවුලක්. ඔබ ජ්‍යෙෂ්ඨයෙක් හැටියට ඔය පාර්ලිමේන්තු විනය ගැන ඔබ මොකද හිතන්නේ?

මෙහෙමයි, ඒක ඉතින් එක එක මන්ත්‍රීවරයාගේ පෞද්ගලිකත්වය. සමහර අය ඉන්නවා කොච්චර ප්‍රශ්න ඇතිවුණත් නොසන්සුන් විදිහට පාර්ලිමේන්තුවේ හැසිරෙන්නේ නැහැ. හැබැයි තරුණ මන්ත්‍රීවරු තමන්ගේ තරුණකමත් එක්ක ටිකක් නොසන්සුන්තාවයෙන් හැසිරෙන්න පුළුවන්. ඒක එදත් වුණා. අදත් වෙන්න පුළුවන්. ඒ නිසා ඒ ගැන එවලෙට කරුණු හොයලා බලලා අවශ්‍ය පියවර ගන්නවා හැරෙන්නට ඊට හේතු සොයලා ඒ වෙනුවෙන් විවිධ ක්‍රමවේද යොදාගෙන යම් යම් නිගමනවලට එන්න පුළුවන් කියලා මම හිතන්නේ නැහැ.

ඔබ දේශපාලනය ආරම්භ කළ දිනයේ සිට වර්තමානයේ කථානායකවරයා දක්වා ආපු ගමන් මාර්ගය තුළ පාර්ලිමේන්තුවේ විනය පිරිහිලා කියලා කියන එක පිළිගන්නවාද?

යම් යම් කාරණා නම් වෙලා තියෙනවා. දේශපාලන කාරණා සහ සංස්කෘතික හේතූන් නිසා අපි යම් ආකාරයකට නොසන්සුන් වුණු අවස්ථා තිබෙනවා. සමස්තයක් හැටියට අපේ කාලයේ අපි විනයානුකූලව වැඩ කළා. වර්තමානයේදී යම් නුසුදුසු දේවල් සිද්ධ වුණා කියලත් පිළිගන්න වෙනවා. 

දැන් ඔබ වර්තමානයේ කථානායකවරයා. යම් ආකාරයක පාර්ලිමේන්තුවේදී අර්බුදකාරී ප්‍රශ්නයක් ඇතිවුණොත් ඔබ ගන්න පියවර කුමක්ද?

මම නම් එහෙම බලාපොරොත්තුවක් නැහැ. මම හැම මන්ත්‍රීවරයාටම කියන්නේ එකමුතුවෙන් සහයෝගයෙන් සංවාදශීලීව කටයුතු කරන්න කියලා. විශේෂයෙන් විනය ගැන. මම හිතනවා මන්ත්‍රීවරැ දැනුම්වත්වෙලා තියෙයි. මොකද ජනතාව බලා ඉන්නේ මන්ත්‍රීවරු දෙස.

කථානායකවරුන්ගේ ඉතිහාසය දෙස දැක්කහම බොහෝ ජ්‍යෙෂ්ඨයන් කියනවා ඉස්සර කථානායකවරැ ස්වාධීනයි. වර්තමානයේ පක්ෂග්‍රාහියි වගේ කතා. ඔබට මොකක්ද ඒ ගැන කියන්න තියෙන්නේ?

මෙහෙමයි. එවැනි පක්ෂග්‍රාහී ලෙස වැඩකරපු කථානායකවරුන්ට ඒ ඒ අභියෝගවලට මුහුණ දෙන්නත් සිදුවුණා. ඇතැම් අවස්ථාවලදී මන්ත්‍රීවරැන්ගෙන් පවා විරෝධතා ආවා. හැබැයි කථානායකවරයාගේ තනතුරේ ස්වාධීනත්වය ගැන අවබෝධයක් තිබුණොත් කාගෙන්වත් එවැනි ප්‍රතිචාරයන්ට ලක්වන්නේ නැහැ.

ඔබේ කාලයේදී අනුව එහෙම පක්ෂග්‍රාහී නැතිව ස්වාධීනව වැඩකරපු කථානායකවරු කවුද?

මගේ කාලය අනුව...... හැමෝම වගේ ස්වාධීනව වැඩ කළා. යම් යම් සිද්ධීන්වලදී හැරෙන්නට සමස්තයක් ලෙස හැමෝම ස්වාධීනව කටයුතු කළා. 

ආණ්ඩුවට 2/3 බලයක් තිබෙනවා මේ වෙනකොට. විපක්ෂයේ කණ්ඩායමත් තරමක් ඉන්නවා. යම් ගැටලුවක් ඇතිවුණොත් ඔබේ හඬට කීකරැ වෙලා පිරිස පාලනය කරගන්න පුළුවන් වේවිද? මොකද ආණ්ඩුවෙන් තමයි වැඩිම පීඩනය එල්ල වෙන්නේ කථානායකවරයාට?

අනිවාර්යයෙන්ම මම හිතනවා මට කිසිම ප්‍රශ්නයක් නැතිව වැඩකටයුතු කරගෙන යන්න සියලුදෙනාම සහයෝගය දක්වාවි කියලා. 

පසුගිය කාලයේ මන්ත්‍රීවරුන්ගේ ක්‍රියා කලාපය පාලනය කරන්න ස්ථාවර නියෝග කිහිපයක් පාර්ලිමේන්තුවට ගෙන ආවා. ඔබ ඒ ස්ථාවර නියෝග ක්‍රියාත්මක කරනවාද?

ඔව්. විනය සම්බන්ධව යම් තීන්දු තීරණ ගැනීමේදී ඒවා ක්‍රියාත්මක කරන්න කිසිම බාධාවක් නැහැ.

විශේෂයෙන් පාර්ලිමේන්තු මන්ත්‍රීවරැන්ට තිබෙන චෝදනාවක් තමයි වෙලාවට පාර්ලිමේන්තුවට එන්නේ නැහැ. නැත්නම් පාර්ලිමේන්තුවට එන්නේම නැහැ. ප්‍රශ්නවලට උත්තරයක් දෙන්න කෙනෙක් නැහැ. කමිටුවලට පිරිස නැහැ. වගේ දේවල්. ඔබ දකින්නේ කොහොමද මේවාට ගතයුතු ක්‍රියාමාර්ග ගැන?

මම හිතනවා එහෙම නොවෙයි කියලා මගේ කාලයේදී. ඒක අවබෝධය පිළිබඳ ප්‍රශ්නයක්. මොකද එක එක මන්ත්‍රීවරයාගේ අවබෝධය වෙනස්. තමන්ගේ වගකීම හරිහැටි තේරැම් අරගෙන පාර්ලිමේන්තුවේ කටයුතු කරන්න අදාළ මන්ත්‍රීවරැ අපි මෙහෙයවනවා. මගේ අත්දැකීම් අනුව ඔවුන්ට ලබාදෙන්න පුළුවන් හැම උපදෙසක්ම ලබාදෙනවා.

පසුගිය කාලයේ හිටපු කථානායක කරු ජයසූරිය මහත්මයා මන්ත්‍රීවරුන්ගේ දැනුම වර්ධනය කරන්න ඉංග්‍රීසි පන්ති වගේ දේවල් පටන්ගත්ත. ඔබ එවැනි දේවල් නැවත ක්‍රියාත්මක කරනවාද?

පැහැදිලිවම අපි ඒ දේවල් කරගෙන යනවා. එතුමා විසින් ක්‍රියාත්මක කරගෙන ගිය සාධනීය වැඩපිළිවෙළවල් හැමදේම මම ක්‍රියාත්මක කරනවා. 

තරුණ මන්ත්‍රීවරු පාර්ලිමේන්තුවේ පුස්තකාලය සමග කරන ගනුදෙනුව ඉතාම පහළ මට්ටමක තමයි තිබෙන්නේ යන චෝදනාව එල්ලවෙනවා. ඔබ ඒ අයව නිසි මාර්ගයේ යොදවනවාද?

අපි ඒ වෙනුවෙන් තරැණ මන්ත්‍රීවරැ මේ වෙනකොටත් දැනුවත් කිරීම් කරලා තියෙන්නේ. පාර්ලිමේන්තු සභාවාරය ආරම්භ කිරීමට පෙර සිටම අපි අදාළ පුහුණුවීම් පාර්ලිමේන්තුව හරහා ලබාදෙනවා. එතැනදී අපි ඒ මන්ත්‍රීවරැන්ට අවශ්‍ය අවබෝධය රටේ තිබෙන නීතිය සම්බන්ධව කියාදීමක් අපි සිදුකරනවා. 

20 වැනි ව්‍යවස්ථා සංශෝධනය සහ ඒ වගේම අලුත් ව්‍යවස්ථාවක් ගෙන ඒමේදී කථානායකවරයාගේ භූමිකාව විශාල ලෙස බලපානවා. ඔබ ඒ සඳහා කොහොමද ක්‍රියාත්මක වෙන්නේ?

මට තියෙන්නේ ඒ ව්‍යවස්ථාවට අදාළ නීතිමය කරුණු සම්බන්ධයෙන් සොයාබැලීමක් කරලා යම් අඩුපාඩු තිබෙනවා නම් ඒවා නිවැරුදි කරන්න. හැබැයි ව්‍යවස්ථාව ගෙන ඒම ආණ්ඩුව සතු වගකීමක්. 

විශේෂයෙන් එතැන තිබෙනවා ප්‍රශ්නයක්, මේ පක්ෂනායකවරු යම් තීන්දු තීරණ ගැනීමේදී ඒ සඳහා සහභාගි වෙන්නේ නැහැ කියලා. ඔබ ඒ සඳහා යම් ක්‍රියාමාර්ගයක් ගන්න බලාපොරොත්තු වෙනවාද?

ඒ අවස්ථාවේදී අපි සාකච්ඡා කරලා අදාළ පක්ෂවල නායකයන්ටත් මන්ත්‍රීවරැන්ටත් පෞද්ගලිකව දැනුම්වත් කිරීම් කරනවා. විශේෂයෙන් මම හිතනවා හැමෝම තමන්ගේ වගකීම තේරැම් අරගෙන කටයුතු කරයි කියලා. 

ඔබට ලැබෙනවා විශාල වරප්‍රසාද රුසක්. යාන වාහන, නිල නිවාස, ආදී දේවල්. ඔබ කථානායකවරයා හැටියට ඒවා භාවිතයට ගන්නවාද?

නිල වශයෙන් ලබාදීලා තිබෙන දේවල් නිල රාජකාරි සඳහා විතරයි මම පාවිච්චි කරන්නේ. පෞද්ගලික පරිහරණයක් නැහැ. 

භාෂා භාවිතය සම්බන්ධව පාර්ලිමේන්තුව ඇතුළේ විශාල කතාබහක් තිබෙනවා. සමහර වචන හැන්සාඩ් කරන්න බැරිතරම් ප්‍රශ්න සහගතයි. ඒ ගැන යම් පියවරක් ගන්නවාද?

(සිනාසෙයි) ඒකට ඉතින් කරන්න තියෙන්නෙ නම් පාර්ලිමේන්තුවේ විනය ආරක්ෂා කරගෙන කටයුතු කිරීම. විශේෂයෙන් භාෂාව කියන දේ පාර්ලිමේන්තුවේ මන්ත්‍රීවරයකුගේ වගකීමක්. 

පසුගිය කාලයේ පාර්ලිමේන්තු සැසිවාරය සජීවීව ජනතාවට බලන්න දුන්නා. ඔබත් ඒ අවස්ථාව සලසලා දෙනවාද?

ඔව්. එහි යම්කිසි කොටසක් සජීවීව විකාශනය කරන්න අපේ බලාපොරොත්තුවක් තිබෙනවා. ඒක ඉදිරියේදී තීරණය කරන්න ඕන. 

අවසාන වශයෙන් ඔබට කියන්න තිබෙන්නේ මොකක්ද අලුතෙන් එන පාර්ලිමේන්තු මන්ත්‍රීවරැන්ට සහ පරණ මන්ත්‍රීවරුන්ට?

මට කියන්න තියෙන්නේ හැමෝම තමන්ගේ වගකීම් තේරැම් අරගෙන නිවැරුදිව ක්‍රියාකරන්න කියලා. විශේෂයෙන් පාර්ලිමේන්තු මන්ත්‍රීවරයෙක් හැටියට ලැබෙන වරප්‍රසාද වලින් නිසි ප්‍රයෝජන ගන්න කියලා. 

ඕනෑම මන්ත්‍රීවරයකුට ඔබව හමුවෙලා සාකච්ඡා කරන්න, ප්‍රශ්නයක් ඉදිරිපත් කරන්න පුළුවන්ද?

අනිවාර්යයෙන්ම පුළුවන්. ඕනෑම කෙනෙකුට.

 ගයාන් ගාල්ලගේ